पहाड़ी भासा दे बारे चर्चा – अज के हलात कनै गांह् दी चिंता

टाकरी लिपि दे फौंट डाउनलोड करी नै कंप्‍यूटरे पर टाइप करी सकदे। एह लग गल है भई जादातर नागरी लिपि चे ई लिखदे हन पर कुछ टाकरी प्रेमी भी हन। एह तसवीर असां सांभ वेबसाइट ते लयी है। तस्‍वीरा पर क्‍लिक करी नैै पूरी जानकारी मिली सकदी। एह साइट कार्टूनिस्‍ट अरविंद शर्मा होरां चलांदे। 

पहाड़ी भासा दे बारे च चर्चा करने ताईं असां मतेयां लखारियां जो छे सुआल भेजयो थे। जुआब औणा सुरू होई गै  तां असां एह चर्चा गजलकार, लेखक कनै अनुवादक द्विजेंद्र द्विज होरां दे विचारां नै सुरू कीती। तिस पर ठियोग देयां लेखकां भी चर्चा कीती कनै मुंशी शर्मा होरां सुआलां पर अपणे वचार भी रखे। तिसते परंत पवनेंद्र पवन, कथाकार मैडम चंद्ररेखा ढडवाल, राजीव कुमार "त्रिगर्ती", भूपेंद्र भूपी, नवीन शर्मा कनै फिरी सुरेश भारद्वाज निराश होरां दे विचार तुसां पढ़े। अज इस चर्चा दी अगली कड़ी रमेशचंद्र  'मस्ताना' होरां पेश करा दे। 

1. तुसां दे स्हाबे नै पहाड़ी लेखन असां दे मुल्के दियां दूइयां भासां दे मुकाबले च कुतू खड़ोंदा ? 

रमेशचंद्र  'मस्ताना':    पहली गल्ल तां एह है जे म्हारिया  भाखा दा नां  सारे प्रदेसे दे कवियां - लखारियां-बुद्धिजीबियां कने हिमाचल अकैडमी दे प्रस्ताबे नै हुण प्हाड़ी दी बजाय  " हिमाचली "  मन्नी लेया है। 

जिह तिकर इसा भाखा च लेखन दी गल्ल है,  सैह एह है जे बड़ी पैहले ते इसा भाशा च लखोन्दा रेहया कनै  अज्ज बी लखोआ दा।  छपा दा कनै प्रकाशत कितणा-क होआ दा,  एह गल्ल बखरी है कनै इस च केई मजबूरियाँ बी हन।  अज्जकल सोशल मीडिया पर बी काफी कुछ  साह्मणे औआ दा है।  जे कुछ घाट बी है तां सैह सिरफ लखारियां-बुद्धिजीबियां - यो सहायता कनै कोई हौसलाअफजाई नी हुणे  कारण है। जे अज्कणे हालातां च मन्नता मिले कनै केन्दर सरकार जां साहित्य अकादेमी  : नौंई दिल्ली म्हारिया  म्हाचली भाशा यो सबीकृति दै तां केई कमियां बी दूर होई सकदियां।  भौंए बाकी प्रदेसां दीयां  भाखां दा दायरा बड्डा है जां बोलणे आल़े जियादा हन पर म्हाचली बी जेकर ईक्की नीं तां उन्नियां ते बी घट्ट नी है।  हालात कनै संस्कार  बखरे होई सकदे। 

2. तुसां दे स्हाबे नै पहाड़ी भासा च इतनी समर्थ्या है भई अजकिया जिंदगिया दी अन्नोह्-बाह् दौड़ कनै सारे ढक-पळेस लखोई सकदे? कि एह् चील्हां दे डाळुआं झुलाणे जोगी ई है? 

रमेशचंद्र  'मस्ताना':     म्हाचली भाखा प्हाड़ां ते बगदे झरूड़ुआं  दे मिट्ठे पांणिएं सांही मिट्ठी,  छैल़ कनै रस्सली है।  इस च कुसी बी भाऊ कनै विचार  यो रक्खया-पेश किता जाई सकदा है।  भौंए म्हाचले दे बारहां जिलेयां च  लग-लग नाएं नै बखो बखरियां भाखां हन पर एह बी सच्ची गल्ल है जे कबायली लाकेयां कनै दूर दराज दे दुरगम लाकेयां दीयां बोलियां यो  किछ परांणे रूपे कारण समझणे च तंगी हुन्दी होए पर बाकी तां तकरीबन सारियां ही भाशां इक्-दूए दीया समझा च आई जांदियां हन।  लिखणे आस्तें बी जेहड़ियां देवनागरी लिपिया च लखोआ दियां,  तिन्हां च तां कोई  समस्या नी हुणा चाहिदी।  मैं-मैं जां मेरी-तेरी दी गल्ल छड्डी नै सिरफ कनै सिरफ इक्की भाशा दी गल्ल  हुणा चाहिदी, तिसा दी मन्नता तांई कोसत हुणा चाहिदी। इस च सरकारा,  भाशा बभाग कनै म्हाचल अकैडमी सौगी-सौगी म्हारे प्रदेसे कनै संसद च बैठयो नेतयां दी राजनीतिक इच्छाशक्ति दा हुणा सारेयां ते पैहलें जरूरी है। कैंह जे जिह तिकर इस बारे च नौंए सिरें प्रस्ताव पास नी हुन्दा है, कनै केन्दर दी साहित्य अकादेमी इस जो मन्नता नी दिन्दी है,  तिस तिकर तां किछ होई ही नी सकदा है।  भाशा कोई बी होए,  कवियां - लखारियां-बुद्धिजीबियां दा इसदे बाद्धे बास्तें बड़ा-बड्डा जोगदान हुन्दा कनै तिन्हां यो परोत्साहन दैणा सरकारा दा पैहला फरज हुणा चाहिदा । इस बास्तें  एह जरूरी है जे म्हाचल प्रदेसे च मान-सम्मानां दी जेहड़ी रुकियो प्रक्रिया है  सैह बी तौह्ली शुरू हुणा चाहिदी। 

3. तुसां दे स्हाबे नै पहाड़ी लेखन कनै पाठकां दे रिस्ते दी कदेई सकल बणदी है ?   इस ताईं होर क्या क्या करना चाहिदा? 

रमेशचंद्र  'मस्ताना':      अज्कणे मौहल च लेखक कनै पाठक जां शरोतां दा रिस्ता कुछ - कुछ  घटदा जा दा है।  शरोता तोपणा तां बड़ा टेढ़ा कम्म होई गिया है।  जे पाठक नी मिलगा तां  लेखक  लिखगा कनै छापगा कुस्स वास्तें, कनै जे शरोता नी मिलगे तां  कवि सुणांगा कुस-यो!  इन्हां दून्हीं दा रिस्ता कुसी सिक्के दे दून्हीं पासेयां आल़ा है।  पाठक जो एह मन्नणा चाहिदा जे तिन्नी कुछ लिखणा है तां सैह पढ़ै जियादा ते जियादा कनै जे बोलणे दी कला सिखणी है तां सुणें जियादा ते जियादा । स्हांजो कनै सरकारा यो बी स्कूली स्तरे ते ही इसा गल्ला दी पैहल करणी चाहिदी। 

4.   अगलिया पीढ़िया तक तुसां दी गल-बात किञा पूजदी ? 

रमेशचंद्र  'मस्ताना':    अगलिया पीढ़िया यो पढ़ाइया ते इलाबा संस्कार दैणे,  मां बोली दी इज्जत करणे कनै रीत परम्परां दी साज सभाल़ करणे दी सिख-मत दैणें दा कम्म  घरे दे बुजुर्ग,  मास्टर - भैणजियां कनै लखारी - साहित्तकार ही करी सकदे हन।  मेरी अपणी कोसत एह रैहन्दी है जे मैं कनै मेरे साहित्तिक मित्र प्रभात शर्मा,  असां  जित्थू बी दूर दराज कनै कबायली इलाकेयां च जान्दे तां सारेयां ते पैहलें स्कूलां च जाई ने इन्हां चीजां कनै गल्लां बारे जरूर स्कूली बच्चेयां नै गल्ल बात करदे कनै अपणा संदेश असां  दिन्दे।  नैतिक सिखिया, रीतां-परंपरां दी गल्ल, अपणे  भाऊ-वचार लिखणे कनै बोलणे  दी गल्ल साझी करणे सौगी-सौगी तिन्हां यो कबता बगैरा करणे दी बी सलाह  दैणे दी पूरी कोसत करदे। 

5.  तुसां दे स्हाबे नै अगली पीढ़ी पहाड़िया जो भासा बणाणे दा ख्यो करह्गी कि गीतां सुणदेयां गांह् बधी जांह्गी?  

रमेशचंद्र  'मस्ताना':    इस सुआले दा जबाब दैणे तांई किछ-किछ बेदण-पीड़ होआ करदी है ।  नौंई पीढ़ी  मां बोलिया नै सैही प्यार  करा दी है कनै लगाब रखा दी है,  जिन्हां दैं घरे-च बुजुर्ग हन,  माँ बोली  बलोन्दी है कनै अपणियां भाखा दे संस्कार  जिन्हां यो दित्ते जान्दे हन। दुखे दी गल्ल एह बी है जे असां  बच्चेंयां यो किछ दस्सगे-सखाल़गे ही नी तां तिन्हां तां फिरी हिन्दी - अंग्रेजी, हाय-बाय, डिस्को-बिस्को कनै मेरा-मेरा ही सिखणा है।  अज्ज घरां च रीत-परम्परां दी गल्ल कनै जीवन-मूल्लां दी कीमत दस्सणे आल़े घटदे जा दे। सच्ची गल्ल तां एह है जे दादू-दादी,  अम्माँ - बाबा दे साथे ते बधी नै संस्कारां दी सिख-मत दैणे आल़ा होर कैई होई ई नी सकदा है, पर इसा गल्ला पर अज्ज गौर करणे आल़े कितणे-क रेही गे हन!  प्हाड़ी  बोली,  प्हाड़ी संस्कार गीत हुण कुण गा दा!  सब डी जे पर लक्क मटकांणे यो मचला दे हन। 

रमेशचंद्र  'मस्ताना'

6. तुसां दे स्हाबे नै अज आम जिंदगी जीणे ताईं सिर्फ इक्की भासा नै कम चली सकदा कि इक्की ते जादा भासां जरूरी हन ?  

रमेशचंद्र  'मस्ताना': अजोकी जिन्दगी च इक्की भाखा नै कोई बी कम्म चलणा  औक्खा है।  नौकरी जां पैसा कमाणें तांई हिन्दिया सौगी अंग्रेजिया दा ग्यान हुणा जरूरी है। घरे ते बाहर जांणा है तां बी ओत्थू दी भाशा जां हिन्दी  अंग्रेजी जरूर औणा चाहिदी। इस सब ते इलाबा एह बी जरूरी है जे अपणी मऊ बोली यो बी मांहणुआं यो नी भुल्लणा चाहिदा।  तिस दे प्रति बी लगाव हुणा चाहिदा।  लेखक - कवि-साहित्तकार  जां बक्ता हुणे बास्तें तां जितणियां जियादा ते जियादा  भाशां दा ग्यान होऐ,  सैह उतणा ही फायदेमंद हुन्दा।