मुकदी गल्ल मुकदी नीं, अग्गें बधदी

सुरेश भारद्वाज निराश होरां दा कविता संग्रह मुकदी गल्ल इसी साल छपेया है। भूमिका दे तौर पर निराश होरां हिमाचली पहाड़ी भाषा दे बारे च अपणी चिंता प्रकट कीतिओ है। राजीव त्रिगर्ती होरां निराश जी दियां कवतां पर अपणे विचार रखणे ते पैह्लें भाषा दे नाएं दे बारे च अपणा मत रखेया है। असां इसा भाषा दा सफर तदूं ते दिक्खेया  है जदूं इसा जो पहाड़ी गलांदे थे। लोक सूबे दी अपणी भाषा बणाणे दे खाब दिखदे थे। इक ता अजादिया ते बाद असां दे प्रांत ज्यादातर भाषा आधार पर बणे। दूआ केंद्र च भी अंगरेजी हटाई नै हिंदी ल्यौणे दी योजना थी। हिमाचली भी सोचदे थे असां भी पहाड़ी अपणी भाषा बणाई चलाई लैणी। पर जिञा असां दियां नदियां दा पाणी सुकी गया तिञा ई भाषा दा सपना भी टुटी गया। एह् सुपना दुबारा दिखणे दी कोशिश कीती ता हिमाचली पहाड़ी नां चलेया। पर सिरें नीं चढ़ेया। हाली भी कोससां होआ दियां।  हुण इक नौंई सोच आई है भई सूबे दी इक भाषा नीं है, मतियां हन। हुण दिखदे हन एह सोच कितणी कारगर हुंदी है। लेखक भाषाविद् क्या सोचदे, जनता क्या बोलदी कनै राजनेता क्या करदे। एह बैह्स लम्मी चलणे आळी है। फिलहाल अपणिया भाषा च लिखदे रेह्या, नां जे मर्जी दिंदे रेह्या। इसी नजरिए नै एह्थू पढ़ा - सुरेश भारद्वाज निराश दी कविता दे बारे च राजीव त्रिगर्ती दे विचार कनै इसा कताबा चा ते निराश होरां दियां दो कवितां।  

    

‘मुकदी गल्ल’ कवि सुरेश भारद्वाज निराश दी चैथी किताब है। एह् तिह्ना दी पहाड़ी भाषा बिच दूज्जी किताब है। इसा किताबा बिच कविये दियाँ छोटियाँ-बड्डियाँ कठेरी करी कुल 60 कविताँ हन्, जेह्ड़ियाँ लाह्देयाँ-लाह्देयाँ विषयाँ जो अप्पू बिच समाहित करने बिच पूरियाँ समर्थ हन्। कवि अपणिया गल्ला गलान्दा-गलान्दा एह् भी मनदा जे अपणिया भाषा बिच लिखणे दा अपणा लाह्दा ही मजा है। कवि इसा गल्ला जो मनदा जे असाँ दी हिमाचली पहाड़ी बड़ी मिट्ठी कने समृद्ध भाषा है। कवि मनदा जे अपणिया भाषा बिच सुखे ने लखोई जान्दा। कविये जो अपणिया भाषा बिच लिखणा खरा लगदा। खरा लगणा कने सुखे ने लखोणा, कविए दियाँ इ्ह्ना गल्लाँ दी गवाही कविये दियाँ कविताँ अप्पू ही देई दिन्दियाँ।

सुरेश भारद्वाज निराश 
पहाड़ी कविता संग्रह: इक अम्मां थी, समर्पित इश्क ,
मुकदी गल्ल। हिंदी गजल संग्रह: मेेेरा इश्क 
इवादत खुदा की   

कवि अपणियाँ कविताँ काँगड़िया बिच लिखदा पर तिसा भाषा जो हिमाचली पहाड़ी नाँ दिन्दा। किताबा बिच प्रयुक्त काँगड़ी भाषा बिच पंजाबी कने पश्चिमी पहाड़ी दा सिद्धा प्रभाव है। अज्ज काँगड़िया जो पश्चिमी पहाड़ी दे नेड़ें ही मन्नेया जान्दा, हालाँकि ग्रियर्सन होराँ इसा जो पंजाबिया दे डोगरी रूपे दे नेड़े दस्सेया था। काँगड़ी शब्दे दे पुराणे प्रयोगे जो दिखदेयाँ एह् इक्क सर्वमान्य कने पुराणे अस्तित्वे वाळी भाषा है।

कुल मिलाई करी हिमाचली पहाड़ी नाँ देणे पर कविये दी कोई गलती नीं दुस्सा दी। एत्थू इक्क अणशोध सोच हिमाचले दियाँ भाषां दे अस्तित्वे उप्पर खतरा बणियो। कुछ लोकां दा विचार है कि जिसा भाषा बिच मता साहित्य होणा कने मतेयां  लोकां गलाणी सैह् हिमाचली होणी। अज्ज दुनिया दियां मतियां भाषां मरी गइयां कने मतियां दा अस्तित्व खतरे बिच है। असां मतियां भाषां बचाणे दा पुण्य करिये तां हिमाचले बिच ही भाषां दा गुलदस्ता बणाई सकदे। हिमाचले बिच हिमाचली भाषा नीं, हिमाचली भाषाँ हन्। हिमाचले दियाँ सारियाँ भाषाँ जो सरोह्णे कने सरोह्यियाँ जो मठोणे दा मौका मिलणा ही चाहिदा। दरअसल कविये दियाँ कविताँ काँगड़िया बिच हन्, कने काँगड़िया दिया कुसी भी किताबा दे ओणे पर काँगड़ी बोलणे बाळेयाँ जो गर्व होणा चाहिदा। काँगड़िया दियाँ इह्ना खरियाँ कविता दा रज्जी स्वागत होणा चाहिदा। उइयाँ इस स्वागते ताएँ कविताँ अप्पू ही अपणी गवाही दिन्दियाँ दुसदियाँ।कवि समाजे देयाँ सारेयाँ पक्षां जो अपणियाँ कविताँ बिच रखदा। सैह् सारियाँ कविताँ बिच रीति-रिवाज, रैह्ण-सैह्ण, खाण-पीण, देश-प्रेम, सामाजिक व्यवहार कने जिन्दगिया दियाँ मतियाँ सारियाँ गल्लाँ जो जेह्ड़ियाँ असाँ सामणे औन्दियाँ तिह्ना जो हू-ब-हू कागजे पर तुआरी करी अपणेयाँ सारेयाँ पाठकाँ साह्मणे रखणे दी कोशिश करदा ही दुसदा है।

कवि अपणिया कविता ‘राती दा मरया’ बिच गलान्दा जे अज्जकल असाँ दे समाजे बिच ताकतवर लोक गरीबाँ देयाँ हकाँ जो मारा दे। जेह्ड़ा असाँदे समाजे जो बंडणे दा इक्क कारगर तरीका है। कवि आश्वस्त है जे बेल्ला इक्को देया सदा ही नी रैह्न्दा। टैम सारेयाँ दा ही ओंदा। सैह् पियोहेयाँ-दरड़ोहेयाँ अन्दर उम्मीदा दी जोत बाळदा -

बड्डियाँ जोकाँ है खून लेया चूसी

गरीबाँ दा हक्क कितणा करी मरोणा

सूरज ता सबदा है चढ़दा निराश

मत सोच्चें इन्नी कदी नी घरोणा।

अज्ज असाँ दे समाजे बिच होड़ लगियो। जेह्ड़ा भी कमा दे तिस दा मता हिस्सा बड्डेया-बड्डेयाँ घराँ जो बणाणे पर मुकाई देया दे। समाजे दा दस्तूर अजकल देह्या है जे बच्चे तिह्ना उच्चियाँ हवेलियाँ जो छड्डी करी अपणे भविष्य बणाणे दा वास्ता देई दुज्जेयाँ शहराँ बिच बस्सी जा दे या तां विदेशां बिच बस्सी करी अपणे देशे जो कने तिस घरे जो भुली जा दे। इक्क टैम ओआ दा तां तित्थू कुत्तेयाँ-बिल्लेयाँ दा बास्सा होई जा दा-

बड्डे-बड्डे महल खरेड़े

एत्थू कुत्तेयाँ बिल्याँ सूणा।

इसा ‘टूह्णमटूणा’ कविता बिच ही कवि मजदूराँ दिया स्थितिया, राजनीतिया बिच व्यापक भ्रष्टाचारे जो सोग्गी ही प्रस्तुत करदा। सैह् बड़ा सहज होई करी राजनीति करने वाळेयाँ कने समाजे बिच अपणा स्वार्थ सिद्ध करने वाळेयाँ लोकाँ पर टोंट कसदा गलान्दा-

अज्जे तिक तूँ लोक ही दूह्ते

पता नी अप्पूँ कदी परसूणा।।

‘इक्क अम्मा थी’ इस नाएँ कन्ने कविये दी पैह्ली काँगड़ी कविता दी किताब छपी थी। इसा किताबा जो पढ़देयाँ इसा किताबा बिच भी इक्क कविता ‘अम्मा’ नाएँ कन्ने मिलदी है। एह् कविता भी इक्क अम्मा थी इसा कविता जो ही बधाऽ दी। उइयाँ एह् छोटी है पर भावाँ कन्ने टुंडमुंडियाँ भरोइयो अपणी पडछैण बणाणे बिच कुसी रचना ते घट्ट नीं है-

खुआन्दी थी कदी कमाई करी टब्बरे जो,

तिन्ना पुतराँ च अज्ज अम्मा बंडोई गई।

‘यादाँ दे झरोखे ते’ कविता भी ‘इक्क अम्मा थी’ कविता दा ही ताजा हिस्सा बझोन्दी। एह् इक्क लम्मी कविता है। अम्मा दी जीवनचर्या कने चरित्र इसा कविता बिच बड़ा ही सटीक बझोन्दा है-

टब्बरे दी तकदीर थी अम्मा

ईश्वर दी तस्वीर थी अम्मा

बापुए दी तदबीर थी अम्मा

अपणे ताईं फकीर थी अम्मा।

कवि लोहड़ी गीते दे नाएँ तित्थ-त्योहाराँ जो बड़ा डुग्गा याद करदा। लोहड़िया दे चितराँ बिच इक्क चित्तर दिखणे जोग्गा है-

रीत-रूआजाँ मत भुलायाँ

सणे घरैतां लोहड़ी मनायाँ

बैही ने किट्ठे खा खिचड़ी.....!

इसा किताबा बिच कवियें इक्क कविता लिखियो ‘पर्यावरण..इक्क जरूरत’। इसा कविता बिच सैह् पर्यावरणे दिया समस्या जो लई करी डूग्घा चिन्ददा। पर्यावरणे पर चिन्दणा अजकणे जमाने दा सारेयाँ ते जरूरी चिन्दण है। पर्यावरण उप्पर खतरा असाँदिया पूरिया सभ्यता उप्पर खतरा है। इस खतरे दा कारण भी असाँ ही हन्, कैंह् जे सारा कितेया कराया असाँ दा ही है। पर्यावरण रक्षा दा सन्देश कवि इस तरीके ने दिन्दा -

पेड़ लगांह्गे बर्खा होणी

नीं तां साह्ड़ी फसल मरोणी 

दाणा फक्का किछ नी मिलणा  

भुक्खेयाँ किह्ञा निन्दर ओणी

किह्ञा निन्दर ओणी

पेड़ लगा सारे भाऊ, पेड़ लगा........।। 

‘जीणे दी क्या गल्ल करिये’ कविता बिच अजकणे सामाजिक परिवेश जो ढाळदा कवि अपणेयाँ शब्दाँ बिच बड़े ही सरस रूपे बिच साह्मणे ओन्दा। कवि जीवने जो लई करी मता आश्वस्त नीं दुस्सा दा। तिस्सेयो सारे माहौले बिच इक्क बदलाव बझोआ

दा-

मुश्किल हन हालात जीणे दी क्या गल्ल करिये

मिल्ला दे आघात जीणे दी क्या गल्ल करिये।

‘कोई आसरा मिलदा’ कविता बिच भी कवि बदलोयाँ हालाताँ कने बदलोयो पर्यावरणे दी ही गल्ल करदा। ‘बिट्टी जम्मी बधाई लैह्’ कविता कविये दे इस संग्रहे दी इक्क मती याद रक्खी जाणे वाळी कविता है। कवि प्रगतिवादी विचाराँ ने भरोया है। बिट्टिया दे जमणे दिया खुशिया जो कवि जिस नोएँ रूपे बिच प्रस्तुत करदा सैह् अनुकरणीय है। जातके बिट्टिया दे अन्तरे जो हटाणे ताएँ जेह्ड़ी पैह्ल ज़रूरी है तिसा जो साह्मणे अणदी एह् पूरिया दी पूरी कविता ही जरूरी है। फिरी भी इह्ना दूँह् पाह्ळियाँ बिच दिक्खा-

पूजा-पाठ कराई लैह्

नूहाँ ते कुळज पुजाई लैह्।

कित्तियो असाँ खरी कमाई

स्हाड़ें घरें जे बिट्टी आई।

मतियाँ कविताँ बिच कवि समझौतावादी होन्दा चला जान्दा। सैह् अपणे मुखर होन्दे विद्रोही स्वभावे जो देरे तिकर नीं ढोन्दा। एह् देह्याँ तेवराँ वाळियाँ कविताँ बिच सैह् इक्क कविता ‘समझौता’ नाएँ ने भी लिखदा-

जे मिल्ले सैह् खाणा पौंदा,

ईह्याँ ही दिल पतियाणा पौंदा।

कविये  दे दिले बिच ‘बड़े गहरे भाव दिलाँ दे’ जोज्झेयाँ खान्दे। प्यारे दा मल्हम सारेयाँ जख्मा भरी दिंदा। ऐह् प्यार इसा धरतिया कन्ने हैं कने सैह् कुथी ग्राएँ कुथी खड्डाँ-नाळुआँ दे रूपे बिच साह्मणे ओन्दा।

राजीव कुमार त्रिगर्ती 
कवि और भाषाविद् 
हिंदी कविता संग्रह: गूलर का फूल (2008)
ज़मीन पर होने की खुशी (2020)
प्रेम में होना (2024)
पहाड़ी  कविता संग्रह छपणे आळा है। 

छंदे दे नाएँ पर कवियाँ दे बिच इक्क तुकबंदी दी परम्परा भी प्रचलित है। कवि अपणियाँ मतियाँ सारियाँ रचनाँ बिच तिसा परम्परा दा अनुसरण करदा ही सामणे ओन्दा। अनुप्रास परम्परा दा निर्वाह जरूर इसा तुकन्दिया दे माध्यमे ने होन्दा कने कविताँ बिच लय बणाई रखदा। वर्तनी जो लई करी हाल्ली काँगड़िया बिच मतियाँ कमियाँ हन्। कवि भी तिह्ना ते अछूता नी रेह्यी सकदा था। कुसी पराणिया साहित्यिक भाषा दिया वर्तनिया बिच भी कुसी दा मुकक्कल होणा आसान नीं हैं फिरी साहित्यिक रूपे ने कांगड़ी तां हाल्ली अपणे अंगणे बिच घंघाळू ही देआ दी है। होळें-होळें काँगड़िया दिया वर्तनिया दा इक्क पक्का, सर्वमान्य कने टिकाऊ रूप साह्मणे ओणा है। कविये दा एह् लिक्खेया भी तिस रस्ते बिच इक्क टप्पा बणना है।

मुकदिया गल्ला उप्पर मुकदी गल्ल एह् है जे एह् किताब कविये दे व्यापक दृष्टिकोणे जो प्रस्तुत करदी। कविताँ पढ़ी करी सारा कुछ अपणे नेड़े-तेड़े लगदा। नोटबंदी, जीएसटी पर भी कवि अपणे विचार रखदा, पर इहना कविताँ बिच सिर्फ इक तरफा गल्ल है कने इह्ना नीतियाँ दा इक तरफा समर्थन ही है। मुकदेयाँ संस्काराँ कने समाजे दे ढैन्दे रूपे ते भी कवि बड़ा दुखी है। मंहगाई कने होर अजकणे मुद्दे भी कविये दियाँ नजराँ ते अछूते नीं हन्।

‘इक्क अम्मा थी’ एह् कविये दी पैह्ली काँगड़ी कविता दी किताब थी। पैह्ली किताब होणे पर भी तिसा किताबा दा प्रभाव सारे जनमानस उप्पर पेआ था। कविये दिया प्रतिभा जो दिखदेयाँ तिस तरीके दियाँ रचना दी उम्मीद सारेयाँ पाठकाँ जो कविये ते जरूर रैह्यी कने रैह्णी। तिह्ञा ही इसा किताबा बिच भी कविये दिया उच्चिया सोच्चा दे ढक्के ते चूंडिया तिकर दर्शन होन्दे। कविये बाह्ली नोआँ रचणे दी ताकत भरोइयो। उम्मीद है इसा ताकता दे दर्शन सताबी ही अगलिया किताबा बिच होणे हन् कने भाषा दे साहित्ये वाळे बाग्गे बिच नोंआँ फुल्ल खिड़ना है।  

सुरेश भारद्वाज निराश दियां दो कवतां 

अम्मां

अम्मां अज्ज सतराँ बरयाँ दी होई गेई

उआने ते उट्ठी ओबरिया जाई सोई गेई

 

खुआंदी थी कदि कमाई करी टव्वरे जो

तिन्ना पुत्रां च अज्ज अम्मां बंडोई गेई

 

चाऽ करी करी तिन्ना पालेया था टव्वर

टब्बरे जो अज्ज सैह फालतु होई गेई

 

बणाई बणाई खिंदाँ भरियाँ थियाँ बिलगां

अज्ज इक्की खंदोलुएं अप्पूं लपटोई गेई

 

अम्मां सौए ओबरिया पौहें सौए उआने

टब्बरे देयाँ तान्याँ अज सैह डंगोई गेई

 

रली मिली किह्याँ करनी ऐं तंग अम्मां

लाड़ी बी मिंजो कनै थी सखलोई गेई

 

जिन्हीं राज कित्ता कदि बीह्याँ माह्णुआ

दिक्खी दूरी तिन्हाँ दी अप्पू सँगोई गेई

 

जदूँ चलदियाँ थियाँ जंघाँ था जोर जीह्वा

नी सरीर हुण चलदा जीब भी चुपोई गेई

 

ठगदी थी टब्बरे जो गुड़े दे इक्क ढेलुऐ नै

ब्रते रै बहाने अज्ज सैह अप्पूं ठगोई गेई

 

दिक्खी दुख बच्चयाँ दा बहांदी थी अथरु

लकोई दुख अपणा मुँह ढक्की रोई गेई

 

उम्र सारी कित्ता अम्मां सबनीं दा भला

सच मेरी अम्मां अज्ज सबनां ते लुटोई गेई

 

सुआंदी थी सुक्कैं थी अप्पूं सौंदी गिल्लैं

अथरुआं नै अम्मां अप्पूं गिल्ली होई गेई

 

इतणे भारी पिट्टे तू अम्मां कजो स्यापे

छुटी गेई जलबाँ अज्ज हाख बी मटोई गेई

 

क्या गेई अम्मां निमौड़ा मैं बी होई गिया

रेही गिया किह्ला किस्मत बी बदलोई गेई

 

गलांदी थी मिंजो छोरु बणी जा माह्णु

मिंजो तिसारी अज्ज गल्ल समझोई गेई

 

सुणी नी सकदा कदि बुराई मैं अम्मां दी

गलाया कुन्नी ज़रा क सैः कालजें छोई गेई

 

बड़े कलेस दित्ते थे तिसा जो मैं मित्रा

भार अपणे दुखांरा सैह किल्ली इ ढोई गेई

 

'निराश' मेरियाँ नीताँ नी मिंजो माफ करना

अम्मां दी सुणी नी लाड़िया दी सुणोई गेई

 

भुल्ली गै

 

कैंह मान रखणा भुल्ली गै

कैंह ध्यान रखणा भुल्ली गै

 

घड़ोलू मटणा भुल्ली गै

सूतर कतणा भुल्ली गै

 

नाम जपणा भुल्ली गै

किस्ती-पतणा भुल्ली गै

 

खंड जोड़े आद नी रेहे

गोआ सटणा भुल्ली गै

 

बड्यां दी बडियाई भुल्ली

पैरां च नपणा भुल्ली गै

 

लोकां दी बुराई हरदम

कर्म अपणा भुल्ली गै

 

हीटरां देही मत मारी

अग तपणा भुल्ली गै

 

मीट शीट कुत्तेयां जो

ग्राह रखणा भुल्ली गै

 

बर्फिया दा डब्बा लीता

प्रौणा सखणा भुल्ली गै

 

तीणी उपर रसो बणाई

अपूं चखणा भुल्ली गै

 

चमचागिरि बथेरी कित्ती

पैरां चट्टणा भुल्ली गै

 

जाणी ले भेत बगाने

अपणे दसणा भुल्ली गै

 

नज़र तिन्हाँ दी मेरी यारी

अपणी मखणां भुल्ली गै

 

संबला था मै ही बणाया

भांडे घसणा भुल्ली गै

 

सबना खूब मिसरे जोड़े

काफिया रखणा भुल्ली गै

 

मार पेई इतणी स्कूलें

बच्चू नसणा भुल्ली गै

 

रत्ती भर नीं बेह्ल लोकां

ज़रा क हसणा भुल्ली गै

 

चुकया जाह्लु अम्मां चिमटा

गंड्डू लहस्णा भल्ली गै

 

भगौत पुराण दैण मापे

सौरेयाँ बसणा भुल्ली गै

 

डीजें कित्ता बेड़ा गर्क

अपणा नचणा भुल्ली गै

 

जदूँ दा आया बैड बाक्स

दौणी कसणा भुल्ली गै

 

सारें पासें धूम तुसाँ दी

स्हांजो जचणा भुल्ली गै

 

भत भटूरु सारे खांदे

स्हांजो पचणा भुल्ली गै

 

सुणेया चुड़ेलां लोक बेठे

स्हांजो सचणा भुल्ली गै

 

बदनै सारे मसाज करिगे

सिरे झसणा भुल्ली गै

 

सारी दुनियाँ डंग्गीत्ती

अप्पूं जो डसणा भुल्ली गै।

 

कन्न भरना सिखी लै

रस्णा बसणा भुल्ली गै

 

लोकां जो पाईयाँ जफ्फियाँ

मिंजो तकणा भुल्ली गै

यादां फौजा दियां

 

फौजियां दियां जिंदगियां दे बारे च असां जितणा जाणदे, तिसते जादा जाणने दी तांह्ग असां जो रैंह्दी है। रिटैर फौजी भगत राम मंडोत्रा होरां फौजा दियां अपणियां यादां हिंदिया च लिखा दे थे। असां तिन्हां गैं अर्जी लाई भई अपणिया बोलिया च लिखा। तिन्हां स्हाड़ी अर्जी मन्नी लई। ता असां यादां दी एह् लड़ी सुरू कीती है, दूंई जबानां च। पेश है इसा लड़िया दा तरताह्ळुआं मणका। 

(चित्र : सुमनिका, कागजे पर चारकोल) 

...................................................................

समाधियाँ दे परदेस च 

लोकनाथनें, अप्पुयो मिलह्यो ‘कारण बताओ नोटिस’ दा जवाब, इक जेसीओ ते लिखुआयी करी दित्ता था। सैह् तिस जेसीओ दे अंडर बख-बख खेलाँ च हिस्सा लैंदा रिहा था। तिसदी तबाही ताँईं, कुत्थी न कुत्थी, सैह् जेसीओ भी जिम्मेदार था। 

कमांडिंग अफसर होराँ सैह् जवाब पढ़ी करी मेरे हवाले करी दित्ता था। मैं तिस महीने दे आखिर च लोकनाथन जो तन्खाह दे तौरे पर साढ़े तिन्न हजार रुपए दी पेमेंट करी नै तिसदे घर जाणे दे खर्च दा बंदोबस्त करी दित्ता था। अगले महीने दी पहली तारीख जो, मेरिया सलाही पर कमांडिंग अफसर होंराँ लोकनाथन जो अपणे दफतर च सद्दी नै, सूबेदार मेजर साहब कनै मेरिया हाजरिया च, दस्सेया था कि तिस्सेयो फौज ते बर्खास्त कित्ता जाह्दा है।  मैं डिस्चार्ज रोल दियाँ मुकर्रर जगहाँ पर तिसदे दस्तखत कमांडिंग अफसर दे दफतर च ही करुआई लै थे। तिसदे परंत सूबेदार मेजर साहब होराँ दे हुक्म पर दो जुआन तिस्सेयो तिसदे समाने समेत ‘नासिक रोड’ रेलवे स्टेशन तिकर छड्डी आये थे। तैह्ड़ी मिंजो बड़ा दुख होया था। अगले दिनैं मैं सूबेदार मेजर साहब होराँ ते लोकनाथन दे बारे च पता कित्ता ताँ तिन्हाँ मिंजो दस्सेया था कि पिछलिया राती सैह् यूनिट दे इक जुआनें जो तिस रेलवे स्टेशन च नशे च धुत होयी लम्मा पिह्या मिल्लेया था। अज्ज मिंजो याद नीं ओंदा कि मैं लोकनाथन दिया जणासा जो तिसदी फौज ते बर्खास्तगी दे बारे च खबर दित्ती थी कि नीं।  मैं हर हादसे कन्नै निपटदे वक्त फौज दे कानूनाँ कनै कायदेयाँ दा पालन करदा था।  तिस मामले च भी मैं कायदे मुताबिक कम्म कित्तेह्या होंगा। 

जिंञा कि मैं पिछली कड़ी च दस्सेया था कि इक दहाई पहलैं नायक नारायण सिंह जो लगिह्यो चोटा दे बारे च फैसला दिंदे वक्त तदकणे बिग्रेड कमांडरे दे स्टाफे ते इक चूक होयी गइह्यो थी। तिस चूक जो सुधारने ताँईं कार्रवाई करने ताँईं मिंजो कमांडिंग अफसरे ते इजाजत मिली गयी थी। 

इंज्यूरी रिपोर्ट दे तिस हिस्से च जित्थू ब्रिगेड कमांडर जो अपणा फैसला देणा होंदा है तित्थू किछ इस तरहाँ पहले ते ही छप्पेह्या होंदा है — “The injury is attributable/not attributable to military service in peace/field/operational area.”  नायक नारायण सिंह दे मामले च उप्पर लिक्खेह्यो ते, ब्रिगेड कमांडर होराँ जो दस्तखत करदिया बेला,  पेन कन्नै not attributable, peace कनै field अक्खर कटणे चाहिदे थे।  मैं हौळदार दे रैंक च जाह्लू इक ब्रिगेड हैडकुआटर च पोस्टड था ताँ मैं गैर-जरूरी अक्खराँ जो पेंसिल कन्नै  कटणे ते परंत ही कोर्ट ऑफ इन्क्वायरी दी प्रोसीडिंग्स कनै इंज्यूरी रिपोर्ट जो ब्रिगेड कमांडरे व्ह्ली भेजदा था जिसते तिन्हाँ जो सही अक्खरां जो पैने कन्नै कटणे च सहूलियत होंदी थी अपर नायक नारायण सिंह दी जेह्ड़ी इंज्यूरी रिपोर्ट तिसदे फील्ड सर्विस डाक्यूमेंटां कन्नै लगिह्यो थी तिस च उप्पर लिक्खेह्यो ते कोई भी हर्फ कटोह्या नीं था।  बस तित्थू ब्रिगेड कमांडर होराँ दी मूहर कन्नै तिन्हाँ दे साइन ही मौजूद थे। नतीजतन तिसदा गलत ‘पार्ट टू ऑर्डर’ छपी गिह्या था। तिसा गलतिया जो हुण आर्मी हैडकुआटर दे जरिए ही सुधारेया जाई सकदा था।   

तिस ताँईं मैं इक ब्यौरेबार ‘स्टेटमेंट ऑफ द केस’ तैयार कित्ती थी।  तिस ‘स्टेटमेंट ऑफ द केस’ च मैं तिस चूक दियाँ वजहाँ च इक वजह एह् भी दस्सिह्यो थी कि इंज्यूरी रिपोर्ट दियाँ चार कापियाँ बणदियाँ हन्न। ब्रिगेड कमांडर होराँ सब्भते उप्पर वाळी कापिया पर सही हर्फां जो कट्टी करी सारियाँ कापियाँ पर साइन करी दित्तेह्यो होंगे। तिन्हाँ दे स्टाफे ते बाकी दियाँ तिन्न कापियाँ च सही हर्फां जो नीं कटणे दी चूक होयी गइह्यो होंगी। तिस चूक दा खामियाजा नायक नारायण सिंह जो नीं भुगतणा पोये इस ताँईं कम्पीटेंट ऑथोरिटी जो भूल सुधारने दे आर्डर देणे चाहिदे।  

तिस स्टेटमेंट ऑफ द केस जो पढ़ी करी मेरे कमांडिंग अफसर साहब होराँ मिंजो शाबाशी दित्ती थी कनै तिस पर दस्तखत करी दित्ते थे।  हुण मिंजो याद नीं कि कुस ‘चैनल’ ते सैह् ‘केस’ आर्मी हैडकुआटर जो भेज्या गिया था। आर्मी हैडकुआटर तिकर पोंह्चणे ताँईं दो चैनलाँ होंदियाँ हन्न ― स्टाफ चैनल कनै डिपार्टमेंटल चैनल। स्टाफ चैनल यूनिट ते ब्रिगेड, डिवीजन, कोर कनै कमांड हैडकुआटराँ ते होंदी होयी आर्मी हैडकुआटर तिकर जाँदी है जद कि आर्टिलरी दी डिपार्टमेंटल चैनल यूनिट, आर्टिलरी ब्रिगेड, कोर आर्टिलरी ब्रिगेड, कमांड आर्टिलरी हैडकुआटराँ ते होयी करी आर्मी हैडकुआटर च ‘आर्टिलरी डायरेक्टरेट’ तिकर पोंह्चदी है।  

इस किस्म देयाँ मामलेयाँ जो सुलझाणे च वक्त लगता है। नायक नारायण सिंह देवलाली दे स्टेशन आर्टिलरी मेस च ड्यूटी करदा था। तिस दौरान तिसते होइयो कुसी गलतिया दिया बजह ते कमांडिंग अफसर साहब तिसते नाराज होयी गै थे। तिन्हाँ मिंजो इशारेयाँ ही इशारेयाँ च एह् दस्सणे दी कोशिश कित्ती कि मैं नायक नारायण सिंह दे केसे पर कम्म करी नै फिजूल ही अपणी ऊर्जा कनै टैम गुआ दा है। मैं तिन्हाँ देयाँ इशारेयाँ जो समझदा होया भी तिस पर कम्म करदा रिहा कनै तिस गलती जो सुधारने च कामयाब होयी गिया। 

हर तिन्न महीनेयाँ परंत पलटन च “प्रमोशन कांफ्रेंस” होंदी थी जिस च पलटन दे हैडक्लर्क दा बड़ा अहम् रोल होंदा था। प्रमोशन कांफ्रेंस च मैं सब्भ हाजिर साहिबानाँ जो दस्सेया था, “ऑपरेशनल एरिये च चोट लगणे दिया बजह ते नायक नारायण सिंह परमानेंट मेडिकल केटेगरी डाउन होया था इस बजह ते रूल दे मुताबिक सैह् प्रमोशन दा हकदार है अपर तिन्नी नायक ते हौळदार बणने ताँईं  प्रमोशन कैडर पास नीं कित्तेह्या इस ताँईं तिस्सेयो हौळदार नीं बणायी सकदे। हाँ, जेकर कमांडिंग अफसर होंराँ चाहण ताँ तिस्सेयो  सीनियर नायक होणे दे कारण ‘लांस हवलदार’ बणायी सकदे हन्न।”  इस पर सारेयाँ हाजिर साहिबानाँ मेरी गल्ल दा समर्थन कित्ता था कनै कमांडिंग अफसर होराँ जो, नीं चांहदेयाँ भी, हाँ करनी पयी थी।  मिंजो पता था नायक नारायण सिंह दे मामलैं मिंजो लई डुबणा है।  कमांडिंग अफसर होराँ दी नाराजगी मिंजो सूबेदार ते सूबेदार मेजर बणने ते रोकी सकदी थी। 

प्रमोशन कांफ्रेंस च मंजूर कित्ते गै प्रमोशन कनै अपॉइंटमेंटां यूनिट दे ‘पार्ट वन ऑर्डरां’ च छप्पणे ते परंत लागू होंदे हन्न। नायक नारायण सिहें तिस मामले जो होर बिगाड़ी करी रखी दित्ता था। होया एह् था कि तिस प्रमोशन कांफ्रेस दे नतीजे छपणे पर  नायक नारायण सिंहें ‘लांस हवलदार’ दियाँ फीतियाँ अपणी वर्दिया पर लगाणे ते नाँह करी दित्ती कनै हौळदार बणाये जाणे ताँईं अड़ी गिया।  तिस वक्त मैं कैजुयल लीव पर था।  ड्यूटी च हाजिर होणे पर मिंजो सूबेदार मेजर साहब होराँ तिस मामले दी जाणकारी दित्ती कनै अगले कदम ताँईं मेरी रै (राय) जाणनी चाही थी। 

मिंजो नायक नारायण सिंह पर बहोत गुस्सा आया था। मैं सूबेदार मेजर साहब होराँ जो ग्लाया था, “साहब, तिस्सेयो चार्ज सीट पर कमांडिंग अफसर साहब होराँ दे साह्म्णे खड़ेरा कनै नायक ते गनर (सिपाही) बणायी दिया।” सूबेदार मेजर साहब होराँ मिंजो ग्लाया था, “साहब, तुसां तिस कन्नै गल्ल करी नै दिक्खा जेकर सैह् फिरी भी नीं मन्नेंयाँ ताँ तिसदी चार्जशीट बणायी दिह्नेंयो।”  

मैं अपणे आफिस रनर जो तरंत नायक नारायण सिंह जो सदणे ताँईं भेज्या। मैं तिस्सेयो हिदायत दित्ती थी, “नायक नारायण सिंह जो बोला कि सैह् लांस हवलदार दे रैंक लगायी करी तरंत मिंजो रिपोर्ट करे। जेकर तिस व्ह्ली वर्दी तैयार नीं होये ताँ कुसी होरसी ते मंगी करी पहनी लै।” नायक नारायण सिंह अद्धे घण्टे दे अंदर लांस हवलदार दी वर्दी च मेरे साह्म्णे आयी खड़ौता था। मैं तिस्सेयो बुरी तरहां डाँट लगाई करी सूबेदार मेजर साहब होराँ व्ह्ली भेजी दित्ता था। 

(बाकी अगलिया कड़िया च….)

  

...................................................................

समाधियों के प्रदेश में (तैतालीसवीं कड़ी)

 

लोकनाथन ने, उसको दिये गये ‘कारण बताओ नोटिस’ का जवाब, एक जेसीओ से लिखवा कर दिया था। वह उसी जेसीओ के नेतृत्व में विभिन्न खेलों में भाग लिया करता था। उसकी बर्बादी के लिए कहीं न कहीं, वह जेसीओ भी जिम्मेदार था। 

कमांडिंग अफसर ने वह जवाब पढ़ कर मेरे हवाले कर दिया था।  मैंने उस महीने के अंत में लोकनाथन को वेतन के रूप में साढ़े तीन हजार रुपए की अदायगी करके उसके घर जाने के खर्च का प्रबंध कर दिया था।  अगले महीने की पहली तारीख़ को मेरी सलाह पर कमांडिंग अफसर ने लोकनाथन को अपने कार्यालय में बुलाकर, सूबेदार  मेजर साहब और मेरी उपस्थिति में, सूचित  किया था कि उसे सेना से बर्खास्त किया जा रहा है। मैंने डिस्चार्ज रोल पर निर्धारित स्थानों पर उसके हस्ताक्षर कमांडिंग अफसर के कार्यालय में ही ले लिए थे। उसके वाद सूबेदार मेजर साहब के निर्देश पर दो जवान उसके समान सहित उसे ‘नासिक रोड’ रेलवे स्टेशन  पर छोड़ आये थे। उस दिन मुझे बहुत दुख हुआ था।  अगले दिन मैंने सूबेदार मेजर साहब से लोकनाथन के बारे में पता किया तो उन्होंने बताया था कि पिछली रात वह यूनिट के एक जवान को नशे में धुत होकर उसी रेलवे स्टेशन में पड़ा मिला था।  आज मुझे याद नहीं कि मैंने लोकनाथन की पत्नी को उसकी सेना से बर्खास्तगी के बारे में सूचित  किया था या नहीं।  मैं हर घटना से निपटते समय सेना के कानूनों और नियमों का पालन करता था।  उस मामले में भी मैंने नियमानुसार काम किया होगा। 

जैसे कि मैंने पिछली कड़ी में बताया था कि एक दशक पहले नायक नारायण सिंह को लगी चोट के बारे में निर्णय देते समय तत्कालीन बिग्रेड कमांडर के स्टाफ से एक चूक हो गयी थी। उस चूक को सुधारने के लिए कार्रवाई करने के लिए मुझे कमांडिंग अफसर से आज्ञा मिल गयी थी। 

इंज्यूरी रिपोर्ट के उस भाग में जहाँ ब्रिगेड कमांडर को अपना फैसला देना होता है वहाँ कुछ इस प्रकार पहले से ही छपा होता है — “The injury is attributable/not attributable to military service in peace/field/operational area.”  नायक नारायण सिंह के मामले में उपरोक्त में से, ब्रिगेड कमांडर द्वारा हस्ताक्षर करते समय, पेन से not attributable, peace और field शब्द काटे जाने चाहिए थे।  मैं हवलदार के रैंक में जब एक ब्रिगेड हैडक्वार्टर में सेवारत था तो मैं सम्बन्धित शब्दों को पेंसिल से काटने के बाद ही कोर्ट ऑफ इन्क्वायरी की प्रोसीडिंग्स और इंज्यूरी रिपोर्ट को ब्रिगेड कमांडर के समक्ष भेजता था जिससे उन्हें सही शब्दों को पेन से काटने में सुविधा होती थी परन्तु नायक नारायण सिंह की जो इंज्यूरी रिपोर्ट उसके फील्ड सर्विस डाक्यूमेंट्स में उपलब्ध थी उसमें उपरोक्त से कोई भी शब्द काटा नहीं गया था। बस वहाँ ब्रिगेड कमांडर की मोहर के साथ उनके हस्ताक्षर ही उपलब्ध थे। परिणामस्वरूप उसका ‘भाग दो’ आदेश गलत प्रकाशित हो गया था।  उस गलती को अब सेना मुख्यालय द्वारा ही सुधारा जा सकता था।  

उसके लिए मैंने एक विस्तृत ‘स्टेटमेंट ऑफ द केस’ तैयार की थी। उस ‘स्टेटमेंट ऑफ द केस’ में मैंने उस गलती के कारणों में एक कारण यह भी बताया था कि इंज्यूरी रिपोर्ट की चार कॉपियाँ बनती हैं। ब्रिगेड कमांडर ने सबसे ऊपर वाली कॉपी पर सही शब्दों को काट कर सभी कॉपियों पर साइन कर दिए होंगे। उनके स्टाफ से बाकी की तीन कॉपियों में सही शब्दों को न काटने की चूक हो गयी होगी। उस चूक का खामियाजा नायक नारायण सिंह को न भुगतना पड़े इसलिए सक्षम प्राधिकारी द्वारा भूल सुधारने के आदेश दिये जाने चाहिए।  

उस ‘स्टेटमेंट ऑफ द केस’ को पढ़ कर मेरे कमांडिंग अफसर ने मेरी पीठ थपथपायी थी और उस पर हस्ताक्षर कर दिये थे।  अब मुझे याद नहीं किस ‘चैनल’ से वह ‘केस’ सेना मुख्यालय को भेजा गया था।  सेना मुख्यालय तक पहुंचने के लिए दो चैनल होती हैं ― स्टाफ चैनल और डिपार्टमेंटल चैनल।  स्टाफ चैनल यूनिट से ब्रिगेड, डिवीजन, कोर और कमांड मुख्यालयों से होती हुई सेना मुख्यालय तक जाती है जब कि आर्टिलरी की डिपार्टमेंटल चैनल यूनिट, आर्टिलरी ब्रिगेड, कोर आर्टिलरी ब्रिगेड, कमांड आर्टिलरी मुख्यालयों से हो कर सेना मुख्यालय में ‘आर्टिलरी डायरेक्टरेट’ तक पहुंचती है।  

इस तरह के मामलों को सुलझाने में समय लगता है। नायक नारायण सिंह देवलाली स्थित स्टेशन आर्टिलरी मेस में कार्यरत था। उसी दौरान उससे हुई किसी चूक की वजह से कमांडिंग अफसर उससे नाराज हो गये थे। उन्होंने मुझे इशारों ही इशारों में यह बताने की कोशिश की थी कि मैं नायक नारायण सिंह के केस पर काम करके व्यर्थ ही अपनी ऊर्जा और समय गंवा रहा हूँ। मैं उनके इशारों को समझते हुये भी उस पर काम करता रहा और उस गलती को सुधारने में सफल हो गया। 

हर तीन महीनों के बाद यूनिट में “प्रमोशन कांफ्रेंस” होती थी जिसमें यूनिट के हैडक्लर्क का अति महत्वपूर्ण रोल होता था। प्रमोशन कांफ्रेंस में मैंने सभी उपस्थित अधिकारियों को बताया था, “ऑपरेशनल एरिया में चोट लगने की वजह से नायक नारायण सिंह परमानेंट मेडिकल केटेगरी डाउन हुआ था अतः नियमों के अनुसार वह प्रमोशन का हकदार है परंतु उसने नायक से हवलदार बनने के लिए प्रमोशन कैडर पास नहीं किया है इसलिए उसे हवलदार नहीं बनाया जा सकता। हाँ, अगर कमांडिंग अफसर चाहें तो उसे सीनियर नायक होने के कारण ‘लांस हवलदार’ नियुक्त कर सकते हैं।”  इस पर सभी उपस्थित अधिकारियों ने मेरी बात का समर्थन किया था और कमांडिंग अफसर को, न चाहते हुए भी, हाँ करनी पड़ी थी।  मुझे पता था नायक नारायण सिंह का मामला मुझे ले डूबेगा।  कमांडिंग अफसर की नाराजगी मुझे सूबेदार से सूबेदार मेजर बनने से रोक सकती थी। 

प्रमोशन कांफ्रेंस में स्वीकृत किये गये प्रमोशन और नियुक्तियाँ यूनिट के ‘पार्ट वन ऑर्डरों’ में प्रकाशित होने के उपरांत लागू होते हैं।  नायक नारायण सिंह ने उस मामले को और बिगाड़ कर रख दिया था। हुआ यह था कि जब उस प्रमोशन कांफ्रेस के रिजल्ट प्रकाशित हुए तो नायक नारायण सिंह ने ‘लांस हवलदार’ की फीतियाँ अपनी वर्दी पर लगाने से इन्कार कर दिया और हवलदार बनाये जाने की जिद करने लगा।  उस समय मैं कैजुयल लीव पर था।  ड्यूटी पर हाजिर होने पर मुझे सूबेदार मेजर साहब ने उस मामले से अवगत कराया और अगले कदम के लिए मेरी राय जाननी चाही थी। 

मुझे नायक नारायण सिंह पर बहुत क्रोध आया था। मैंने सूबेदार मेजर साहब से कहा था, “साहब, उसे चार्ज शीट पर कमांडिंग अफसर के सामने पेश कीजिए और नायक से सिपाही बना दीजिए।”  सूबेदार मेजर साहब ने मुझे कहा था, “साहब, आप उससे बात करके देखो अगर वह फिर भी नहीं माना तो उसकी चार्ज शीट बना देना।”  

मैंने अपने आफिस रनर को तुरंत नायक नारायण सिंह को बुलाने के लिए भेजा। मैंने उसे हिदायत दी थी, “नायक नारायण सिंह से कहो कि वह लांस हवलदार के रैंक लगा कर तुरंत मुझे रिपोर्ट करे। अगर उसके पास वर्दी तैयार न हो तो किसी दूसरे से मांग कर पहन ले।” नायक नारायण सिंह आधे घण्टे के भीतर लांस हवलदार की वर्दी में मेरे सामने आ खड़ा हुआ था। मैंने उसे बुरी तरह से डाँट कर सूबेदार मेजर साहब के पास भेज दिया था।

 (शेष अगली कड़ी में…) 

हिमाचल प्रदेश के जिला काँगड़ा से संबन्ध रखने वाले भगत राम मंडोत्रा एक सेवानिवृत्त सैनिक हैं। उनकी  प्रकाशित पुस्तकें हैं ―
     
 जुड़दे पल, रिह्ड़ू खोळू, चिह्ड़ू मिह्ड़ू, परमवीर गाथा.., फुल्ल खटनाळुये दे, मैं डोळदा रिहा, सूरमेयाँ च सूरमे और
हिमाचल के शूरवीर योद्धा।
यदाकदा 'फेस बुक' पर 'ज़रा सुनिए तो' करके कुछ न कुछ सुनाते रहते हैं।