भाषा बगदा नीर है। बगते दियां रगड़ां नै एह् संगरोदी पंगरोदी बदलोंदी गांह् बधदी जांदी। दूइयां भाषां दे लफ्जां नै समरिध हुंदी रैंह्दी। सिखदी भी सखांदी भी। असां दिया भाषा दे दरियाए च इक अर्ध दयोया है इक्की कताबा नैं। मेरियां कवतां दे संग्रह दा तेज सेठी होरां अनुवाद कीता। लेखकां सौगी मिली बैठी नै असां कताबा दा लोकार्पण कीता कनै कवियां ते तिन्हां दियां कवतां सुणियां। धर्मसाळा होए इस कारजे दा ब्योरा तुसां ताईं पेश है।
अनूप सेठी
.jpeg)
असां सोच्या भई अपणे शैह्रे धर्मसाळा च इसा कताबा दा विमोचन कीता जाऐ। इस ब्हाने नै अपणेयां लेखकां नै मुलाकात होई जांह्गी।
जिन्हां जिन्हां लखारियां जो असां बिनती कीती, तकरीबन सैह् सारे ही 23 फरवरी जो इन्द्रूनाग दे जस्टा बर्डिंग होटल भ्यागा साढे दस बजे पधारी गै। त्याह्ड़ी सोमवार था। इस वजह नै कम्मे पर जाणे आळे लेखक शामल नीं होई सके। असां जो एह् मलाल रेह्या।
प्रोग्राम दे सुरु च गणमान्य लेखकां दे हत्थां दूंह् कताबां दा विमोचन होया। पैह्लें चुह्णियां कवतां दा विमोचन होया। रेखा ढडवाल होरां इसा कताबा पर अपणे विचार रखे। कइयां कवतां दी व्याख्या कीती कनै अनुवाद दिया बरीकिया पर भी लो पाई। अनुवादक तेज सेठी होरां पहाड़ी भाषा दी जरूरत कनै अनुवाद प्रक्रिया पर विस्तार च अपणे विचार पेश कीते। तिन्हां पुराणेयां लेखकां दी प्रेरणा दा जिक्र कीता कनै अपणी इक ग़ज़ल गाई नै सुणाई। इसते बाद रेखा ढडवाल दे कहानी संग्रह दा विमोचन होया। रेखा जी दियां कहाणियां पर सेंट्रल यूनिवर्सिटी दी शोध छात्रा कनै युवा समीक्षक रूचि शर्मा नै अपणा पर्चा पढ़ेया। तिन्हां कहाणियां दे स्त्री पख पर पर डुग्घी नजर पाई।
कार्यक्रम दे अगले हिस्से च कविता पाठ होया। पवनेंद्र पवन, रेखा ढडवाल, हरि कृष्ण मुरारी, द्विजेन्द्र द्विज, विनोद भावुक, प्रभात शर्मा, रमेश मस्ताना, राजीव त्रिगर्ती, कुशल कटोच, युगल डोगरा कनै पृथिपाल सिंह होरां अप-अपणियां कवतां नै समां बन्हेया। कवि पत्रकार सौरभ चौहान अजकल बौद्ध दर्शन पर शोध करा दे हन। तिन्हां भी अपणियां कवतां सुणाइयां। पहाड़िया च सांझ नाएं आळी पैह्ली फीचर फिल्म बणाणे आळे नौजवान फिल्मकार पत्रकार अजय सकलानी होरां भी आह्यो थे। तिन्हां भी अपणी कवता सुणाई।
हिमाचल दस्तक दे संपादक हेमंत कुमार होरां नै मतेयां सालां परंत मुलाकात होई। तिन्हां अपणी गल रखदे होए जिक्र कीता कि एह् प्रोग्राम बड़ा सादा कनै सिद्धा था। कोई औपचारिकता नीं। इस च कोई अध्यक्ष नीं था, कोई मुख्य अतिथि या विशेष अतिथि नीं था। सारे खास कनै अपणे ही लोक थे। असां कल्पना भी एह् देह्यी ही कीतियो थी।
कवि रंगकर्मी, कांगड़ा लोक साहित्य परिषद नै जुडे़यो कनै बाणेश्वरी पत्रिका दे संपादक दुर्गेश नंदन नै भी पैह्ली बरी मुलाकात होई। दुर्गेश होरां शुरु ते आखर तक मंच सम्हाळेया कनै सारी कारवाई निर्बिघ्न पूरी कराई।
पत्रकार कार्टूनिस्ट मित्तर अरविंद शर्मा होरां सारे इंतजाम सम्हाळे कनै मनमोहणे फोटो भी खिंजे।
विनोद भावुक होरां सारे कारजे दी वीडियो रिकॉर्डिंग कीती।
एह् कारज अरविंद शर्मा दे उद्यम सांभ कनै पहाड़ी भाषा दे ब्लॉग दयार दे पासे ते सम्पन्न होया।
लेखकां विद्वानां नै मिली ने बड़ा नंद आया।
अनूप सेठी दियाँ 'चयनित कवितां' दे प्हाड़ी अनुवादे दिया कताब्बा दा लोकार्पण संस्कार जिस ढंगे नै, जिस गर्म जोशिया नै कनै सब्भनां पहाड़ी प्रेमियाँ दे जिस उल्ळदे प्रेम्मे नै चुक्क डुब्ब होयेया , जिस्जो सबदां दे छुब्बेयाँ च बह्न्नणा मेरे बसे च नि है। भ्यागा दस बजे ते लई नै दो ढाई बजे दा वगत कुतांह् लंघी गेया, पता ही नि लग्गा । सब्भनां अप अप्पणियाँ छैळ छैळ नजमां पढ़ियाँ अपर असां दा मन नि भरोह्या । मुञ्जो तां एह्यी गलाणा है भई देह्ये जेहे प्रोग्राम लगातार हुन्दे रैह्णे चांहिदे ।
ReplyDeleteपहाड़िया भासा दे प्रति असां दी प्रेम-लोअ बह्ळियो रेह्णी चांहिदी कनैं असां जो 'दयारे ' पर अपणी हाजरी भरी नैं मतेयाँ ते मतेयाँ प्रेमियाँ सौग्गी अलख जगाणे ते पचांह् नि रैह्णा चाहिदा ।
बडे ही छैल तरीके ने ओगेनाइज कितिओ पहाड़ी प्रेमियां दी महफल। जिसा दी खूबसूरती दो बडे बिद्वानां दियां छैल लिखियां कताबां दा लोकार्पण था। असां सारियां खूबसूरत बादियाँ, छैल छैल कबतां कनै कताबां सुण्ने दिखणे दा बडा मजा लिया। उम्मीद है होर भी दे दे प्रोग्राम होर भी होग्गे। बधाइयाँ।
ReplyDelete