पांगी-घाटी च दो संझां

 

चैणी पास, संझका बेला।

पांगी-घाटी च दो संझां  :  साच-खास दे नाएं पर

हिमाचल प्रदेश दी पांगी घाटी बड़ी दुर्गम जगह है। लेखक रमेश चंद्र मस्ताना कनै प्रभात शर्मा होरां पिछले म्हीनें इक बरी फिरी इसा जगह दा फेरा लाई आए। कनै आई नै रमेश चंद्र मस्ताना होरां असां ताईं खास करी नै एह् लेख लिखया है।  

म्हाचल प्रदेसे दा चम्बा जिला, कुसी अजूबे ते घट नीं है, तांईं तां  "चम्बे यो अचम्भा" बी बोल्या जांन्दा है। इस जिले च कुदरती नजारेयां सौगी-सौगी लोक-संस्कृतिया दे दे-देह् अथाह भंडार हन, जिन्हां यो दिक्खी नैं, तिन्हां दे बारे च सुणी नैं "अचम्भा" तां हुन्दा ही, मनैं-यो बड़ी शान्ति-चैन कनैं खुशी बी बेथाह् बझोन्दी। इस ही चम्बा जिले दा भरमौर उपमंडल कनैं पूरी दी पूरी पांगी-घाटिया यो  म्हारिया केन्द्र सरकारा दुआरा संविधाने दिया पंजमिया अनुसूचिया मुताबक कबायली इलाका घोषित करी, ओत्थू दे रैह्णे आल़ेयां यो जनजातीय दा दर्जा दित्ता गेया है। 

कुमार नाले पर बना
घाटी का सबसे लम्बा वैली-ब्रिज।

चम्बा जिले दी पांगी-घाटी पीर पंजाल कनैं जांस्कर दिया लम्मिंयां-उच्चियां प्हाड़ी चोटियां दियां छाऊंआं-च रस्सेया-बस्सेया इक इदेहा इलाका है, जेह्ड़ा इक्की पास्सें जम्मू-कश्मीर दे गुलाबगढ़-पाड्डर दे संसारी नाल़ा, दूएं पास्सें लौहल़ दे कड़ू नाला कनैं त्रिंएं पास्सें चम्बा दे बैरागढ़ कनैं सतरुंडी ते अग्गैं समुन्दर तले ते चौउदह् हजार, सत्त सौ, अट्ठतर फुट ऊच्चे साच पास ते गांह तिकर फैल्या है। पन्द्रह सौ तिन्न वर्ग किलोमीटर च फैल्यो इस कबायली इलाके च जित्थू 55 देह् ग्रां हन, जित्थू लोक बसदे कनैं 106 देह् ग्रां हन जित्थू कोई बी नीं रैहन्दा-बैंहन्दा है। एह सारा इलाका चन्द्रभागा नदिया दे उआर-पार रस्सेया-बस्सेया है कनैं इस च पंगवाल़े कनैं बुद्ध धर्म यो मन्नणे आल़े भोट लोक रैंहन्दे हन। पांगी च सत्त बस्सयो ग्रां चन्द्रभागा दे उस पार हन कनैं अट्ठताल़ी ग्रां इस पार हन, जिन्हां च पांगी-घाटी दा हैड-कुआटर किलाड़ बी शामिल है। इन्हां अट्ठताल़ियां ग्रां च ही घाटिया दे बक्खरे-बक्खरे पंज कूंणेयां पर पंज ग्रां इदेह हन जिन्हां च भोट लोक बस्सदे कनैं इन्हां बसदियां यो भटोरियां बोल्या जांन्दा है। एह भटोरियां हन :  सुराल भटोरी, हुडान भटोरी, हिलु-टुआन भटोरी कनैं चस्क भटोरी। इन्हां सारियां ही भटोरियां च चस्क भटोरी सभनां ते ऊच्ची तकरीबन तेरह हजार फुट ते जिआदा ऊंच्चाइया पर बस्सियो है कनैं एत्थू दे भोट लोक सारेयां ते ही जिआदा कठन जींण जींणे यो मजबूर हन। पांगी-घाटिया च परयावरण दे लिहाजे नैं एह बी बड़ी बड्डी कनैं खुशिया आल़ी गल्ल है जे एत्थू दे पूरे इलाके च सिर्फ अट्ठारह परसेंट हिस्से च ही ग्रां, बसदियां कनैं खेतीबाड़ी करणे तांईं खेतर-जमीन है कनैं बाकी ब्यासी परसैंट हिस्से च वण-जंगल, नदियां-नाल़े, चरांन्द कनैं बड़े-बड़े प्हाड़ जां चट्टानां ही हन। पांगी-घाटी जित्थू 1966 च केन्द्र सरकारा दिया तरफा ते कबायली इलाका कनैं पंगवाल़ेयां सौगी-सौगी भोटां यो जनजातीय दा दर्जा दित्ता गेया था, तित्थू 15 अप्रैल 1986 ते एत्थू दी सारी दी सारी तरक्की बास्तैं इकहैरी प्रशासन प्रणाली "सिंगल लाइन एडमिनिस्ट्रेशन" शुरू कित्ता गेया था कनैं पूरियां पावरां आल़ी इक पोस्ट आवासीय आयुक्त दी दित्ती गेई थी कनैं किलाड़ यो हैड-कुआटर बणाई दित्ता गेया था। 

स्हांजो घुमक्कड़ी करणे दा शौक तां शुरू ते ही रेहया है कनैं जाह्लू बी कदीं कोई मौका मिलदा, कोई ब्हाना बणदा, कुसी बैगे च समान पाई नैं चली पौन्दे थे। सन्  2012-13 च रटैर हुणे ते परन्त परांणे दोस्त कनैं प्रशासनिक अधिकारी प्रभात शर्मा होरां दा साथ क्या मिल्ला, दोयो ही मितर ते साहित्तिक-मितर बी बणी नैं घुमक्कड़ बी बणी गे कनैं जाहलू बी जित्थू दा मन करदा, उट्ठि नैं चलणा लगी पे। इन्हां सारियां ही जातरां च असां तकरीबन तिन्हां ही इलाकेयां यो बसां च जां पैदल ही नापदे रेह, जेह्ड़े दूरदराज दे कठन प्हाड़ी इलाके जां देसे-प्रदेसे दी सीमां पर बस्सयो इलाके थे। साहित्तिक परोगरामां बास्तैं तां देसे कनैं प्रदेसे दे बक्खो-बक्खरे शैहरां च गे ही गे, म्हाचले दे दूरदराजे दे इलाकेयां सौगी-सौगी उत्तराखंड दे उत्तरकाशी कनैं रूपन-सूपन दियां वैलियां सौगी जम्मू-कश्मीर दे राजौरी-पुंच्छ कनैं डोडा, किश्तबाड़, गुलाबगढ़ कनैं भद्रवाह बगैरा-बगैरा इलाकेयां यो भी नेड़े तिकर जाई नैं दिक्खणे दा मौका बी मिल्ला कनैं तित्थू दिया लोक-संस्कृतिया यो समझणे दा मकसद बी पूरा होय्या। 

इयां तां चम्बा जिले की कबायली घाटी पांगी यो चार-पंज बरी प्रभात होरां सौगी दिक्खणे कनैं घुम्मणे दा मौका मिली चुकेया था पर इसा लम्मिंया-चौड़िया घाटिया यो टिकी-टकाई नैं दिक्खणे-पढ़ने बास्तैं दिन तां क्या म्हीने कनैं बरहियां बी घट्ट हन। एत्थू दे छैल़ नजारे, हरे-भरे बण-जंगल, डुग्गी-डुग्गी बगदी चन्द्रभागा कनैं पंगवाल़ेयां कनैं भोटां दी रीतां-प्रीतां भरियो लोक-संस्कृति यो दिक्खी-दिक्खी मन भरोन्दा ही नीं है। दूई खास गल्ल एह बी है जे प्रभात शर्मा होरां पांगी दे हैड-कुआटर किलाड़ च तकरीबन दस साल ते जिआदा वक्त 1986 ते लेई नैं 2008 तिकर बक्खरे-बक्खरे टैंमें नायब तहसीलदार, तहसीलदार, एस डी एम (सिविल) कनैं इक बरी आवासीय आयुक्त दा पदभार भी सम्हाल़ेया था, इस बास्तैं ओत्थू देयां सारेयां ही लोकां नैं इन्हां दा गूढ़ कनैं गैहरा रिश्ता बणी चुकेया है कनैं जितणी बरी बी असां दोयो पांगी-घाटी च पुजदे, लोक पूरा दा पूरा आदरमान बी दिन्दे कनैं आवभगत बी करदे। 

पिछले म्हीने ही करोना-कोविड दी दूंह सालां दी काल़ी छाया ते निपटणे ते परन्त इक बरी फिरी पांगी जांणे दा मन बणाया कनैं मनाली हुन्दे होए, छैल़-बांकी अटल टनल यो लंघी नैं लाहौल हुन्दे होए पांगी-घाटी च असां जाई पुज्जे। 

जांन्दे ही इक दिन असां दोयो मुसाफर सुगलवास रैस्ट हाऊस च ठैह्रे कनैं संझा-तरकाल़ां तिकर रुआंह्-परांह् शुभचिंतकां नैं मिल्ले-गिल्ले। सुगलवास दे हाई स्कूले च बी गे पर टूर्नामेंट कनैं इक लोकल मेला-जातर हुणे करी नैं नां पूरे बच्चे ही मिल्ले कनैं नां ही मास्टर-लोक ही। असां जित्थू बी जांन्दे, तित्थू इलाके दे बड्डे बजुर्गां नैं मिल्लणें सौगी-सौगी असां नेड़े-तेड़े दे स्कूलां-कालजां च जाई नैं मास्टरां-बच्चेयां नैं बी गल्ल बात जरूर करदे। दूंए दिनैं भ्यागा ही नाश्ता-पाणी करणे ते परन्त पुरथी पंचायत दे पराणे प्रधान कनैं ठेकेदार सतीश शर्मा होरां अपणी गड्डी भेजी कनैं मिन्धल माता दे दरशन करुआई नैं संझा यो स्हांजो साच खास दे रैस्ट हाऊस च पजाई दित्ता। साच खास ग्रां पांगी दा इक खास ग्रां है कनैं कुमार-परमार, सेचू सौगी-सौगी हिलु-टुआन, शूण कनैं चस्क भटोरी बगैरा-बगैरा बास्तैं इक खास ठाह्र है। एत्थू इक बड़ा पराणा रैस्ट हाऊस बी है कनैं बक्खैं ही इक नौआं रैस्ट हाऊस बी बणा करदा है। असां दी बुकिंग किलाड़ ते होई चुकियो थी कनैं असां तित्थू अपणा डेरा जमाई दित्ता। 

पत्थर के रूप में लोक देवता।

रैस्ट हाऊस दें बक्खें ही पूरे ग्राएं कनैं प्रजा दा इक मेला ग्राउंड कनैं पंजनाग देवता दा मन्दर बी बणेया है। संझोकणे बेलें तित्थू काफी चैह्ल-पैह्ल दुस्सणा लग्गी कनैं एह सुणी-जाणी नैं बड़ी खुशी होई जे दूंए दिनैं तिस मन्दरे कनैं मेला ग्राउंडे च जातर कनैं मेले दा आयोजन था, जिसियो साच-जाच दे नाएं नैं जाणेया जांन्दा है।  किछ मर्द जातरा दे परबन्धे च लगयो थे तां किछ लंगर-भंडारे दी त्यारी करा करदे थे। किछ दुकानदार अपणियां दुकानां सजा दे थे तां कुड़ियां-मुंडुआं-बच्चेयां च इक नोक्खा ही चाअ था। संझा बेलें जियां ही सूरज डुब्बा दा था, साह्मणे चैणी पास दियां चोटियां पर सूना ही सूना बिखरेया दुस्सा दा था कनैं इक नोक्खे ही नजारे दे दरशन होआ दे थे। फिलहाल तिकर चैणी पास दा रस्ता चम्बे दे देवीकोठी ते सारेयां ते घट्ट दूरी आल़ा पैदल रस्ता है कनैं जे इस पास दे थल्लैं-थल्लैं सुरंग निकल़ी जाऐ तां बारहा म्हीने लोक आसानियां नैं घाटिया च पुज्जी सकदे हन। एह डिमांड लोकां दी वाजिब बी है, बड़ी पराणी बी है कनैं जरूरी बी है पर कदूं पूरी हुंगी, एह कोई पता नीं है। 

दूएं दिनैं भ्यागा ही दल़िए दा नाश्ता करी असां पैदल ही कुमार-परमार ग्राएं यो चली पे कनैं जाहलू जे असां कुमार नाल़े पर बणेयो घाटिया दे सारेयां ते लम्मे पुळे ते किछ पचांह् थे तां बस आई गेई, जिसा दा स्हांजो पता नीं था। कुमार ग्राएं च जाई नैं इक शुभचिंतक दिलाराम जी, जेह्ड़े पंचायत इन्सपैक्टर थे, तिन्हां दा कनैं बादे च तिन्हां दी धर्मपत्नी दा बी सुरगवास होई चुकेया था, तिन्हां दे घरें जाई शोक-सनेहे दैंणे ते परन्त असां आंगनबाड़ी केंद्र कनैं प्राइमरी स्कूले सौगी-सौगी हाई स्कूले च बी गे कनैं तिस ते परन्त पैदल ही साच खास यो चली-पे। रस्ते च पुल़े दें पिच्छैं ही थे कनैं मैं पुल़े दे फोटू लेया दा था, ताह्लू ही पचांह ते इक कार आई गेई, जेह्ड़ी इक साईंस मास्टर दी थी कनैं सैह किलाड़ कुसी सरकारी कम्में बास्तैं चलयो थे, तिन्हां कार रोकी स्हांजो बठैळी लेया कनैं असां वापस साच रैस्ट हाऊस च पुज्जी गे। 

पंगवाली वेशभूषा में
एक पंगवालन 

दपैहरां ते ही मेले-जातरा दियां रौणकां बद्धा करदियां थियां।  मर्द कनैं किछ जुआन मुंडू कनैं बच्चे ग्राएं ते किछ उपर नाग देवता दे थड़े पर जातरा दे रूपे च जांणे यो त्यार बैठयो थे तां जणांसा-कुड़ियां कनैं किछ बच्चे मेला ग्रौउण्डे च मेले दा नन्द लेया दे थे। थोड़ी देरा परन्त बड्डेयां ढोलां, जिन्हां यो ढौंस बोल्या जांन्दा है, दी धमक सणोणा लग्गी।  रणसिंगे, तुरही कनैं बांसुरिया दिया धुनां कनैं कंसियां-खड़तालां दिया थापां नैं चेलयां अपणी पंगवाल़ी पैहरावे, जिस च चिट्टा मोटा पंगवाल़ी ऊनी कोट, तिस पर लाल पट्टिया दा मझींन कमरबन्द, सिरे पर चिट्टी पंगवाल़ी टोपी कनैं पैरां च एल़ो जौंआं दियां बणियां खास पूलां पैहनी नैं हत्थे च फुल्ल कनैं मूंहण्डे पर सौंगल़ रखी नैं जातरा दा श्रीगणेश होय्या। पूरे विधि-विधान नैं नाग देवता दे थड़े पर जातर देई जातरा दा जलूस वापस हटी नैं मेला ग्राउंडे च पुज्जी गेया। तिह तिकर असां बी रैस्ट हाऊस ते निकली करी ग्राउंडे च पुज्जी गेयो थे कनैं साच खास दे किछ शुभचिंतकां चैनसिंह, दीनानाथ, नेकराम, प्रेम सिंह बगैरा नैं स्हाड़ा सुआगत बी कित्ता कनैं मेला-ग्राउंडे दें गब्बें देइया, उसा जगहा पर जित्थू ते सारा नजारा असानियां नैं दुसी जांन्दा, पक्किया बणियां अट्टल़िया पर स्हांजो बी बठैल़ेया कनैं अप्पूं बी सौगी बैठी गे। जलूस जियां ही पंजनाग मन्दर दे साह्मणे पुज्जा तां गांह्-गांह् पंगवाल़ी वाद्ययंत्रां आळे, पिच्छैं-पिच्छैं चेले सौंगळ कनैं त्रिशूल, जिन्हां पर लाल चुन्नियां कनैं फुल्ल लपेटयो थै, लेई नैं  तिन्हां दे पिच्छैं मते सारे भगत लोक संजल नाएं दे रुक्खे दियां लम्मिंयां-उच्चियां डालियां पर फुल्ल, सेब कनैं चौलाई दे लाल-लाल डालू सजाई नैं नच्चदे-गांन्दे मस्त होई नैं चलयो थे। इक चेला गांह् कनैं तिस दे पिच्छैं दो-दो चेले, इक सिद्धा कनैं इक पुट्ठा, इक पैर पैह्लें सज्जें पास्सें फिरी किछ पचांह् कनैं फिरी खब्बें पास्सें रखी-रखी करी इक खास अन्दाजे दी नाटी पाई नैं गोल दायरे च पूरे ग्राउंडे दे चक्कर बी लगा दे थे कनैं मुख मन्दरे सौगी-सौगी होरनां छोटेयां मन्दरां कनैं थड़ेयां पर स्थापत देवतेयां पर फुल्ल चढ़ाई-सुट्टी नैं मत्था टेकदे जा करदे थे। इन्हां चेलयां सौगी इक आदमी देया बी था, जेह्ड़ा अपणे हत्थें इक खास किस्मां दा फरसा  "शैण" लेई नैं नच्चा करदा था। एह शैण बी बड़ा पवितर कनैं खास मन्नेया जांन्दा है कनैं नच्चदें-नच्चदें एह हत्थे ते भूइयां बिल्कुल नीं डिग्गणा चाहिदा। 

मेला ग्राउंड में चेले प्रेम सिंह व अन्य गणमान्य व्यक्तियों
के साथ लेखक द्वय  

सारेयां गाजेयां-बाजेयां सौगी सारे चेले कनैं बाकी लोक नाग देवता अग्गैं सिरे यो झुकाई-झुकाई, फुल्ल चढ़ाई नैं मत्था टेकदे होऐ नाटी पाई नैं फेरियां लगा करदे थे। थोड़ी देरा परन्त चेलयां यो खेला बी आई कनैं सैह संगलां खड़काई, पिट्ठी पर बजाई देवता दी वाणी यो सारेयां यो दस्सा बी करदे थे। एह बी दिक्खी नैं हैरानी होई जे बादे च इकनी चेलें अपणे इक्की पतल़े त्रिशूले दे नुकीले सिरे यो मुंहें ते पाई खाखा ते बाहर कड्डी-ता कनैं तियां ही सैह दौड़दा-दौड़दा फेरी लगांन्दा रेहया। इस दौरान ही कोई पांणी पिआ दा था तां कोई कोल्ड-ड्रिंक बी पिआ दा था। बादे च पांगी-घाटी दा सोमरस अराख़/पातर बी, जेह्ड़ा लैंणा चांहन्दे थे, उन्हां यो बंडी गेई। पूरी पांगी-घाटी च पातर इक इदेहा पेय-पदार्थ है, जिसदा हरेक रीत-परम्परा च कनैं लोक-संस्कृतिया च खासमखास महत्व है। 

साच खास का रैस्ट हाऊस। 

संझा-तरकाल़ां तिकर एह जाच मेला ग्राउंड च पूरी आस्था कनैं श्रद्धा नैं लोकां पूरी कित्ती कनैं सारेयां लोक-देवी-देवतेयां अग्गैं एह प्रार्थना कित्ती जे तिन्हां दें घरें-घरें कनैं पूरी प्रजा च सुख-शांति-चैन म्हेशा बणी रैह।  कोई बी आपदा कुसी पर बी नां औऐ। पूरी ही पांगी-घाटी च बक्खो-बक्खरेयां मन्दरां कनैं तित्थू दियां प्रजां, जेह्ड़ियां बी इस तरीके दे जाच मनांन्दियां, सभनां दा एह बसुआस रैहन्दा जे तिन्हां दैं घरें, ग्राएं कनैं प्रजा च कुसी बी तरीके दी भूत-प्रेती आत्मा दी छाया-झपरेट नीं पौन्दी है। जातरा-जाच दी पूरी पूजा कनैं पूरा विधि-विधान खत्म हुणे पर जिन्हां बी संजल दियां डालियां सजाइयां हुन्दियां, सैह मन्दर मत्था टेकणे ते बाद तिन्हां डालियां यो अपणे-अपणे कोठे पर रखी दिन्दे हन। इस नैं बी एह मन्नेया जांन्दा है जे इसा डालिया यो कोठे पर रखणे ते बाद साल भर तिस घरे पर कुसी बी भूत-प्रेती छाया दा कोई असर नीं हुन्दा है। इस तरीके नैं नेह्रा हुणे तिकर असां बी पूरी जातर दिक्खी कनैं लोक बी इस जाच-मेले दा सारे ही नन्द लैंन्दे रेह कनैं सारा ही म्हौल आस्था कनैं वसुआसे नैं भरोया रेहया।

1955 में जन्मे रमेश मस्ताना पहाड़ी के जाने माने लेखक हैं।  पहाड़ी भाषा की मान्यता के लिए संघर्षशील। प्रमुख कृतियां: झांझर छणकै, पखरू बोल्लै (पहाड़ी कविता), कागज के फूलों में (हिंदी कविता), आस्था के दीप, लोकमानस के दायरे, पांगी घाटी की पगडंडियां एवं परछाइयां, मिटिया दी पकड़ (गद्य साहित्य) ।