मुकदी गल्ल मुकदी नीं, अग्गें बधदी

सुरेश भारद्वाज निराश होरां दा कविता संग्रह मुकदी गल्ल इसी साल छपेया है। भूमिका दे तौर पर निराश होरां हिमाचली पहाड़ी भाषा दे बारे च अपणी चिंता प्रकट कीतिओ है। राजीव त्रिगर्ती होरां निराश जी दियां कवतां पर अपणे विचार रखणे ते पैह्लें भाषा दे नाएं दे बारे च अपणा मत रखेया है। असां इसा भाषा दा सफर तदूं ते दिक्खेया  है जदूं इसा जो पहाड़ी गलांदे थे। लोक सूबे दी अपणी भाषा बणाणे दे खाब दिखदे थे। इक ता अजादिया ते बाद असां दे प्रांत ज्यादातर भाषा आधार पर बणे। दूआ केंद्र च भी अंगरेजी हटाई नै हिंदी ल्यौणे दी योजना थी। हिमाचली भी सोचदे थे असां भी पहाड़ी अपणी भाषा बणाई चलाई लैणी। पर जिञा असां दियां नदियां दा पाणी सुकी गया तिञा ई भाषा दा सपना भी टुटी गया। एह् सुपना दुबारा दिखणे दी कोशिश कीती ता हिमाचली पहाड़ी नां चलेया। पर सिरें नीं चढ़ेया। हाली भी कोससां होआ दियां।  हुण इक नौंई सोच आई है भई सूबे दी इक भाषा नीं है, मतियां हन। हुण दिखदे हन एह सोच कितणी कारगर हुंदी है। लेखक भाषाविद् क्या सोचदे, जनता क्या बोलदी कनै राजनेता क्या करदे। एह बैह्स लम्मी चलणे आळी है। फिलहाल अपणिया भाषा च लिखदे रेह्या, नां जे मर्जी दिंदे रेह्या। इसी नजरिए नै एह्थू पढ़ा - सुरेश भारद्वाज निराश दी कविता दे बारे च राजीव त्रिगर्ती दे विचार कनै इसा कताबा चा ते निराश होरां दियां दो कवितां।  

    

‘मुकदी गल्ल’ कवि सुरेश भारद्वाज निराश दी चैथी किताब है। एह् तिह्ना दी पहाड़ी भाषा बिच दूज्जी किताब है। इसा किताबा बिच कविये दियाँ छोटियाँ-बड्डियाँ कठेरी करी कुल 60 कविताँ हन्, जेह्ड़ियाँ लाह्देयाँ-लाह्देयाँ विषयाँ जो अप्पू बिच समाहित करने बिच पूरियाँ समर्थ हन्। कवि अपणिया गल्ला गलान्दा-गलान्दा एह् भी मनदा जे अपणिया भाषा बिच लिखणे दा अपणा लाह्दा ही मजा है। कवि इसा गल्ला जो मनदा जे असाँ दी हिमाचली पहाड़ी बड़ी मिट्ठी कने समृद्ध भाषा है। कवि मनदा जे अपणिया भाषा बिच सुखे ने लखोई जान्दा। कविये जो अपणिया भाषा बिच लिखणा खरा लगदा। खरा लगणा कने सुखे ने लखोणा, कविए दियाँ इ्ह्ना गल्लाँ दी गवाही कविये दियाँ कविताँ अप्पू ही देई दिन्दियाँ।

सुरेश भारद्वाज निराश 
पहाड़ी कविता संग्रह: इक अम्मां थी, समर्पित इश्क ,
मुकदी गल्ल। हिंदी गजल संग्रह: मेेेरा इश्क 
इवादत खुदा की   

कवि अपणियाँ कविताँ काँगड़िया बिच लिखदा पर तिसा भाषा जो हिमाचली पहाड़ी नाँ दिन्दा। किताबा बिच प्रयुक्त काँगड़ी भाषा बिच पंजाबी कने पश्चिमी पहाड़ी दा सिद्धा प्रभाव है। अज्ज काँगड़िया जो पश्चिमी पहाड़ी दे नेड़ें ही मन्नेया जान्दा, हालाँकि ग्रियर्सन होराँ इसा जो पंजाबिया दे डोगरी रूपे दे नेड़े दस्सेया था। काँगड़ी शब्दे दे पुराणे प्रयोगे जो दिखदेयाँ एह् इक्क सर्वमान्य कने पुराणे अस्तित्वे वाळी भाषा है।

कुल मिलाई करी हिमाचली पहाड़ी नाँ देणे पर कविये दी कोई गलती नीं दुस्सा दी। एत्थू इक्क अणशोध सोच हिमाचले दियाँ भाषां दे अस्तित्वे उप्पर खतरा बणियो। कुछ लोकां दा विचार है कि जिसा भाषा बिच मता साहित्य होणा कने मतेयां  लोकां गलाणी सैह् हिमाचली होणी। अज्ज दुनिया दियां मतियां भाषां मरी गइयां कने मतियां दा अस्तित्व खतरे बिच है। असां मतियां भाषां बचाणे दा पुण्य करिये तां हिमाचले बिच ही भाषां दा गुलदस्ता बणाई सकदे। हिमाचले बिच हिमाचली भाषा नीं, हिमाचली भाषाँ हन्। हिमाचले दियाँ सारियाँ भाषाँ जो सरोह्णे कने सरोह्यियाँ जो मठोणे दा मौका मिलणा ही चाहिदा। दरअसल कविये दियाँ कविताँ काँगड़िया बिच हन्, कने काँगड़िया दिया कुसी भी किताबा दे ओणे पर काँगड़ी बोलणे बाळेयाँ जो गर्व होणा चाहिदा। काँगड़िया दियाँ इह्ना खरियाँ कविता दा रज्जी स्वागत होणा चाहिदा। उइयाँ इस स्वागते ताएँ कविताँ अप्पू ही अपणी गवाही दिन्दियाँ दुसदियाँ।कवि समाजे देयाँ सारेयाँ पक्षां जो अपणियाँ कविताँ बिच रखदा। सैह् सारियाँ कविताँ बिच रीति-रिवाज, रैह्ण-सैह्ण, खाण-पीण, देश-प्रेम, सामाजिक व्यवहार कने जिन्दगिया दियाँ मतियाँ सारियाँ गल्लाँ जो जेह्ड़ियाँ असाँ सामणे औन्दियाँ तिह्ना जो हू-ब-हू कागजे पर तुआरी करी अपणेयाँ सारेयाँ पाठकाँ साह्मणे रखणे दी कोशिश करदा ही दुसदा है।

कवि अपणिया कविता ‘राती दा मरया’ बिच गलान्दा जे अज्जकल असाँ दे समाजे बिच ताकतवर लोक गरीबाँ देयाँ हकाँ जो मारा दे। जेह्ड़ा असाँदे समाजे जो बंडणे दा इक्क कारगर तरीका है। कवि आश्वस्त है जे बेल्ला इक्को देया सदा ही नी रैह्न्दा। टैम सारेयाँ दा ही ओंदा। सैह् पियोहेयाँ-दरड़ोहेयाँ अन्दर उम्मीदा दी जोत बाळदा -

बड्डियाँ जोकाँ है खून लेया चूसी

गरीबाँ दा हक्क कितणा करी मरोणा

सूरज ता सबदा है चढ़दा निराश

मत सोच्चें इन्नी कदी नी घरोणा।

अज्ज असाँ दे समाजे बिच होड़ लगियो। जेह्ड़ा भी कमा दे तिस दा मता हिस्सा बड्डेया-बड्डेयाँ घराँ जो बणाणे पर मुकाई देया दे। समाजे दा दस्तूर अजकल देह्या है जे बच्चे तिह्ना उच्चियाँ हवेलियाँ जो छड्डी करी अपणे भविष्य बणाणे दा वास्ता देई दुज्जेयाँ शहराँ बिच बस्सी जा दे या तां विदेशां बिच बस्सी करी अपणे देशे जो कने तिस घरे जो भुली जा दे। इक्क टैम ओआ दा तां तित्थू कुत्तेयाँ-बिल्लेयाँ दा बास्सा होई जा दा-

बड्डे-बड्डे महल खरेड़े

एत्थू कुत्तेयाँ बिल्याँ सूणा।

इसा ‘टूह्णमटूणा’ कविता बिच ही कवि मजदूराँ दिया स्थितिया, राजनीतिया बिच व्यापक भ्रष्टाचारे जो सोग्गी ही प्रस्तुत करदा। सैह् बड़ा सहज होई करी राजनीति करने वाळेयाँ कने समाजे बिच अपणा स्वार्थ सिद्ध करने वाळेयाँ लोकाँ पर टोंट कसदा गलान्दा-

अज्जे तिक तूँ लोक ही दूह्ते

पता नी अप्पूँ कदी परसूणा।।

‘इक्क अम्मा थी’ इस नाएँ कन्ने कविये दी पैह्ली काँगड़ी कविता दी किताब छपी थी। इसा किताबा जो पढ़देयाँ इसा किताबा बिच भी इक्क कविता ‘अम्मा’ नाएँ कन्ने मिलदी है। एह् कविता भी इक्क अम्मा थी इसा कविता जो ही बधाऽ दी। उइयाँ एह् छोटी है पर भावाँ कन्ने टुंडमुंडियाँ भरोइयो अपणी पडछैण बणाणे बिच कुसी रचना ते घट्ट नीं है-

खुआन्दी थी कदी कमाई करी टब्बरे जो,

तिन्ना पुतराँ च अज्ज अम्मा बंडोई गई।

‘यादाँ दे झरोखे ते’ कविता भी ‘इक्क अम्मा थी’ कविता दा ही ताजा हिस्सा बझोन्दी। एह् इक्क लम्मी कविता है। अम्मा दी जीवनचर्या कने चरित्र इसा कविता बिच बड़ा ही सटीक बझोन्दा है-

टब्बरे दी तकदीर थी अम्मा

ईश्वर दी तस्वीर थी अम्मा

बापुए दी तदबीर थी अम्मा

अपणे ताईं फकीर थी अम्मा।

कवि लोहड़ी गीते दे नाएँ तित्थ-त्योहाराँ जो बड़ा डुग्गा याद करदा। लोहड़िया दे चितराँ बिच इक्क चित्तर दिखणे जोग्गा है-

रीत-रूआजाँ मत भुलायाँ

सणे घरैतां लोहड़ी मनायाँ

बैही ने किट्ठे खा खिचड़ी.....!

इसा किताबा बिच कवियें इक्क कविता लिखियो ‘पर्यावरण..इक्क जरूरत’। इसा कविता बिच सैह् पर्यावरणे दिया समस्या जो लई करी डूग्घा चिन्ददा। पर्यावरणे पर चिन्दणा अजकणे जमाने दा सारेयाँ ते जरूरी चिन्दण है। पर्यावरण उप्पर खतरा असाँदिया पूरिया सभ्यता उप्पर खतरा है। इस खतरे दा कारण भी असाँ ही हन्, कैंह् जे सारा कितेया कराया असाँ दा ही है। पर्यावरण रक्षा दा सन्देश कवि इस तरीके ने दिन्दा -

पेड़ लगांह्गे बर्खा होणी

नीं तां साह्ड़ी फसल मरोणी 

दाणा फक्का किछ नी मिलणा  

भुक्खेयाँ किह्ञा निन्दर ओणी

किह्ञा निन्दर ओणी

पेड़ लगा सारे भाऊ, पेड़ लगा........।। 

‘जीणे दी क्या गल्ल करिये’ कविता बिच अजकणे सामाजिक परिवेश जो ढाळदा कवि अपणेयाँ शब्दाँ बिच बड़े ही सरस रूपे बिच साह्मणे ओन्दा। कवि जीवने जो लई करी मता आश्वस्त नीं दुस्सा दा। तिस्सेयो सारे माहौले बिच इक्क बदलाव बझोआ

दा-

मुश्किल हन हालात जीणे दी क्या गल्ल करिये

मिल्ला दे आघात जीणे दी क्या गल्ल करिये।

‘कोई आसरा मिलदा’ कविता बिच भी कवि बदलोयाँ हालाताँ कने बदलोयो पर्यावरणे दी ही गल्ल करदा। ‘बिट्टी जम्मी बधाई लैह्’ कविता कविये दे इस संग्रहे दी इक्क मती याद रक्खी जाणे वाळी कविता है। कवि प्रगतिवादी विचाराँ ने भरोया है। बिट्टिया दे जमणे दिया खुशिया जो कवि जिस नोएँ रूपे बिच प्रस्तुत करदा सैह् अनुकरणीय है। जातके बिट्टिया दे अन्तरे जो हटाणे ताएँ जेह्ड़ी पैह्ल ज़रूरी है तिसा जो साह्मणे अणदी एह् पूरिया दी पूरी कविता ही जरूरी है। फिरी भी इह्ना दूँह् पाह्ळियाँ बिच दिक्खा-

पूजा-पाठ कराई लैह्

नूहाँ ते कुळज पुजाई लैह्।

कित्तियो असाँ खरी कमाई

स्हाड़ें घरें जे बिट्टी आई।

मतियाँ कविताँ बिच कवि समझौतावादी होन्दा चला जान्दा। सैह् अपणे मुखर होन्दे विद्रोही स्वभावे जो देरे तिकर नीं ढोन्दा। एह् देह्याँ तेवराँ वाळियाँ कविताँ बिच सैह् इक्क कविता ‘समझौता’ नाएँ ने भी लिखदा-

जे मिल्ले सैह् खाणा पौंदा,

ईह्याँ ही दिल पतियाणा पौंदा।

कविये  दे दिले बिच ‘बड़े गहरे भाव दिलाँ दे’ जोज्झेयाँ खान्दे। प्यारे दा मल्हम सारेयाँ जख्मा भरी दिंदा। ऐह् प्यार इसा धरतिया कन्ने हैं कने सैह् कुथी ग्राएँ कुथी खड्डाँ-नाळुआँ दे रूपे बिच साह्मणे ओन्दा।

राजीव कुमार त्रिगर्ती 
कवि और भाषाविद् 
हिंदी कविता संग्रह: गूलर का फूल (2008)
ज़मीन पर होने की खुशी (2020)
प्रेम में होना (2024)
पहाड़ी  कविता संग्रह छपणे आळा है। 

छंदे दे नाएँ पर कवियाँ दे बिच इक्क तुकबंदी दी परम्परा भी प्रचलित है। कवि अपणियाँ मतियाँ सारियाँ रचनाँ बिच तिसा परम्परा दा अनुसरण करदा ही सामणे ओन्दा। अनुप्रास परम्परा दा निर्वाह जरूर इसा तुकन्दिया दे माध्यमे ने होन्दा कने कविताँ बिच लय बणाई रखदा। वर्तनी जो लई करी हाल्ली काँगड़िया बिच मतियाँ कमियाँ हन्। कवि भी तिह्ना ते अछूता नी रेह्यी सकदा था। कुसी पराणिया साहित्यिक भाषा दिया वर्तनिया बिच भी कुसी दा मुकक्कल होणा आसान नीं हैं फिरी साहित्यिक रूपे ने कांगड़ी तां हाल्ली अपणे अंगणे बिच घंघाळू ही देआ दी है। होळें-होळें काँगड़िया दिया वर्तनिया दा इक्क पक्का, सर्वमान्य कने टिकाऊ रूप साह्मणे ओणा है। कविये दा एह् लिक्खेया भी तिस रस्ते बिच इक्क टप्पा बणना है।

मुकदिया गल्ला उप्पर मुकदी गल्ल एह् है जे एह् किताब कविये दे व्यापक दृष्टिकोणे जो प्रस्तुत करदी। कविताँ पढ़ी करी सारा कुछ अपणे नेड़े-तेड़े लगदा। नोटबंदी, जीएसटी पर भी कवि अपणे विचार रखदा, पर इहना कविताँ बिच सिर्फ इक तरफा गल्ल है कने इह्ना नीतियाँ दा इक तरफा समर्थन ही है। मुकदेयाँ संस्काराँ कने समाजे दे ढैन्दे रूपे ते भी कवि बड़ा दुखी है। मंहगाई कने होर अजकणे मुद्दे भी कविये दियाँ नजराँ ते अछूते नीं हन्।

‘इक्क अम्मा थी’ एह् कविये दी पैह्ली काँगड़ी कविता दी किताब थी। पैह्ली किताब होणे पर भी तिसा किताबा दा प्रभाव सारे जनमानस उप्पर पेआ था। कविये दिया प्रतिभा जो दिखदेयाँ तिस तरीके दियाँ रचना दी उम्मीद सारेयाँ पाठकाँ जो कविये ते जरूर रैह्यी कने रैह्णी। तिह्ञा ही इसा किताबा बिच भी कविये दिया उच्चिया सोच्चा दे ढक्के ते चूंडिया तिकर दर्शन होन्दे। कविये बाह्ली नोआँ रचणे दी ताकत भरोइयो। उम्मीद है इसा ताकता दे दर्शन सताबी ही अगलिया किताबा बिच होणे हन् कने भाषा दे साहित्ये वाळे बाग्गे बिच नोंआँ फुल्ल खिड़ना है।  

सुरेश भारद्वाज निराश दियां दो कवतां 

अम्मां

अम्मां अज्ज सतराँ बरयाँ दी होई गेई

उआने ते उट्ठी ओबरिया जाई सोई गेई

 

खुआंदी थी कदि कमाई करी टव्वरे जो

तिन्ना पुत्रां च अज्ज अम्मां बंडोई गेई

 

चाऽ करी करी तिन्ना पालेया था टव्वर

टब्बरे जो अज्ज सैह फालतु होई गेई

 

बणाई बणाई खिंदाँ भरियाँ थियाँ बिलगां

अज्ज इक्की खंदोलुएं अप्पूं लपटोई गेई

 

अम्मां सौए ओबरिया पौहें सौए उआने

टब्बरे देयाँ तान्याँ अज सैह डंगोई गेई

 

रली मिली किह्याँ करनी ऐं तंग अम्मां

लाड़ी बी मिंजो कनै थी सखलोई गेई

 

जिन्हीं राज कित्ता कदि बीह्याँ माह्णुआ

दिक्खी दूरी तिन्हाँ दी अप्पू सँगोई गेई

 

जदूँ चलदियाँ थियाँ जंघाँ था जोर जीह्वा

नी सरीर हुण चलदा जीब भी चुपोई गेई

 

ठगदी थी टब्बरे जो गुड़े दे इक्क ढेलुऐ नै

ब्रते रै बहाने अज्ज सैह अप्पूं ठगोई गेई

 

दिक्खी दुख बच्चयाँ दा बहांदी थी अथरु

लकोई दुख अपणा मुँह ढक्की रोई गेई

 

उम्र सारी कित्ता अम्मां सबनीं दा भला

सच मेरी अम्मां अज्ज सबनां ते लुटोई गेई

 

सुआंदी थी सुक्कैं थी अप्पूं सौंदी गिल्लैं

अथरुआं नै अम्मां अप्पूं गिल्ली होई गेई

 

इतणे भारी पिट्टे तू अम्मां कजो स्यापे

छुटी गेई जलबाँ अज्ज हाख बी मटोई गेई

 

क्या गेई अम्मां निमौड़ा मैं बी होई गिया

रेही गिया किह्ला किस्मत बी बदलोई गेई

 

गलांदी थी मिंजो छोरु बणी जा माह्णु

मिंजो तिसारी अज्ज गल्ल समझोई गेई

 

सुणी नी सकदा कदि बुराई मैं अम्मां दी

गलाया कुन्नी ज़रा क सैः कालजें छोई गेई

 

बड़े कलेस दित्ते थे तिसा जो मैं मित्रा

भार अपणे दुखांरा सैह किल्ली इ ढोई गेई

 

'निराश' मेरियाँ नीताँ नी मिंजो माफ करना

अम्मां दी सुणी नी लाड़िया दी सुणोई गेई

 

भुल्ली गै

 

कैंह मान रखणा भुल्ली गै

कैंह ध्यान रखणा भुल्ली गै

 

घड़ोलू मटणा भुल्ली गै

सूतर कतणा भुल्ली गै

 

नाम जपणा भुल्ली गै

किस्ती-पतणा भुल्ली गै

 

खंड जोड़े आद नी रेहे

गोआ सटणा भुल्ली गै

 

बड्यां दी बडियाई भुल्ली

पैरां च नपणा भुल्ली गै

 

लोकां दी बुराई हरदम

कर्म अपणा भुल्ली गै

 

हीटरां देही मत मारी

अग तपणा भुल्ली गै

 

मीट शीट कुत्तेयां जो

ग्राह रखणा भुल्ली गै

 

बर्फिया दा डब्बा लीता

प्रौणा सखणा भुल्ली गै

 

तीणी उपर रसो बणाई

अपूं चखणा भुल्ली गै

 

चमचागिरि बथेरी कित्ती

पैरां चट्टणा भुल्ली गै

 

जाणी ले भेत बगाने

अपणे दसणा भुल्ली गै

 

नज़र तिन्हाँ दी मेरी यारी

अपणी मखणां भुल्ली गै

 

संबला था मै ही बणाया

भांडे घसणा भुल्ली गै

 

सबना खूब मिसरे जोड़े

काफिया रखणा भुल्ली गै

 

मार पेई इतणी स्कूलें

बच्चू नसणा भुल्ली गै

 

रत्ती भर नीं बेह्ल लोकां

ज़रा क हसणा भुल्ली गै

 

चुकया जाह्लु अम्मां चिमटा

गंड्डू लहस्णा भल्ली गै

 

भगौत पुराण दैण मापे

सौरेयाँ बसणा भुल्ली गै

 

डीजें कित्ता बेड़ा गर्क

अपणा नचणा भुल्ली गै

 

जदूँ दा आया बैड बाक्स

दौणी कसणा भुल्ली गै

 

सारें पासें धूम तुसाँ दी

स्हांजो जचणा भुल्ली गै

 

भत भटूरु सारे खांदे

स्हांजो पचणा भुल्ली गै

 

सुणेया चुड़ेलां लोक बेठे

स्हांजो सचणा भुल्ली गै

 

बदनै सारे मसाज करिगे

सिरे झसणा भुल्ली गै

 

सारी दुनियाँ डंग्गीत्ती

अप्पूं जो डसणा भुल्ली गै।

 

कन्न भरना सिखी लै

रस्णा बसणा भुल्ली गै

 

लोकां जो पाईयाँ जफ्फियाँ

मिंजो तकणा भुल्ली गै

पहाड़ी भासा दे बारे चर्चा – अज के हलात कनै गांह् दी चिंता

अंतर्राष्‍ट्रीय मात्रृभाषा दिन

पहाड़ी भासा दे बारे च चर्चा करने ताईं असां मतेयां लखारियां जो छे सुआल भेजयो थे। जुआब औणा सुरू होई गै  तां असां एह चर्चा गजलकार, लेखक कनै अनुवादक द्विजेंद्र द्विज होरां दे विचारां नै सुरू कीती। तिस पर ठियोग देयां लेखकां भी चर्चा कीती कनै मुंशी शर्मा होरां सुआलां पर अपणे वचार भी रखे। तिसते परंत पवनेंद्र पवन, कथाकार मैडम चंद्ररेखा ढडवाल, राजीव कुमार "त्रिगर्ती", भूपेंद्र भूपी कनै फिरी होरां नवीन शर्मा दे विचार तुसां पढ़े। अज इस चर्चा दी अगली कड़ी कवि सुरेश भारद्वाज निराश होरां पेश करा दे। 

1 तुसां दे स्हावे नै स्हाड़ा लेखन असां दे मुल्के दियां दूईयां भाषां दे मुकाबले च कुथु खड़ोंदा?

सुरेश भारद्वाज निराश: मैं इस दे बारे एह समझदा जे स्हाड़ा लेखन उन्हां होर भाषां दे मुकावले बी पिच्छें नी यैं। इसा भाषा च असां सैह सब किछ लिखी सकदे जेहड़ा भी असां लिखणां चांहदे। लिखणे तांई भाव जरुरी होंदे। भाव होण तां भाषा तां कोई भी होई सकदी फिरी स्हाड़ी हिमाचली भाषा च क्या कमी यै। इहदे बास्ते स्हाड़े च लिखणे दी लगन होणी जरुरी यै कनै अपणियाँ भाषा नै प्यार होणा भी जरूरी है। जे असां बोली सकदे तां लिखी भी सकदे। अपण ए सही यै कि स्हाड़े लिखणे कनै बोलणे च बड़ी भरी घाट ऐ। स्हाड़े बच्चे अपणी माँ बोलिया च गल्ल नीं करदे। स्कूलां च स्हाड़ी माँ बोली कुसी भी स्त्तर तिकर पढा़ई नी जांदी। पढ़या लिख्या तबका भी अपणी बोली नी बोलणा चांहदा, न ही लिखणा चांहदा। लोक चिट्ठी तिक भी अपणी भाषा च नी लिखदे। एह होर भी दुखद ऐ जे असां अपणे घरां विच भी अप्पुं बिचें अपणी भाषा च गलबात नी करदे। जे बोलगे नी लिखगे नी तां अपणिया भाषा दी तरक्की कैस कनै होणी, किह्यां होणी, कुजो बास्तें होणी। इन्हां सारियां गल्लां जो मद्देनजर रखदे होए स्हांजो घरे च, घरे ते बाहर घट ते घट अपणे प्रदेश च कनै प्रदेश ते बाहर भी हिमाचली जाणने आलेयां नै अपणी भाषा च ही गलबात करनी चैहदी। हिमाचली जाणने आलेयां ने लिखित संबाद भी जी तिकर होई सकै अपणी भाषा च ही करना चैहदा। हिमाचली जाणने आल़ेयां नै जे असां अपणियां भाषा च संबाद करगे तां हर्ज भी क्या है? ईह्यां ई तां स्हाड़िया भाषा दा प्रचार प्रसार होणा।

2. तुसां दे स्‍हाबे नै पहाड़ी भासा च इतनी समर्थ्‍या है भई अजकिया जिंदगिया दी अन्‍नोह्-बाह् दौड़ कनै सारे ढक-पळेस लखोई सकदे? कि एह् चील्‍हां दे डाळुआं झुलाणे जोगी ई है? 

सुरेश भारद्वाज निराश: पहली गल्ल तां एह जे स्हाड़िया भाषा दा नां पहाड़ी भाषा नी अपण हिमाचली भाषा यै। कश्मीर ते लेई करी आसाम तिकर सारियां भाषां पहाड़ी भाषां गणोदियां पर तिन्हां सारियां दे अपणे नां हन । जिह्यां भोजपुरी, असमी बगैरा। सै आपणी भाषा जो पहाड़ी भाषा नी बोलदे । सारे देशे च प्रदेशां दे नां मुताबिक भाषां दे नां हन जिह्यां पंजाबी, हरियाणवी, गुजराती, बंगला, उड़िया, मराठी बगैरा। सिर्फ असां अपणियां भाषा जो "हिमाचली" दी बजाये पहाड़ी बोलदे अपण कैंह? स्हाड़ियां अपणियां बोलियाँ चमव्याली, कांगड़ी, मंडियाली़, कुल्लबी बगैरा उस क्षेत्र दे नुसार गलोंदियां पर हिमाचल दिया भाषा जो गलांदे पहाड़ी भाषा। क्या तुसां जो अपणा एह विचार किछ अजीब नीं लगदा? पिछली बारी भी बिधान सभा ते हिआचली भाषा दा प्रस्ताव पारित होई चुकया। भाषा दे नां बारे तां हुण एह मतभेद मुकणा चैहदा कनै पहाड़ी दी बजाये "हिमाचली" भाषा दा इस्तेमाल होणा चैहदा।

जी तिकर हिमाचली भाषा दी समर्थ दी गल्ल यै तुहाड़े सबाले दे जबाब च मैं एह बोलगा जे हिमाचली भाषा च बड़ी समर्थ है कुछ भी लिखणे दी। एह सबाल सही नी यै जे क्या स्हाड़ी भाषा चील्हां दे डाल़ू झुलाणे जोगी यै। चील्हां दे डाल़ू झुलाणा स्हाड़ी संस्कृती यै। जिन्नी कवियें गीतकारें एह लैण लिखी सै हिमाचली भाषा दा मोहतवर पारखी होणे दिया गिणतिया च आऊँदा। तिस कनै एह गीत भी अमर होई गिया। एह सबाल चुक्की करी स्हांजो अपणी भाषा संस्कृति, कनै इस गीत जो लिखणे आल़े मोहतबर कवि, बिद्वान गीतकार दा कद छोटा नी करना चैहदा।

ऐसा कोई बिषे नी जिस पर असां हिमाचली भाषा च नीं लिखी सकदे जां अपणे विचार गलाई नी सकदे । अज स्हाड़े कवि, लेखक हरेक रस च कवितां गीत लेख, प्रसंग, ग़ज़ल संस्मरण लिखा दे। छंदबद्ध भी कनै अज्जे दी कबिता ( आधुनिक कबता) भी खूब लखोआ दी, कतावां भी छपा दियां। स्हाड़े अंदर लिखणे दी तड़प होणी जरुरी है। इसा भाषा च शव्दां दी भी कोई घाट नी ऐं। दूईयां भाषा दे शव्दां जो भी हिमाचली भाषा अपणे अंदर समाई लेंदी कनै भाषा दे अनुरुप शव्द जो अपणा रुप देई सकदी। एह स्हांजो चाहिदा जे असां इस करी के न रुकिये जे शव्द नी ऐं। दूईयां भाषा दे शव्द लेई करी तिन्हां जो अपणी भाषा च बदली करी असां गांह बधी सकदे। मैं एह भी मसूस कित्ता जे कई गल्लां जेह्ड़ियां हर कुसी भाषा च लिखणा आसान नीं लगदियां सैह हिमाचली भाषा च खूवसूरतिया नै लखोई जान्दियां।

असां दियां हिमाचली पहाड़ी वोलीयां दे हालात भी

किछ ठीक नीं हन। दैनिक जागरण दे संपादक 

नवनीत शर्मा होरां नौजवांना बिच सर्वे कराई

ने पहाड़ी भासा ताईं इस ध्‍याढ़े जो नूठे तरीके

ने मनाया। इस सर्वे ते पता लगया भई असां जो

अपणी मां बोली वोलणे च शरमा ओंदी। असां दियां 

गलवातां ते मां बोलीयां गैव होंदियां जा दियां। 

असां पहाड़ीया दे बजाए अंग्रेजी मलाई हिंदी बोला दे।

बिच थोड़ी बौत पहाड़ी लफज भी आई जांदे।

दुखे दी गल एह है कि पहाड़ी लखारीयां कनै

तिन्‍हां दियां लीखियां कताबां दी पोंह्च लोकां

तक नीं है। इक खरी गल एह है कि लोकगायक

कनै लोकगीत लोकां दियां जबानी कनै दिलां च हन।

चिंता वाळी गल ता है। असां जो अपणीयां

मातृ भासां जो बचाणे ताईं आंदोलन नीं ता घटा ते घट

अपुं च अपणीयां मां बोलीयां च ता बोलण ही चाही दा।

3. तुसां दे स्‍हाबे नै पहाड़ी लेखन कनै पाठकां दे रिस्‍ते दी कदेई सकल बणदी है ?   इस ताईं होर क्‍या क्‍या करना चाहिदा? 

सुरेश भारद्वाज निराश: पाठकां कनै रिश्ता बणाणे तांई लेखकां कनै पाठकां दा अपणियां भाषा कनै प्यार होणा जरुरी यै। असां पहाड़ी बोलगे नी लिखगे नी तां पाठकां कनै रिश्ता कैह्दे जोरे पर बणना। कुसी होर दी लिखियो कताब जां कोई रचना असां पढ़ना ई नी चाहदे, टैम नी देई सकदे, रुची भी पैदा नी करदे अपणे अंदर, किह्यां बणना पाठकां कनै रिश्ता? लेखक, कबि होणे ते पहलां पाठक बणना जरुरी यै। खास कर हिमाचली भाषा दी कताव जा कोई रचना हिमाचली भाषा दे मोहतवर विद्वानां दी लिखियो भी असां नी पढ़दे। इसते बड्डी तिन्हां बिद्वाना कनै अपणी भाषा नै ना इन्साफी क्या होई सकदी। दूई सच्ची गल्ल एह भी है जेहड़ा कोई किछ लिखा दा सैह अपणे जोरे पर छपबा दा स्हांजो बाह्ल-सहित जो छपाणे दा कोई साधन नीयै जेह्ड़ा होणा बड़ा जरूरी यै। जेह्ड़ा कुसी भी तरीके नै छपदा तिसजो पढ़ने आल़ा कोई नी। छपया सहित बुक सैल्फां च बंद होई करी रेही जांदा। इक गल्ल होर असां च मते इस करी लिखदे जे कुथि सांठ गांठ करी नै मुफ्त छपी जाअ, कताब बिक्री भी होऐ, नां भी होए, रायल्टी भी मिल्लै। अपण सारेयां दी पहुँच इतणी तां नी यै न । बड़े घट लेखक, कवि हन जेहड़े पल्लों पैसे लाई करी कताबां छपबा दे कनै मुफ्त बंड्डा दे तां जे लोक पढ़न कनै समाज च अपणी भाषा, अपणे सहित कनै संस्कृति बारे जागृति बणें। पाठक भी पैसे खर्च करी नी पढ़ना चाहंदे कैंह जे आदत नीं ऐं पढने दी। एह आदत सहितकार ही तिन्हां अंदर पैदा करी सकदे अच्छा सहित लिखी करी कनै लोकां जो भी अपणे कार्यक्रमां दा हिस्सेदार बणाई करी, मान सम्मान देई करी। छपणे दा साधन तोपणा बड़ा जरूरी यै अपणी भाषा दी तरक्किया बास्ते।

कबि गोष्ठियाँ होंदियां तां हिमाचली भाषा दियां रचना, कबिता कहाणी बगैरा जो दाद नी मिलदी। असां ईह्यां सुणदे जंता मजबूर हन तीह तिकर सुणने जो जाह्लू तिकर अपणी बारी नीं आई जांदी। खरियां कबतां भी नज़र अंदाज होई जा दियां। आखिर तिक कोई नीं बैहणा चांहदा। दूई गल्ल एह जेह्ड़े कबता बोलणे आल़े सैई सुणने आल़े एह देईया हालता पाठकां कनै क्या रिश्ता बणना। सहित्यिक गोष्ठियाँ च आम लोकां दी साझ भी होणी चैहदी तां जे तिन्हां बिच भी सहित्य बारे रुची पैदा होए जिसते इक मजबूत श्रोता बर्ग तैयार होई सके। एह श्रोता बर्ग ही कल्ले दा पाठक बर्ग बणी सकदा।

4. अगलिया पीढ़िया तक तुसां दी गल-बात किञा पूजदी ? 

सुरेश भारद्वाज निराश: अगली पीढ़िया तिकर लिखित सहित्य ही पुज्जी सकदा, कनै सैह ही जादा कारगर होणा। इस करी स्हांजो खूव लिखणा चैहदा छपबाणा चैहदा तां जे अगली पीढ़ी भी स्हाड़े विचारां जो पढ़ी सकै। गलबात हिमाचली भाषा च करने पर भी जोर दैणा चैहदा तां जे भाषा भी पीढ़ी दर पीढ़ी गाँह बदधी रैह। खूव प्रचार प्रसार होणा चैहदा। इन्टरनैट दा सहारा लैणा भी जरुरी यै। कोई भी भाषा कदी मरदी नी जे लिखणे पढ़ने आल़े सहित्य दे जरिये जिन्दा रैहण।

5. तुसां दे स्‍हाबे नै अगली पीढ़ी पहाड़िया जो भासा बणाणे दा ख्‍यो करह्गी कि गीतां सुणदेयां गांह् बधी जांह्गी?  

सुरेश भारद्वाज निराश: स्हांजो, स्हाड़िया पीढ़िया जो कुनी नी गलाया जे अपणी भाषा बारे किछ करा। एह तां अपणिया भाषा दा प्यार है कनै रुहानी जजवा यै जे स्हाड़ी भाषा फल़ै फुलै। सदियां तिक सारेयां दे दिलां च बस्दी रैह । इस करी नै सारे अपणे अपणे तरीके नै अपणिया भाषा दी पैरबी करा दे। अपणे अंदर अपणिया भाषा नै प्यार जिन्दा रैहणा चैहदा कनै भाषा जो गाँह ते गाँह लेई जाणे दी सोच जिन्दा रैहणी चैहदी।

6. तुसां दे स्‍हाबे नै अज आम जिंदगी जीणे ताईं सिर्फ इक्‍की भासा नै कम चली सकदा कि इक्‍की ते जादा भासां जरूरी हन ?  

सुरेश भारद्वाज निराश

सुरेश भारद्वाज निराश: इक भाषा दा तां कोई मतलव ई नी। अज्ज अपणे ग्रायें जां शहरे ते बाहर भी भाषा च बदलाब नज़र औंदा। इस करी जादा ते जादा भाषां दा ज्ञान होणा उतणाई जरूरी यै जितणा अपणी भाषा दा ज्ञान होणा। कुसी जो समझाणे ते जादा जरूरी यै कुसी जो समझणा इस करी होरना भाषा दा ज्ञान होणा भी लाजमी यै। बेशक अंतरराष्ट्रीय भाषा दा ज्ञान भी बड़ा जरूरी यै। ईह्यां ई हिमाचल दीसगरियां बोलियां भी स्हांजो समझणा चैहदियां तां जे सहाड़ी हिमाचली भाषा मजबूतिया नै गाँह ते गाँह बधी सकै कनै इहदे च बथेरा सहित लखोई सकै।

अज सारे हिमाचली भाषा जो अठबीं सूची च दर्ज कराणे तांई कोस्त करा दे। एह कोस्त उपले स्त्तर यानी भाषा बिभाग कनै प्रदेश सरकार दी तरफों भी होणी चैहदी स्हांजो सरकार जो एह अहसास दुआणा पौणा, सरकार जो मनाणा पौणा जे हिमाचली भाषा जो अठबीं सूची च दर्ज कराणे तांई बिधान सभा च प्रस्ताव पारित करण कनै अपणियां सिफारशां नै केद्र सरकार जो भेजणे दी व्यबस्था करण। किह्ला सहितकार बर्ग सहित दे जोरे पर इहदे बारे मता किछ नी करी सकदा।