चिंतन-मनन

 

असां दिया भाषा च कवता ता बथेरी लखोंदी, गद्य उतणा जादा नीं सुझदा। मौलिक गद्य तोपणा होर भी मुसकल। असां दे संस्कृतिकर्मी दुर्गेश नंदन जाह्लू अपणिया रौ च औंदे ता मता खरा लिखदे। असां कइयां दिनां ते अर्जी लाइयो थी। हुण तिन्हां दा आगमन होया है। इन्हां अपणे इस चिंतन-मनन च कश्मीरी संत लल्लेश्वरी दा इक वाख लिखेया। तिस दा हिंदी अनुवाद असां हिंदी दे मशहूर कवि, अनुवादक अग्निशेखर होरां ते लेया। तिन्हां इन्हां संतां दे वाखां दा हिंदी कविता च अनुवाद कीतया है। अग्निशेखर होरां दा शुक्रिया। जे तुसां ए वाख सुणने होन तां थल्लें दित्तयो लिंक पर जाई नै सुणी सकदे।    

याद रेही इक कथा.. 

इक

अध्ययन कई बरी आदमिये जो इतणा डुबोई दिंदा कि अपणा आप याद नीं रैह्ंदा। न भुख रैह्ंदी न प्यास, न निंदर न सुपने, बस इक ही गल होंदी कि भई अक्खरा़ च कुछ खाणे जो मिल्ले ता खाइये कनै सोई जाईये पर प्यास तड़फाई रखदी। शास्त्र बोलदे कि कालिदास भी खूहे पर फस्सी गे थे निरे प्यासे।

अध्ययन कई प्रकार दा है। कई बरी असां जेह्ड़ा सुणदे सैह् अध्ययित होणा लगी पौंदा। कई बरी असां जेह्ड़ा पढ़दे-पढ़ांदे सैह् अध्ययित होणा लगी पौंदा। कई बरी असां जेह्ड़ा दिखदे-दसदे सैह् अध्ययित होणा लगी पौंदा कनै कई बरी प्रकृति क्रिया साह्ंजो अध्ययित बणाई दिंदी।

अज्ज मैं "आदिज्ञान" पत्रिका दा अध्ययन करा दा था। टापिक था 'मलिन मैल से कोई भी लोक नहीं संवरता'। इह्दे लेखक सीताराम गुप्ता होरीं हन पीतमपुरा दिल्ली ते। सीताराम होरां इस लेखे च कबीर दी समकालीन कवयित्री लल्लेश्वरी उर्फ ललद्यद दी गल कीत्तियो। गल पढ़दे-पढ़दे जां जे मैं पढ़या-

आमि पनॅ स्वोदरस नावि छस लमान

कति बोज़ि दय म्योन म्यति दियि तार।

आम्यन टाक्यन पोञ्य ज़न श्रमान

ज़ुव छुम ब्रमान गरॅ गछ़ हाँ

अर्थात् 

मैं खींच रही कच्चे धागे से

समुद्र में नाव

काश, सुन लें देव मेरे

तारें मुझको भी उस पार

मैं छीज रही

मिट्टी के कच्चे सकोरों में

ज्यों पानी

मेरा जी मचल रहा

कब घर लौटूँ

(कश्मीरी ते अनुवाद : कवि लेखक अग्निशेखर)

 जे तुसां ललद्यद दे वाख सुणना चाह्ंदे ता इस लिंक पर जा - ललवाख 

याद रेही इक कथा.. 

दो

कश्मीरी भाषा दे इस काव्यरूप दा जां अनुवाद पढ़या ता मेरिया नजरी गांह कई कवता लंगियां जेह्ड़ी ए एदेई गल करदियां।

प्रस्फुटन अपणे आप है ता आलोचना भी अपणे आप - जिन्हां अध्ययन कित्तेयो होंदे सैह गल्लां पकड़ी लैंदे ।

खैर आदिज्ञान पढ़दे-पढ़दे जां जे मैं आदि कवियत्री लल्लेश्वरी दी गल डा.गौतम व्यथित ने साझा कित्ती तां तिन्हां मिंजो मतियां सारियां गल्लां, जेहड़ियां सैह एम. ए. हिन्दी कक्षा च पढ़ांदे थे, पर मैं नाटकां च व्यस्त रैहंदा था, सैह् छुट्टियां गल्लां, सैद्धांतिक सूक्तियां अज्ज व्यथित होरां दस्सियां, समझाईयां।

मैं सुणदा रेहा, समझदा रेहा। फिरी मैं तिन्हां ते कोई संदर्भ पुच्छया ता तिन्हां ‘आदिज्ञान’ पत्रिका जेह्ड़ी तिन्हां अध्ययित कित्तीयो थी, तिसा च संकलित इक महिला लेखक दा मनन दस्सया, समझाया। मैं तिसा पत्रिका जो खोजणे दी कोस्त कित्ती पर पत्रिका हत्थे नीं आई, खैर तिस कहानियां दीया संकलनकर्ता ते माफी मंगदेया होयां मैं सैह कथा तुसां नै शेयर करा दा..

कथा बोलदी कि भई इक ग्राएं दे खूहे च तिन्न कुत्ते लड़दे-लड़दे डुबी मरे कनै खूह गंदला होईया। पाणी पीणे जोगा नीं रेहा। बदबू होई गई तां ग्राएं दे लोक इक बाबे ल गै कि महाराज खूह गंदला, पाणी पीणे जोगा नीं। इलाज़ दस्सा।

बाबें बोल्या.. खूहे च गंगाजल पाओ।

लोकां खूहे च गंगाजल पाया पर बदबू सैह दी सैह, गल नीं बणी।

ग्राएं दे लोक फिरी गे बाबे ल। बाबे दस्सया.. खूहे च इत्र फुलेल पाओ।

ग्रां आल़ेयां खूहे च इत्र फलेल पाया। गल नीं बणी, बदबू नीं गई।

ग्रां दे लोक फिरी बाबे ल। बाबें सलाह दित्ती.. खूहे दी पूजा करा।

खूहे दी पूजा होई.. पर बदबू जस दी तस।

ग्राएं दे लोक फिरी बाबे ल जाई रैह्। बोल्या.. बाबा.. खूह नीं साफ होआ दा। पाणिये च बदबू ही बदबू।

ऐसा क्या? बाबें चिमटा चुक्कया कनै ग्राएं देयां लोकां कन्नै खूहे पर जाई रेहा।

बदबू तिञा ही फैलियो थी। बाबे लोकां जो पुच्छया.. लोको तुसां सारे उपाय कित्ते पर सैह घुळदे-लड़दे कुत्ते जेह्ड़े खूहे च मरी डुब्बयो सैह् बाहर कड्डे थे कि नीं।

ग्राएं आल़ेयां ना नुकर करदेयां सिर हिलाई ता।

चिमटे दी कोई लोड़ नीं, खूहे च बड़ा कनै तिन्हां तिन्नां कुत्तेयां जो बाहर कड्डा, पाणी निर्मल होई जाणा, होर उपाय दी जरूरत नीं।

ग्रां आळयां जो खीरली गल बोली- समझाई बाबा गांह् होया।

कथा इतणी कि याद रेही।

(मूह्रली तस्वीर- कागजे पर चारकोल नैै रेखांकन: सुमनिका सेठी)    

 

दुर्गेश नंदन
कवि,  गद्यकार, नाटककार, निर्देशक