पहाड़ी भाषा दी नौई चेतना .

Tuesday, June 28, 2022

गल सुणा

 


लिखणे दा ताणा-बाणा 

कवता लिखणा बड़ा औखा। एह् मनणा भई मैं कवता लिखी लैंदा होर भी औखा। मैं हिंदिया च लिखणे दी कोसस करदा। पर हर बरी लिखणा लगदा ता इञा लगदा जणता पैह्ली बरी लिखणा लग्गा हुंगा। पहाड़िया च मते साल पैह्लें लिखया था। माड़ा-मोटा। फिरी छुटी गेया। हिमाचल मित्र पत्रिका चल्ली ता गल सुणा लिखणा लग्गा। हुण भी कदी कदी दयार ब्लौगे ताईं लिखी लैंदा। सैह् भी कवता नीं। कदी कदी अनुवाद करने दी थोड़ी बौह्त कोसस कीती है।

एह् गल मैं तां छेड़ी भई कुछ म्हीने पैह्लें दिलिया ते साहित्य अकादमिया आळेयां दा फोन आया। पुछणा लगे तुसां पहाड़िया च क्या लिखदे। मैं गलाया- मैं हिंदिया च लिखदा। तिन्हां गलाया- ओह् अच्छा। मैं पुच्छेया- तुसां पुच्छा दे कजो? तिन्हां गलाया- प्रोग्राम करना है हिमाचल च।

एह् भी होई सकदा था भई साहित्य अकादमिया दा नां सुणी नै मैं बजळोई पौंदा कनै गलाई दिंदा- हांजी मैं लिखता हूं। मने च सोचदा- नीं भी लिखया ता क्या होया, दो चार कवतां घसीटी लैंदा। मौका कजो गुआणा।

आम समझदारी ता एह्यी है। मौके जो हत्थे ते जाणा मत देया। बल्कि जरूरत पौऐ ता झप्फी लेया। छड्डा मत। तुसां गैं भौएं रपैये दी चीज है पर फणसोई नै दस्सा भई सौआं रपैयां दी है। बणी ठणी नै सभां-चबूतरेयां पर जाई बैठा कनै अपणी कला, अपणे ज्ञाने दी नुमाइस लाई देया।

एह् भी सच है भई सारे इञा नीं करदे। कई दुनिया ते औह्लें होई बह्यी रैंह्दे। कई मने-मने च सोचदे भी रैंह्दे भई कोई सद्दी लै, कोई स्हाड़ी कीमत पाई लै। कई पूरे ही बीतराग हुंदे। सैह् अपणिया ई धुन्ना च रैंह्दे कनै अपणी ई धूणी रमाई रखदे।

मेरी ट्रेनिंग होर देह्यी है। पैह्ला कम एह्यी जरूरी लगदा भई खरा लखोऐ। आखरी कम भी एह्यी लगदा भई खरा लखोऐ। जे न लखोऐ ता मत लिखा। लिखणा जिम्मेदारिया दा कम है। टाइमपास नीं है। लक्ष्य फिल्मा च हीरोइना दा पिता हीरो जो सलाह दिंदा- भले ही घास छीलो पर घसियारे बनो तो अच्छे घसियारे बनो। मतलब लेखक बणा ता पाएदार लेखक बणने दी तांह्ग रक्खा। दोधी परलाण दुद्ध देयी जाए ता पता लगी जांदा। पीणे आळे पछियाणी लैंदे।  

एह् भी सच है भई हर लेखक अप्पू ही अपणे ताईं बैंचमार्क बणांदा कनै मिथदा भई तिनी कुस्सा बत्ता हंडणा है कनै कुती पूजणा है।

लेखक बणना होऐ ता लिखणा जरूरी है पर न लखोऐ तां भी कोई गल नीं। दिखणा, नीह्ज लाई नै दिखणा, सारेयां बखां ते समझणे दी कोसस करना, पढ़ना कनै कढ़ना तिसते भी जादा जरूरी है। जे जमाने दे तजे-नजे दिक्खी मने च सुआल न पैदा होन, मिठियां जबानां दियां नीतां पर शक-सुबह न होऐ, पचांह् बखी नजर न होऐ, गांह् बद्धणे दी तांह्ग  न होऐ, ता अंदर बैठ्या लेखक कलाकार जींदा नीं  रैंह्दा। अंदर घमचोळ पयी रैह्णा चाहिदा। तिसते परंत ई निकळदे धारदार लफ्ज़। बेलबूटेयां कनै लीखणुआं पाई नै राती दे न्हेरें लछमिया जो सदणे दियां झाेजे-चाइयां होई सकदियां, सरस्वती माता हंसे पर बैह्यी नै कुतकी होरती ई घुमदी रैंह्दी। (मूह्रली तस्वीर- बिंदु स्वामीनाथन)   

अनूप सेठी

                  


3 comments:

  1. अनूप जी तुसां बडियां सच्चियां कनैं सुच्चियां गलां लीखियां। लींखणे दा है पर खरा लीखणे दा कोई नुस्‍खा नीं है। जेह्ड़ा अपणे आप लखोंदा तिस लीखणे दा कोई अप्‍पुं लीखी ने बी मकाबला नीं करी सकदा। जित्‍थू तिकर पढ़ने दी गल है ऐह् जीणे ताईं बी जरुरी है कनैं लीखणें ताईं होर बी जरुरी है कैंह् कि असां लखारी जिदंडियां पर लीखणे दा दावा कर दे पर क्‍या पढ़ना एह् बी पता होणा चाही दा। एह् सारयां दे मुश्‍कल कम है। हुण कंप्‍यूटरे दिया भासा च जदेहा अंदर पांगे सैही बाह्र ओणा। इक निघिया कनैं ड़ग्गिया गलसुणा ताईं बधाई कनैं साधूवाद।

    ReplyDelete
    Replies
    1. कुशल जी, तसां ठीक गलाया। असल च पढ़ना-कढ़ना कनै सिखणा सारी उमर ई चली रैंह्दा। लिखणे दी गल एह् है भई अपणे पासे ते पूरी कोसस करदे रहिए। तुसां कमेंट करने दा ख्यो कीता, धन्नवाद।

      Delete
  2. गत्ला च ते गल्ल निकळदी । गल्ल जे कोई टके दी कह्र्गा तां दूआ जणा भी कुछ ठोक्कुआँ गलाह्न्गा । कनै गल्ल सैह्यी खरी लगदी सैः जे असां दीयाँ हाक्खीं गुहाड़ै लोईं दस्सै कनै असां दी जिन्दगीया मैह्ने खोह्ड़ी नै कड्ढै कनै इक्क गल्ल गला :ईयो स्हान्जो ' झंझोड़ी दै ,
    असां दीया बत्ता बदली दै । स्हान्जो ए ह्
    असां देयाँ रस्तेयाँ बदली दै ।

    ReplyDelete