कवतां दी कताब

 

रवींद्र कुमार शर्मा होरां दी कवतांदी कताब हाल च ही छपी है। 

कवि लेखक कुशल कुमार होरां इसा कताबा दे बारे च चर्चा करादे हन। 

रवींद्र कुमार शर्मा जी दा कवता संग्रह ‘गुलदस्‍ते रे फुल्‍ल’ मिल्ला। रवींद्र होरां बिलासपुर ते हन। इन्‍हां अपणियां कवतां कह्लूरी च लीखियां हन। भासा दे नांएं दा ही फरक है। एत्‍थू मुंबई च चौंह्ई-पंजा जिल्‍यां दे लोकां ने पहाड़िया च गल करने दे कारण मिंजो एह् सारियां भासां बोलियां इक ही लगदियां।

गुलदस्‍ते दे फुल्लां च बीतेयो कनै बीत दे जा दे वग्‍ते दियां तस्‍वीरां हन। पिछलेयां पंजाहं सालां च जीणे कनैं चीजां च आए बदलाव जो समेटणे दी कोशिश है। तस्‍वीरां पर बैठियो धूड़ा च सब धुंधळा सुज्झा दा। एह् धूड़ पराणयां बचारां-संस्‍कारां दी बी है, नौंए दे नांए पर फोकियां डुआरां दी बी है।  

सुणो मुयो लोको सुणो गलां सै पुराणियां

सुणदा नी कोई हुण कुस जो सुनाणियां

कुत्‍ते खांदे रज्‍जी कन्‍ने कांरा बिच घुमदे

अम्‍मा बाहर सौंदी पुत्‍त कोई बी नी पुछदे

बहुयां कम्‍म करदी नीं बणी गईयां राणियां

कविए व्‍हाल इक प्‍यारी भासा कनै गलाणे दा महाबरा है। ग्रां दे जीणे दा खास करि करसाणी दा अनुभव है। करसाणा दिया समस्‍यां अवारा डंगर, उकल बूटी, मौसमे दी मार, ख्‍वाड़ा, तूफान कने नहेरी, सकरोई  कमियां कनैं मजबूरियां हन। कवि लफ्जां दिया वर्तनिया दे बारे च जादा नीं सोचदा। वर्तनिया दा मानकीकरण करने आळेयां दा चेता औंदा। पहाड़ी भासा च इक दिन सैह् औंह्गा भई असां दी भासा दे लफ्ज तिञा

श्वेतवर्णा प्रकाशन, नोयडा

लखोंगे जिंञा तिन्हां जो गलांदे। खैर...    

भ्‍यागा तड़के ते उठी कने

सारा दिन कम्‍म कमाणा

एहड़ी हुई करसाणा री जिन्‍द

कई बार हत्‍था आईरी

फसल चली जांदी

सारी सारी रात नी औंदी निंद

इन्‍हां कवतां च कवि अपणे बचपने दियां यांदा जो जिया दा कनै पिछलिया सदिया दी सैर बी करा दा। इक तुलना कनै गिणती भी है। क्‍या-क्‍या था कनैं क्‍या-क्‍या बदलोई गिया या नीं रिह्या। मिटिया दे घर, चुड़दियां छत्तां,  गिट्टियां कनै गुल्ली डंडेयां दे ग्रांजड़ खेल जिन्‍हां हुण कोई नीं खेल दा। माह्णू जीणे ताईं जानवरां कनै माह्णुआं च जींदा था।

कोरडा, कौडियां, कंचे

कन्‍ने गुल्ली डंडा हुंदा था पसंद

कईयां जो पंज गिटियां

लगदी थी बड़ी प्‍यारी

 

ब्‍छाओ तां नरम

जे ओढो तां गर्म कने जे

तेहड़ो तां बशर्म

एहड़ी हुन्‍दी थी तिस जमाने री खिंद

ईसा पर सेई कने औंदी थी

बड़ी मज़ेदार निन्‍द 

इन्हां कवतां च  बीतियां सारियां चीजां करने, बणाणे दे तरीके कनैं नुस्खे हन। घरा री छाह, कोरे घड़े रा पाणी, मखीर, लूण, पि‍पली, किह्यां लगदा तुड़का, किह्यां बणदे लह्सूड़े, पतरोड़ू। एह सब अपणे सुआदे कनैं मौजूद हन। किह्यां बणदे थे खिंद खंदोलू, बटोंदा था बाण, बणदे थे मंजे। सारंया दी तफसील कनैं तस्‍वीरां हन।

बेजुआं रे पत्‍तेयां जो तोड़ी कने

पैह्ले तिन्‍हां जो पुट्ठा पांदे

बेसन, मसाला लूण पिपळी

रा लेप लाई कने

पत्‍ते रा फेरी रोल बणान्‍दे

 

बाणा खातर ब्‍यूह्ळ, सण

कने ब्‍यूह्ळिया रे छटे

पाणिए रिया आळी च थे दबांदे

तिन्‍नां महीनेयां बाद कडदे थे

फेरी थे चफांदे

सेल तन्‍जे निकलदा था फेरी

तिसरा रस्‍सा थे बणान्‍दे

बड़िया मे‍हनती ने बणदा

था बाणा रा मंजा

भ्‍यागा ते बुणने लगदे थे

तां किते बणदा था जाई कने सन्‍जा

कवतां दा मुख स्‍वर सैही है जैह्ड़ा आम पहाड़ी कवतां कनैं लोक साहित्‍य दा है। आदर्श कनैं जेह्ड़ा बीती गिया सैह् वग्‍त बड़ा खरा था। घर क्‍या पक्‍का होया माह्णू भी पक्‍का होई गिया। एह् इक सोच कनैं बचार है, क्‍या सच च माह्णू पैह्लें बड़ा खरा था हुण बुरा होई गिया? जैह्ड़ा बीती गिया सैह् खरा था कनै हुण बुरा जमाना आई गिया।  

देखा ओ लोको ए केह्ड़ा

जमाना आई गया

प्‍यार कने भाईचारे रा

पवाड़ा पाई गया

हुण रहया नियां तेहड़ा जेया प्‍यार

बंडोई गए हुण घर बार

कने अंगण द्धार

अप्‍पु च बधी गई जादा तल्‍खी

स्‍याणेयां तक ई था भाई चारा

चौबी घंटे हुण अया तकरार

असां जाह्लू अपणियां बोलियां च लिख दे ता पराणियां गप्‍पां ज्‍यादा याद औंदियां। जिह्यां-जिह्यां वग्‍त बीत दा जांदा तिस दा परछोंआ बड्डा होंदा जांदा।

बंडोई गए हुण घर बार

कने अंगण द्वार

अप्‍पुं च बधी गई जादा तल्‍खी

स्‍याणेयां तक ई था भाईचारा

हर चीज बदलोई गईयो। मिट्टिया दे घरां, बाटां, कुआळां दिया जगह पक्कियां सड़कां कनै घर आई गै। महाणू कनैं डंगरे साथी थे, डंगरेयां कनैं माह्णू जींदा था। हळ, बाळद, डंगरयां, बौड़ियां कनैं-कनैं माह्णुए जो माहणुए दी जरूरत बी नी रहियो। सुबिधां आई गईयां मेहनत कनै समाज गुआची गिया।

पाणियें लैणे जो नलका चलाणा

पुराणे जमाने साई हुण खुआ ते

या बौ‍ड़ीया ते पाणी

किसी नी लयाणा

----

अजकल फ्रिज होई गए सबीं गे

ईंया ई रुलिरे घड़े

----

मुन्निया जो देयो तुहें अच्‍छे संस्‍कार

भरने देयो इन्‍हांजो लंबी उडार

जे मुन्नियां अग्‍गे बधगियां

तांई हुणा सबी रा उद्धार                   

----

नौंई चेतना कनैं पराणयां आदर्शां दियां बेड़ियां कनैं-कनैं चला दियां। स्‍याणयां दा गलाईरा, जबरयां दे खंगारयां कनैं कुड़िया दी उड़ान बी है, चादरूए दा गैहणा बी है।   

चादरु हुंदा था औरता री

शर्म कने हया र गहणा

बड्डा कोई आई जांदा था सामणे

तां झट सिरा पर पौन्‍दा था लैणा

कुशल कुमार

मुठ भर अंबर 

द्विभाषी कविता संग्रह 

दे चर्चित कवि 

रवींद्र कुमार शर्मा दियां दो कवतां

------------------------------ 

कुड़ियां री उड़ान

कुड़ियां जो नी समझा तुसें

हुण मुन्‍डुआं ते घट

इस बार तां मैरीटा च

कुड़िऐं मुन्‍डुआं रे बड्डी दित्‍ते नक्‍क

 

कुड़िऐं चक्‍की त्‍या कम्‍म

मैरीटा च बल्‍ले-बल्‍ले

मुंडू रही गे पिछे

तिन्‍हारी हुई गई थल्‍ले थल्‍ले

 

कुड़ियां अगे जायादियां

मुंडू पिछेखा जो जायादे

एह चिट्टे रा असर आ

या कुछ होर कमायदे

 

उणतालियां मेरीटां ते

कुड़िऐं लई ली ट्ठाई

मुंडूआं रे हिस्‍से

सिर्फ ग्‍यारह ही आई

 

सरकारी स्‍कूलां रे ता बडोई गए नक्‍क

सिर्फ इक मैरिट आई

प्राईवेट स्‍कूलां वाले गलान्‍दे

पई असांरा मुकाबला नी आ भाई

 

सरकारी स्‍कूलां रे मास्‍टर

नेतागिरी करदे ज़ादा पढ़ान्‍दे घट

नतीजे देखी कने तां

एह लगया करदा बिल्‍कुल सच्‍च

 

देखी लवा कुड़िऐं

करी दित्‍या चमत्‍कार

मुन्‍डुआं ते घट नी समझणी

बराबर देणा प्‍यार

 

कुड़ियां कने मुन्‍डआं च

नी समझणा फर्क

सैजे समझगे तिन्‍हां च फर्क

ता मिलणा तिन्‍हांजो नरक  

------------------------------ 

धियू-बहू

धियू कने बहू असारें

परिवारा रे दो खंबे

तिन्‍हें जे संभाली री दुनियादारी

कने सारा घरबार

जे इक बी अपणियां जगह

ते हिल्‍ली जाओ

तां घरा च नी रैहन्‍दे फेरी संस्‍कार

 

धियू असारें घरा री इज्‍़जत

बहू असारें घरा रा गहणा

इन्‍हां दूई ते बिना कियां

चलणा घरबार

कने किंयां असां रहणा

 

धियूवां बहूआं अज्‍ज पढ़ी लिखियां

खरा कम्‍म करदियां

बड़ी अफसर बी बणी गियां

पर किसी ते नी डरदियां

 

जे धियू-नी हुन्‍दी

तां बहू बी नी बणदी

इस संसारा री गड्डी

अग्‍गे कियां चलदी

 

धियू कने बहू

जे दोनों होवे संस्‍कारी

तां हमेशा महकदी रैहन्‍दी

परिवारा री फुलवाड़ी

 

तिस घरा जे हुंदा

बहूआं रा तिरस्‍कार

प्‍यार प्रेम नी उत्‍थी मिलदा

टब्‍बरा च रैहन्‍दी हमेशा तकरार

 

बहूआं जो देंदे सै जे

पूरा इज्‍़जत मान

लक्ष्मियां रा रूप हुन्‍दी बहू

तिस घरा बसदे साक्षात भगवान

 

तिस घरा जे मिली जुली

रैहन्दियां नणान कने भरजाई

तिस घरा कदी बी

कोई विपदा नी आई