प’थराँ नैं क्या हाल सुणाणाँ सीह्स्से दा

मितरो ! मेरी इक ग़ज़ल पढ़ा. जे टैम लग्गै ता दस्सा कदेह्यी लग्गी

 ग़ज़ल

इक्क जमोरड़ ऐब पुराणाँ  सीह्स्से दा

छुटदा ई नी‍ सच्च गलाणाँ सीह्स्से दा

तोड़ी नैं, भन्नी नैं, प’थराँ मारी नैं ?

दस्सा कीह्याँ सच्च छडाणाँ सीह्स्से दा

अपणे चेहरे दा नीं झलणाँ सच्च मितराँ

प’थराँ ने थोब्बड़ छड़काणाँ सीह्स्से दा

किरचाँ दा एह ढेर तुसाँ जे दिक्खा दे

एह्त्थू इ था सै सैह्र पुराणाँ सीह्स्से दा

कदी ता मितरो ! मूँह्यें अपणे भी पूँह्ज्जा

घड़-घड़ियें भी क्या लसकाणाँ सीह्स्से दा

इट कुत्ते दा बैर ए सीह्स्से प’थरे दा

प’थराँ नैं क्या हाल सुणाणाँ सीह्स्से दा

इक्क स्याणाँ माह्णूँ एह समझान्दा था

प’थराँ बिच नीं सैह्र बसाणाँ सीह्स्से दा

भखियो तौन्दी अग्ग बर्हा दी पर अपणाँ

हर समियान्नाँ, ठोह्र-ठकाणाँ सीह्स्से दा

जे घड़ेया सैह भजणाँ भी त्ता था इक दिन

‘द्विज’ जी ! किह्तणाँ सोग मनाणाँ सीह्स्से दा

 द्विजेन्द्र ‘द्विज’