कनै गायक औल्‍हैं होई जांदा

लोक गायक प्रताप चंद शर्मा होरां जो श्रद्धांजलि कने किछ जरूरी सुआल

मसहूर लोक गायक प्रताप चंद होरां चली गै। पर अपणेया गीतां च अमर होई गै। लोकां देयां मनां च इतणे डुग्‍घे बैठ्यो हन भई कोई हटाई नी सकदा। सरीर चला गया, संगीत चली रेह्णा। मतेयां लोकां जो तिन्हां दा नां ग्रां पता है। कई खुसकिस्‍मत तिन्‍हां नै मिल्‍यो भी होणे, सौगी भी रेह्यो होणे। पर म्‍हातड़ां साह्ई मतेयां जो दरसणां दा मौका भी नीं मिल्‍या होणां है। साछात सुणने दा भी नीं। पर 'झुलदे चीलां दे डाळू' गीत अंतर्आत्‍मा च गूंजदा रैंह्दा। छोटे हुंदेयां हमीरपुरे दिया झनयारिया कनै असां दे ग्रांएं दरवैलिया चीलां दे बण थे। तिन्‍हां च सां सां हौआ बगदी थी। लगदा हा भई एह् गीत इन्‍हां बणां ताईं लखोया है। मैं समझदा हा भई एह गीत कुनी लिखेया नीं है। लोकां अप्‍पी ई बणाई लेह्या। कनै बणाह्या भी खबरै कदूं? जदूं बण बणे होणे, तदूं ई एह गीत भी बणी या होणा। पैह्लके जमानें लोकगायकां नै हुंदा भी एही था। गीत धारां धारां गूंजदा रैंह्दा कनै गायक औल्‍हैं होई जांदा। लोकगीत सदियां सदियां लोक कंठां च ई जींदा रैंह्दा।

रेडियो आया ता गीत हौआ चीं ऐं घरैं घरैं पूजी गै। कैसटां सीडियां आइयां ता गीत बजारां च बिकणा पूजी गै। गीत बजारां दी वस्‍तु होई गै। तिन्‍हां पर बजारां दे नफे-नुकसानां दे बाड़ लगी गै। जिन्‍हां बजार साधी लै, सैह् फायदे च रैह, जिन्‍हां ते बजार नीं सधोए, सैह हत्‍थां मळदे रही गै। मतेयां कलाकारां दे बसे च भी नीं हुंदा बजारां जो बसे च करना। सैह अपणिया कला कनै कलाकारिया च ई गुआची रैंह्दे। न, नां दी फिकर न नामे दी चिंता। प्रताप चंद होरां मेरा ख्‍याल इसी किस्‍मा दे कलाकार थे। तिन्हां दिया कलाकारिया दा इक होर पख भी है। तिन्‍हां गीत अप्‍पू ई लिख्‍यो, अप्पू ई तर्जां बणाइयां। मेरा ख्‍याल तिन्हां अपणेयां गीतां दी कताब भी छापी थी। सैह अपणिया ई दुनिया च मस्‍त रैह्। सोचणे आळी गल है भई हिमाचले ते कोई भूपेन हजारिका कैंह् नीं निकळदा।

प्रताप चंद होरां दे बारे च सोचदिया बारिया होर भी कई सुआल खड़ोई जांदे। असां इन्‍हां सुआलां ते बची नीं सकदे।

पैह्ला सुआल एह है भई राज्य सरकार कनै केंद्र सरकार कलाकारां दा ख्‍याल कैंइ नीं रखदियां। इन्‍हां दे विभाग भी कई, अकादमियां भी कई, मंत्रालय भी कई। तिन्‍हां दियां स्‍कीमां भी कई। जेह्ड़ा सरकारां दियां फाइलां ते पार पाई लैंदा, जेह्ड़ा सरकारां गैं ठूठा लई नै खड़ोई जांदा, फेरियां पांदा या सरकारां दे मुने:जामां पर डोरे पांदा या अफसरां, मंत्रियां, मीडिया नै पीं:गां पाई नै सरकारा दिया नजरी च जाई बैंह्दा, सैह् गफ्फे खाई लैंदा। जेह्ड़ा अपणे कम्‍मे नै कम्‍म रखदा होऐ, सरमालू होऐ, असूलां दा पक्‍का होऐ, तिह्दे पासैं अफसरां, सरकारां दी कोई जिम्‍मवारी नीं? ऐसा सिस्‍टम बणना चाहिदा जिसते सभनी सच्‍चेयां कलाकारां जो लाणे-खाणे दी फिकर न करना पौऐ।

बजार भी अपणिया जिम्‍मवारिया ते नह्स्‍सी नीं सकदे। जे कलाकारे दिया कला बेची नै बपारियां दे घर भरोई सकदे ता कलाकारां जो भी तिन्हां दा बाजव हिस्‍सा मिलणा चाहिदा। पर हटियां बजारां कनै मंडियां दा न्‍याय, दया, मेहरबानिया नै रिस्‍ता घट ई हुंदा। हुण वैहे कैसटां सीडियां दा जमाना बीती गया। सोशल मीडिया दा राज है। कलाकारां जो तिह्दा हसाब कताब सिखणा चाहिदा।

रेडियो, अखबारां, टीवी चैनलां जो भी जिम्‍मेवारी लैणे दी जरूरत है। 'कौन बनेगा करोड़पति' प्रोग्रामे दी मिसाल असां दे साम्‍हणे है। एह लोक समाज सेवा दे कम्‍मैं लगेयो लोकां जो बड्डी रकम जताई दिंदे। केंद्र सरकारें सीएसआर (कारपोरेट समाजिक जिम्‍मेवारी) भी सुरू कराया। इस च सरकारी कंपनियां अपणे मुनाफे दा कुछ हिस्‍सा धर्मे कर्मे दे कम्‍मे पर खर्च करदियां। जे सैह हजारां करोड़ सरदार पटेले दी मूर्ति बणाणे दे वास्‍ते दयी सकदियां तां कलाकारां ताईं कैं: नीं खर्च करी सकदियां। पुराणे जमाने च राजे महाराजे कलाकारां पाळदे थे। हुण सरकारां कनै बजारां दी जिम्‍मेवारी है।

इन्‍हां दे सौगी जिस समाजे च कलाकार पैदा हुंदा, कनै जिह्दिया सेवा च जिंदगी भर खटोंदा, तिस समाजे दी जिम्‍मेवारी भी घट नीं है। सिर्फ सुणणे दिखणे दा ई मजा नीं लैणा, कलाकारां कनैं कलाकृतियां नै प्‍यार करना, तिन्‍हां दी इज्‍जत करना, तिन्‍हां दी सम्‍हाळ करना समाजे दी ही जिम्‍मेवारी है। स्‍हाड़े लोक बड़े धर्मी कर्मी हन। मंदरां, बाबेयां दे घरां भरदे रैंह्दे। भंडारेयां लाई लाई रज्‍जेयां जो ठुकांदे रैंह्दे। इन्‍हां कम्‍मां दा क्‍या फायदा। असां जो नासुकरा समाज नीं चाहिदा, दिलदार समाज चाहिदा। जिन्‍हां कलाकारां दी माली हालत ठीक न होऐ, तिन्हां जो स्‍हारा देणा ज्‍यादा जूरूरी है।

प्रताप चंद होरां दिया मुफलिसिया ते इक होर गल भी सुझदी भई कलाकारे जो अपणा ख्‍याल अप्पू ही रखणा पौणा है। असां दुनिया देह-देही बणाई लइयो जिसा च जादातर लोक अपणे बारे च ही सोचदे। जीणा दिन-दिन करड़ा होआ दा। दूए दा हक नीं खोह्णा पर अपणा छडणा भी नीं। अंदरैं कूळे रैह्णा, बाह्रैं करड़े होणा।

अनूप सेठी                                 

पहाड़ां दे सुर

इक लोकगीत - कई सुर

सोशल मीडिया खासकरी नै फेसबुक कनै यूट्यूब तुहां दिया पसंदा जो ऐसा पकड़दे भई धूं देई दिंदे।  जिञा मन्‍नेया तुहां जो मधरा पसंद है कनै बोटी चौं: पंजां किस्मां दे मधरे परीह्ंदा जाऐ, जे खट्टा पसंद होऐ ता भांति भांति दे खट्टेयां दियां त्रूड़ियां बगाई दै, तां तुहां दी क्‍या डौल हुंगी? तिञा ई यूट्यूबा पर कोई पहाड़ी गीत सुणी लेया, तिनी तिह्दे अखले बखले सारे कठेरी ल्‍यौणे। फेसबुक भी इसी दाऐं इतणियां पोस्‍टां बूजी दिंदा भई दिखणे, पढ़ने, सुणने आळा अक्‍की जांदा। एह् सोशल मीडिया दा सुभाअ ई है। इनी हर गल गांह् धकणी है। खबरै गाह्क कुती टकरी जाऐ। सोशल मीडिया ताईं हर यूजर गाह्क है। तिनी दिखणा है भई यूजर कुसी न कुसी तरीके  नै चिमड़ी रैह्। खैर छड्डा।

मैं गल एह् करनी थी भई इक दिन इक प्हाड़ी गीत सुणेया ‘धूड़ू नच्‍चेया ...’ । मोहित चौहान गा दा था, सदगुरु जग्‍गी होरां दे जलसे च। सदगुरु सिबरातरी जो बड़ा जलसा करदे। भांति भांति दे गीत... संगीत... ढोल नगाड़े... । इन्‍हां दूंह् मतलब मोहित कनै सदगुरु होरां मिली नै ‘संकट संकर हरना...’ भी गाह्या है। पर जदेह्या लमन बैंडे आळ्यां गाह्या, तदेही मिट्ठी भाख होरनीं ते नीं लगदी। मैं नीं सुणी। मोहित चौहाने दा अपणा तरीका है। अपणियां ई तानां लांदा। एह् नौंए गायक गिटार कनै ड्रम्‍मां सौगी लोकगीतां गांदे। मिंजो एह् पसंद हन। इस मामले चे मैं सुचियारा नीं है। मैं नीं समझदा भई लोकगीत सिर्फ ढोलकिया कनै बांसुरिया नै ही गाया जाऐ तांई सुच्‍चा हुंदा। असली गल ता एह् है भई सुरीला कनै सादा होणा चाहिदा। बदलदे बग्‍तां दे असर गीतां पर भी पौंदे। इक्की जमाने च सिंथेसाइजरें लोकगीतां दा भला नीं कीता। नकली भाखां ई निकळियां। गिटार तिसते कई गुणा खरा है।

गल फिरी खिसकी नै होरती जाई रही। अहां ‘धूड़ुए’ पर गल करनी है। इस गीते चे एह बिंब बड़ा जबरदस्त है। प्‍यारा। लोकल। घरेलू। शिवजी होरां धूड़ मळी लइयो कनैं जटां खलारी नै नच्‍ची पेयो। गद्दी भाइएं दिक्‍खेया कनै तिह्जो लग्‍गेया हुंगा, एह् कुण बालक है, भतोई चलेया। धूड़ू तां जणता कुसी जागते दा ई नां है। अपणे ही अड-पड़ेसे दा। जटां खलारी नै नचणे दा मतलब तिनी क्‍याड़ी भी तांह् तूंह् मड़क्‍याई होणी। जिसनै जटां खिल्‍लरियां दुसियां होणियां। फिरी नगाडे भी बज्‍जी पै। फिरी गौरां कनैं गंगा भी आई रेहियां। सैह् लड़ी पइयां। सौकणियां साही। तिन्हां दे गैह्णे औह् पै तांह् तूंह्। खरा तांडव मचेया। ताला पर कनै तानां पर। फिरी भगीरथ आया कनै गंगा जो लई गेया। धूड़ू कल्‍लम-कल्‍लाह रही गेया। एह् सारे रूप इतणे मानवी हन, इतणे अड-पड़ोसे दे, भई भगवान भी माह्णू ई बणाई तेया। एह् स्‍हाड़े लोक दी महिमा है। शास्‍तर परमातमे दियां व्‍याख्‍यां करदा। परिभाषां दिंदा। बडबडियां गल्‍लां करदा। एह्थी शिवजी म्‍हाराज धूड़ू बणी नै नचदे रैह् कनै जणासां दी घुळाटी हुंदी रेही।

मोहित चौहाने दा गीत सुणदे सुणदे, होरनां गायकां दे गायो गीत यूट्यूबा पर तरदे रैह्। ‘सांभ’ आळे अरविंद शर्मा होरां सुनील राणे दा गाया ‘धूड़ू’ भी यूट्यूबा पर रखेया। एह् भी बड़ा सुरीला है। सुनीले दी उवाज भी टणकदी है। राणा रिह्ड़िया पर गाणे सौगी नाटी भी पांदा रैंह्दा। बद्दळ कनै प्‍हाड़ कनै हरियाली। छैळ जी छैळ। इक गीत होर है। अभिज्ञ बैंड आळयां दो, अंशुल कपूरे दा गाह्या। । इञा लगदा भई एह् मुडेयां कुसी रेस्‍टोरेंटे च बह्यी करी गाह्या। ओथी सुणने आळे नौजुआन भी हन। थोड़े जेह् हिप्‍पी टाइप। फिरी यूट्यूबें इक होर वर्शन कड्डी लंदा। तिह्ते परंत मैं लगा टोळणा भई एह् होई नी सकदा भई करनैल होरां एह् गीत नी गाया होऐ। तिन्हां दा भी मिली गया। पर तिस सुणी इतणा मजा नीं आया। इक ता सिंथेसाइजरे दा क्‍या करिए। माफ करनेयों पर जे बजाणा ई होऐ ता चज ता चाहिदा। नईं ता क्‍या फायदा। जेह्ड़े लोक लोकगीतां च गिटार पसंद नीं करदे, सैह् सिंथेसाइजरे दे बारे च क्‍या सोचदे हुंगे?  

बगते सौगी चलदेयां चलदेयां तौर तरीके भी बदलोंदे जांदे। पर बेसुरे कनै बेताले नीं चली सकदे। नौईं पीढ़ी मेहनत करा दी है कनै नौएं-नौएं तरीके भी टोळा दी है। सोशल मीडिया दिया मेहरबानिया ते अहां दूर बैठ्यो भी दिक्‍खी सुणी लेया दे। कनैं सदगुरु दिया हजारां दिया सभा च प्‍हाड़िया दे बोल गूंजा दे। एह् सुख संतोस ता है। 

मोहित चौहान 

सुनील राणा

अंशुल कपूर

करनैल राणा

एक लोकगीत-कई सुर

कुछ दिन पहले यूट्यूब को खंगालते समय मोहित चौहान का गाया लोक गीत ‘धूड़ू नचया...’ प्रकट हो गया। वह भी जग्‍गी सदगुरु के जलसे में। हजारों भक्‍तों की भीड़ में पहाड़ी का यह गीत मोहित की भाख में गूंजता है। विशाल जन समुदाय के सम्‍मुख पहाड़ी गीत की प्रस्‍तुति को देखना सुनना रोमांचकारी है। धुन को बरकरार रखते हुए मोहित ने यह गीत अपने खास अंदाज में गाया है। वे बीच बीच में अपनी चिर-परिचित तानें लेते हैं। साथ साथ सदगुरु के शिष्‍य बड़े बड़े ढोल-नगारे भी बजते रहते हैं।

गीत के बोल बड़े आत्‍मीय और घरेलू बिंब खड़े करते हैं। राख मले हुए शिव भगवान को ‘धूड़ू’ कहना उन्‍हें नितांत मानवीय बना देने जैसा है, सारी दैवीय सत्‍ता को दरकिनार करते हुए। ऊपर से शिव ने जटाएं भी बिखेर लीं हैं। वे नाचने से बिखरी हैं, ऐसा नहीं लगता। धूड़ू जटाएं खलार (बिखेर) कर नाच उठा। और ढोल नगारे बज उठे। कहीं कोई उत्‍प्रेरक है जिसने शिव को नृत्‍य करने के लिए प्रेरित कर दिया है। लोक गीत का रचियता उसे अपने धरातल पर उतार कर मानवीय और साधारण बना देता है। पार्वती और गंगा को ग्रामीण स्‍त्रियों की भांति पानी भरने भेज देता है। उन्‍हें सौतेली पत्‍नियां बना कर लड़ा देता है। उनके गहने टूट बिखर जाते हैं। झगड़ा शांत करने के लिए भगीरथ गंगा को अपने साथ ले जाते हैं।

गीत के बोल, उसकी बिंबावली और धुन मनमोहक है। इसे सुनते हुए निजता, आत्‍मीयता, सहजता और ग्राम्‍यता का एहसास होता है। यह सब शिव के औघड़ चरित्र से मेल भी खाता है। दिव्‍यता को मानवीय धरातल पर उतार लाना और भी प्रियकर हो जाता है। 

Dhudu, Lord Shiva is dancing accompanied by the divine music With his hair open and feral Ganga and Gaura are going to get water Gauri inquiries from Ganga about the nature of their relationship Ganga smilingly tells her that she is the step-wife of lord Shiva Ganga and Gaura indulges in a fierce battle Resulting in the shattering of their beautiful ornaments Sage Bagirath takes Ganga with her And Shiva, the master is left alone. This song is a prayer to invoke lord Shiva to assume the form of Natraja and bless the people with his eternal dance of life and death. Any event of celebration in Gaddi life is beautifully expressed in its folk songs which is accompanied by dance and playing of gaddi traditional musical instruments (Dhol and Naggada). The hallmark of this folk song is the invocation of Lord Shiva and it catalogues the episode of deliberation between mother Paravati and holy Ganga about the status of their respective relationship with Shiva. Shiva is addressed as Dhudu (the one who is the supreme creator and destroyer and rubs the ash of the cremation ground signifying the transient nature of the mortal world). On the invocation of his devotees, Natraja , the Shiva,blesses them with Tandava (eternal dance of life and death). The song talks about the instance when Mother Paravati and Mother Ganga go to fetch water where Paravati questions Ganga about the status of relationship between two of them. Ganga affirms that she is the second wife of Shiva which results in a fierce battle between the two goddesses breaking their precious jewelry. Sage Bagirath takes away Goddess Ganga leaving Lord Shiva alone.  (Courtesy : Saambh)    

हेतराम तनवर

राष्ट्रपति  अब्दुल कलाम दे हत्थां राष्ट्रपति सम्मान ने सम्मानित हिमाचल दी लोक कनै शास्त्रीय गायकी दी पछेण 84 सालां दे  हेत राम तनवर होरां दा किछ दिन पेहलें  गुजरी गै। सैह बमार रेहा दे थे। 

1 जनवरी 1932 जो कुनिहार हरकोट च संगीत दी परम्परा वाळे परिवारे च इन्हां दा जन्म होया था। इन्हां पेहलें अपणे पिता गुड्डू राम ते कनै उसते बाद चाचा लच्छी राम ते सुगम संगीत सिखया। राष्ट्रपति सम्मान ते अलावा संगीत नाटक अकादमी दिल्ली कनै हिमाचल कला,संस्कृति कनै भासा सम्मान ने सम्मानित हेतराम जी दी उआज  आकाशवाणी शिमला पर 1955 च इस दी स्थापना ते ही सारे हिमाचले च गूंजदी ओआ दी। 

इन्हां देस-वदेस तिकर हिमाचली लोक संगीत जो ख्याति दुआई। इन्हां दी  गाईयो गंगी, शंकरी, मोहणा व बामणा रा छोहरूवा अज भी हर कुसी दी  जुआनी पर गाणा लगी पोन्दी।
इन्हां  अपणी माता दे गुज़रने  ते  बाद शिमले दे माहूंनाग मंदिर च शरण लई। इसते बाद इन्हां पिछें हटी की नीं दिखया । इन्हां दिया लोक गायकीया जो इन्हां दे परुआरें भी संभाळी ने रखया। आकाशवाणी शिमला पर इन्हां दे नुंहां, पुत्रां कनै पोतरुआं दी उआजा च लोकगीत बजदे रेहंदे।

इंडियन आइडल ते परसिद्ध कृतिका तनवर इन्हां दी पौतरी है।

हेतराम तनवर 
...............

कुनिहार ते ओन्दीयाँ होआं दसया

अज धौलाधारा जो 
गीतां दा ईक संत नीं रिहया
जिसदयां गीतां च गूंजदी थी 
असां सारयां दी  हार 
असां सारयां दी जित 
हरकतां कनै मुर्किंयां देहियां 
कि कोई पूजी जाए धौलाधार ते कुनिहार 
या हंडे सांडू दे मदाना
जित्थु बेकसूर मोहणा जो फांसीया दा रस्सा
अज भी घुटी-घुटी जांदा 
कनै  हेतराम दी उआज गान्दी
मोहणा दे गलें उपड़यो रस्से देया नशाणां

हेतराम दी याद आणे दा  कोई ईक मौसम नीं होणा है
पीछा करना है असां तिन्हां दियाँ यादां दा
असां ते रोकी नीं होणा है
समिंटें ने लदोई गाहं चलदा अर्की दे नंबरे वाळा ट्रक 
नम्‍होल दी चढ़ाइयां या मोड़ 
इस घाटे  या तिस घाटे दे तिखे मोड़

हेतरामे जाह्लु भी गाया, तार कसया था
तिसदे साफे साही 
साफ कनै चिट्टा  तिन्हां दिया दाढ़ीया साही
हेतरामें हुण  भी गाणे  हन असां दे बछोह 
असां सारयां दे मिलण
म्हारियां खुशियां 
बाईं-खुहां दे नखरे
पहाडाँ दे छाले 
रूख़ाँ दे ठूंठाँ दी व्‍यथा 
पहाड़े दियाँ खाकां पर उपड़ीयाँ लूचां दी कथा 
देणे गंभरीया दे  बोलां जो सुर 
देणी लंम्मिया टेरा च 'बामणा रा छोहरूआ' जो  उआज 
हेतराम कुत्थी नीं गे
हेतराम कुत्थी नीं जान्दे
इस वग्त जाह्लु 
लोक ते विरत है लोक 
कनै पछेणा ताईं दौड़ा दे 'फोक'  
विधां तोपा दियाँ राज्‍याश्रय 
नीं झुकणे वाळा ईक ऊंचा दयार जरूरी है  
जेड़ा गल्लाइ सके 
'आऊं कसी कौ डरूं थोड़ी भी.....'
जेड़ा गाई  सके लोक दे अंदरला  लोक 
अण डरे 
अण रुके 
अण थके 
इस करी
हेतरामें गान्दे रेहणा है
हेतरामें  याद ओन्दे रेहणा है

-नवनीत शर्मा

(लोक संगीत दे  विख्‍यात बुजुर्ग हस्‍ताक्षर हेतराम तनवर जी दी स्‍मृति जो समर्पित। तिन्हां दे बारे च  ईक किस्‍सा एह भी है कि जाह्लु सैह राष्‍ट्रपति होरां ते  सम्‍मान लेणा गे ता सुरक्षा कर्मियाँ तिन्हां दी तलाशी लेणा लगे ता इन्हां तिन्हां जो बुरे हालें  झिड़की ता। ‘एह क्‍या करा दे।‘ इन्हां ते जाह्लु पुच्छया गिया कि तुसां जो  डर नही लगा ता इन्हां दा जवाब था, मैं कुसी ते डरदा थोड़ी)

सांभ गीत-संगीत दी (कुंजड़ी - मलहार , चम्बा )

पत्रकार कनै कार्टूनिस्‍ट अरविंद कनै मीडिया मास्‍टर विकास राणा होरां मिली नै पहाड़ी संस्‍कृति दी साज सम्‍हाळ करा दे। इह्दे बारे च हुण तुसां दयारे पर भी पढ़ी सकदे। अरविंद होरां कुंजड़ी मल्‍हार दे बारे च दस्‍सा दे हन।

सांभ गीत-संगीत दी

मते साल पैह्लें चम्बे दे राजयां अपणे स्‍तुतीगाण ताएँ लखनऊ ते अवधाल सद्दे कनै लगदे ग्रां मंगला च बसाये। इना अवधालां कुंजड़ी-मल्‍हार दी रचना कीती। कुंजड़ी-मल्‍हार च सौण रुत्‍ता दे बारे च गीत हन। जिन्हा च जनानां दी बिछोह बेदण भी सामल है। मतलब एह् भई नायिका बिछोह च कुछ इस तरीके नै कई भाव-भंगमाँ कनै अपणिया बेदणा जो कुंजड़ी-मल्‍हार दे गीतां च प्रगट कर दी भई तिसदी झांकी मिंजरा दे मेले च अज भी चम्बे दे कलाकारां ते एह सुणने कनै दिखणे जो मिली जांदी।

पैह्लें कलेले दे वक्त (संझ कनै राती दे बिचला गोधुली काल) एह गीत गाये जांदे थे। पर अजकल इक्‍की पासें नौजुआन अपणे लोक संगीत ते दूर हुंदे जा दे कनै दूए पासें मुफलिसिया दे हलातां च असां दे लोक कलाकारां ते जाह्लू मर्जी गाण गुवाई लैंदे। असल च हर राग रागणिया सुणने कनै गाणे दा इक वक्त हुंदा है।

कुंजड़ी-मल्‍हार च हर तिसा जनाना दी बेदण सामल है जिसा दा प्यारा (कंत या प्रेमी) या ता कुथी दूर परदेस नौकरी करना गिया या लामा च लड़ना गिया या भेडां चारना गिया या कुसी भी बजह नै गीते दिया नायिका ते दूर है, ऐह देही जनाना संझके वक़्त जाह्लू सबनां दे कंत घरें औंदे कनै इसा दा प्‍यारा दूर हुंदा ता इनां गीतां च सैह् जनाना अपणियां भावनां कनै बेदण  प्रगट करदी। 

 

सांभ गीत-संगीत की
बहुत पहले चम्बा के राजाओं ने अपने स्तुतिगान के लिए लखनऊ से अवधाल बुलाये जिनको कि साथ लगते गावं मंगला में बसाया गया , इन अवधालों ने कुंजड़ी - मलहार की रचना की , कुंजड़ी - मलहार में सावन ऋतु से संबधित गीत हैं जिनमें कि नारी की विरह वेदना का समावेश है 

यानि की नायिका विरह में कुछ इस तरह से विभिन्न भाव भंगिमाओं के साथ अपनी वेदना को कुंजड़ी - मलहार के गीतों के माध्यम से प्रकट करती है जिसका मंचन आज भी चम्बा के कलाकारों के ज़ानिब मिंजर के मेले में देखने और सुनने को मिलता है 

पहले कलेला के वक़्त (गोधूलि यानि शाम और रात के बीच का समय ) ये गीत गाये जाते रहे हैं लेकिन आज जब युवा वर्ग अपने लोक संगीत से विमुख हो रहा है तो ऐसे में मुफलिसी के दौर से गुजर रहे हमारे लोक कलाकारों से जब मर्जी परफॉर्म करवा लिया जाता है जबकि संगीत में हर राग रागिनी को सुनने और गाने का एक वक़्त होता है 

लॉजिक साफ़ है कुंजड़ी - मलहार में हर उस नारी की विरह वेदना का समावेश है जिसका प्रियतम (पति या महबूब ) या तो कहीं दूर परदेस में नौकरी करने गया है या युद्ध में गया है भेड़ें चराने गया है या किसी भी बजह से गीत की नायिका से दूर है , ऐसी नारी जब शाम के वक़्त जब सबके पति घर आते हैं और उसका उससे दूर होता है तो ऐसे में इन गीतों के माध्यम से वो नारी अपने इमोशंस को एक्सप्रेस करती है

कुंजड़ी - मलहार च मते सारे गीत हुंदे

जिञा कि

"गनिहर गरजे 

मेरा पिया परदेस "

(गनिहर-मेघ )

सुन्दरा बेदर्दिया 

अक्खी दा ना तू हेरया

कन्ना दा सुणया हो 

तू ताँ अधि राति मेरे सुपणे च आया 

(हेरया - देखा )

शब्द हन

उड़ - उड़ कुँजड़िए , वर्षा दे धियाड़े ओ 

मेरे रामा जींदेयां दे मेले हो

बे मना याणी मेरी जान , उड़ - उड़ कुँजड़िए

पर तेरे सुन्ने वो मडावां , रूपे दियां चूंजा हो 

बे मना याणी मेरी जान , उड़ - उड़ कुँजड़िए

चिकनी बूंदा मेघा बरसे , पर मेरे सिज्जे हो 

ओ मेरे रामा याणी मेरी जान , उड़ - उड़ कुँजड़िए

उच्चे पीपला पीहंगा पेइयां , रल-मिल सखियाँ झूटप गइयां हो 

झूटे लांदीआं सेइयाँ हो , ओ मेरे रामा मना याणी मेरी जान ,

जींदे रेहले फिरि मिलिले , मुआ मिलदा ना कोई 

बे मना याणी मेरी जान , उड़ - उड़ कुँजड़िए

कुंजड़ी चातके साही इक्‍क पंछी है

ए कुंजड़ी तू उड़ 

वर्षा के दिन आ गए हैं 

मेरे प्रियतम को सन्देश दे , कि अब तो मिलने का समय आ गया 

देख तू उन्हें अपने साथ लेकर आना , मैं तेरे पंख सोने से मड़वा दूँगी 

चोंच चांदी से सजा दूँगी तू उड़ और मेरा काम करके आ 

वर्षा की ऋतु है , मेरे पंख भीग जाएंगे , मैं कैसे उड़ूँगी , 

सन्देश देकर आती अन्यथा मैं जरूर जाती ,

ऊंचे पीपल पर झूले पड़े हैं , मिल जुल कर सहेलियां झूला झूलने गयी 

परन्तु मुझे मेरे प्रीतम की याद , उदास बना देती है

कुंजड़ी उड़ और उड़ कर जा 

ज़िन्दगी रही तो फिर मिलेंगे , फिर कई बरसातें आएँगी 

ए कुंजड़ी तू उड़ कर जा , और मेरे प्रीतम को संदेसा दे कर आ

मलहार

मेरे लोभिया हो , आ घरे हो , मैं निक्की याणी हो 

मैं निक्की याणी ,

जीउ कियां लाणा हो कंथा , मेरेया लोभिया हो , आ घरे 

सेज रंगीली ना सेज रंगीली , मेरे जाया परदेस हो कंथा

मेरे लोभिया हो , आ घरे हो 

पाई के बसीले ना पाई के बसीले , ते याणी जिंद ठगी हो कंथा

मेरे लोभिया हो , आ घरे हो

मेरे लोभी पति घर आ , मैं अस्वस्थ हूँ 

मेरे प्रियतम मैं मन कैसे लगाऊँ 

मेरे लोभी प्रियतम घर आओ 

मैं चाव से सेज बिछाती हूँ , मेरे परदेसी कंत

मेरे लोभी प्रियतम घर आओ 

तूने मुझसे प्रेम जता कर , मेरा कोमल जीवन ठगा है

सबसे दुखद पहलू हमारी परम्पराओं को सहजने के काम को लेकर ये रहा है हम लोग अपनी रिवायतों से इस कदर विमुख हो बैठे हैं कि स्थानीय स्तर पर हम लोगों को अपनी संस्कृति की जानकारी नहीं है।

( अवधाल यानी कि संगीतज्ञ वैसे अवधाल फ़ारसी का शब्द है लेकिन उस वक़्त फ़ारसी , उर्दू आदि भाषाओँ का पहाड़ी रियासतों में प्रभाव रहा है )

पहाडां दे सुर

इसी भजने जो करनैल राणा होरां दे सुरां च सुणा। 

दूंहीं गाायकां दी लग लग दुनिया है।

पहाडा़ं दे सुर

पहाडा़ं दे इन्‍हां सुरां सुणा भला