भारत दियां भासां-बोलियां जो समर्पित नवभारत टाइम्स दे स्तंभ ऐसी बानी बोलिए च छपया कुशल कुमार जी दा लेख ‘असां सारे अंगरेजिया दे फोबिया च जिया दे’ पेश है।
मेरी सारी उमर मुंबई च ही बीती गई पर पता नीं एह् क्या चीज है जेह्ड़ी मिंजो हिमाचल नें जोड़दी। हालांकि इक पहाड़ी भासा ते लावा बाकी सारे बह्न्नण कमजोरी होई टुटणा लगी पियो। एही इक तार है जिसा नें लपटोया सालें-दुअें सालें मैं हिमाचल पूजी जांदा।
तित्थू जाई नें दिल बड़ा उचाट होई जांदा। इसा तारा दा औत्थू आळा हिस्सा ईह्यां लगदा की हुण टुटया कि पलैं टुटया। औत्थू इसा बेली दी बड़ी बेकदरी है। गळोंई आळा ही हाल है, पहाड़ी गांधी बाबे दी ता कुन्नीं नीं सुणीं हुण कोई बाबा रामदेव साही ओंगा इसा बेला बेचगा ता मुल पोंगा।
इसा बारिया करोना दे कारण ग्राएं च कुछ लोग थे पर मौह्ल विरधा आसरम आळा ही था। जबरे ही जबरे थे याणे शेह्रां दे अंगरेजी स्कूलां च पढ़ा दे। जित्थू पहाडि़या आळा दराजा बंद है। ओथू ते पढ़ी ने याणें पहाड़ी लैह्जे च दादुअे-दादीया जो हिंदी-अंगरेजी पढ़ा दे। जेह्डि़यां मोडन मांऊं हन सैह पूरा ख्याल रखदियां गलतिया नें कोई पहाड़ी लफ्ज याणें दे मुंहे ते नीं निकळी जाए।
पंज-सत साल पैह्ले दी गल है मैं बसा च पालमपुर चलया था। मेरे बक्खें इक जणास बैठईयो थी। तिसा दिया गोदा च त्रीं की सालां दा यांणा था। तिस जो फूकणुआं बेचणे आळा सुझया। तिन्नी जोरें ने गलाया मम्मी फूकणू। नहीं बेटा फुकणू नहीं वलून गलाते हैं। याणा नीं मने फूकणू-फूकणू करी जाए आखर च माऊ जो गुस्सा आईया कनैं तिन्नें सैह् याणा बसा च ही थपड़ईता। पहाडि़या दा फूकणू फुटी गिया कनैं अंगरेजिया दा वलून फुल्ली गिया। केंदर सरकार कनैं मनोवेज्ञानिक गला दे प्राथमिक शिक्षा मातरी भासा च ही होणा चाही दी। एह् है मातरी कनैं मातरी दी भासा। जिसा च याण्यां ने मातां ही नीं गला दियां।
इस च मातां दा कोई कसूर नीं है मातां जो ऐह्ई फिकर होंदी की याणा जिदडि़या दिया दौड़ा च पंचाह् नी रही जाए। हालांकि तथ नीं है पर असां सारे अंगरेजिया दे फोबिया च जिया दे। पैह्लें लोकां जों अंगरेजिया च लीख्रियो गल समझा नीं ओंदी थी हुण नौंई पीढ़ी बोल दी अंकल अंग्रेजी में समझाओ।
असां दे म्हाचली पहाडि़या छड्डी जिसा हिंदीया बोला दे तिसा दा ऐह् हाल है। वैसे हिंदी इक मजबूरी है, अंगरेजिया तिकर पूजणे दी पेढ़ी है। ऐत्थू शेह्रां च इक हाई तबका है जिस दे हाले दिक्खी हाय वो ही निकलदी। सैह् ड्ररेबरां, घरेलू नोकरां कनै छोटयां दुकानदारां ताईं ही हिंदिया कनैं देसीं भासां दा इस्तेमाल करदा।
मुंबई मते साल पैंह्लें ‘मराठी बोला’ एह् नारा चलया था। इस दे कारण कुछ लोग हिंदी ओणे ते बावजूद जाणी-बुझी करी मराठी च गल करदे थे ताकि सामणे आळे जो मराठी सिक्खणा पई जाए। पंजाबी ता परवाह् नीं करदे की साह्मणे आळे जो पंजाबी ओंदी की नीं। इन्हां लोकां मिंजो एत्थू मुंबई च ही कमचलाऊ पंजाबी सखाईतियो।
इस बारिया में राजपुरे ते टैक्सी किती। सैह् बंदा दकाना आळे नें ठेठ पहाडि़या च गल करा दा था पर मेरे नें पहाड़ी सुआलां दा जवाब हिंदियां च ही देया दा था। मिंजो ते रह्ई नीं होया है। मैं पुछी लिया भाई जी। मैं तुसां ने पहाड़ी च गल करा दा कनै तुसां हिंदिया च जवाब देआ दे। इसा बमारिया दा नां क्या है। अंकल जी आदत होई गईयो। पसींजर जादा कर हिंदी ही गलाते हैं।
हुण एह् जे वि है। आदत, फोबिया, डर, शयाह्री या फिह्री असां दा स्वभाव है। दुअे दा टप्परु कदेह्या वि होअे तिस ताईं अपणा टप्परू कोई नीं फूकदा। पैह्लें ग्रां देया स्क्ूलां च हिंदी-अंग्रेजी, साह्ब-साईंस सब मातरी भासा च ही पढ़ाए जांदे थे कनै सारे देसे च इन्हां दे पढ़यो जुवा शैह्रां आळयों जो पछाड़दे रेह्यो। पर नोकरिया दे नांए पर इन्नीं अंगरेजी शिक्षा दा बपारें असां दी सारिया भासां दी बैंड बजाई तियो। असां दे जुवा सरकारी क्लर्की तोपा दे कनैं बाह्रे ते आई नें लोक असां दे घरां-ग्रां च बपार करी जा दे। इक काळी आदत होर मिली जिसा दा नां चिट्टा है। एह् असां दे जुआना दी जिंदगी कनैं परवारां घरां उजाड़ा दी पर इस दा जादू जुआना दे सिरें चढ़ी बोला दा।
कुशल कुमार
No comments:
Post a Comment