गल सुणा

दयारे दा सफर : मठैं मठें चली रेह्या 

हिमाचल मित्र पत्रिका पंज साल चल्ली थी; दो हजार पंज ते दो हजार दस तक। पंजां सालां च दस अंक निकळे। मुंबई ते चल्ली नै हिमाचल पूजदी थी। कुशल कुमार होरां मुंबई दे मते लोक कठेरे। तिन्हां बाल लाया। हिमाचल दे लेखक, संस्कृतिकर्मी जुड़दे गै। होरनां शैह्रां दे हिमाचली भी जुड़े। बाह्रलेयां मुल्कां दे भी। फिरी इक दिन ऐसा आया भई सारा समान कागजां च ही रही गया। छपया नीं। बगैर सरमाए ते लघु पत्रिकां दा एही हाल हुंदा। फिरी असां अप-अपणिया दुनियादारिया च फसी गै। 

दुबारा असां पंज जणे कठरोए। थे ता दूर दूर पर इंटरनेटे नै बन्होयो थे। द्विजेंद्र द्विज, नवनीत शर्मा, प्रकाश बादल, कुशल कुमार कनै मैं। प्रकाश बादल होरां कल्लेह्यां ही ‘दयार’ ब्लॉग बणाई नै चलाई ता। सन 2011 दे दिसंबर म्हीने दिया 27 तरीकां जो तिन्हां पैह्ली पोस्ट पाई। फिरी 31 दिसंबर जो द्विजेंद्र द्विज होरां नौंए साले दी कवता पाई। 

सिलसिला चली पेया। 2012 च 27 पोस्टां पइयां। पहाड़ी उर्फ हिमाचली पहाड़ी उर्फ कांगड़ी मंडयाळी चंबयाळी (जाकी रही भावना जैसी। देखी भाषा मूरत तिन तैसी।।) भाषा दे कई लेखक जुड़े। कवता, कहाणी, लेख, यात्रा, अनुवाद, लोक संस्कृति, चर्चा, समीक्षा ... कई कुछ छपदा रेह्या। अनुवाद हिंदी, अंग्रेजी, मराठी वगैरा भाषां ते  होए। भगत राम मंडोत्रा होरां दी फौजी जीवन दियां यादां दी लम्मी सीरीज चल्ली। तिन्हां दियां 45 लड़ियां छपियां। पहाड़ी हिंदी दूईं भाषा च।  ब्राजील दे कवि मारियो द अंदरेदे दी इक कवता दे अंग्रेजी अनुवाद दा पहाड़ी, कुमाउनी, वागड़ी, पंजाबी कनै हिंदी अनुवाद इक्की जगह छपेया। 

पर दयारे जो चलाणे आळे भी हौळें हौळें जणता थकणा लगी पै। सरीर भी टैम मंगणा लग्गा। भाई अपणेयां होरनीं कम्मा च भी रुझदे गै। लेखकां कलाकारां दा सुभाव देह्या हुंदा भई सैह् अपणिया मर्जिया दे मालक हुंदे। मर्जी होऐ ता लिखणा, मर्जी होऐ ता छपणा छपाणा। नीं मर्जी होऐ ता मौजां। 

मैं कनै कुशल होरां मठे मठे लगी रैह्। भई लो बळी रैह्। ताल्हू ही भाई रोशन जसवाल होरां आई जुड़े।सैह् कवि, लेखक, समाचार वाचक, संयोजक ता हन ही, तिन्हां जो तकनीकी जानकारी भी जबरदस्त है। तिन्हां ब्लॉगे दी नुहार जरा बदली। रंग रोगन कीता। सैह् ता होर भी फंह्ग लाणा चाह् दे थे पर मेरा ही मन नीं मन्नेया। मिंजो लगदा भई साहित्य दा ब्लॉग सांत सुभावी ही होणा चाहिदा। पोर्टल बणाई नै साहित्य कुती पचांह ही न रही जाऐ। दुनिया च वैसे ही गहमागहमी भतेरी है, साहित्य तिसा च भंगळोई न जाए। तिह्दा कम्म है चौंहीं पासैं नजर रखणा। शायद एही वजह हुंगी, असां दयार ब्लॉगे नै इक लैण जोड़ी थी – पहाड़ी भाषा दी नौईं चेतना। सुरु ते ही एह् गल मिंजो बड़ी जरूरी लगदी रही। अज्जे तिक। जदेह्या लखोंदा औआ दा, तदेह्या लिखदे जाणे च मजा नीं। नौईं भाषा ही नीं, अपणे वग्ते नै टकराणे दे तरीके भी नौएं चाहिदे। इसी करी नै  ब्लॉगे पर रचना चुणने ताईं भी असां जरा सौह्गे होई नै चलदे। जादातर इसदा नतीजा एह् हुंदा भई लेखक भाई अपणियां रचनां ही नीं भेजदे। हर लेखक स्वयंभू है। कुसी पर असां दा क्या बस। फिरी भी पिछलेयां बारां- तेरहां सालां च दो सौ ते उप्पर पोस्टां लगियां। सत्तरां ते उप्पर लेखक शामिल होए। सिर्फ असां दिया भाषा दे नीं, हिंदी, अंग्रेजी, मराठी, तिब्बती वगैरा दे। कनै ब्लॉग होणे दिया वजह नै एह् सारियां रचनां तुसां दुनिया दे कुसी भी हिस्से च, कुसी भी वक्त पढ़ी सकदे। रचनां पर अपणे विचार भी लिखी सकदे। 

मतेयां दिनां ते सोचा दा था भई अपणे मने दी गल एह्थी करां, पर बिच मैं अपणेयां घरेलू कम्मां च पंझळोई गया। दयारे पर कोई पोस्ट भी नीं पाई होई। 

कुशल कुमार होरां अपणी मुंबई डायरी शुरु कीतियो है- पहाड़ी हिंदी दूईं भाषा च। मेरिया वजह नै सैह् भी दो म्हीने बंद रही। हुण जरा बेह्ल मिल्ली है। नौएं साले च दुबारा हरकता च औणे दा मन्सूबा बन्हेया है। 

मेद है अपणिया भाषा दे सारे ही लेखक, भौंए अपणिया भाषा जो जेह्ड़ा भी नां देई लैह्ण, दयारे पर अपणी कृपा दृष्टि बणाई रखगे। 

तुसां दियां रचनां दी, कताबां दी, जरूरी मुद्देयां पर बैह्सां दी असां जो निहाळप है। नौंए  जोशे नै, नौईं चेतना दी, नौईं गलबात कीती जाऐ। कुशल होरां दी मुंबई डायरी दी अगली किश्त त्यार है। तुसां भी पढ़ने ताईं त्यार होई जा। 

नौआं साल मुबारक।

नौआं लेखन मुबारक।

अनूप सेठी

     

          

31 दिसंबर, 2011 दी पोस्ट 

मुबारक तुसाँ जो नौंआँ साल मितरो !

                                          द्विजेन्द्र 'द्विज'

एह सुभकामनाँ दे लेया थाळ मितरो !

भरी बगतैं-हिरनैं नौंईं छाळ मितरो !

झलारे होआँ दे नौएँ डाळ मितरो !

खरे सुपनेयाँ दी करा पाळ मितरो !

करा नौंईं परचोळ -पड़ताल मितरो ! 

पुटी सट्टा सारे ई जिंड-जाल मितरो !

ब’जण सारे ई नौंएँ सुरताल मितरो!

मुबारक तुसाँ जो नौंआँ साल मितरो !

तुसाँ जो हर इक बक्खैं पुँगरास मिल्लै

हर इक पास्सैं फुल्लाँ दी ही बास मिल्लै

तुसाँ देयाँ फ्हंग्गाँ जो भी गास मिल्लै

तुसाँ जो ठकाणाँ जगा खास मिल्लै

पियारे-परेम्में जो बसुआस मिल्लै

दुखाँ-रोग्गाँ जळबाँ जो बणबास मिल्लै

न बगते दी बिचळै कदी चाल मितरो

मुबारक तुसाँ जो नौंआँ साल मितरो !

एह फुल्ल सुपनेयाँ दे सदा रैह्न सजरे

तुसाँ ई लह्ग्न जहाराँ लक्खाँ च बखरे

कदी पोह्न झळणाँ न बगते दे नखरे

चला ताँ मि’लण सारे रस्ते भी पधरे

मि’ल्ण भत्ते कनैं सदा मिठ्ठे-मधरे

दिलाँ ते तुसाँ नीं कदी होन जबरे

उमीद्दाँ ते जादा मिल्लै माल मितरो

मुबारक तुसाँ जो नौंआँ साल मितरो !

सदा होन सुपने तुसाँ दे भी सच्चे

हमेसा ई राजी-खुसी रैह्न  बच्चे

उमीद्दाँ दे मितरो लुणाँ धान सारे

हमेसा ई पास होन इम्ताह्न सारे

तुसाँ दा रुकै नीं कदी कम्म कोई

गमाँ दा नीं घूरै कदी जम्म कोई

भरोयो तुसाँ दे सदा रैह्न गल्ले

जमान्ने च होए सदा बले-बल्ले

चली रैह गरीब्बाँ दा भी दाळ-फुलका

तिन्हाँ जो भी मिल्लै खरा तेल-तुड़का

होए कोई बेबस न बेहाल मितरो

मुबारक तुसाँ जो नौंआँ साल मितरो !

तुसाँ दी अधूरी नीं  रैह कोई हसरत

नीं मुक्कै कदी भी कमाइयाँ च बरकत

सलामत सदा रैह तुसाँ दी एह इज्जत

नीं टुटै कदी जिँदगिया दी एह हरकत

करै तँग तुसाँ जो कदी भी न दैह्सत

तुसाँ पीन्दे ई रैह्न खुसियाँ  दे सरबत

हमेसा तुसाँ  रैह्न खुसहाल मितरो

मुबारक तुसाँ जो नौंआँ साल मितरो !

हमेसा ई चमकै न्यांएँ दा सूरज

जीह्याँ कोह्रे बाह्ज्जी गराएँ दा सूरज

घरोए कदी भी न खुसियाँ दा सूरज

चढ़ैं नी कदी कोई गमिया दा सूरज

भलाखाँ दे, आस्साँ दे लाल्ले दा सूरज

मुबारक चढ़ै नौंएँ साल्ले दा सूरज

लखाँ खुसियाँ दे भी मि’लण थाळ मितरो

मुबारक तुसाँ जो नौंआँ साल मितरो !