 |
| सतीश कालसेकर : 1942-2021 |
मराठी भाषा दे मशहूर कवि, लेखक, संपादक सतीश कालसेकर होरां 24 जुलाई 2021 जो गुजरी गै।
तिन्हां दिया यादा च तिन्हां दियां दो कवितां कुशल कुमार होरां दयार ताईं
हिंदिया ते पहाड़िया च अनुवाद कीतियां हन।
मराठी ते हिंदिया दे अनुवाद संजय भिसे होरां दे हन।
परिमार्जन
सैह् चले जांदे मौता दे सामणे
बेवग्त उमरा च
कनैं पैहले ते किछ दसदे भी नीं
फिह्री बच्या रही जांदा असां ताईं तिन्हां दा
महेशा ताईं मुक्की जाणां
तिन्हां पैह्लें कीत्तियां गल्लां
अंदर ही अंदर
छळ दियां रेह्न्दियां
मौता दे भेते ते बी जादा
तिन्हां दिया ल्हासा दे बक्खें होआ दी होंदियां
गांह-पचांह फुसफुस उआजां
हस्पताले दी मरियो रपोट
बीमा कम्पणिया दा समझाणा
पुळसा आळयां दा हत्थ मलाणा
पचांह् बची रैंह्दी है तिन्हां दिया छात्तिया पर
दुनियादारिया दी फिकर
जेह्ड़े गै तिन्हां दा
इसा दुनियादारिया च
कदी नीं लगया मन
तासा दे जोडू पतयां
जो रामें नें फैंटी
पसंदा देयां मितरां जो
अखीरी बार
उंगलियां दी उड़ान
ढोलकिया दे चमडे पर
खणखणाई आखिरी बार
आखरी पीड़ा जो
नीं औणा दित्ता लबड़ां पर तिन्हां
जोरे ने दब्बी रक्खी
अपणिया छातिया च
ताकि भुली सकन
सारे जीणे पर कित्या प्यार
क्या सैह् दिखणा चांहदे थे मुड़ी नैं
इकदम आखरी मौके पर
फिह्री ते सारा किछ नौंए सिरे ते
मौता तिक जाई नै
फिह्री ते हटणे दी नजाकता ने भरोयो संयम दा
परिमार्जन.
वर्तमान
कवताँ च गलांदा कवि सच
कनैं देही कबता पढ़ दिया बारिया
डुग्गा दुख खिंजदा
मिंजो बड़ीया गैह्राइया च
कवता च गलांदा कवि झूठ
कनैं मिंजो आई नें घेरी लैंदा दुख
इसते भी किछ जादा डुग्गा
दुखे दी बेलगाम खिंज
क्या एही है असां दा वर्तमान
मैं सुणियां तुसां दिया कवतां
कनैं गल्लाया,
बड़ियाँ छैल हन एह् कवतां
कनैं गल्लाया,
‘बड़ा बुरा लगदा
कि असां जो लिखणा पौंदिया
ऐह् देहियां कवतां’
कनै फिह्री सुन्न होई गै
असां दोह्यो किछ देरा ताईं
