तकनीकी परिवर्तन और हमारी भाषा (दो)

     

     

हिमाचली पहाड़ी भासा दे प्रेमी अपणिया भासा ताईं बड़े फिक्रमंद रैंह्दे। सारेयां जो ई लगदा भई असां दी भासा दिन-ब-दिन मरदी जा’दी। एह् गल काफी हद तक सही है। पर भासा पर कम भी होआ दा। तकनीकी सहूलियत मिल्ला दी। सूबे दी भासा अकादमी कनै ऐनआईटी हमीरपुर अनुवाद दा इक ऐप बणा दे। गूगल आळेयां कांगड़ी, मंडियाळी कनै महासुवी बोलियां दे कीबोर्ड बणाई ते। पिछलिया पोस्टा च असां हिमाचली साहित्यकार भूपी जमवाल होरां नै इस बारे च गल कीती। इस पर अनूप सेठी होरां गल्ला जो गांह् बधा दे। 

तकनीकी परिवर्तन और हमारी भाषा (दो) 

बड़ा खरा लग्गा कमेंटां पढ़ी नै भई प्हाड़िया च लिखा या अनुवाद करी नै देया। एह् कमेंट ‘तकनीक कनै भासा’ पर असां दिया पिछलिया पोस्टा पर थे। असां एह् सोची नै सवाल जवाब हिंदिया च कीते भई तकनीकी मामला है, हिंदिया च गल करना जादा सौखा होणा। एनआइटी हमीरपुर आळेयां जेह्ड़ी ऐप लाइयो बणाणा, तिसा दा सारा कम मेरा ख्याल हिंदिया कनै अंगरेजिया च ही हुंदा। प्हाड़िया (हिमाचलिया) दी सारी वकालत भी ता हिंदिया च ही हुंदी। इस च कोई बुराई भी नीं है। जाह्लू तिकर लिखणे आळे जादा न होन, लिखणे दे मंच जादा न होन, तां दूइयां भासां दा स्हारा लैणा ही पौंदा। इञा भी असां दिया जिंदगिया पर हिंदी अंगरेजी पंजाबी इक्की दूइया पर लदोदयां ई रैंह्दियां। भाषिक शुद्धतावाद दा जमाना नीं है। फिरी भी असां सारयां दी ही कोसस है, अपणिया बोलिया ताईं जादा जगह  बणै। 

असां दा मकसद गूगल दे की-बोर्डां दी जानकारी देणा था। एह् बणी ता गेह्यो पर बरतणे ताईं सौखे नीं हन। कांगड़िया कनै म्हासुविया दा लेआउट (मतलब स्वर व्यंजनां दी जगह) हिंदिया ते फर्क है। मंडयाळिया दा लेआउट हिंदिया साही है। असां जादातर हिंदिया दा की-बोर्ड बरतदे। चौह्यीं भासां दी लिपि देवनागरी है। ले आउट भी इक्को देह्या हुंदा ता असानी हुंदी। वैसे कंप्यूटरां कनैं मोबाइलां ताईं कइयां किस्मां दे की-बोर्ड हन। गूगल इंडिक भी मता बरतोंदा। मतेयां लोकां जो देवनागरिया च टाइप करने च अळख लगदा। सैह् अंगरेजी (रोमन) की-बोर्ड दा इस्तेमाल करदे। भाषा-प्रेमी लोक इसा गल्ला दा ख्याल रखदे भई जे सारे ई लोक रोमन की-बोर्ड दा इस्तेमाल करना लगी पौंह्गे तां असां दिया लिपिया दा क्या हुंगा? वर्तनिया दा क्या हुंगा? तकनीक भासा दे इस्तेमाल जो असान करदी ता कई पेचीदगियां  भी पैदा करी दिंदी। एह् भी सोचणे आळी गल है। 

गूगल आळेयां कांगड़ी, मंडियाळी, म्हासुवी दे की-बोर्ड पता नीं क्या सोची नै बणाए कनैं एह् कितने क चह्लगे, एह् भी पता नीं। पर इसा बंड-बखेरा ते सारे सूबे च हिमाचली भाषा दे सुपने च तरेड़ न पयी जाऐ। हुण अप-अपणिया बोलिया थम्मी रखा। सारे सूबे दी मत सोचा। जे एह् की-बोर्ड नीं बणदे तां भी कोई फर्क नीं पौणा था। कोई भी देवनागरी की-बोर्ड कम्मे आई सकदा। इसा बंड-बखेरा दा गांह् चल्ली नै क्या असर हुंगा, एह् भी सोचणे आळी गल है। तेल दिखा कनै तेले दी धार दिक्खा।             

हिंदी कनै मंडियाळिया दे स्वर पैह्लिया लैणी च हन। 

स्वर कनै व्यंजन खब्बे ते सज्जे पासे जो चलदे। 

मंडियाळिया च 'ळ' है, 'ङ' कनै 'ञ' नीं हन। 

                                                           

  कांगड़ी कनै म्हासुवी दे स्वर सज्जे पासें हन। 

स्वर कनै व्यंजन उपरा ते थल्ले जो चलदे। 

जिन्हां लोकां जो हिंदिया दे की-बोर्ड दी अदत हुंगी सैह् मंडियाळी ता 

असानिया नै टाइप करी सकदे। पर कांगड़ी कनै म्हासुवी आळेयां जो 

दो दो की- बोर्ड सिखणा पौणे।

 इन्हां च 'ङ' कनै 'ञ' हन पर 'ळ' नीं है।