पहाड़ी भाषा दी नौई चेतना .

Saturday, August 28, 2021

तकनीकी परिवर्तन और हमारी भाषा (तीन)


 

हिमाचली पहाड़ी भासा दे प्रेमी अपणिया भासा ताईं बड़े फिक्रमंद रैंह्दे। सारेयां जो ई लगदा भई असां दी भासा दिन-ब-दिन मरदी जादी। एह् गल काफी हद तक सही है। पर भासा पर कम भी होआ दा। तकनीकी सहूलियत मिल्ला दी। सूबे दी भासा अकादमी कनै ऐनआईटी हमीरपुर अनुवाद दा इक ऐप बणा दे। गूगल आळेयां कांगड़ीमंडियाळी कनै महासुवी बोलियां दे कीबोर्ड बणाई ते। पिछलिया पोस्टां च असां हिमाचली साहित्यकार भूपी जमवाल कनै अनूप सेठी  होरां दे विचार पढ़े। इस पर राजीव त्रिगर्ती होरां गल्ला जो गांह् बधा दे


तकनीकी परिवर्तन कनै असां दी भाषा (तिन्न)

 

पहाड़ी दयार (पैह्ला सुआल) : गूगल नै अपणे जीबोर्ड पर हिमाचल दी कांगड़ी, मंडियाली कने महासुवी बोलियां जो शामिल करी लेह्या। सिर्फ इन्हां बोलियां चुणने दी क्या वजह रही हुंगी ? कनै इस कम्मे च कुन्हां लोकां दा योगदान रेह्या है

राजीव त्रिगर्ती : गूगल दा अपणा इक्क व्यपारिक नजरिया है। तिस नजरिए ने ही सैह् पूरिआ दुनिया च अपणे नफे ताएँ जरूरी जगहाँ पर ही जाळ बछान्दा, जिह्ञा जे झीर मतिआँ मछियाँ वाळिआ आळी च ही अपणे जाळे जो सटणे पर विश्वास करदा। लोकाँ जो अजकणे जमाने बिच जेह्ड़ी सुविधा चाहिदी, लोकाँ तिकर असानिया ने तिसा जो पुजाई करी तुसाँ पैसा कमाई सकदे। एह् त्रैयो बोलियाँ सोशल मीडिये पर मतिआँ प्रयोग होआ दिया होणिआँ, इस करी ने इह्ना दा की-बोर्ड बणाया होणा। कल्लेओ सिरमौरी,  कुल्लवी दा भी बणी जाणा। एह् ता समय दी मंग है,  इस्सेओ व्यपारे दा तरीका ही गलाई सकदे। इस करी ने इस बिच कुसी दे निजी योगदाने दी गल्ल ता नी गलाई सकदे।

 

पहाड़ी दयार (दुआ सुआल) :  न्हां कीबोर्डां दी उपयोगिता क्या है ? उपयोग करने आळा हिंदिया दे कीबोर्ड दिया जगह इसदा इस्तेमाल कजो करै ? क्या इस परियोजना कनै एनआईटी दे अनुवाद ऐप दा अप्पू ची कोई संबंध है ? जे नीं है तां भी तिस प्रोजेक्ट दे बारे च भी दस्सा  

राजीव त्रिगर्ती : उइयाँ ता गूगले दा देवनागरिआ दा इण्डिक की-बोर्ड़ ही भतेरा है। मराठिया बिच भी है। असाँ दिञा भाषां-बोलियाँ ताएँ  ज़रूरी है। उपयोगिता ते हटी करी सोचिए ता होई सकदा इसदे पिच्छें कोई तकनीकी कारण या अग्गे ताएँ कुछ असान करने दी सोच भी होई सकदी। देवनागरिआ दा जेह्ड़ा इक्क टंकण ढाँचा है तिस बिच ही देवनागरिआ बिच लखोआ दिआँ होरनी भाषाँ दे लाह्दे वर्णां दे प्रतीक चिह्ना जो रक्खेआ जाई सकदा। हत्थ बणेआ होंदा, ता फिरी नौंए तरीके दी जरूरत भी क्या है। भाषा दा नाँ कॉंगड़ी चुणी करी जे सुथरा शब्दकोश खुली जाए ता टंकण तौळा होई सकदा। 

एनआईटी दा काँगड़ी हिन्दी अनुवाद डिवाइस इकदम जुदा है। कुह्नी भी दूँह् भाषाँ बिच अनुवादे जो सोक्खा बणाणे ताएं जेह्ड़े ऐप बणा दे एह् तिह्ना दा ही इक्क अगला टप्पा है। मन्नी ने चल्ला जे एह् हाल्ली ढकला कम्म है। इस बिच हाल्ली भी मते बदलाव होणे हन्, एह् पक्का है। जिस तरीके दे वाक्य भूपी जम्वाल कने मिंज्जो सामणे आए, तिस बिच जितणा पुग्गेआ असाँ सहयोग कित्ता पर हाल्ली वर्तनी जो लई करी मता कम्म कित्ता जाई सकदा।

 

पहाड़ी दयार (त्रिया सुआल) : इन्हां बदलावां दा हिमाचली भाषा दी मुहिम पर क्या असर पौंह्गा ? क्या हुण  हिमाचले दी इक्क भाषा नीं कई भाषा होई जाह्ंगियां  

राजीव त्रिगर्ती : तकनीकी परिवर्तनाँ जो असॉं इक्क व्यपारिक मुहिम दे रूपे बिच भी दिक्खी सकदे। पर जेह्ड़ी भाषा दी अंदरूनी चाल है सैह् भी इसते बखरी नी है। अज्ज असाँ बाह्ली मौका है,  बाह्रलिया पट्टिया बिच काँगड़िया-मण्डयाळिया जो इक्क रूप देणे दा। सौगी कलहूरी, बघाटी, चम्बयाळी भी। इक्क बड्डा लाक्का है। किन्नौर, लाहौळ-स्पिति दा जेह्ड़ा भारोपीय टब्बरे ते बाह्रला लाक्का है तिसते उरें अणदाजण इक्क गह्वली पट्टी भी है, जिसा बिच मतिआँ बोलियाँ अपणे रूपे बिच संगरोइयाँ हन्। जे इसा पट्टिआ दे बसणीकू बाह्रलिया पट्टिया वाळे रूपे जो मानक मन्नी ने अपणिआँ बोलियाँ जो सम्हाळी रक्खन ता किछ होई सकदा। भरमौरी (गाद्दी), कुल्लवी, कुल्लू मंडिया दी सिराजी, महासुई दियाँ उपबोलियाँ, भद्रवाही कने तिसा दियाँ भळेसी, पाढरी उपबोलियाँ बगैरा इसा गह्वलिया पट्टिया बिच्च हन्। गाद्दी लाक्के बाळेआँँ ताएँ ता काँगड़ी गादिआ बरोबर ही है।

जे नी, ता दुआ पास्सा भी साफ ही है। राजनीतिक तरीके ने जिह्ना जो असाँ बोली गलाई करी, हाल्ली भी तिह्ना जो निक्के होणे दा एहसास दिंदे, सैह् सारिआँ ही भाषाविज्ञानिक तरीके ने अपणे आप्पे च सरूठ भाषां हन्। तिह्ना दी अपणी घड़नी बणिओ है। तिसा गल्ला जो ही कल्ले दे रूपे च असां जो गूगल दस्सा दा। कुण है अपणिआ पछैणा जो छडणेओ तैयार। छडणे दी गल्ल कुथी दुस्सा दी नी है अपर इक्क भुस्स ता सारेआँँ जो ही होणा ही। 


पहाड़ी दयार (चौथा सुआल) :  तकनीक भाषा दे इस्तेमाल जो असान करा दी। इसा गल्ला दे साह्मणे असां अपणियां भाषा-बोलियां दा कितणा इस्तेमाल करा दे। गांह् तुसां भाषा दा क्या भविष्य दिक्खा दे  ?

राजीव त्रिगर्ती : सुविधा बधा दी मनणा पौणा। अपणिआ भाषा दा प्रयोग भी बधा दा। वर्तनिया दियाँ गलतिआँ जो मत दिक्खा। दिक्खा जे सोशल मीडिये दे औणे परन्त मते लोक भले ही मोबाइलाँ पर ही सही अपणिआँ बोलियाँ बिच किछ न किछ लिखा दे। जे तुसाँ मिंज्जो कुथी बधाई होएलिखदे हन्, ता मैं भी खुश होई ने तुसाँ जो धन्यवाद तुसाँ दालिखणे बिच गर्व मनदा। भाषा उप्पर औन्दे खतरे जो तिह्ना जो बोलणे वाळे ही टाली सकदे। जे भ्यागा-संझा घंटियाँ लई भाषा-भाषा जपदे रहिए कने लेफे हेठ लाड़िया ने कुसी होरसी भाषा च गिटमिट करन, घरे-पछवाडें, त्ता-संधा न्याणेआँ ने होर भाषा बोल्लण कने अपणा नां कुसी त्रिया भाषा दे इतिहासे च तोप्पन ता सारेआँ ते बड्डा खतरा सैह् देआँ दोगलेयाँ ते ही है। आम माह्णु ता हौळें-हौळें पाह्लिआ बिच पोआ दा है। अम्ब चूफणे ता रिड़कणा भी पौणा। 

ध्वनि,  पद, शब्द कने वाक्य इह्ना सारेआँ पर भाषाविज्ञानिक दृष्टिया ने कम्मे दी जरूरत है। ओआ, मिली-जुली लगदे।

                      

राजीव त्रिगर्ती 
जन्म : 20-01-1975
हिंदी कविता संग्रह : गुलर का फूल (2008) और 
जमीन पर होने की खुशी (2020) 
अजकला पहाड़ी भाषा पर भी कम करा दे हन।  

3 comments:

  1. 1. इक कामयाब माह्णू् सैह् होंदा जेह्ड़ा टारगेट सेट करदा कनै अपणी जिंदगी च तिन्हाँ जो हासल भी करदा। जेकर इक जिंदगिया च सैह् टारगेट हासल नीं होणे वाळे होण ताँ बाकी बच्हेया कम्म अगलिया पीढ़िया जो थमाणे जोगी करी नै रखदा।

    2. असाँ दे भाखा/बोली दे खैरख्वाहाँ देहा टारगेट सेट कित्तेया जिसदे हासल होणे दी मीद इसा पीढ़िया कन्नै ही खत्म होई जाणी है। न इसा जिंदगिया च तिस टारगेट जो हासल होणे दी मीद है न अगलिया पिढ़िया ताँईं एह् कम्म रखणे जोगा है।

    3. सैह् टारगेट है — हिमाचली पहाड़ी। मिंजो एह् टारगेट हासल होणे दे चांस जीरो दे भी थल्लैं सुझदे हन्न। जमीना पर चलणे कनै हौआ च उड़णे च फर्क होंदा है।

    4. मेरी इस सोच दे पिच्छें एह् बिंदू हन्न:—

    (क) हिमाचल दी इक भाखा/बोली कदी होई ही नीं सकदी।

    (ख) अजकणे जागरूक जमानें च कुसी भी अपणी बोलिया दी वळी देणे जो तियार नीं हौणा है।

    (ग) इक स्टेट च इक ते ज्यादा भाखाँ/बोलियाँ होई सकदियाँ हन्न।

    (घ) मन्ना जाँ नीं मन्ना, एह् दुनियाँ 'सरवाइवल ऑफ द फिटेस्ट' दे उसूल पर चलदी है। जेह्डी भाखा/बोली फिट होंगी तिसा ही जीणा है।

    (ङ) काँगड़ी दे मामले च काँगड़ा, हमीरपुर कनै उना वाळेयाँ जो कोई परेसानी नीं हौणा चाहीदी। मंडी कनै चम्बा वाळे भी मनोई सकदे हन्न। अद्धे ते ज्यादा हिमाचल कवर होई जाणा।

    (च) अठमीं सूची च सामल होणे दा टारगेट नीं होणा चाहीदा। अपणी भाखा/बोली जो ताकतवर बणाणे पर ज़ोर होणा चाहीदा।

    (छ) ताकतवर भाखा/बोलिया अपणी जगह अप्पु बणाई लैणी है।

    5. मैं इक मामूली देहा आदमी है। मेरी कम्म कनैं मेरी सोच इतणी अहमियत नीं रखदी। मैं हुण अपणियां अगलियां कताबाँ सिर्फ़ 'काँगड़ी' च नकाळने दी गल्ल सोचा दा। 'हिमाचली पहाड़ी' दे लोली पॉप च मिंजो सुआद नीं लगा दा।

    6. जिस दिन 'हिमाचली पहाड़ी' दा कांसेप्ट कामयाब होई गिया मैं भी खुशी मनाणी है अपर तिस तांईं इक होर जन्म लैणा पौणा।

    ReplyDelete
    Replies
    1. मंड़ोत्राजी,
      कुल मलाई करी मैं तुसाँ दिया गल्ला ते सहमत है.
      अज्ज भले ही कोई अपणी भाषा नी बोल्ले अपर जाह्लु जे गल्ल तिसा जो कुसी होरसी कने मलाणे दी होए ता कोई भी तैयार नी !!!

      Delete
  2. मण्डोत्रा होरां दी गल्ल सोळा आने लग्गा दी। जेहड़ा कम्म प्रैक्टिकल है कने जेहड़ा तकनीकी रूप विच सम्भव है , तिसपर विचार करना ज़रूरी है । बाकी बाद 'च ...

    ReplyDelete