साहित्य इतिहास : पुस्तक चर्चा

रमेश मस्ताना होरां दी कांगड़ी पहाड़ी दे इतिहास दी परचोळ करने आळी कताब हाल च ही छपी है। इसा कताबा दी पहाड़िया कनै हिंदिया च चर्चा करा दे भगतराम मंडोत्रा होरां। साहित्य इतिहास लिखणा असान कम्म नीं हुंदा। इस करी असां मस्ताना होरां जो कुछ सवाल भेजे। पहाड़ी समीक्षा ते बाद एह् सवाल जवाब हन। कनै आखर च कताबा दी हिंदिया च समीक्षा है।   

इक नूठी कनैं नौंईं पैहल है : कांगड़ी-प्हाड़ी-च प्रकाशत साहित्त : रीत-परम्परां कनैं त्याह्स

 

रमेश चन्द्र 'मस्ताना' होरां दी कताब  “कांगड़ी-प्हाड़ी-च प्रकाशत साहित्त : रीत-परम्परां कनैं त्याह्स”  इक इदेह्यी कताब है, जिसा यो सच्ची-मुच्ची इक नूठी कनैं नौंईं पैहल ग्लाया जाई सकदा है। इसा कताबा-च जिला कांगड़े दे परांणे त्याह्से दी गल्ल तां होइयो ही है, कन्नैं ही कांगड़े दे जितणे वी कवि-लखारी होए हन कनैं तिन्हां जिसा वी विधा-च जे किछ वी लिखी नैं कताबा दे रूपे-च छापेह्या है, सारे दी ही गल्ल-बात कनैं समीख्या इसा कताबा-च होइह्यो है। 'मस्ताना' होरां अपणी गल्ल-बात रखदेयां होयां अपणी मूरह्ली गल्ल-च इसा कताबा दे लिखणे दे मकसद दे बारे-च साफ-साफ दसी दित्तेह्या है। सैह् लिखदे हन कि जिंञां तिन्हां जिले कांगड़े दियां हदां ते अन्दर ओंणे वाळे लिखारियां दियां रचनां दा इसा कताबा च जिक्र कित्तेह्या है, तिंञां ही जे हर जिले दे लखारी, अपणे-अपणे जिले दे अपणी मां-बोली-च लिखणे वाळे लखारियां दियां रचनां पर लिखह्ण तां ‘हिमाचली-पहाड़ी’ दा कल्याण तां होंणा ही होंणा कनैं क्या-किछ कदेह्या लखोह्या है, तिस दा वी पता लगी जांणा।  कुसी इक लखारिये तांईं हिमाचल प्रदेशे देयां बारहां जिलेयां देयां लखारियां दियां सारियां रचनां दा जिक्र कनैं तिन्हां नैं पूरा न्या करनां भ्हौंएं नांमुमकिन तां नीं है पर थोड़ा-ब्हौत मुश्किल कम्म तां जरूर बझोंदा है। 'मस्ताना' होरां हिमाचल प्रदेशे दी भाषा दे नांयें दे बारे-च पैदा होआ दे मतभेदां दा वी जिक्र कितेह्या है कनैं तिसा दे हिमाचली-पहाड़ी नां दी वी वकालत कितिह्यो है। सैह् एह् वी मनदे लग्गे कि हिमाचली-पहाड़ी जो मन्नता मिलणा हाली तिकर दूरा दी ही कौड़ी है। तिन्हां जो एह् गल्ल वी बड़ी अखरदी बझोई है कि हिमाचली-पहाड़ी-च कवतां मतलब पद्य तां खूब लखोआ दा पर गद्य दे बखरे-बखरे रूपां-च बड़ा ही घट लखोह्या कनैं कताबां दे रूपे-च छपेह्या है। जदकि असलीत एह है जे गद्य लखोणा कनैं छापणा भाषा दी तरक्की तांईं बड़ा लाजमी है। 'मस्ताना' होरां हिमाचली-पहाड़ी-च जियादा ते जियादा कताबां छापणे दी जरूरता पर वी जोर दिंदे नजरी आये हन। तिन्हां एह् सुझाओ वी बड़े जोरैं-शोरैं नैं दित्तेह्या है जे अपणियां लिखिह्यां कताबां दूजेयां लिखारियां-च, खास करी नैं समीख्या करणे वाळेयां-ल जरूर पुजांणियां चाहिदियां तां जे तिन्हां जो पढ़ी नैं समीख्या करणे आल़ा विदुआंन तिन्हां पर किछ लिखी नैं लो पाई सकन।

मिंजो 'मस्ताना' होरां दियां गल्लां कनैं सुझाअ बड़े बद्धिया कनैं सच्चे-सुच्चे लग्गे।  दरअसल असां हिमाचली-पहाड़ी जो कवतां कनैं गीतां दी भाषा ही बणाई छड्डेह्या है। असां सटो-सटिया कवतां ही लिखी जाह्दे कनैं कहाणी, नाटक, लेख, उपन्यास, संस्मरण बगैरा-बगैरा लिखणे दी हाली तिकर वी टाळ ही करा दे हन। अनुवादे दे नांएं पर तां अतिह्यें किछ वी खास नीं होई सकेह्या है। भ्हौंएं लखारियां यो हिमाचली-पहाड़ी-च कवता लिखणा सौखा लगदा होऐ पर एह् गल्ल तां पक्की है जे गद्य दे लखोणे नैं ही पहाड़ी भाषा कनैं मां-बोली दा कल्याण कनैं बाद्धा होंणा है। एह् औक्खा कम्म कुण करह्गा, इसा गल्ला पर वचार होंणा बड़ा जरूरी है ! लखारियां जो इक्की-दूए दियां कताबां जरूर पढ़नियां चाहिदियां कनैं होई सकै तां खरीदणियां वी जरूर चाहिदियां। पढ़ी करी तिन्हां पर अपणी गूढ़ कनैं निर्पक्ख गल्ल-बात वी जरूर रखणी चाहिदी। इसते सारेयां ते बड्डा फाइदा एह् होंणा जे साहित्ते दा मुल्ल वी पौंणा कनैं भाषा दा मानकीकरण वी अपणे-आप ही होंदा चलणा।

कुसी वी गल्ला जो समझणे तांईं तिसा गल्ला दिया जड़ां तिकर पुजणा बड़ा लाजमी होंदा है। कताबा दे पैह्ले ही ध्याये-च कांगड़ा कनैं कांगड़ी दे त्याह्से पर संक्षेप-च बड़ी डुग्घी नजर पाइह्यो है। अपणी जन्म भूमि, अपणे पुरखेयां कनैं वरास्ता-च जे किछ मिलेह्या है, सारेयां जो तिसदी जाणकारी होंणा वी बड़ी जरूरी है। इस दे सौगी-सौगी अपणी-अपणी मां-बोली नैं प्यार कनैं तिसा जो बड़े गरवे कन्नैं बोलणे दा फर्ज वी हर शख्से-यो जरूर नभाणा चाहिदा। दूए ध्याये-च 'मस्ताना' होरां साहित्ते दे भेह्त-किस्मां कनैं लोक-साहित्ते पर लौ पांन्दे हन। एह् ध्याये तां मेरे बरगे स्टूडेंटां तांईं बड़ा ही कम्में दी जानकारी दिंदा है। 'मस्ताना' होरां अजकणे जमाने दियां खोजां — टी.वी., कम्प्यूटर, लैपटॉप, मुबाइल, टैव दे सौगी-सौगी मीडिया कनैं सोशल मीडिया दे जोगदाने-यो वी साहित्ते दी तरक्की तांईं खास मन्नदे हन।  तिन्हां दा गलाणा है जे कवि कनैं लखारी समाजिक प्राणी बणने दे सौगी-सौगी जेकर साहित्तिक प्राणी वी बणन कनैं इक सच्ची-सुच्ची कनैं सुथरी सोच रखह्ण तां सैह् समाजे-यो इक नौंयीं दिशा कनैं दशा देई सकदे हन। ‘मस्ताना’ होरां लोक साहित्ते दे खजाने जो संभाळी करी रखणे कनैं गांह् दियां पीढ़ियां दे हत्थें पकड़ाणे दी गुहार वी लगांदे हन।

अपणिया इसा किताबा दे त्रिए ध्याये-च 'मस्ताना' होरां कांगड़ी कवता दे प्रकाशत बक्खो-बक्खरे रूप-भेदां पर लो पाइह्यो है । तिन्हां कांगड़ी-पहाड़ी कवता यो चार जुगां-च बंडेह्या है। पैह्ले जुगे जो सैह् ‘बाबा कांशीराम जुग’ दा नां दिंदे हन। दूए जुगे दा समां सन् 1950 ते 1975 दा है, जिस-च सोमनाथ ‘सोम’, लच्छमन दास ‘मस्ताना’, चक्रधारी शास्त्री, डॉ. पीयूष गुलेरी, डॉ. गौतम शर्मा 'व्यथित' बगैरा दे जोगदान दा जिक्र है। त्रीया जुग बीह्मीं सदी दे मुकणे तिकर दिया कवता दा जुग है कनैं इकह्मीं सदी दे शुरू ते लेई नैं अज्जे तिकर दा जुग चौथा जुग है, जिन्हां दा 'मस्ताना' होरां बड़ा विस्तारे नैं जिक्र कितेह्या है। कवतां दियां बक्खो-बक्खरियां सारियां ही विधां-च प्रकाशत कताबां दा पूरा-पूरा विवेचन तिन्हां करनें दी कोसत कितिह्यो है। चाहें सैह् महांकाव्य होए, खंडकाव्य होए, जां चाहें मुक्तक काव्य दा रूप होए।

चौथे ध्याये-च 'मस्ताना' होरां कांगड़ी निबन्ध-लेखां दियां परम्परां पर नजर पाइयो है तां पंजमें ध्याये-च कांगड़ी उपन्यास, कहाणी कनैं लघुकथा दी चर्चा-परचोळ वस्तारे नैं सांह्मणें औंन्दी है। छठे ध्याये-च  इन्हां नाटकां, इक-अंकी नाटकां कनैं काव्य-नाटकां दियां परम्परां दा जिक्र करदे-करदे अभिनै दियां किस्मां, नाटक दे तत्त्वां, पातरां, रसां सौगी-सौगी भेह्तां-प्रकारां पर वी लो पाणे कन्नै कांगड़ी-च प्रकाशत होऐ नाटक साहित्ते दा वस्तारे नैं जिक्र कितेह्या है। कताबा दा सत्तुआं ध्या साहित्तिक विधां दा कांगड़ी-पहाड़ी च अनुवादे दियां परम्परां उप्पर लो पांदा है तां अठुआं ध्या कांगड़ी लोक-गीतां पर विस्तारे नैं गल्ल वी करदा है कनैं तिन्हां दिया साज-सम्हाळा दिया जरूरता पर वी जोर दिंदा है।

खीरी ध्याये च “मुकदी गल्ल कनैं सार-निचोड़” करदे-करदे 'मस्ताना' होरां मां-बोली दिया संभाळा कनैं तरक्किया तांईं बड़े कीमती सुझाओ वी दिंदे हन। एह् किताब अपणिया किस्मा दी इक नोखी कताब ही नीं इक दस्तावेज वी कहायी जाई सकदी है। कांगड़ी साहित्त जां कांगड़े पर शोध करने वाळेयां तांईं तां एह बड़े ही कम्मे दी कताब है। मैं तां एह बड़े फख़्र नैं गलाई सकदा जे अपणी भाषा कनैं साहित्ते नैं प्यार करणे आल़ेयां यो एह् कताब जरूर पढ़नां वी चाहिदी कनैं सहेजणा वी चाहिदी।

कताबा दे बारे च रमेश मस्ताना नै गलबात 

दयार :       तुसां रचनात्मक लेखक हन। इतिहास लेखन दे पासे किंञा आई गै ?

रमेश मस्ताना :  सेठी जी, मेरा एह मनणा है जे साहित्तकार दा फर्ज सिर्फ कवता कनैं लेख लिखणे दा ही नीं हुंणा चाहिदा। समाजिक प्राणी हुंणे दे नाते तिस दी नज़र गांह्-पचांह्, उपर-थल्लैं, खरिइया-बुरिइया सौगी-सौगी भूत, वर्तमान कनैं बड़ी दूर भविक्खे तिकर वी हुंणा चाहिदी। लखारियां यो अपणे त्याह्से दा पता हुंणे सौगी-सौगी तिस त्याह्से-च कुस-कुस दा कितणा कनैं कदेह्या जोगदान रेहया है, सब-किछ दा पता हुंणा जरूरी है। कोई वी कम्म जां रचेया साहित्त जे त्याह्स नां बणाई सकै तां नां सैह कम्म ही कम्म हुंन्दा कनैं नां सैह साहित्त साहित्त ही। जे कोई लखारी अज्ज लिखै कनैं कले-परसूं यो ही खत्म होई जाऐ तां नां सैह त्याह्स ही बणनां कनैं नां ही जुगां-जुगां तिकर अमर ही रैहणा। मैं सिर्फ दो ही दुआह्रण दिंन्दा। पैहला एह जे पंचतंत्र दियां कथां मेरे स्हाबे नैं भ्हौंएं तिस जमानें उतणियां सच्चियां हुंन नां हुंन, अज्ज तिस जमानें ते वी जिआदा सच्चियां बझोन्दियां हन। कबीर जी जे किछ अपणे जमानें-च बोली गेयो, अज्ज बड़े-बड़े शोध करणे आल़े पी. एचडी. कनैं डी. लिट. वी करा दे पर तिन्हां दी वांणी कैंह् जे अमर कनैं त्याह्स बणी चुकियो ऐ, तिसा वांणिया दा पार कोई नीं पाई सका दा है। इस बास्तैं मैं वी माड़ी देई एह कोसत कित्ती जे एह पता तां लाइए जे पूरा म्हाचल नीं तां कांगड़े कनैं कांगड़िया पर ही किछ नजर दुड़ाई जाऐ, जे कांगड़े देयां लखारियां अपणी मां-बोली-च क्या किछ, कदेह्या कनैं कितणा-क लिखेया है, इस ही बास्तैं इस त्याह्से यो कठेरने दा कम्म मैं कितेया है।

 

दयार :       इतिहास लेखन ताईं तुसां क्या त्यारी कीती कनै इतिहास लेखन दी क्या पद्धति अपनाई। क्या तुसां दे साम्हणै पैह्ले दी मिसाल या कताब थी?

रमेश मस्ताना :  मेरे मनें-च इसा सारिया गल्ला-बाता दा वचार केई बरी उठदा था जे म्हारे प्रदेसे दे लखारियां दी वरासत कितणी कनैं कदेह्यी है। तुसां दे मुकदे सुआले दा जवाब तां गांह् जाई दिंगा पर म्हाचली-प्हाड़ी, प्हाड़ी जां म्हाचली भाखा दी मन्नता दे बारे-च जे किछ वी सारे बोलदे कनैं बखरी-बखरी मंग रखदे, पैहलें असां एह तां दिक्खिए जे स्हाड़ा साहित्तिक भंडार कितणा-क भरोया है। जिआदा दूर नीं जाई नैं अपणे नेड़ैं-तेड़ैं दी पंजाबी कनैं डोगरी यो दिक्खी नैं वी सारियां गल्लां किछ-किछ तकड़ुए-च जरूर तोलणियां चाहिदियां। इन्हां-ल क्या कनैं कितणा किछ है कनैं इन्हां दे मुकाबिल असां कुत्थू खड़ोत्यो हन।इस बास्तैं मैं बड़ा सोच-वचार करणे ते बाद इस नचोड़े तिकर ही अप्पूं यो सीमत कित्ता जे अजोके कांगड़े दियां जेह्ड़ियां सीमां हन, तिह् तिकर दे लखारियां दा लेखा-जोखा ही पेश कित्ता जाऐ। केइयां मितरां-सज्जणां एह वी सुझाउ दित्ता जे चम्बे दे भट्टियां 'लाके कनैं ऊनें-हमीरपुरे दे लखारियां यो वी शामल कित्ता जांणा चाहिदा। पर जे सच्ची गल्ल गलां तां ऊनें आल़ी अपणी बोली-भाखा यो ऊनवी कनैं हमीरपुरे आल़े हमीरपुरी बड़े दावे नैं गलांणा लगी पेयो। हुंण तिन्हां दा त्याह्स कनैं बोली-भाखा दा त्याह्स कितणा परांणा है, इसदा जवाब सारे अप्पूं ही तोपन तां खरा है। इस बास्तैं मैं अजोका कांगड़ा ही पकड़ेया कनैं तिस दा त्याह्स वी खंगालेया कनैं साहित्ते दा त्याह्स वी तोपया। कांगड़े दा त्याह्स जे जुगां-जुगां परांणा है तां इसदी भाखा-बोली वी पक्का ही है जे सैह वी उतणी ही परांणी है। मैं एह वी दावे नैं गलांन्दा जे कांगड़े दी कांगड़ी बोली-भाखा पंजाबी, डोगरी सौगी-सौगी पूरे उत्तर भारते-च तां समझी ही जांन्दी है, हिन्दी-भाखी जितणे प्रदेस हन, सैह वी इसा यो बड़िया असानियां नैं समझी जांन्दे कनैं जाह्लू कुसी रचनां यो पढ़दे-सुणदे, सारे पूरा नन्द लैंन्दे हन। जिह् तिकर कोई मसाल जां कताब पैहले दी हुंणे दी गल्ल है तां मैं अपणिया कताबा-च वी जिक्र कितेया है जे इदेह्यी इक कोसत पहलें डॉ. गौतम शर्मा 'व्यथित' नैं जरूर कितियो है कनैं तिस-च बीह्मियां सदीया तिकर दा ही लेखा-जोखा है।

 

दयार :       इतिहास लेखन ताईं कताबां कुतू ते कठियां कीतियां? क्या कोई जानकारी दूएयां स्रोतां ते भी लयी? जेह्ड़े लखारी या कताबां छुटी गइयां तिन्हां दे बारे च तुसां क्या सोचदे?

रमेश मस्ताना : कताबां दी परचोल़ा तांईं बे-स्हाबी चाराजोई कनैं जुगाड़ वी लांणा पे कनैं मगजमारी वी करणा पेई। कांगड़ी-प्हाड़ी दियां काफी कताबां मेरिइया अपणिया लाइबेरिया-च वी हन पर कैंह् जे कोई वी मांह्णू जां चीज कदी वी "सम्पूर्ण" नीं हुंन्दी, इस बास्तैं नां तां मेरा एह कम्म ही सम्पूर्ण है कनैं नां ही अपणिया कोसता यो ही मैं पूरी कामयाब मनदा हां। किछ कताबां मंगुआइयां वी गेइयां, किछनां दी जानकारी मुबाइले दे माध्यम नैं वी पूरी कित्ती पर फिरी वी मैं इसा कताबा दे प्रकाशत हुंणे ते पहले तिकर, मतलब जून : 2024 तिकर दियां प्रकाशत कताबां दा जिक्र करणे दी पूरी कोसत मैं कितियो है, फिरी वी जियां पैहलें ही मैं गलाई बैठा, किछ वी कदीं वी "सम्पूर्ण" नीं हुंन्दा, जे किछ छुटी वी गेया हुंगा तां क्या करी सकदा ! फिरी वी मैं एह गलाई सकदा जे भ्हौंएं इक-अद्ध मापदंडे पर ताजा-ताजा ही अलोचना जरूर होई थी पर मैं तिस जो वी जरूरी नीं मन्नेया था, इस बास्तैं तिस मापदंडे यो मैं नीं अपनाया था कनैं जे कोई लखारी छुटेया वी हुंगा तां तिन्नी मिंजो अज्जे तिकर दस्सेया वी नीं जे मेरा नांअ जां मेरिया कताबा दा जिक्र नीं होया है। मैं एह वी दावे नैं गलान्दा जे लोकार्पण पर जां गांह्-पचांह् वी जितणियां कताबां मैं अप्पूं प्रकाशक हुंणे दे नातें बंडदा, शाइद ही कोई बंडदा होऐ।

 

दयार :       तुसां अपणे इतिहास बिच लखारियां/कताबां दे बारे च दस्सेया है। साहित्य दे आधार पर बणने आळियां परंपरां या प्रवृत्तियां दे आधार पर भी वर्गीकरण कीतेया है ?

रमेश मस्ताना :  मैं साहित्ते दियां सारियां विधां दा जिक्र तां कितेया ही कितेया है, तिन्हां दे सारेयां तत्तां कनैं खासियतां पर वी गल्ल करी नैं सारियां विधां पर बखरे-बखरे ध्यां-च वस्तारे नैं गल्-बात वी कितियो है। इतणा ही नीं इक ध्या सार-नचोड़ दा वी है, जिस-च मैं जे किछ वी अपणिया समझा मुजब नचोड़ कड्डेयो हन, सैह दितियो हन। सारेयां ते बड्डी गल्ल एह है जे कांगड़े दे लखारियां दा रुझान सिर्फ कवता दैं पास्सैं ही जिआदा रहेया है, गद्य दे पास्सैं बड़ा धट्ट है। जे लेखां दियां किछ कताबां हन वी तां उपन्यास गिनतिया दे कनैं साहित्तिक नाटक तां कोई वी नीं है, इक-अंकी नाटक जरूर थोह्ड़े-मते हन। इक होर नचोड़ जेह्ड़ा मैं कड्ढेया पर कताबा-च कुसी वजहा नैं नीं दित्तेया, सैह एह वी है जे अकार-प्रकारे कनैं पेजां दे मामले-च कितणियां कताबां हन कनैं कितणे पोत्थू हन एह वी दिक्खणे दी गल्ल है। मिंजो जितणी जांणकारी थ्होई सारेयां ते छोटी कताब हरिकृष्ण मुरारी दी "बड़े स्यांणें लोक" जिस-च सिर्फ इक ही क्हांणी है कनैं सारेयां ते बड्डी कताब रमेश चन्द्र 'मस्ताना' दी "मिट्टिया दी पकड़" लेखां दी कताब है।

 

दयार :       एह् कताब लिखणे च कितणा बग्त लग्गा ?

रमेश मस्ताना : " कांगड़ी-प्हाड़ी-च प्रकाशत साहित्त : रीत-परम्परां कनैं त्याह्स " कताबा पर वचार करणा तां मैं काफी पैहलें शुरू कित्ता था पर फिरी तकरीबन "नौ-म्हीनें" तिकर वेदण झल्ली नैं कताबां कनैं जांणकारी कठ्ठी कित्ती। इस ते परन्त छ-सत्त म्हीनें कताबा दे छपणे-छपुआंणे-च लगी गे। मैं एत्थू एह वी दस्सणा चांहन्दा जे मैं कुसी "व्यावसायिक प्रकाशक" - ल कदीं नां जांन्दा नां गेया। मैं अपणियां सारियां कताबां दा लिखारी वी अप्पूं ही हां, प्रकाशक वी अप्पूं ही हां कनैं जिआदातर बंडणे आल़ा वी अप्पूं ही हां। जितणी वी मेहनत कनैं खर्चा करदा, अपणे ही पल्ले दा करदा, सिर्फ माँ सरस्वती जी दा शीरवाद लैंणें खातर। लच्छमी माता कुत्थीं मेहरबान होई जांह्न तां धन्नभाग नीं तां सरस्वती माता दा शीरवाद ही मेरे बास्तैं सब्बो-किछ।

 

दयार :       तुसां पहाड़ी कनै हिमाचली पहाड़ी दे आंदोलनकर्ता रेह्यो। पूरे सूबे दी इक भाषा तुसां दा सुपना था। इतिहास तुसां कांगड़ी भाषा दे साहित्य दा लिखेया। एह् ता बड्डा बदलाव है। सैह् भी ऐसे बग्ते च जदूं कई लेखक हिमाचली पहाड़ी दे विचार जो खारिज करा दे। क्या एह् मन्नी लइये भई हुण हिमाचली पहाड़ी दी गल बेमतलब है ?

रमेश मस्ताना : सुआल औक्खा वी है, किछ टेढा वी है कनैं अणसुलझ वी है। पूरे म्हाचले दी माॅं-बोली दी मन्नता दे बारे-च बे-स्हाबी कोसत कित्ती, केई पेपर पढ़े, केई लेख, राइट-अप कनैं प्रैस नोट छपुआए, एत्थू तिकर जे इसा गल्ला यो पकड़ी नैं जे म्हाचल बणेया ही प्हाड़ां कनैं प्हाड़िया करी नैं था, इस बास्तैं जे असां पंजाबिया कनैं पंजाब यो छड्डेया तां स्हांजो स्हाड़ी "प्हाड़ी" वी तां मन्नता दे रूपे-च मिलणा चाहिदी। पूरे देशे-च बसेयां म्हाचलियां नैं राब्ता कायम करी इक बड़ा-बड्डा "हस्ताक्षर अभियान" चलाई नै मेमोरेंडम केन्द्र सरकारा तिकर दिल्लिया कनैं प्रदेस सरकारा तिकर शिमलें पुजाया पर हासल क्या होया, मैं किछ नीं गलाई सकदा। असां तां पूरे म्हाचले दी गल्ल करदे रेह, सारियां बोली-भाखां-च म्हाचली-प्हाड़ी दा "जाग-जगैंण" लाई दैंही जमाई नैं छोल़ी करी "मक्खण" कड्ढणे दे सुपनें पाल़दे रेह पर लत्तां धीड़ने आल़ेयां ओह् छाह् छोल़ी जे गल्ल नीं गलांणे दी ! घट्टों-घट्ट बारहां जिलेयां दियां ठाह्रां बोली-भाखां बास्तैं अपणे-अपणे दावे हुंणा लगी पे। मन्नता तां इक ही भाखा यो मिलणा ही औक्खी है तां दसां-बीहियां यो कुन्हीं पुच्छणा ! मैं कुसी दी वी मां-बोली यो छोटा जां बड्डा नीं मन्नदा। सारियां ही बोलियाँ-च अज्ज साहित्त थोह्ड़ा-ब्हौत कुसी नां कुसी रूपे-च लखोआ दा। सारे लखारी वी आदरजोग हन पर जित्थू जे पूरे देशे कनैं प्रदेसे दी गल्ल होऐ तां दिल जरूर बड्डा करी लैंणा चाहिदा। जिह् तिकर सिर्फ कांगड़ी भाखा दे ही त्याह्स लिखणे दी तुसां गल्ल कित्ती है, मैं जितणी मैंहनत कनैं कोसत कित्तियो, तिस ते अद्धी वी होर करदा तां पूरे म्हाचले दा वी त्याह्स पूरा कित्ता जाई सकदा था पर मन था, नीं बणेया तां नीं ही बणेया !

भाखा दे मन्नता दे मुद्दे पर कांगड़े दिया तरफा ते मैं जितणियां जगहां पर पेपर पढ़े जां कांगड़े दे कुन्हीं होरनी वी पेपर पढ़ेया तां सभनां ही पूरी म्हाचली-प्हाड़ी दी जां प्हाड़ी दी ही गल्ल कित्ती, कदीं वी कांगड़ी दा राग नीं लाय्या। जदकि होरनां केइयां अपणी-अपणी माँ-बोली दी पैरवी वी कित्ती कनैं दावा वी कित्ता जे इसा ही बोलिया जो मन्नता मिलणा चाहिदी।

सेठी जी, तुसां अज्ज ब्हानें नैं छेड़ पाई तां दु:खी मनैं नैं किछ गलोई गेया नीं तां इस मुद्दे पर मैं किछ वी गलांणा छड्डी ही दित्तेया है। हुंण तां मिंजो एह वी लगदा है जे एह मुद्दा ही हुंण खत्म है। जिन्हां प्हाड़िया ते ही सब-किछ लेया, सैह ही नीं चांहन्दे, प्रदेस जिस नैं बणेया, सैह ही नीं चांहन्दा, राजनीतिक इच्छा-शक्ति, जेह्ड़ी सारेयां ते जिआदा जरूरी है, सैह ही नीं है। असां तां सैह जमानां वी दिक्खेया जाहलू मुख-मंतरी कनैं मंतरी कवियां सौगी स्टेजा पर बिच्छिया दरिया पर सौगी बैंह्न्दे थे। पराशर होरां यो मैं अप्पूं देसराज डोगरा जी दे छोटे अटैचिइए यो चुकी नैं चलदे दिक्खेया। तदैह्ड़ी लेखक अपणे यो धन्नभाग कनैं "गौरवान्वित" समझदे थे। अज्ज कुत्थू मत्था ऊच्चा करणा, कुसी-ल नां गल्ल करणे जोगी बेह्ल नां गल्ल सुणने जोगी ही टैंम ! चौंह्नीं पास्सेयां ते सारेयां लखारियां दे राग वी बखरे-बखरे कनैं बत्तां वी बखरियां-बखरियां ही। इस तरीके नैं कुजो क्या मिलणा कनैं कुत्थू ते क्या थ्होणा !

रमेश मस्ताना
झांझर छणकै, पखरू बोल्लै
(पहाड़ी कविता),
कागज के फूलों में
(हिंदी कविता),
आस्था के दीप,
लोकमानस के दायरे,
 पांगी घाटी की पगडंडियां एवं परछाइयां,
मिटिया दी पकड़ (गद्य साहित्य)

एक अनूठी और नयी पहल है : 

कांगड़ी-प्हाड़ी-च प्रकाशत साहित्त : रीत-परम्परां कनैं त्याह्स

 रमेश चन्द्र 'मस्ताना' जी की पुस्तक “कांगड़ी-प्हाड़ी-च प्रकाशत साहित्त : रीत-परम्परां कनैं त्याह्स”  एक ऐसी पुस्तक है, जिसे सच-मुच एक अनूठी और नयी पहल कहा जा सकता है। इस पुस्तक में जिला कांगड़ा के प्राचीन इतिहास की बात तो हुई ही है, साथ ही कांगड़ा के जितने भी कवि-लेखक हुए हैं और उन्होंने जिस भी विधा में जो कुछ भी लिख कर पुस्तक के रूप में प्रकाशित किया है, सब का ही जिक्र और समीक्षा इस पुस्तक में हुई है। 'मस्ताना' जी ने अपनी बात रखते हुए अपनी भूमिका में इस पुस्तक के लिखने के उद्देश्य के बारे में स्पष्ट कर दिया है। वह लिखते हैं कि जैसे उन्होंने जिला कांगड़ा की सीमाओं के अंदर आने वाले लेखकों की रचनाओं का इस पुस्तक में जिक्र किया है, वैसे ही अगर हर जिले के लेखक, अपने-अपने जिले के अपनी मातृभाषा में लिखने वाले लेखकों की रचनाओं पर लिखें तो हिमाचली-पहाड़ी का कल्याण तो होगा ही होगा साथ में क्या-कुछ कैसा लिखा गया है, उसका भी पता चल जाएगा।  किसी एक लेखक के लिए हिमाचल प्रदेश के बारह जिलों के लेखकों की सभी रचनाओं का जिक्र और उनके साथ पूरा-पूरा न्याय करना चाहे असम्भव तो न हो पर थोड़ा-बहुत कठिन कार्य तो अवश्य ही लगता है। 'मस्ताना' जी ने हिमाचल प्रदेश की भाषा के नामकरण के बारे में उत्पन्न हुए मतभेदों का भी जिक्र किया है तथा उसके ‘हिमाचली-पहाड़ी’ नाम की वकालत  की है।  वह यह भी मानते लगे कि कि हिमाचली-पहाड़ी को मान्यता मिलना अभी दूर की ही कौड़ी है। उन्हें यह बात भी बहुत अखरती लगी कि हिमाचली-पहाड़ी में कविता अर्थात पद्य तो खूब लिखा जा रहा है पर गद्य के विभिन्न रूपों में बहुत ही कम लिखा और पुस्तक रूप में प्रकाशित किया गया है। जब कि वास्तविकता यह है कि गद्य का लिखा  जाना और प्रकाशित होना भाषा की उन्नति के लिए अनिवार्य है। 'मस्ताना' जी हिमाचली-पहाड़ी में अधिक से अधिक पुस्तकें प्रकाशित करने की आवश्यकता पर भी बल देते नजर आते हैं। उन्होंने यह सुझाव भी बड़े जोर-शोर के साथ दिया है कि अपनी लिखी पुस्तकें दूसरे लेखकों, विशेष कर समीक्षा करने वालों के पास पहुंचानी चाहिए ताकि उन्हें पढ़ कर समीक्षा करने वाला विद्वान कुछ लिख कर उन पर प्रकाश डाल सके। 

मुझे 'मस्ताना' जी की बातें और सुझाव बहुत बढ़िया और सच्चे-सुच्चे लगे। दरअसल हमने हिमाचली-पहाड़ी को कविताओं और गीतों की ही भाषा बना कर रख छोड़ा है। हम निरंतर कविताएं ही लिखते जा रहे हैं तथा कहानी, नाटक, लेख, उपन्यास, संस्मरण इत्यादि के लेखन की अभी तक अवेहलना कर रहे हैं। अनुवाद के नाम पर तो अभी तक कुछ भी विशेष नहीं हो सका है। चाहे लेखकों को हिमाचली-पहाड़ी में कविता लिखना आसान लगता हो पर यह बात तो सत्य है कि गद्य में लिखे जाने से पहाड़ी भाषा और मातृभाषा का कल्याण और विकास होना है। यह कठिन कार्य कौन करेगा, इस मुद्दे पर विचार होना अतिआवश्यक है।  लेखकों को एक दूसरे की पुस्तकें पढ़नी भी चाहिए और हो सके तो खरीदनी भी अवश्य चहिए। पढ़ कर उन कर अपनी गूढ़ व निष्पक्ष राय भी जरूर व्यक्त करनी चाहिए। इससे सबसे बड़ा लाभ यह होगा कि साहित्य के मूल्यांकन के साथ-साथ भाषा का मानकीकरण भी स्वत: होता चलेगा। 

किसी भी बात को समझने के लिए उस बात की तह तक पहुंचना अतिआवश्यक होता है। पुस्तक के पहले ही अध्याय में कांगड़ा और कांगड़ी के इतिहास पर संक्षेप में बड़ी गहरी नजर डाली गई है। अपनी जन्म भूमि, अपने पूर्वजों और विरासत में जो कुछ मिला है, सभी को उसकी जानकारी होना भी लाजिमी है। इस के साथ-साथ अपनी-अपनी मातृभाषा से प्यार व उसे बड़े गर्व के साथ बोलने का फर्ज भी हर शख्स को निभाना चाहिए। दूसरे अध्याय में 'मस्ताना' जी साहित्य के भेद-प्रकार और लोक-साहित्य पर रोशनी डालते हैं। यह अध्याय तो मेरे जैसे विद्यार्थियों के लिए बड़े ही काम की जानकारी देता है। 'मस्ताना' जी वर्तमान युग की खोजों — टी.वी., कम्प्यूटर, लैपटॉप, मोबाइल, टैब के साथ-साथ मीडिया और सोशल मीडिया के योगदान को भी साहित्य के विकास के लिए खास मानते हैं। उनका मत है कि कवि और लेखक समाजिक प्राणी बनने के साथ-साथ यदि साहित्यिक प्राणी भी बनें और एक सच्ची-सुच्ची व सुथरी सोच रखें तो वे समाज को एक नई दिशा व दशा दे सकते हैं। ‘मस्ताना’ जी लोक साहित्य के खजाने को संभाल कर रखने तथा अगली पीढ़ियों के हाथ सौंपने की गुहार भी लगाते हैं।

अपनी इस किताब के तीसरे अध्याय में 'मस्ताना' जी ने कांगड़ी कविता के प्रकाशित भिन्न-भिन्न रूप-भेदों पर प्रकाश डाला है। उन्होंने कांगड़ी-पहाड़ी कविता को चार युगों में बांटा है। पहले युग को वह ‘बाबा कांशीराम युग’ का नाम देते हैं। दूसरे युग का कालखंड सन् 1950 ते 1975 का है, जिस में सोमनाथ ‘सोम’, लच्छमन दास ‘मस्ताना’, चक्रधारी शास्त्री, डॉ. पीयूष गुलेरी, डॉ. गौतम शर्मा 'व्यथित' वगैरह के योगदान का जिक्र है। तीसरा युग बीसवीं शताब्दी के अंत तक की कविता का युग है तथा इक्कीसवीं सदी के आरंभ से लेकर अभी तक का कालखंड चौथा युग है, जिस का ‘मस्ताना’ जी ने विस्तार में वर्णन किया है।  उन्होंने कविता की विभिन्न विधाओं में प्रकाशित पुस्तकों का पूरा-पूरा विवेचन करने का प्रयास किया है, चाहे वह महाकाव्य हो, खंडकाव्य हो या चाहे मुक्तक काव्य का रूप हो। 

चौथे अध्याय में 'मस्ताना' जी ने कांगड़ी निबन्ध-लेखन की परम्पराओं पर दृष्टि डाली है और पांचवें अध्याय में कांगड़ी उपन्यास, कहानी व लघुकथा पर चर्चा विस्तार से सामने रखी है। छठे अध्याय में उन्होंने नाटकों, एकांकी नाटकों तथा काव्य-नाटकों की परम्पराओं का जिक्र करते-करते अभिनय की किस्मों, नाटक के तत्त्वों, पात्रों, रसों के साथ-साथ भेदों-प्रकारों पर भी रोशनी डालने तथा कांगड़ी में प्रकाशित हुए नाटक साहित्य का विस्तृत वर्णन किया है। पुस्तक का सातवां अध्याय साहित्यिक विधाओं का कांगड़ी-पहाड़ी में अनुवाद की परम्परा पर रोशनी डालता है तो वहीं आठवां अध्याय कांगड़ी लोक-गीतों पर विस्तार से चर्चा करता है और उनकी साज-संभाल की आवश्यकता पर बल देता है। 

अंतिम अध्याय में “मुकदी गल्ल कनैं सार-निचोड़” करते-करते 'मस्ताना' जी मातृभाषा की संभाल और उन्नति के लिए बहुमूल्य सुझाव भी देते हैं। यह पुस्तक अपनी किस्म की एक अनुपम पुस्तक ही नहीं एक दस्तावेज भी कही जा सकती है। कांगड़ी साहित्य अथवा कांगड़ा पर शोध करने वालों के लिए तो यह बहुत ही काम की किताब है। मैं बड़े गर्व के साथ कह सकता हूं कि जो लोग अपनी भाषा और साहित्य से प्रेम करते हैं, उन्हें यह पुस्तक जरूर पढ़नी चाहिए और अपने पास संभाल कर रखनी चाहिए।

पुस्तक : कांगड़ी-प्हाड़ी-च प्रकाशत साहित्त : रीत-परम्परां कनैं त्याह्स। (विवरणात्मक एवं विवेचनात्मक रचना) लेखक  : रमेश चन्द्र 'मस्ताना'। प्रकाशक : प्रिय प्रकाशन, मस्त-कुटीर : नेरटी (कांगड़ा) 176208. प्रकाशन वर्ष  : 2024. आइएसबीएन : 978-93-340-5037-0. मूल्य : रु. 500/- (सजिल्द) 

हिमाचल प्रदेश के जिला काँगड़ा से संबन्ध रखने वाले भगत राम मंडोत्रा एक सेवानिवृत्त सैनिक हैं। उनकी  प्रकाशित पुस्तकें हैं ―

     

 जुड़दे पल, रिह्ड़ू खोळू, चिह्ड़ू मिह्ड़ू, परमवीर गाथा.., फुल्ल खटनाळुये दे, मैं डोळदा रिहा, सूरमेयाँ च सूरमे और

हिमाचल के शूरवीर योद्धा।

यदाकदा 'फेस बुक' पर 'ज़रा सुनिए तो' करके कुछ न कुछ सुनाते रहते हैं।