दुर्गेश नंदन दियां कवतां

 

अज पेश हन कवि, नाट्यकर्मी, संस्कृतिकर्मी, दुर्गेश नंदन होरां दियां चार कवतां। 

मूह्रली तस्वीर : देवदार दिया लकड़िया कुरेदी नै बणाइयो कलाकृति - कलाकार : मुदित सेठी   

   1   

साईकला दा झूटा.....

साईकला दे झूटे दा अपणा नंद था

खेलां च खेल थी कनै परमानंद था

 

कुसी कुसी ल होंदी थी साईकिल तदूं

छिक्की कनै घंटी लगियो होंदी थी

कैरियर पर बैठदी थी सुआरी

लगदा जंघां दा बड़ा दम था

 

एटलस होंदी थी कम्पनी

रंग लाल काल़ा होंदा था

बच्चेयां दे भी होंदे थे सैकलू

कैंची साईकिल चलाणे दा भी नंद था

 

लगाई दिंदा जे था कोई झूटा

ता चेहरे दी रौणक ही लग होंदी थे

एह जे फोटुए च लुब्बा दा ना बच्चा

दे देई खुशी बजोंदी थी

 

घंटी करदी थी टण टण टण

चक्केयां पर फुल्ल बेल बणोंदी थी

मुठ्ठे सैकला दे लगदे थे सैले प्यूल़े

जंदरे दी भी टोह्र होंदी थी

 

आये स्कूटर स्कूटी मोटरसाइकिल

साईकल जरूरता दीया जगह खेल होई

अजकल बच्चे रेसर बणयो

रेट देह् सैकलां दे कि सुणी जाह्न भतोई

 

मेरे ल भी साईकिल होंदी थी

बड़े कम्मे औंदी थी

घरे दा सौदा पतरा औंदा था

घुमणे दी भी मौज औंदी थी

 

हुण साईकिल पुराणी होई

अगणे कंडे रैहंदी खड़ोई

मुन्नु कदी कदी चक्कर लांदा

अंगणे च साईकिल खूब घुमांदा

 

मिंजों भी बचपन याद औंदा

मैं भी साईकला पर था बोंहदा

कदी कैरियर पर बैठी जांदा था

कदी डंडे बैठी झूटा लांदा था

 

पैहलें कैंची साईकिल चलाई

फिरी काठिया पर सीट बणाई

वक्त इसा फोटुआ दिखी याद गया आई

साईकिल कांगड़े शाहपुर घुमाई

 

नागे दा फेरा साईकला पर लाया

चामुंडा त्रिलोकपुर भी फिरी आया

तदूं सड़क छोटी थी पर नंद था

स्पीडा दा कोई द्वन्द न था

 

कदी कदी रेस भी लगदी थी

पैडलां दी जोर अजमाईश चलदी थी

एह भी इक खेल था

खेले च बड़ा ही आनंद था

 

साईकला दे झूटे दा अपणा नंद था

खेलां च खेल थी कनै परमानंद था

 

 

   2   

लिखणू ..

अंगण मिट्टीया दा था ता पौंदा था लिखणू

सगरांदी, जामणिया, मोखे, ब्रते दा लिखणू

छोटा लिखणू, बड्डा लिखणू, गोल लिखणू, चकोर लिखणू

 

लिखणूये पाणे दा भी दा होंदा था

ईह्यां ही थोड़ा ना लिखणू पौंदा था

पैहलें अंगण बौंकरियां नैं सतोंदा था

फिरी माड़ा माड़ा पाणी छड़कोंदा था

गाई दे गोह्ए च सैला रंग पाई

चौकी, चौका, पीड़ू पौंदा था

सुकदा था घड़ी दो घड़ी धुप्पां

तां गोल़ूयां पारूए च खूब घलोंदा था

तां फिरी पौणा लगदा था लिखणू

 

अंगण मिट्टीया दा था ता पौंदा था लिखणू..

 

चलदी थी फिरी उंगल गूठे सहारे

लाईना दा इक जाल़ बछोंदा था

बणदे थे भांति भांति दे डिजाईन

लिखणू क्या भई रस्तेयां दा घुमाव बझोंदा था

पांदी थी जाह्लू इक जनाना लिखणू

दुईया दा बणाया भी चर्चा च औंदा था

विशेषज्ञ बोलदे एह मना दे घुमाव

पुरोहत बोलदे देवता आई बौह्ंदा था

सजदी थी जाह्लू लिखणूये पर पत्री

चणे चौलां, गुड़ दा प्रसाद रखोंदा था

तां फिरी चलदा था घरे च कारज

जाहलू पैहलें  पुजोंदा था लिखणू

 

अंगण मिट्टीया दा था ता पौंदा था लिखणू

 

हुण मिट्टीया दे अंगण घट घट रेह

लिखणू सिखणू भी घट घट रेह

पौंदे तां हन टाईलां, मार्बलां पर

पर गोहे, सैले रंगे कनै गोल़ूएं दे रिवाज नीं  रैह

हुण नूंह गोए नै हत्थ घट ही लांदी

रमूंजिरया, लाल रंगे ने लिखणू पांदी

गोल़ूआ बी नी मिल्लदा हुण बजारे च

चौलां पीह् नै कम्म चलांदी

चलो इतणा ही बड़ा कि पत्री हडांदी

पांदी कदी कदी अंगणे च लिखणू

 

अंगण मिट्टीया दा था ता पौंदा था लिखणू

 

खैर इक समा था, समा था लिखणूआं दा

हुण समा रेडीमेड लिखणूयां दा

बजारे च लिखणू रेडीमेड मिली जांदे

पालमपुर अंद्रेटें ह्रदयपाल सरदार जी लिखणूआं दा कम्पीटीशन करांदे

असां भी इक दो फिल्मा लिखणुआ पर बणाईयां

कहाणीयां, फोटू, लेख खूब छपाईयां

अज्ज एह लिखणू दिखया ता कई जनाना याद आईयां

भांति भांति दे लिखणू बणांदियां थीयां

बणांदे लिखणूयां कनै गाणे भी गांदियां थीयां

खैर सैह समा होर था, होर थे गान बजाण

कि टैमे दियां नौकरिया जो जाह्न

कि बणान अंगणे च लिखणू ..

 

अंगण मिट्टीया दा था ता पौंदा था लिखणू

 

खैर दुर्गेश इतणा ही सोचदा

कि असां लोक अपणी बिरासत न भुल्ली जाह्न

इस ताईं लिखदा  रैंहदा रुआजां पुरखेयां दे

कि बारे तुहारे असां पुरखेयां दी भी गान

देन मान असां संस्कृति, संस्कार जो

नोईयां नूहां, बिट्टियां भी लिखणू बणान

अपणी विरासत भुल्ली न जाह्न

अपणी विरासत भुल्ली न जाह्न ।.

 

   3   

सैर....

साले बाद आई सैर

लेई आई सुख चैन खैर

किरनियां च सज्जियो

ग्राएं घुम्मणा चल्लियो

सारें जाणा नीं कुसी नैं वैर

साले बाद आई सैर

घर-घर हंडदी मंगदी खैर

मंगदी खैर -बंडदी खैर

साले बाद आई सैर

 

जोता दे रूपे च बल़दी आई

फुल्लां नै सज्जियो खिलदी आई

फल भी पुजोओ धाने दी बाल़ी भी

सारे बंदां दे मंगा दे खैर

साले बाद आई सैर .

घर-घर हंडदी मंगदी खैर

मंगदी खैर, बंडदी खैर

साले बाद आई सैर ..

 

मौसम बरसाती दा ढल़ी चल्ला

धानां दा पकणा लग्गा सिल्ला

बरसाती दे नाल़ू थमणा लगी पे

बद्दलां भरोया धारा दा टिल्ला

छल्लियां दी फसल घरे पुज्जणा लग्गी,

सैले दडुंजे दी भी चल्लियो सैर

साले बाद आई सैर

घर घर हंडदी, मंगदी खैर

साले बाद आई सैर ..

 

डंठू दा मौसम ढुकणा लग्गा

घारीं दा डर मुकणा लग्गा

बरसाल़ा भी मुकणा लग्गा

ब्यातड़ां बोल़ण हुण सौरियां दी सैर

साले बाद आई सैर

घर घर हंडदी, मंगदी खैर

बंडदी खैर, मंगदी खैर

साले बाद आई सैर ..

 

कल सगरांदी पकोड़ू बनाणे

पतरोड़ू कनै दो न्योड़ू बणाणे

तल़ियां रोटियां कद्दुयें कनै

मिठड़ू, भल्ले, खीर, भटूरू

घर घर बंडोणे, मंगोणी खैर

साले बाद आई सैर

घर घर हंडदी मंगदी खैर

बंडदी खैर, मंगदी खैर

साले बाद आई सैर..

 

हुण तुसां पुच्छणा कुण है हंडा दा

इसजो राजा (नाई भाई) हंडा दा

इसदी है एह सरहा श्रद्धा

इन्नी पुजाणी सबणा ल सैर

बंदणी सारेयां कने मंगणी खैर

साले बाद आई सैर

घर घर हंडदी मंगदी खैर

बंडदी खैर, मंगदी खैर

साले बाद आई सैर ...

 

सैरा दी बधाई कबूल करा

जीवन च खूब तरक्की करा

रखा प्रेम भाव सबने

हिरखे जो समाजे दे दूर करा

मना खुशियाँ, बंडा खुशियाँ

मत रक्खा कुसी नै वैर

साले बाद आई सैर

घर घर हंडदी, मंगदी खैर

बंडदी खैर, मंगदी खैर

साले बाद आई सैर ...

 

बुजुर्गां दा भी धनवाद करा

खरियां गल्लां याद करा

तिन्नां भी सोचियां खरियां बुरियां

कई त्यौहार चलाए, तिनां च इक सैर

साले बाद आई सैर

घर घर हंडदी मंगदी खैर

बंडदी खैर, मंगदी खैर

साले बाद आई सैर ...

 

सैर मुबारक तिन्नां लोकां जो

लोकां जो ही नीं मुबारक परलोकां जो

परलोक भी ता करदे रैहंदे

संजा भ्यागा इक दूजे दी सैर

साले बाद आई सैर

घर-घर हंडदी मंगदी खैर ..

साले बाद आई सैर....

लेई आई सुख चैन खैर ..

बंढदी खैर, मंगदी खैर

साले बाद आई सैर..

 

   4   

पल़ोह्ड...

साल बीतेया, निग्घी होई पल़ोहड, बड्डी होई अनुभव चादर

कुथी भरड़ोई भी, कुथी छंगोई भी, कुथी निग्घोई मेरी चादर

 

साल भर मैं खूब पढ़या, कुथी ठंडोई, कुथी गर्मोई मेरी चादर

पढ़ी के कदी कदी मैं बयां भी कित्ते, साझी ओढोई मेरी चादर

 

चादरी दा मैं ,चादर मेरी, कदी शरमाई कदी फणसोई चादर

कदी कुसी दे दुखें ऐसी भतोई, रोई पटोई, ठंडोई मेरी चादर

 

चादर मिंजों यादां लांदी, गप्पां बणांदी, लपटोई लपटोई चादर

संगोणा पौंदा जां जे कुथी मिंजो, फेरुआं घेरुआं ढकांदी चादर

 

सूतें पाणा सीणा पौंदी, धागेयां कतणा, बुनणा, गुणना पौंदी चादर

ना होएं पल्लैं तां बझौंदा नंगियां बाह्ईं जां कमदी, ठंडोंदी चादर

 

बदलौंदे साल सालां दर साल, इक बरी खल्ली ते चुंगोंदी चादर

जीण तिन्हां दा भी हाक्खीं गांह रैहंदा, कतोंदी जिन्हां दीया चमड़िया ते चादर

 

साल बदलौंदे, बदलौंदे मौसम, बदलौंदे माह्णू , बदलौंदी चादर

जी गे जेह्ड़े सतकर्मा जो, औंदी सदा याद तिन्हां दी चादर

 

ऐह जे पलोह्ड मैं जिसा चादरा दी है मारियो, इसा दा नां है "दौह्ड़ " चादर

चाह लेई मैं भी इक चलया, कि बुणां- गुणां मैं भी कबीरे नानके साहीं इक चादर...

 

सारी दुनिया अपणे निग्धे च रैंह, निग्घी रैंह परिवारी समाजी चादर

कुथी न संगोए, सब भला भला होएं, होएं दे देई 2025 दी चादर ।

 

तुसां सारेयां जो नौएं साले दीयां मुबारकां ।

 

#पल़ोहड .. आप जानते ही होंगे कि चादर, पट्टू ओढने के टैग्ड स्टाईल को पल़ोह्ड मारना कहते हैं ।

मूह्रली तस्वीर : देवदार दिया लकड़िया कुरेदी नै बणाइयो कलाकृति - कलाकार : मुदित सेठी 

दुर्गेश नंदन 
मंच सचिव, कला निदेशक, कांगड़ा लोक साहित्य परिषद, कनै संपादक बाणेश्वरी 

मुंबई डायरी - चार

अपणिया जगह छड्डी लोक मुंबई पूजे। न अपणे ग्रां भुल्ले, न शहर छुट्या। जिंदगी पचांह् जो भी खिंजदी  रैंह्दी कनै गांह् जो भी बदधी रैंह्दी। पता नीं एह् रस्साकस्सी है या डायरी। कवि अनुवादक कुशल कुमार दी मुंबई डायरी पढ़ा पहाड़ी कनै हिंदी च सौगी सौगी। किस्त चार। 

 

................................

चार मूंह्डेयां दी तांह्ग 

जेह्ड़ा भी रोजी-रोटी कमाणे ताईं अपणा मुल्‍ख या घरबार छडदा, तिसजो एही इक मेद होंदी कि इक रोज तिन्‍नी मती सारी कमाई करी नैं अपणे घरे जो हटी ओणा है। फिह्री बड़े सुखे नैं रामे दी जिंदगी जीणी है। अपणिया जोध्या ते नगरवास जो निकळणे आळा जुआन मुंडू राजा भले नीं होए पर घरे दा राम ता होंदा था। तिसदियां हाक्‍खीं  च एही इक सुपना होंदा थी कि शैह्र जित्‍ती नैं तिन्‍नीं अपणे टब्‍बरे दे सारे दुख-दलिदर दूर करी देणे हन।

पिछलयां सत्‍तरां-अस्सियां सालां च देह्या बड़े घट लोकां नै होया कि सैह् हटी आए कनैं तिन्‍हां जो अपणिया जड़ां ताईं अपणी जमीन मिली होए। पंछियां साही माण्‍हू कितणिया बी डुआरियां मारी लै पर जड़ां वाळे इक्‍की जमीना पर ही रस्‍सी-बस्‍सी सकदे। लम्मियां डुआरां पर उड़ने वाळयां सारयां पंछिया व्‍हाल बी एह् तकदीर नीं होंदी कि सैह् अपणे घोंसलया-ठकाणयां पर हटी सकन। कई बरी वग्‍ते दी गलेल डुआरां उड़ानां बिच ही मकाई दिंदी। मुंबई शेह्रे च बी असां ताईं मरना रोजी-रोटी कमाई नै बसणे ते जादा ओखा था। कई बरी जींदा माह्णू मरी नैं लावारिस होई जांदा था।

हिमाचल मित्र मंडळे दे अधिकारी पुनीचंद कटोच कनैं पिरथी सिंह परमार होरां इक किस्‍सा सणांदे थे। सैह् दोयो मंडळे दे दफ्तर बैठयो थे। फोने दी घंटी बज्‍जी। कटोच होरां फोन चुक्‍या। पहाड़िया च जवाब मिलणे ते बाद सामणे वाळें भारी संघें गलाया कि मैं एत्‍थू टाटा हस्‍पताळे ते बोला दा। मैं म्‍हीनां भर पैह्लें अपणे मुंन्‍नुअे दा कैंसरे दा लाज कराणा आया था कनैं अज मेरा मुन्‍नू मिंजो किह्ला करी नैं चला गिया। मैं क्‍या करें मिंजो समझा नी ओआ दा। मुंबई च मैं कुसी जो नीं जाणदा। मैं इस दा दाह संस्‍कार किह्यां करगा। कोई अपणा तोपणे तांई मैं टेलीफोन डायरेक्टरिया च हिमाचल तोपण लगा ता तुसां दा नंबर मिला। इन्‍हां ते एह् सुणने ते बाद कि तुसां फिकर मत करा असां आए। इसा दुखे दिया घड़िया इस तरफेन शैह्रे च तिसजो इक मूंडा चाही दा था। सैह् मिली गिया था। हुण सैह् फोने पर ही रोई नैं हलका होई सकदा था। ताह्लू ही दस बारा लोग कठरोई गे कनैं दाह संस्‍कार करी ने सैह् अस्थियां लई नैं हिमाचल चला गया।

इस ताईं ही परदेशां च जित्‍थू बी हिमाचली बसयो थे तित्‍थू मंडळे साही संस्‍थां मिलदियां। हालांकि हुण वग्‍त बदलोई गिया। इन्‍हां संस्‍थां कनैं लोकां दा लगाव घटदा जा दा। एह् 90-91 दी गल है। विष्‍णु राम जी कनैं मेरे दो रिश्‍ते थे।  इक ता जीजा जी थे। कनैं ग्रांए दे घ‍रैंता दे साह्बे नै चाचा भी लगदे थे। सैह् मुबंई छडी नैं ग्रांए च ही रैह् दे थे पर एत्‍थू तिन्‍हां दा टेक्‍सी परमिट था। इस परमिटे जो पंजा सालां बाद जींदा रखणे ताईं रिन्‍यू कराणा पोंदा था। बंधन दा जमाना था। टैक्‍सी खरीदणे ताईं नोंए परमिट नीं मिलदे थे। लोग दुए ते परमिट (परवाना) लई नैं टैक्सियां पांदे थे बदले च पैसे दिंदे थे। एह् पैसे रिटायर कनैं विदमां ताईं इक्‍की साह्बे ने पैन्‍सन ही थे। कई विदमा तिस जमाने च इस पैसे ने ग्रां च अपणे टबर पाळयो। उपरे ते पंजां सालां बाद रिन्‍यू करने दे भाह्नें गडीया वाळे दे कराये नैं मुफ्ते च मुंबई दी सैर भी होई जांदी थी।

तैह्ड़ी तुआर था। असां तिह्नां दा इंतजार करा दे थे। तिन्‍हां ओणे ताईं गलाया था। चाणचक तिह्नां दे पड़ेसी समेश सिंह धोबू तिह्नां दे नीं रैह्णे दी खबर लई नैं पूजी गै। माता जी कनैं मिंजो ताईं एह् खबर इक भारी सदमा थी। तिह्नां घरे जो तार ता करी तियो थी पर दाह संस्‍कार दी समस्‍या थी। असां ते लावा होर कोई रिश्‍तेदार संपर्क च नीं था कनैं ऐत्‍थू भी नीं था। तेह्ड़ी फोन बी बड़े घट थे। ग्रां च त थे ही नीं। पर किस्‍मता नै मेरे व्‍हाल तिन्‍नां दे बड़डे भाई जेह्ड़े दिल्लिया रैंहदे थे, तिन्‍नां दा नंबर था। तिह्नां गलाया ग्रांए ते कुसी दा ओणा मुश्‍कल है। मैं कल ट़ेन पकड़ी ओणे दी कोशिश कर गा पर देर होई जाणी तू दाह संस्‍कार करी दे।

मिंजो ताईं बड़ा मुश्‍कल था पर हारी-फारी मिंजो ही दाह् देणा पिया। जळदिया चिता दिक्‍खी नैं बड़ी देर सोचदा रिह्या। मिंजो पर तिह्नां दा इक करजा था। दाह देई नैं मैं करजा मुक्‍त होई गिया या होर चढ़ी गिया। अजे तिक मैं फैसला नीं करी सक्‍कया क्‍या मेरा दाह देणा ठीक था? सैह् खरे भले-चंगे घरे ते आयो थे। मीट-सीट कुछ पुठा-सिधा खाणे ते, सफरे दे थकैमे ते या डरेवर भाईंयां घुट लगावाई ता होंगा। सैह् पींदे नीं थे, मै‍फलां च घुट लगाई लैंदे होंगे ता पता नीं। तिह्नां दा पेट खराब होया था कनै दस्‍त लगयो थे। सैह् रात भर उठी-उठी बाह्र जांदे रैह कनैं पाणी निटरदा रिह्या।           

आखर च भ्‍याग होणे ते पैह्लें ही तिह्नां प्राण छडी ते। चरजे वाळी गल एह् थी कि तिह्नां बक्‍खें भले ही टुन थे पर चार जणे सुतयो थे। सैह् बड़ा घट कनैं होळें गलांदे थे पर तिह्नां अपणी तकलीफ गलाणे दी कोशश ता कित्‍ती ही होणी। इह्नां दे बार-बार उठणे ते छेड़ भी ता होई होणी। मृत्‍यु सारटीफिकेट देणे वाळे डाक्‍टरे दा गलाणा था कि एह् मुंबई शैह्रे ताईं चुल्‍लू भर पाणिये च डुब्‍बी मरने दी गल है कि इक भला-चंगा आदमी डीहाईड्रेशन नैं मरी जाए। हुण इस ताईं सौग्‍गी सुतयां मितरां दी शराबे वाळी डीहाईड्रेशन जिम्‍मेदार थी या जिस्‍मे दे पाणिये वाळी। कुछ नीं गलाई सकदे। 

एत्‍थू मुंबइ च कई बरी एह् समस्‍या आई जांदी थी कि माह्णू मरी जांदा था कनैं तिस व्‍हाल इक धेला नीं होंदा था। सैह् अपणी सारी कमाई कनैं जमा पूंजी लाजे पर खर्च करी चुक्‍कया होंदा था। तिसदिया लाड़िया कनैं बच्‍चयां दे साह्मणे दाह संस्‍कार ता छड्डा,  खाणे दी भी समस्‍या होंदी थी। फिह्री हटी नैं ग्रांए जो भी जाणा होंदा था। कई बरी सैह् किह्ला ही होंदा था। सौग्‍गी रैह्णे आळयां जो या रिश्‍तेदारां जो खर्च करना पोंदा था। देह्या कुछ नीं भी होए तां भी इक दिहाड़ियां पर कम करने वाळयां तांई मौत भी इक बोझा ही होंदी थी।

कई बरी अरथी चुकणे ते पैह्लें ढाळ पाई नैं पैसे कठरेणा पई जांदे थे। तैह्ड़ी अज्जे साही श्मशाने पर लकड़ू भी मुफ्त नीं मिलदे थे। इसा समस्‍या ते निपटणे ताईं हिमाचल मित्र मंडलें इक मृत्‍यु कोष बणाया। जिस च सारयां ते दो-दो रपईये चंदा लेंदे थे। कनैं मरणे वाळे दे टबरे जो तुरंत तिन्‍न सौ रपईये दी मदत दित्‍ती जांदी थी। तेह्ड़ी इन्‍हां पैसयां च दाह संस्‍कार भी होई जांदा था कनैं बाल-बच्‍चा भी मुल्‍खें पूजी जांदा था।

एह् इकी समाजे दी अपणी सूझबूझ कनैं बलबूते पर समस्‍यां हल करने दी मसाल है। इस ते बाद जाह्लू तिन्‍नां सौआं दा कोई मुल नीं रिह्या ता मंडल तिन्‍न सौ रपईए लई नैं 9 हजार दी मदद करने वाळी नोंयी मृत्‍यु कोष योजना लई नैं आया। हुण एह् योजना कमेटियां दे कुछ लोकां जो बोझ लगणा लगी पईयो पर हाली भी मंडळ मदद करा दा। मिड डे कनैं कुछ अखबारां इस योजना पर खबर भी छापियो है।

बदलोंदे वग्‍ते कनैं लोक चालीं छडी नैं, सोसाइटियां फ्लैटां च रैह्णे तांई मुंबई कनैं मुंबई ते बाह्र नवी मुंबई साही नोईयां जगहां बसणा-बिखरना लगे। इसते इक समस्‍या होर पैदा होई गईयो। आपसी मेलजोल नीं होणे दे कारण मरने पर लोकां ता कठरोणा घटदा गया। हुण ता एह् परंपरा लगभग बंद ही होई गईयो। हालात एह् देह्ये होई गियो‍ कि भाईचारे दे बदले दाह संस्‍कार करने वाळियां व्‍यावसायिक संस्‍थां जो सदणा पोआ दा।

इस मोह्ले च ब्रह्मदास ठाकुर जी नेरुल टैक्‍सी स्‍टेंडे कनैं नवी मुंबई दे डरेबर भाईयां दा हिमाचल सेवा संघ सालां ते समाज दी एह् सेवा करदा ओआ दा। परुआर दाह संस्‍कार दा खर्चा देई दे तां भी ठीक नीं देई सके ता संघ है ना। दुखी परुआरे जो पैसयां दी नीं इस कम्मे च हथ पाणे वाळे कनैं दुखे दिया घड़िया च सौग्‍गी खड़ोणे वाळयां भाऊआं दा साथ चाही दा होंदा। पर करोना ते बाद एह् टीम भी बिखर दी जा दी। 

 

चित्रकृति : लीलाधर मंडलोई 

................................

चार कंधों की तलाश

यों तो जो भी रोजी रोटी के लिए अपना घर गांव छोड़ता है, इस उम्‍मीद से ही छोड़ता है कि एक दिन व‍ह बहुत सारा धन कमा कर अपने घर लौट आएगा। फिर बड़े सुख और आराम से जिंदगी जिएगा। अपनी अयोध्या से नगरवास को निकलने वाला युवा राजा भले न हो, अपने घर का  राम जरूर होता है। उसकी यह सोच होती थी कि नगर जीत कर उसने अपने  परिवार के सारे दुख-दलिदर दूर कर देने हैं।

पिछले सत्तर-अस्‍सी साल में ऐसा बहुत कम लोगों  के साथ हुआ कि वे वापस लौट सके और उन्‍हें अपनी जड़ों के लिए अपनी जमीन मिली। पंछियों की तरह इन्‍सान कितनी भी उड़ानें भर ले पर जड़ों  वाले एक ही जमीन पर बस सकते हैं। लंबी उड़ानों पर उड़ने वाले सभी पंछियों के पास भी अपने  घोसले-ठिकाने पर लौट आने वाली तकदीर नहीं होती है। वक्‍त की गुलेल बीच में ही उड़ान खत्‍म भी कर देती है। मुंबई शहर में भी हमारे लिए मरना रोजी-रोटी कमाने और बसने से ज्‍यादा कठिन था। हिमाचल मित्र मंडल के अधिकारी पुनीचंद कटोच और पिरथी सिंह परमार  एक घटना सुनाते थे। वे दोनों मंडल के कार्यालय में बैठे थे। फोन की घंटी बजी। कटोच जी ने फोन उठाया। पहाड़ी में जवाब मिलने के बाद सामने वाले ने कहा कि मैं यहां टाटा अस्‍पताल में  महीना भर पहले अपने बेटे को कैंसर का इलाज कराने ले कर आया था। आज मेरा बेटा मुझे अकेला छोड़ कर चला गया। मैं मुंबई  में किसी को नहीं जानता हूं मैं इसका दाह संस्‍कार कैसे करूं। मैं क्‍या करूं मुझे समझ नहीं आ रहा था। फिर टेलीफोन डायरेक्‍टरी में हिमाचल ढूंढने लगा तो वहां आपका नंबर मिला। इन से यह सुनने के बाद  कि आप फिक्र मत करो हम आ रहे हैं। उसको एक अजनबी शहर में जिस एक कंधे की तलाश थी, वह मिल गया था। वह  फोन पर ही रो कर हलका हो गया। तभी दस-बारह लोग इक्‍कठे हो गए और व‍ह दाह संस्‍कार कर अस्थियां ले कर चला गया।

इसलिए परदेस में जहां भी हिमाचली बसे थे व‍हां मंडल जैसी संस्‍थाएं मिलती हैं। हालांकि अब समय  बदल गया है। लोगों का इनके प्रति लगाव कम होता जा रहा है। यह 90-91 की बात है। विष्‍णु राम जी के साथ मेरे दो रिश्‍ते थे। यूं तो वे मेरे जीजा थे पर गांव के हिसाब से चाचा भी थे। वे  मुंबई छोड़ कर गांव में ही रहते थे पर यहां उनका टैक्‍सी परमिट था। इस परमिट को पांच  साल बाद जीवित रखने के लिए  रिन्‍यू कराना पड़ता था। बंधनों को जमाना था। टैक्‍सी खरीदने के लिए नए परमिट नहीं मिलते थे। लोग दूसरे के परमिट (परवाना) पर टैक्सियां खरीदते थे बदल में पैसे देते थे। यह पैसे रिटायर लोगों और विधवाओं के लिए एक पैन्‍सन ही थे। कई विधवाआं ने उस जमाने में इन पैसों से गांव में अपने बच्‍चे पाले हैं। ऊपर से पांच साल बाद रिन्‍यू करने के बहाने टैक्‍सी वाले के खर्चे पर मुफ्त में मुंबई की सैर भी हो जाती थी।

उस दिन रविवार था। हम उनका इंतजार कर रहे थे। उन्‍होंने आने के लिए कहा था। लेकिन तभी उनके पड़ोसी समेश सिंह धोबू उनके नहीं रहने की खबर ले कर पहुंच गए। गांव में उन्‍होंने तार कर के सूचना दे दी थी परंतु  दाह संस्‍कार की समस्‍या आ रही थी। हमारे अलावा और  कोई रिश्‍तेदार संपर्क में यहां नहीं था। उस समय फोन भी बहुत कम थे। गांव में तो थे ही नहीं। किस्‍मत से मेरे पास उनके  बड़े भाई जो दिल्‍ली में रहते थे उनका नंबर था। उन्‍होंने कहा कि गांव से किसी का आना संभव नहीं है। मैं कल ट्रेन पकड़ने की कोशिश करता हूं। देर हो जाएगी तुम दाह संस्‍कार कर दो।

मेरे लिए बहुत मुश्किल  था पर आखिर मुझे ही मुखाग्नि देनी पड़ी। जलती चिता देख बड़ी देर तक सोचता रहा। मुझ पर उनका एक कर्ज था। मुखाग्नि दे कर मैं कर्ज मुक्‍त हो गया या और कर्जदार हो गया। आज तक मैं फैसला नहीं कर सका हूं।  क्‍या मेरा मुखाग्नि देना ठीक था। वे अच्‍छे भले गांव से आए थे। मीट-मांस कुछ उलटा-सीधा खाने से, सफर की थकान से या ड्राईवर भाईयों ने घूंट लगवा दिया होगा। वैसे वे पीते नहीं थे, महफिल में थोड़ा  लगा लिया होगा तो पता नहीं। उनका पेट खराब  था दस्‍त लगे हुए थे। वे रात भर उठ-उठ कर बाहर  जाते रहे और पाणी नितरता रहा। 

आखिर सुबह होने से पहले ही उन्‍होने प्राण छोड़ दिए। आश्‍चर्य की बात यह थी कि भले ही टुन थे पर उनके बगल में चार लोग सोए थे। वे बड़ा कम और धीरे से बोलते थे फिर भी इन्‍होंने अपनी तकलीफ बताने की कोशिश तो की ही होगी। इनके बार-बार उठने से आवाज भी तो हुई होगी। मृत्‍यु प्रमाणपत्र देने वाले डाक्‍टर का कहना था कि यह मुंबई शहर में लिए चुल्‍लू भर पानी में डूब मरने वाली बात है कि एक भला-चंगा आदमी डीहाईड्रेशन से  मर जाए। अब इस के लिए साथ सोए मित्रों की शराब वाली डीहाईड्रेशन जिम्‍मेदार थी या शरीर के पानी वाली। कुछ नहीं कहा जा सकता है।  

यहां मुंबई में कई बार यह समस्‍या हो जाती थी कि इंसान मर गया और उसने अपनी सारी जमा पूंजी इलाज में खर्च कर दी होती थी। उसकी पत्‍नी और बच्‍चों के सामने दाह संस्‍कार तो छोड़ो खाने की भी समस्‍या होती थी। फिर लौट कर गांव भी जाना होता था। कई बार वह अकेला ही होता था। साथ रहने वालों और रिश्‍तेदारों को खर्च करना पड़ता था। ऐसा कुछ ना भी हो तो भी दिहाड़ी करने वालों के लिए मौत भी एक बोझा ही होती थी।

कई बार अरथी उठाने से पहले चंदा निकाल कर पैसे इकट्ठा करना पड़ जाते थे। उस समय आज की तरह श्मशान पर लकड़ियां भी मुफ्त नहीं मिलती थीं। इस समस्‍या से निपटने के लिए हिमाचल मित्र मंडल ने एक मृत्‍युकोष बनाया। जिस के लिए सभी से दो रुपये चंदा लिया जाता था और मृतक के परिवार को तुरंत तीन सौ रुपये की मदद दी जाती थी। उस समय इन पैसों में दाह संस्‍कार भी हो जाता था और बाल-बच्‍चा भी गांव पंहुच जाता था।

यह एक समाज द्वारा अपनी सूझबूझ और बलबूते पर समस्‍याओं को हल करने की मसाल है। इस के बाद जब तीन सौ का मोल नहीं रहा तो मंडल एक बार तीन सौ रुपए ले कर मृत्‍यु उपरांत  9 हजार की सहायता प्रदान करने वाली नयी मृत्‍यु कोष योजना ले कर आया। अब यह योजना कार्यकारिणियों में कुछ सदस्‍यों को बोझ लग रही है पर अभी भी मंडळ सहायता राशि दे रहा है। इस योजना को मिड डे और कुछ दूसरे अखबारों ने खबर के रूप में छापा भी था।  

लोग बदलते वक्‍त के साथ सोसाइटियों, फ्लैटों में रहने के लिए चालें छोड़ मुंबई और  मुंबई के आस पास नवी मुंबई और दूसरी जगहों में बसने-बिखरने लगे। इससे एक और समस्‍या पैदा हो गई। आपसी मेलजोल नहीं होने के कारण मरने पर लोगों का इक्‍ट्ठा होना घटता गया। अब तो यह परंपरा लगभग बंद ही हो गई है। हालात एसे हो गयें‍ हैं कि भाईचारे के बदले दाह संस्‍कार करने वाली व्‍यावसायिक संस्‍थांओं को बुलाना पड़ रहा है।

इस माहौल में  ब्रह्मदास ठाकुर जी, नेरुल टैक्‍सी स्‍टेंड और नवी मुंबई के ड्राईवर भाइयों का हिमाचल सेवा संघ सालों से समाज की यह सेवा करता आ रहा है। परिवार दाह संस्‍कार  का खर्च दे तो  भी ठीक नहीं दे सके तो संघ है ना। दुखी परिवार को पैसों की नहीं इस काम में हाथ डालने वाले और दुख की घड़ी में साथ खड़े होले वाले भाइयों का साथ चाहीए होता है। पर करोना के बाद यह टीम भी बिखरती जा रही है।

मुंबई में पले बढ़े कवि अनुवादक कुशल कुमार
2005-2010 तक मुंबई से हिमाचल मित्र पत्रिका का संपादन किया।
चर्चित द्विभाषी कविता संग्रह मुठ भर अंबर।