भूपेंद्र भूपी दियां कवतां

  

अज पेश हन कवि भूपेंद्र जम्वाल भूपी होरां दियां पंज कवतां। 

मूह्रली तस्वीर : जपानी चित्रकार असाई चू दा सन 1887 च जलरंग च बणाया इक पहाड़ी ग्रां दा चित्र  

  1  

फ़िक्र जे है तां

दुखां   गमां   ते  न्हस्सा  कर

खिड़खिड़ करी के हस्सा कर

 

तर्फ़ैनां  ते नी  आस लगाणी

अपणिया कमरा कस्सा कर

 

हर  कोई  नी अपणा हुन्दा

जाळां बिच मत फस्सा कर

 

गल्ल कोई ना कौड़ी लग्गें

एह  देह्या जादू झस्सा कर

 

चन्द्रमें ते है  छैळ थोबडू

तू लेप्पां मत घस्सा कर

 

आळी टाळी  कैह्नो करनी

फ़िक्र जे है तां दस्सा कर

 

लोकां 'ने भावें मिलदी रैह

दिले 'च मेरे ही बस्सा कर

  

  2  

मोमो खांदे चल

 रळीमिळी के सुणदे कने सुणान्दे चल

इक्की दूए दे अथरू फिरी बगान्दे चल

 

महंगी कॉफ़ी पीणे दे दिन बीती गए

खोखें बेही के सस्ते मोमो खांदे चल

 

गल्लां   मुकदियाँ   नी  थियाँ  करी-करी

तिह्नां दिनां जो याद करी मुस्कान्दे चल

 

हत्थां-ओंगळीं  पकड़ी  घुमदे  फिरदे  रहे

हुण देई तसल्ली दिलां जो पत्यान्दे चल

 

किस्मता   बिच  लिखेया  होणा इञा  ही

एही सोची के हाक्खीं जो समझान्दे चल

 

अपणे  फ़र्ज़  नभाणे  मने  जो मारी के

दोस्ती सच्ची दिले ते हुण नभान्दे चल

 

ख़ुश  जे  है  तां  खुश  ही रेह्यां जानी तू

अगले जन्मे मिलणे दी सौंह खांदे चल

 

 

  3  

चढ़ाई  उप्पर  चूंडिया  फिरी थल्लें फोड़ना

सिक्खें कोई तुसां ते दिल किह्ञा तोड़ना

 

दराटे  लेई  निहाळा  दे सांजो तुसां पता है

मिलदेयां ही तुसां दिल मुंडिया ते मरोड़ना

 

न्हठी न्हठी  चलदा  है  फिरी  तुसां  पासे  जो

कितना कि रोकणा दिल कितना कि होड़ना

 

चीण्डू लाई  के  अरो  रोणा भी नीं दिंदे तुसां

कुसा कूणां लुक्की असां संघा एह घरोड़ना

 

देह देह्या  भी  चाहिदा  नीं कुसी कन्ने करना

एह हाल दिक्खी कुसीने दिल कुनीं जोड़ना

 

  4  

'मैं भी घुलेया घोळ'

गल्ल बड़ी पुराणी है

फिरी भी मैं सुनाणी है

जवानी हाली आइओ नी थी

ताहलू दी एह कहाणी है

 

मेला कुफरी दा था आया

रौणक बड़ी भारी थी

इस बरी पैसे डबल खर्चणे

कित्तियो ख़ूब त्यारी थी

 

टमक टंगोए  छिंज बज्जी

छोकरमत्ता लगाई चुंग

मैं भी घुळना सोची लेया

मन 'च मेरे आया जुंग

 

लीतडू , घटारू , दाणु , माणु

सारे ही कुद्दी पेयो थे

थोड़े चिरे'च कमीज़ पजामा

जिस्में पर नी रेह्यो थे

 

लंगोट कस्सी के दंद दस्से

नां लखाई दित्ता अपणा

दिले'च तरीक़े सोची रखे

कुस दाएं है विरोधी नपणा

 

पहली कुश्ती  तोते कने

घटारुए दी थी घुळाई गेई

तोतें धोबी पछाड़ लगाया

घटारू इकदम पेया ढेई

 

हाइबो हाइबो करदा सैह

पिढ़े ते बाहरे जो नसेया

दो पल मैं भी खज्जळ होया

अज्ज कुथू मैं आई फसेया

 

सारे हल्ला पाणा लग्गे

तोता गेम है कड्डी गेया

घटारू बचारा ऐसा नट्ठा

कपड़ेयां भी सैह  छडी गेया

 

मेरा दिल कुछ कमणा लग्गा

मिंजो ने क्या होंगा सीन

कुछ न कुछ सोचणा पौणा

नी तां बज्जी जाणी बीन

 

हिम्मत करी जुगाड़ लगाया

चिपळू भाई मैं कित्ता त्यार

दोयो मिली जुली कमांगे

जित्त होए भौवें होए हार

 

जाहलू  असां दी बारी आई

किस्मता छडी दित्ता किल्ला

चिपळुए ने कोई होर मेळेया

मिंजो कने जोधा मिल्ला

 

जोधे सिद्धे जफ्फी पाई 'ती

कस्सी के मैं पकड़ी पाया

इह्ञा जिक्केया मुंडका तिन्नी

बड़िया मुश्कला ने साह आया

 

कड़कड़ हड्डियां बोली पेइयाँ

लत्तां बाहीं नी रेह्या त्राण

सारे ही गुआs दुखणा लग्गे

लग्गें निकली जाणे प्राण

 

झोटेयां साहीं जैल्लें जोधें

बांह जाहलू मरोड़ी मेरी

पिट्ठी कड़ाके कढी दित्ते

सज्जी जंघ  करी'त्ती  ढेरी

 

छडी दे जोधे! पैरां पौन्दा

मैं तिसने फ़रियाद लगाई

जेहड़े मिलगे तू ही रखेयाँ

असां दूह्नी दी सब कमाई

 

तरस तिसजो आया थोडा

दित्ती मुंडिया जो आज़ादी

जान बची तां मत्थे टेके

कदी नी घुळगा सौंह खाह्

 

हार मन्नी के ढैन्दा पौन्दा

पिढ़े कंढे मैं आई पुज्जा

इक्क बारी लोक हसदे दुस्से

तिसते बाद नी कुछ भी सुज्झा

 

हाख खुड़ी जे त्रिये दिने

हस्पताले दा कमरा दुस्सा

अपणी हालत दिक्खी तां

अप्पू पर ही आया गुस्सा

 

समझ आया जे हिम्मता बाहर

कदी भी कुछ नी करना

जे कोई लीस्सा होए डराणा

पर जे तगड़ा होए तां डरना

 

अक्ल आई पर हड्डां भनाई

अज्जे बाद नी पंगा लैणा

पैह्लें अपणा आप परखणा

बादे विच कुछ चुकणा थैणा

 

तुसां कदी गलती मत करदे

गल्ल मेरी हुण लेया मन्नी

इत्थी मत इसा छड्डी जांदे

सौगी लेई जानेयो गट्ठी बन्नी

 

  5  

मैं बेह्लड़ नाकारा बन्दा

कम्मे ने हत्थ लांदा नी

रड़काटी चौद्धर चौबी घण्टे

घरें पैर टकांदा नी ।

 

कदी कुथकी कदी कुथकी नचेया

निचले बैह्णा औंदा नी

सुपने विच भी भाषणबाजी

चैना ने कदी सौंदा नी

 

घरे वाळेयां भी छडेया खुल्ला

जित्थू मर्जी रिड़क प्रांह

फ़िक्र फाका नी टबरे दा तां

घुमदा रेह हुण तांह तुआंह।

 

खब'नी पैरें चक्कर कितने

उपरे वालें पाई छड्डेओ

कमाणा कुछ भी औंदा नी पर

मीनकिया साहीं टुंड अड्डेयो

 

एह चौद्धर कदी ओह चौद्धर

खामखाह ही पाई लेइओ

अपणे आपे जो लायक़ समझदा

हाक्खीं पट्टी छाई गइओ

 

अक्ल पल्ले नी कौड्डिया दी

होर अपणी मैं क्या सुणां

बस इतणा ही है बथेरा कि

नां बड़ा कने उज्जड ग्रां 

भूपेन्द्र जम्वाल 'भूपी' 

कांगड़ी कनै हिंदी दे लेखक, टांकरी लिपि दे जाणकार, 

शिक्षा विभाग च सेवारत कनै आकाशवाणी च आकस्मिक उद्घोषक    

राजीव त्रिगर्ती दियां कवतां

 

अज पेश हन कवि, कहाणीकार, भाषाविद्, राजीव त्रिगर्ती होरां दियां सत प्रेम कवतां। 

मूह्रली तस्वीर : सीसे पर भापे पर उंगळिया नै उकेरेया चित्र : सुमनिका सेठी   

  1  

अपणे बारे बिच

 मैं ठीक सोचदा रेह्या

तू भी ठीक सोचदी रेह्यी

 

मैं तेरे बारे बिच सोचदा रेह्या

तू मेरे बारे बिच सोचदी रेह्यी  

 

असाँ सोचदे रैह् मता कुछ

इक्की दुव्वे दे बारे बिच

शायद ठीक-ठीक ही

 

नीं सोच्चेया असाँ

अपणे बारे बिच

किछ भी ठीक !

  

  2  

तां फिरी इह्ञा करदे

 हुण नीं लिखदा कुछ भी

तू बुझदी भी है मेरा लिखेया कि नीं

एह् सोच्ची करी

 

लिपियाँ जाणियाँ-पछैणियाँ

कुसी भी भाषा जो

करी सकदियाँ बगानियाँ

लिपियाँ सचमुच ही

समझा ते बाह्र करी दिन्दियाँ भाषा जो

उइयाँ इक्क ही भाषा बोलने वाळे भी

इक्की-दुव्वे कन्ने गलान्दे

मती बरी होन्दा कि

नीं समझदे इक्की-दुव्वे दी भाषा

इक्क ही भाषा होई जान्दी

दूँह् जणेयाँ बिच बेगानी

जे नीं होए सुणने पर ध्यान

या नीं गमदा होए

कुसी दा गलाया

 

तां फिरी इह्ञा जे करदे

ना तां लिखदे

ना ही गलान्दे

रैह्णा दिन्दे

मने दिया भाषा मने बिच

कोई ओह्ङ्गा मने दा प्रेमी

लाह्ङ्गा मने कन्ने लौ

मने कन्ने मन लाई

मने दी भाषा

मने ते दो बोल

सुह्णगे-गलाह्ङ्गे

तां मने जो खुश करी थैंगे !

  

  3  

प्रीता दा फुल्ल

 मेरे हत्थें गुलाबे दा फुल्ल था

मैं तिज्जो कैंह् दिन्दा फुल्ल

भ्यागा जो मुरझाई जाणा था फुल्लें

होर भी क्या दिन्दा

सारे स्वागत अधूरे ही लग्गे मिंज्जो

प्रीता ते गाँह्

प्रीत मुकणे पर भी नीं मुकदी

जुगे दे मुकणे परन्त भी

अगले जुगे दा पैह्ला स्वागत

प्रीत ही करदी

 

प्रीत इक्क अंदरूनी फुल्ल है

बाह्रें दुसदा नीं अपर

साहाँ ते लई सारेयाँ फुल्लाँ दी मुस्क

तिसते ही है

मुस्कड़ोणे ते लई सारिया दुनिया दे रंग

तिसते ही हन् !

 

  4  

तेरिया ख़ुशिया बिच

 उइह्ञा

माफ नीं कित्ता जाई सकदा था

तेरा अपराध

कुसी भी कीमता पर

इह्ञा ही तैं बिच आळी

छड़ाई लेया अपणा हत्थ

जाह्लू हत्थे दी

बड़ी भारी ज़रूरत थी

 

तिसा लोळी बिच

रुढ़ने दा मता डर नीं था

पर था इक्क साथ

जिसने फुलदी थी छाती 

लक्खाँ दे साथे मुजग

बझोन्दा था तेरा साथ

 

दिले दे हत्थाँ हारेया माह्णू

भुली जाणा चाह्न्दा

अपणे सारेयाँ ते बुरे पल भी

सैह् होणा चाह्न्दा शरीक

तेरिया ख़ुशिया बिच

अपणिया ख़ुशिया जो

फाहे बिच लटकोइया दिक्खी करी भी !

 

  5  

थोड़ा देह्या तेल पान्दे

तेरा कोई स्नेहा

नीं ओन्दा कुथी ते

 

मैं सोचदा रेह्या

ओह्ङ्गा कोई कबुत्तर

लई ओह्ङ्गा तेरा सन्देश 

अपर कबुत्तर सिर्फ़

मेरे अंगणे चोग्गा चुगणा आया

 

मैं सोचदा रेह्या

ओए कोई हरकारा

घोड़े पर बैट्ठी

लई ओए सन्देश

अपर घोड़ा सिर्फ चुगणा आया

मेरेयाँ गुआड़ेयाँ-पछुआड़ेयाँ दा घाऽ

 

मैं सोचदा रेह्या

ओए कोई डाकिया

खाकी पैह्नी

सैकला देयाँ पैंडलाँ मारदा

सैह् आई करी

पुछदा रेह्या बखलेयाँ दा पता

नीं आयी कोई तार नीं चिट्ठी

 

मैं सोचदा रेह्या

रेडियो दे कार्यक्रमे बिच

ओह्ङ्गा कोई स्नेहा

अपर नीं था मेरे नाएँ

कोई ढक्केया-पलेटेया स्नेहा

 

डर था जे

कोई पकड़ी नीं लै कबुतरे जो

डर था जे

खोही नीं लै कोई हरकारे दे हत्थाँ ते स्नेहा

डर था जे

डाकिया दस्सी नीं दे भेजणे वाळे दा पता

डर था जे

कोई सुणी समझी नीं लै रेडिये दा स्नेहा

 

हुण आई गेया वट्सएप

तू भेज स्नेहा

मैं मिटाई दिह्ङ्गा पढ़ने परन्त

भेजदे रैंह्गे स्नेहे इक्की-दुव्वे जो

पढ़दे-मटाह्न्दे

डर एत्थू भी है

एत्थू भी लग्गियाँ नज़राँ

कफन्दियाँ दियाँ

कुछ भी होई सकदा

स्नेहा पढ़ोई सकदा

घुमी सकदा पले बिच

सत्ताँ समुन्दराँ पार

 

छड्ड पराँह्

ज़रूरत भी नीं है

दूरें-दूरें ही

हाक्खीं मिटदे

तू कुछ बोल

मैं कुछ बोल्लाँ

जुगाँ ते जेह्ड़ी नीं बदलोई

तिसा भाषा बिच गलान्दे

प्यारे दे अणबुझ दिए बिच

चल थोड़ा देह्या तेल

असाँ भी पान्दे !

 

  6  

सुन्नमसुन्नी

तू नीं है तां पता ही नीं चल्ला

सारियाँ कंधाँ काह्लू पायी

सणे समाने घूड़ सिरे पर, झूँडे साहीं

 

तू नीं है तां पता ही नीं चल्ला

काह्लू रस्तें जम्मी पै एह्

फुलणू,  झुड़े-बसूंट मते ही

 

तू नीं है तां पता ही नीं चल्ला

काह्लू चिड़ियाँ अह्ल्ले पाए

बटाँ ते बच्चे तिह्नाँ उडाए

 

तू नीं है तां होआ दा सब

चुप-चणाकें

बह्डी-बह्डी खा दी मिंज्जो

सुन्नमसुन्नी तिज्जो बाह्जी

 

दस्सें जे,  तुध काह्लू ओणा !

  

  7  

इक्की दुए पर फणसोन्दे

टिपिएँ-टिपिएँ बणदा चुट्टू

चुटुएँ-चुटुएँ घड़ा भरोन्दा

छोटे-छोटे फुंड्डू मिलदे

फुंडुएँ फुंडुएँ बद्दळ बणदे

अम्बर रज्जी करी भरोन्दा

तूह्ड़े-तूह्ड़े पुंगरासे ने

रुक्ख पूरा ही सैल्ला होन्दा

कळियाँ-फुल्लाँ सजदा बाँका

प्यार घड़े दे पाणिए साहीं

रिमझिम बह्रदे बद्दळाँ साहीं

पतराँ साहीं रुणझुण करदा

रंग-बरंगा फुल्लाँ साहीं

हसदा-हसदा खुश्बू दिन्दा

पल भर प्यारे कन्ने सोच्चा

पाणिएँ, बदलाँ, रुक्खाँ पर भी

पान्दे प्यार असाँ जे मितरो

प्यारे दा इक्क घड़ा बणान्दे

टिपिएँ-टिपिएँ तिस जो भरदे

प्यारे दा इक्क नीला अम्बर

फुंडुएँ फुंडुएँ बदलाँ भरिए

प्यारे दा इक्क रुक्ख लगाइए

सैल्ले-सैल्ले पतराँ भरिए

टुंडमुंडिएँ प्यारें घचळोन्दे

सारे प्यारे ने लंबड़ोन्दे

रळदे इक्की दुए कन्ने

इक्की दुए पर फणसोन्दे !

 

राजीव कुमार त्रिगर्ती 
कवि, कहाणीकार कनै भाषाविद् 
हिंदी कविता संग्रह: गूलर का फूल (2008)
ज़मीन पर होने की खुशी (2020)
प्रेम में होना (2024)
पहाड़ी  कविता संग्रह छपणे आळा है।