मिठिया भाषा च पारंपरिक कविता

 

रमेशचंद्र 'मस्ताना' होरां दे पहाड़ी कविता संग्रह झांझर छणकै, पखरू बोलै ते बाद पहाड़ी कवतां दी नौई कताब मेरया मितरा हाल च ही छपी है। कवि लेखक कुशल कुमार होरां इसा कताबा दे बारे च चर्चा करा दे हन। 

 

रमेश चंद्र मस्‍ताना जी दा पहाड़ी कवता संग्रह मेरया मितरा, मितरां दे ब्‍हाने सारे समाजे कनैं इसा टेडिया दुनिया दे सारे छल़ां, कपटां, टुच्‍चयां सोचां, तिकड़मां कनैं जुगाड़ां दा खुल्‍ला चिट्ठा है। कवतां दा मुख स्‍वर पारंपरिक ही है कि बुरा जमाना आई गिया। कविए दी कसीदाकारी, पहाड़ी भासा दी मठास अपणिया पूरिया सुंदरता च मौजूद है। मितरा तकिया कलाम दे दोहराब दे बावजूद इक जबर्दस्‍त लय है। जेह्ड़ा सारियां कवतां जो जोड़दा चल्ला दा। कुत्‍थी भी लय कनैं गल टुटा दी नीं। 

प्रिय प्रकाशन,
मस्त कुटीर, नेरटी, रैत, 
जिला कांगड़ा, (हि. प्र.)
मूल्य रु. 400/-

बल्‍ले नीं बल्‍ले तेरे क्‍या कैंह्णे मितरा।

इक नथ नीं है बाकी सारे गैंह्णे मितरा।।

संस्‍कार सारे-न मुकदे जा दे,

रीत-रुआजे वी घटदे जा दे।

नूंहां नीं जेकर पल्‍लू लैंणा,

सौह्रैं ही मुंह लुकांणा मितरा।।  

कवि मितरां जो सलाह देआ दा जरा बची नैं चलना। इसा दुनिया च‍ जीणा सोखा नीं है। कवि दुनिया दे जिस दोगलेपण, ऐबां, सिफ्तां, रोगां कनैं सुआरथां दियां तस्‍वीरां कवतां च पेड़ा दा, एह् सिफ्तां असां दे व्‍यावहारिक समाज कनैं दुनिया च हर जगह कनैं हर माह्णुए च तूही-तूही ने भरोईयां मिलदियां। स्‍यापा एह् है कि एह् एब दुअे च त बुरे लगदे पर अपणे नीं सुझदे। ताहीं ता क‍बीर गलाई गिया – बुरा जो देखन मैं चला...। 

दुनिया तां लुह्ड़-कंजूस है मितरा,

पूरी एह मक्‍खी-चूस है मितरा।

दुनिया दी भुक्ख तां रोह्ज बद्धा दी,

भरोआ नीं करदी जेब है मितरा।

कलहा-कलेश वी ओत्‍थू ही बदधे

जित्‍थू भी पेई जरेब मितरा।।

हौलें कनैं हिरखें हन सारे ही जल़ा दे।

भरोसे आल़ा कुत्‍थू बसुआस है मितरो।। 

पैह्लिया कवता च असूलां दा जींण्‍डा पुटणे ते लई आखर च हर हर गंगे होणे तिकर कवतां दुनियादारी दे नड़ीनुएं दे फैरे च फसयो माह्णूए जो सलाहां देआ दियां। इसा जातरा च उमरा दे जंजाल़ हन, करमां दे फल हन या जमाने दी चाल कनैं चाळे हन। नौक्‍खयां रंगां वाळी एह् दुनिया रंग बरंगी होणे कनैं-कनैं नखरीली, सुआदू, जुगाड़ू कनैं बड़ी कप्‍पती है। बैपैंदयां लोटयां, फसली बटेरेयां, मतलबी लोंकां दे मतलबां बिच जळबां ने भरोईयो जिंदा लई इसा दुनिया च कियां जिंद जीणी।

वग्‍त होया बड़ा बमार ओ मितरा,

अज्‍ज मांह्णू मांह्णू-मार ओ मितरा।

 

दुनियां दी दौड़ बद्ध दी जा दी,

नखरे सभनां दे न्‍यारे मितरो।।

 

अपणेयां सुआरथां दुनियां उलझी

पेइयो है मारो-मार ओ मितरा।। 

क्‍या करिए सब कर्मां दे फल़ हन। भोलेपणे नैं जीणां औक्‍खा है। एत्‍थू मेंहगाई पटराळयां मारा दी। मुफ्त खोरां दी मौज है, वग्‍त बड़ा बमार है। बतीरा बिगड़ी गेया बर्हले बड्ढी लोक चणे दिया चूंडिया चढ़ी नैं सुक्‍खी जिंदू दे सुपने दिक्‍खा दे। एह् ठीक नीं है। सबरा दे फल ही सुखी जिंदगी दे तत हन। नेकी पर ही टिकेया है जमाना। जे इस च मौजा नैं जीणा बत नीं बगाड़नीं। सारयां दा सौंह्णा बाबू बणी जीणा। 

खाह्म-खाह् ही सलांही देई नैं,

मगज़ नीं अपणा खपाणा मितरा।।

छड्डी सारी ही तेरी छाह् मितरा,

चलदी रख तूं खसमां यो खाह् मितरा।

जे कुसी गल्‍ला पर गौर नीं करणी,

खट्टी कढ़ी तूं ठूठे-च खाह् मितरा।।    

एह् इस संग्रह दियां कवतां दे शीर्षकां कनैं कवतां जो जोड़ी नैं कवतां पर गल करने दी इक कोशिश थी। इस संग्रह दियां कवतां पढ़दिया बारिया पढ़ने वाळे जो एह् ख्‍याल बी आई सकदा कि इतणियां खराबियां वाळी एह् दुनिया कैत पाणी। एह् सब दिक्‍खी नैं कविए जो वी एही लगा दा ताईं ता सैह अपणियां कवतां च गला दा। 

रमेश मस्ताना
झांझर छणकै, पखरू बोल्लै
(पहाड़ी कविता),
कागज के फूलों में
(हिंदी कविता),
आस्था के दीप,
लोकमानस के दायरे,
 पांगी घाटी की पगडंडियां एवं परछाइयां,
मिटिया दी पकड़ (गद्य साहित्य)

सुखी जिन्‍दू दे सुपनें अज्‍ज चूर-चूर ‘मस्‍ताना’।  

फी-वी जीणे दां सारेयां पर दबाव है मितरो।।

 

कोई भी नीं गल्‍ल सुणा दा,

दस मितरा क्‍या करिए।     

कुण कुसदी सुणदा दुनिया दी एही रीत है, माह्णू इन्‍हां कनैं ही जींदा ओआ दा। जिन्‍हां बण-बण दियां पखैनां, सणोणियां, बालियां कनैं मैंजरां नैं कविएं अपणियां कवतां दियां माळां परोईयां। एह् सब असां जो कनैं कविए जो पिछले वग्‍ते कनैं पीढ़ियां ते बरासता च मिलियां। कुछ असां दी पीढ़ी भी जोड़ा दी। 

बगानैं सिरैं जूं दुस्‍सी जांन्‍दी

अपणे पर नीं घोड़ा।

दुखां-ज़ल़बां कियां जिन्‍द कटोणी,

गठ्ठ-त्रुप कितणी सींणी-परोणी।

जे मनैं रति भ़र चैंन नां होएं,

क्‍या करणे पींघ झुटारे मितरो।।

जो सुख छज्‍जु दे चुबारे मितरो,

नां ही बल्‍ख नां बुखारे मितरो।

जे मुकदा जल़बे नैं मुकदा,

कम्‍मैं नैं मुकदा मितरा। 

एह् जिंदगी कनैं दुनिया दे सिक्‍के दा मूहरला पासा है। जै‍ह्ड़ा दुनियादारी दे छळां कपटां च खुरदरा लगा दा पर इस दे दुअे पासें बांका, छेळ कनैं पिआरा सौह्णा बाबू है। कवि चांह्दा कि दुनिया च सारियां बुराईयां ते बावजूद  एह् सौह्णा बाबू सौह्णा ही बणी रेह।  

बुराइयां बेश‍क हन ‘मस्‍ताना’

किछ नेकी पर टिकेया जमानां।

फलां भरेया डालू लफदा,

सुक्‍का कुत्‍थू झुकदा मितरा।।

कुशल कुमार

मुठ भर अंबर 

द्विभाषी कविता संग्रह 

दे चर्चित कवि कनै

अनुवादक