पहाड़ी भासा–अज के हलात कनै गांह् दी चिंता

 नैनसुख (1710-1778)

पहाड़ी भासा दे बारे च चर्चा करने ताईं असां मतेयां लखारियां जो छे सुआल भेजयो थे। जुआब औणा सुरू होई गै हन तां हुण असां एह चर्चा गजलकार, लेखक कनै अनुवादक द्विजेंद्र द्विज होरां दे विचारां नै सुरू करा दे। चर्चा दिया इसा लड़िया ताईं मसहूर चित्‍तरकार कनै कला पारखी विजय शर्मा होरां पुराणे मास्‍टर कलाकार नैनसुख (1710-1778) होरां दे कुछ चित्‍तर भेजयो हन। इन्‍हां चितरां पर टांकरी लिपि लिखियो है।

1. तुसां दे स्‍हाबे नै पहाड़ी लेखन असां दे मुल्के दियां दूइयां भासां दे मुकाबले च कुतू खड़ोंदा ?  

द्विजेंद्र द्विज: सुआल करड़ा है। मैं असाँ दे मुल्के दियाँ मतियाँ दूइयाँ भासाँ च लखोह्या मता जादा किछ नीं पढ़ेया, अपण इतना त पता इ है जे हिन्दी, उर्दू, बंगाली, कन्नड़, मराठी, गुजराती, तेलगू, राजस्थानी, पंजाबी, कने होर भी मतियाँ भासाँ जिह्नाँ दा लेखन साहित्य अकादमी, कने ज्ञानपीठ ते भी पणछोन्दा, तिह्नाँ दे मुकाबले च ता जादा तर प्हाड़ी लेखन कुथी  भी नी खड़ोन्दा, अपण फिरी भी किछ लेखन ऐसा भी है जिसजो पणछैणया जाणा जरूरी है। 

2. तुसां दे स्‍हाबे नै पहाड़ी भासा च इतनी समर्थ्‍या है भई अजकिया जिंदगिया दी अन्‍नोह्-बाह् दौड़ कनै सारे ढक-पळेस लखोई सकदे? कि एह् चील्‍हां दे डाळुआं झुलाणे जोगी ई है?  

द्विजेंद्र द्विज: जी मेरा एह पक्का बसुआस है जे प्हाड़ी भासा च इतनी समर्थ्या है जे एह अजकिया जिँदगिया दी अह्न्नो-बाह दौड़ कने सारे ढक-पळेस अप्पूँ च समेटी सकदी है। जे पंजाबी, डोगरी, राजस्थानी कनै भोजपुरी च एह समर्थ्या है (मैं इह्नाँ भासाँ दे लेखन जो पढ़ी सह्म्झी लैन्दा ता गलाअ दा।) ता प्हाड़िया बिच भी है।   किछ लखारी बड़िया सोह्गमानिया  ने इस कम्मे करा दे भी। फिरी भी मती मिह्णत करने दी जरूर्त है। अपण मते करी लखारी अजैं भी चीलाँ दे डाळुआँ ही झलेरी जा दे। तिह्नाँ तियैं लेखन दा मतलब इसते उप्पर किछ नीं है। 

3. तुसां दे स्‍हाबे नै पहाड़ी लेखन कनै पाठकां दे रिस्‍ते दी कदेई सकल बणदी है ?   इस ताईं होर क्‍या क्‍या करना चाहिदा?  

पैह्ली सतर: तस्वीर राजा बलवंत देव जी। राग मलार सुण दे। 

उबजा बाईया कछ। नऊ घरे दीआ निआ पर खड़ोते दे लीखे दे। 

दसे दे समते दे साउणे बीच। खीआल है। 

दूई सतर:  ताँ बणेआ दा था। आई रे नहनी नहनी बूँदनीआँ रित 

साऊण की आई रे। चहुँ देस बीज चमके सीरी सीरी पऊंन सुहाई रे। 

आई रे नहनी नहनी बूँदनीआँ।।

द्विजेंद्र द्विज: प्हाड़ी लेखन कने पाठकाँ दे रिस्ते दी बड़ी खरी सकल ता नी बणदी।  पहाड़िया च गलाणा-बोलणाँ ता असाँ बिच  मतेयाँ जो खरा लगदा अपण  लिखिया / छपिया प्हाड़िया जो पढ़ने दिया बरिया मते पढ़ेयो-लिखेयो भी  हत्थाँ  खड़ेरी दिन्दे।  जे खरे लेखक  घट हन ता खरे पाठक होर भी घट। जादा की लखारी लिखा दे मता, पढ़ा दे घट। लिखणे आळे मते हन, पढ़ने आळे घट्ट हन। जे हर कोई लखारी होई गेया ता पढ़गा कुण?  कोई कुसी जो पढ़ी नैं राजी नीं है। कोई कुसी जो सुणी नैं राजी नीं है।  गाई रिह्न्नेया कने बळ्दैं खाह्द्दा, गोह्यी जो मिली गोह जदेह्यी ओह तदेह्यी ओह। सब अप-अपणेयाँ भाण्डेयाँ सराह्यी जा करदे। बस इसते उप्पर किछ भी नीं। है ता राम रौळा ही। फिरी भी एह जोड़ना भी जरूरी लग्गा दा भई लोक्काँ जो प्हाड़ी लेखन कनै प्यार होऐं नीं होऐं भासा कनै प्यार  जरूर है। एह इ प्यार तिह्नाँ जो  प्हाड़ी लेखन जो धळोफणे जो भी मजबूर करदा। एह इ प्यास तिह्नाँ जो प्हाड़ी लेखन दे खूह्ये बखी भी घेरी ल्योन्दी। पहाड़ी लेखन दी चील्लाँ देयाँ डाळुआँ झुलाणे दी छवि टुटणा जरूरी है। जाह्ल्लू तिकर एह छवि नीं टुट्टी ताह्ल्लू तिकर लेखन कने पाठक दे रिस्ते एह देह्ये ही रैह्णे हन।

  

4. अगलिया पीढ़िया तक तुसां दी गल-बात किञा पूजदी ?  

द्विजेंद्र द्विज: अगलिया पीढ़िया तिकर मेरी उवाज ता प्हाड़िया च इ पुजदी। बच्चे प्हाड़ी बोलदे सह्म्झदे । कैंह जे तिह्नाँ दी मा  प्हाड़िया च तिह्नाँ नै गलान्दी। जे सैह भी अपणेयाँ बच्चेयाँ कनैं अपणियाँ भासा च गलाह्न्गे  ता अगलेयाँ भी अप्पूँ चीं तीह्याँ इ गलाणा। 

  

5. तुसां दे स्‍हाबे नै अगली पीढ़ी पहाड़िया जो भासा बणाणे दा ख्‍यो करह्गी कि गीतां सुणदेयां गांह् बधी जांह्गी?   

द्विजेंद्र द्विज: असाँ दिया पीढ़िया च मता जोस है, प्हाड़ी बोलिया जो भासा बनाणे दा। मेद ता है अगली पीढ़ी भी एह ख्यो करगी ही। प्हाड़िया च फिल्माँ पैह्ल्लैं नीं बणदियाँ थियाँ, हण बणा दियाँ। बाह्र्लेयाँ मुल्खाँ च रैह्णे आळे लोक अपणिया भासा च फोन्नाँ पर गलाई-बोल्ली सका दे। टेक्नॉलोजी इतनी अडबाँस होई् गेइह्यो जे अपणियाँ भासा दा हर अक्खर सम्हाळी ने रक्खेया जाई सकदा। अगलिया पीढ़िया ते मतियाँ मेद्दाँ हन।   मतेयाँ लखारियाँ जो एह बैह्म  है भई सैह प्हाड़ी भासा जो  बचाणे तियैं लिखा दे, जे सैह नीं लिखगे ता भासा खतम होई याणी, मरी याणी। टटीह्री सोचदी गास तिसा ही थम्मेया। जे सैह नीं होयैं ता गास्सैं टिरी याणाँ है। प्हाड़ी दिलाँ दी भासा है, प्हाड़ी माऊँ दी भासा है, इसा जो खतरा कोई नीं है।   

6. तुसां दे स्‍हाबे नै अज आम जिंदगी जीणे ताईं सिर्फ इक्‍की भासा नै कम चली सकदा कि इक्‍की ते जादा भासां जरूरी हन ?  

द्विजेंद्र द्विज: जानबराँ दी कोई भासा नी हुन्दी,  जिँदगी सैह भी जीन्दे। माह्णू जितणियाँ भासाँ सिक्खी सकै तितणियाँ घट।  हर भासा दी अप-अपणी बाँक है, अप-अपणा छळैप्पा है, अप-अपणा रस, अप-अपणा तुड़का कनै, सुआद है। अजकणे ग्लोबल ग्रायें च जीणे दा मजा लैणे तियैं, बग्ते दी चाल जो सह्म्झणे तियैं जितणियाँ भासाँ सिखियाँ जाह्न घट हन। इक्की भासा दे खूह्ये दे मीनक बणी नै ता किछ फाइदा है इ नीं। लखारिआँ तियैं ता होर भी जरूरी है, अपणे कैनबसे जो बड्डा करने तियैं भी। जे टैगोर जो अँग्रेजी नीं औन्दी हुन्दी ता गीतांजलि सारिया दुनिया च कीह्याँ पढ़ोणी थी? अज जे सारिया दुनिया दा  लेखन गूगल होई सका दा ता एह इक्की ते जादा भासाँ जाणने दा ही कमाल है। मैं मते सारे अनुवाद अंग्रेजिया ते हिंदिया कनैं  प्हाड़िया च कित्तेयो। मिन्जो लगदा सैह कई ऐसेयाँ  पाठकाँ पढ़े जिह्नाँ सैह लेखन अँग्रेजिया च ता कदी भी नीं पढ़ना था।  

                                        द्विजेंद्र द्विज