धौळाधार दे सिलमे दा पर्दा

 

पवनेंद्र पवन होरां दा गीति काव्य 'मेरा ख्याल है भई' छपया ता असां शायर द्विजेंद्र द्विज होरां जो समीक्षा लिखणे दी बिनती कीती थी। तिन्हां जो लिखणे च टैम लगी गया। कुशल शर्मा होरां जो भी कताब जरूरी लग्गी थी। तिन्हां दी समीक्षा असां अक्तूबर म्हीने च छापी थी। हुण द्विज होरां दी समीक्षा भी त्यार होई गई है। जरूरी कताबां जो लग-लग नजरां नै दिखणा भी जरूरी हुंदा है।

    

धौळाधार दे सिलमे दा पर्दा : ‘मेरा है ख्याल भई’

अंबरे छूह्न्दिया, मने मूह्न्दिया परवत माळा धौळाधारा दा छळैप्पा लखारियाँ, कवियाँ, चित्तरकाराँ जो जुगाँ जुगाँ ते मंत्तर-मुग्ध करदा औआ दा। धौळाधार इक बुझारत जाँ फोह्लणी बणी ने खड़ोतियो लगदी । इसा दियाँ बाँकियाँ छवियाँ दिक्खी, मंत्तर-मुग्ध होई पैह्ल्ला कुदरती ख्याल / पैह्ल्ला सुआल ता एह् इ औन्दा "भई एह् धौळाधार बणी कीह्याँ हुंगी?  एह् चित्तरकार कुण है?" इह्नाँ सुआल्लां दे जुआब्बे च पवनेंद्र पवन होरां गलाअ् दे "भई मेरा ख्याल ता एह् है।" 

जिगर मुरादाबादी होराँ दा इक शे’र है: 

“शाइरे-फ़ितरत हूँ जब भी फ़िक्र फ़रमाता हूँ मैं

रूह बन कर ज़र्रे ज़र्रे में समा जाता हूँ मैं” 

“मैं सृष्टिया दा/प्रकृति दा शायर हाँ, जाल्हू भी मैं चिंतन करदा (शाइरी करदा) ता रूह बणी ने जर्रे-जर्रे (कणे-कणे) च समाई जान्दा।” 

हिन्दी कने प्हाड़ी दे गज़लकार, लफ्जाँ च अपने ख्याल्लां दे दृश्यांकन कने चितरांकन दे उस्ताद शायर  पवनेन्द्र ‘पवन’ भी जाह्लू  कविताई करदे,  इन्हाँ दे ख्याल्ले दा सूरज भी प्हाड़ाँ दे जर्रे-जर्रे जो अपणियाँ किरनाँ ने सिंजी दिन्दा। प्हाड़ कने प्हाड़ी लोक जीवन दे सच्चे साधक, तपस्वी, खोज्जी पत्तरकार (जिह्नाँ जो प्हाड़ाँ दे चप्पे-चप्पे, कूणाँ- कूणाँ  दी खबर है), अनूठ्ठे  चित्तरकार नाटककार, कात्थू-कवि पवनेन्द्र प्हाड़ाँ  दिया सीनरिया पचाँह्  छुप्पिया सीनरिया जो, पहाड़ां दे मने दी सार कने जिस्में दियाँ पीड़ां जो,  अपणे छन्दाँ कने बन्दाँ  चैं,  अपणे ख्याल्लाँ  दे  बड्डे कैनवसे पर बड़िया बरीकिया, बड़िया सोह्गमानिया ने  पेड़ी करी असाँ साह्मणे रखदे।  "मेरा है ख्याल भई"  इक ऐसा सन्दूक जाँ  पटारा है  जिसजो धौळाधारा दिया सीनरिया / दृश्यावलिया कने इसा देयाँ फोटुआँ ते प्रेरित फोटुआँ दी, मतियाँ छबियाँ दी, बणद-बणदे, नेक-बनेके, कई रंगाँ-रुप्पाँ दी बेजोड़ एल्बम गलाई सकदे।  एह् कताब पहाड़ां पर बणियो ‘सदा याद रैह्णे  वाली’ शानदार डॉक्यूमेंट्री है जिसा दे  पटकथा लिखारी, कोरियोग्राफर कने निर्देशक ग़ज़लकार पवनेन्द्र पवन होराँ हन। 

पवनेन्द्र पवन होराँ अपणेयाँ इह्नाँ बंदाँ च अपणे समें दे सच कने सरोकाराँ जो, अपणे परिवेश, संस्कृतिया, संस्काराँ, पुराणां, महाकाव्याँ, लोककथां, इतिहास देयाँ पात्तराँ कने घटनाँ दियाँ उपमाँ देयाँ मोतियाँ कने सिंगारी ने कविताइया दिया कला जो धौळाधारा साह्यी उचियाँ चूँडियाँ पर लई ने जा दे। 

औआ इसा कताब्बा दे किछ बंद पढ़िये: 

“किरणाँ दी तूलियाँ ने फुँडुआँ दा रूँ लाई

तिन डी कैनवास धौळाधारा दा बणाई

चत्रैह्रा सूरज है तूलियाँ जो फेरदा

भाँति भाँति दियाँ है तस्वीराँ पेड़दा” 

पवनेन्द्र होरां जो दुनिया दे बहलड़े च रखियो धौलाधार, सिलमे दा पर्दा बझोंदी: 

“दुनिया दे बह्लड़े च थेई करी धौलाधार

दसणे जो सिलमा है कित्ता पर्दा त्यार

सूरजे ने फिलमा चैं गासला है लौ सट्टै,

बदळाँ दी, नदियाँ दी, बरफाँ दी फोटो दस्सै

गद्दी गळगोजू बज्जी धणे जो चरान्दा सुझै

काळे-काळे गरने गुआळू कुथी खान्दा सुझै

सुझदा मोनाळ, कुथी मोर नाच पान्दा सुझै

सिद्ध जोगी कोई कुथी धूणियाँ रमान्दा सुझै” 

तुलसी दास गलान्दे "जाकी रही भावना जैसी, प्रभु मूरत तिन देखी तैसी":

कोलरिज गलान्दे ‘ओ लेडी वी रिसीव बट व्हट वी गिव

एंड इन आवर हार्ट्स अलोन डथ नेचर लिव’

 पवनेन्द्र पवन होराँ गलाअ् दे: 

“जीह्दे मने जे है उह्जो तीह्याँ सुज्झी धौलाधार" 

पवनेन्द्र पवन होराँ दे ख्याल्लाँ दे कैमरे ने एह् धौळाधार कुथी सतिया दी दँदराळ, कुथी कुथी इन्द्रासने दिया जगा निद्रासने मंगी भुल्लेया भादर जुआन कुम्भकर्ण लगदी। कुथी पंजा पाण्डुआँ दी हारियो द्रौपदी जिसा जो सभा च नचाणे तियें सूरज दुसासन चीर हरने दिया कोससा च रैह्न्दा, अपण कृसन मुरारी बद्दळ बणी आई ने तिसा दी सदा लाज रखदे। कुथी धौळाधार घ्योए मण्डले च अंबे माता दी नुहार भी दुह्सदी। 

द्विजेंद्र द्विज
हिंदी कनै पहाड़ी दे शायर, अनुवादक, 
अंगरेजिया दे प्रोफैसर (सेवानिवृत्त),
हिंदी गजल संग्रह-
जन-गण-मन (2003), सदियों का सारांश (2021),
हिमाचली पहाड़ी गजल संग्रह-
ऐब पुराणा सीहस्से दा (2021)   

एह् इ धौळाधार कुथी-कुथी मनुए दा मूह्यें भार पेह्या बेड़ा बझोंदी, कुथी धुप्पा दिया मारा ते बचाणे तियें ठँह्डी छाँ देणे जो अपणे फिह्णे खलारी तह्णेया सेसनाग, कुथी सुर्गे तिकर पुजणे दिया कोससा च पाँडवाँ दिया अधचिणियाँ पैड़ियाँ, कदी अपणे रोन्दे बच्चे-बदळे जो हिक्का लाई ने बसाह्न्दी, पुचकारदी माँ सुह्जदी, कदी  महिला मंडळे दी जागरूक परधान भी लगदी, जेहड़ी सारे समाजे जो अपणेयाँ हकाँ तियें जगाणा अपणा फर्ज सह्म्ज्दी। कुथी भारतीय सोह्बती कने सभ्यता दा रूप लगदी, कदी धौळाधार बच्च्याँ जो सेऊँआँ, चिलगोजेयाँ, खोड़ाँ दे तोह्फ्याँ बँडदा चिटिया दाढ़िया आळा सैंटाक्लॉज बझोन्दी, कुथी कुँजुए दिया निह्याळपा बैठियो चैंचलो, कुथी छैळ होणे दी सजा भुगतदी कोई जुआनडी दुह्स्दी, कुथी देस भगतिया दा पाठ दिन्दी, कुथी भगतण, कदी जोग्गण, कदी बजोग्गण, कदी रोग्गण, कदी अमृत,  कदी जैह्र। एह् इ धौळाधार गौतम ऋषिये दे स्राफ्फे ने पथरोइयो (अ)हल्या भी बझोन्दी, जिसा जो भगवान राम दे पैरे दे स्पर्शे दी निहयालप है। कबीर होराँ वाळी चिट्टी चादर भी धौळाधार ही बझोन्दी। कदी सोह्रियां जांदिया धीया जो कने परदेसां जांदे पुतरे जो थोड़िया दूरा तिकर  पुजाणा आइयो, डालिया पकड़ी ने खड़ोत्तियो मा भी बुझोंदी। कविये दे ख्याल्लाँ दे कैमरे चैं कई झल्कियाँ, झाकियाँ कने सीन दिखणे पढ़ने कने सोचणे जो मिल्ला दे। 

कुदरती दे, प्रकृतिया दे बिद्यार्थी कने उपासक ग़ज़लकार पवनेन्द्र होराँ तियें धौळाधार सबनाँ ते बड्डी गुरु है। जे दुनिया इक स्कूल है ता काळा प्हाड़ ब्लैक बोर्ड है। कुदरत मस्ट्रैणी है ... बर्फे दे चॉके कने लिखदी जा दी: 

“कदी है बझोंदा जग इक पाठसाला है

बोर्डे दी ठाह्री जित थेया प्हाड़ काळा है

कदी धुप, बरखा, कदी बणी धुंध राणी

बणी ठणी रोज ओंदी कुदरत उस्ताणी

बरफे दा चाक लई लिखदी ही जांदी है

अनपढ़ां पढ़ना लिखणा सखांदी है

धारा पर दिक्खी लोक पढ़दे न नदी नाळा

घा, फुल, रुख, पत्ते, पगडंडी, धुंध, पाळा

चिड़ियाँ, बटेर, तोते, तितर, घटारियाँ

झरने, छरूड़ू, देवदार, झिल, झाड़ियाँ

चंदरमा, सूरज ने पढ़दे ग्रह सारे

टीणे होई पढ़दे न अम्बरे दे सब तारे

दिक्खी दिक्खी धारा पास्सें पढ़या जमाने सार

सबना ते बड्डी गुरु लगदी है धौलाधार” 

संसार भगवान सिवाँ दी जलैह्री है, कने धौळाधार जलैह्रिया च रखोह्या सिवलिंग: 

सिवां दी जलैह्री जीह्यां सारा संसार होए

सिवलिंग रूपी जिस बिच धौलाधार होए

ओस आई भ्यागसारे पिंडिया नुहाए रोज

भ्याग नार लाल लाल चन्नण लगाए रोज

सूरज पुजारी आई न्हेरे दे कुआड़ खोहड़ी

मत्था टेकै रोज भ्यागा किरणां दे हत्थाँ जोड़ी

बम बम बोली धण करी जांदे धारा पार

मन्दर सिवां दा निरा लगदी है धौलाधार। 

कुथी सूरजे ललारिये ते मतेयाँ रंगाँ दिया किरनाँ दे धागेयाँ वाळी प्यूळी चाद्दर रँगाई, ओह्डी नै गोड्डेया जोड़ी ने बैठियो कोई जुआन कुड़ी म्हाचली कसीदा कह्डा दी बझोन्दी: 

"होए जीह्यां बैठियो गोडयां मलाई ने

सूरजे ललारिये ते पीलिया रंगाई ने

छैल इसा चादरा उप्पर बछाई ने

कई रंगी किरणां दे धागयां लगाई ने

लग्गे है जुआन कुड़ी लेई ने तरुपयां

कढा दी है चादरा छैल बेल-बूटयां” 

कुथी कोई स्याणी: 

“लग्गे धारा बदलां दे फुंडू दिक्खी पीले लाल

कढा दी स्याणी होए रास मंडली रुमाल

या है शाल्ला कुल्लू दिया पट्टी सज्जी रंगदार

म्हाचली कसीदा सांजो दसदी है धौलाधार” 

कदी एह् समुँदरे समुन्दर छोळणे तियें रस्सा बणी, सुमेरु पर्बते जो प्ळेस पाई अपणा जिस्मे छलाणे वाळा काळा स्याह वासुकी नाग बझोंदी: 

“चन्दरमा, लछमी, मणि, बिष, वारुणी

दस बध चार चीजा छोली-छोली बाह्र आइयां

देवतयां असुरां अप्पू च ही बंडां पाइयां

दयोआं कने राकसां ही सब कुछ बंडया

जिस्म छलाया जिन्नी कुछ भी नी मंगया

बरसाती बरखा दी पोंदी जाह्लू मार है

ध्योई जांदा सारा ईह्दा चानणा सिंगार है

स्याह काली बड्डी भारी उच्ची लम्मी बेसमार

लगदी है नाग पूरी वासुकी ए धौलाधार” 

जे असाँ पवनेन्द्र होराँ दे मने दे कैमरे दियाँ हाक्खीं ने दिखिए ता धौळाधार बौणेयाँ देयाँ प्ळेस्साँ च बेहोस जक्ड़ोह्या ‘गुलीवर’ भी सुझदी। बौणपणे च बौणा माह्णू धौळाधार-गुलीवरे दे जिस्मे पर सड़काँ कने खान्नीं दियाँ पचरोड़ाँ ला दा, तिस देयाँ बणाँ (बाळाँ) भेच्छा दा, बेबसी धौळाधारा कळाणे जोग्गी ही होइय्यो: 

“कदी लग्गे गुलीवर बेड़िया समेत पेह्या

 बौणयां दे टापुए है होई ने अचेत पेह्या

बौणे भी ने अपणा न बौणपण दस्सा दे

बह्न पाई पाई ईह्जो घुट्टी घुट्टी कस्सा दे

ला दे न घरोड़ाँ ईह्जो सड़कां उकारी ने

भेछा दे न ईह्जो ईदे बणां जो उखाड़ी ने

खोदी खोदी खान्ना लाई खालां दी कतार है

पीड़ा ने कलाणा हुण लग्गी धौलाधार है" 

कुथी पवनेन्द्र होराँ जो पहाड़े पर चिटी चिटी बदले दी धारी भी धौळाधारा दिया हाखीं पर बह्नियो, गांधारिया वाळी पट्टी लगदी 

ए प्हाड़े पर चिट्टी चिट्टी बदले दी जेहड़ी धारी है

लग्गे हाखीं पर बनियो जणी पट्टी धौलाधारी है। 

कदी काँगड़े दे भौणे लुट्टी हट्दिया बत्ता जान्दे गजनिए दी टिरियो चान्दी बझोन्दी: 

सुणी करी सोन्ना चाँदी बड़ा है मजूद इत्थू

दौड़दा ही गजनी ते पुज्जा महमूद इत्थू

ज्यंति माता छाउणी पाई किले जो उड़ाया था

ऊँटां कने घोड़यां ने भौण डेरा लाया था

सुन्ना चाँदी लुट्टी लुट्टी खूहाँ दे खूह खाली कित्ते

मूरतां, ने चाँदिया दे भित सब काबू कित्ते

हटदिया बारिया सै बत्ता च कणांदा गेया

जगह जगह चाँदिया दे ढेरुआं लगांदा गेया

जाणे तिदे घरे होंगे कितणे अम्बार लग्गे

बत्ता च टराइ‌यो चाँदी ही जे धौलाधार लग्गे । 

पवनेन्दर होराँ जो उचिया बैठियो धौळाधार, दुनिया दे चौगान्ने च अप-अपणियाँ खेह्ल्लाँ दे खलाह्ड़ी कने मराह्ढ़ी माहुणुयें दे रोह्ळाँ-घचोळाँ दिखदी कने अपणियाँ हाखी दिखिया दा सारा हाल सुणान्दी बझोन्दी: 

“दुनियां चौगान असां सारे ही खलाड़ी हन

अपणियां-अपणियां खेलां च मराढ़ी हन

उच्चे टिल्ले बैठी सब खेल दिक्खी जाए एह

हाखीं हेरी हाल सारे जगे जो सुणाए एह

कुणी पूरा जोर लाया कुणी है घचौळ पाया

सुक सिन जित्ती कूह्जो खरा पाळा आया

खेलणे ते मूह्रिया ही कुणी मन्नी हार लेई

पंगे दिया नीत्ता कुण आया है गुआर लेई

कड्ढा दा है कुण कुस कुस कन्ने कोई खार

उचिया बठुई सब दिक्खा दी है धौळाधार” 

इक फोटो हरे-काळे प्हाड़े ते पचाँह् धौळाधारा दिया झाँकदिया इक्की सुनैह्रिया चूँडिया दा भी है। पवनेन्द्र होराँ दा कैमरा दस्सा दा भई एह ता थक्केयो-टुट्टेयो बिकरमें अपणिया गाधा पर बताळ चुक्केया जेह्ड़ा अपणे साथिये दे मने परचणे जो प्हाड़ाँ दियाँ अनगिण क्हाणियाँ (लोक-कथाँ) सुणाई-सुणाई हटी-हटी अपणेया अणगिण सुआल्लाँ दे जुआब मंगा दा: 

“सौगी जांदे साथिये दे मने परचाणे जो

 थकयो दे टुट्यो दे रस्ते कटाणे जो

कहाणियां ए इसजो सुणांदा बेहिसाब है

कथां जो सुणाई फिरी मंगदा जबाब है

भरोइयां कैंह बन्दूकां दस कुंजुए मकाणे जो

देरे जो कैंह जैह्र दित्ता भाभिया ही खाणे जो

टिल्ले ते गुआळुए कैंह् डोले दिक्खी छाल लाई

रांझुए बिहोंदे गळे फुलमू कैंह लाई फाह्ई

भाइए दिया कितिया कैंह मोह्ण फाह्यें लगया

मातरें कैंह् धीया ते था कौळ फुल्ल मंगया

इक्की पर दुआ देया करदी सुआल है

जुआब देणा जिसदा बड़ा ही मुहाल है

गाधा जीह्यां विकरमे चुकया बताळ है

काले प्हाड़े पिच्छे ईह्याँ झाके धौलाधार है” 

पवनेन्द्र होरां दस्सा दे, धौळाधार इक बड्डा चिट्टा कागज भी है जिस पर रोज रात्ती छपणे वाळिया अखबारा जो उप्परला (गासला) रोज पढ़दा। इस अखबारे च, देवदाराँ, तूह्णियाँ चीलाँ, टाह्लियाँ, चनाराँ दे अणगिणत बणाँ दे कटोणे, जड़ी बूटियाँ दे भछोणे, मिरगाँ कनै रिच्छाँ दे सकारे कने खल्लाँ दे बपारे, भेड्ड़ाँ दियाँ चोरिया, कलगियाँ तियैं मोराँ कनैं मोनाळाँ दे मरने दियाँ सारियाँ खबराँ परमात्मे दे हत्थे दिया अखबारा-धौळाधारा च छपदियाँ: 

“कोरा चिट्टा बड्डा इक कागद है धौलाधार

छपदी है रोज राती जिस पर अखबार

भ्यागा उठी गासला है रोज ईजो वाचदा

क्या कुछ होया राती इसते है जाचदा

कितणे कटोए राती बण देवदारां दे

तूह्नियां दे चीलां दे टाह्रियां चनारां दे

कितणयां मिरगां ने रिछां दा सकार होया

खल्लां बेच्ची कितणयां ढउआं दा वपार होया

कितणियां भेछियां कुणी जड़ी बूटियां

गदियां दे धणां ते न कुणी भेडां मूसियां

कलगियां ताईं किन्ने मोर ने मोनाल मारे

खबरची बणी टोह रात भर लैह्ण तारे

दिंदी है जमीन्ना दीयां खबरां ए लगातार

गासले दे हथे अखबार बणी धौलाधार” 

इसा अखबारा दे रिपोर्टर तारे कने तारेयाँ कने जागदे पवनेन्द्र पवन हन। 

कारखान्ने धौलाधारा- मुटियारा दे मुँह्यें पर धुआँ मारदे, पुराणियाँ फिल्मां दे गुआर सड़क छाप मजनू कने बिलेन लगदे: 

मजनू सड़क छाप मने दा बमार कोई

फिल्मा पुराणियां च जीह्यां कि गुआर कोई

पीन्दा-पीन्दा सिगरिट, बीड़ी या सिगार कोई

लम्मा कश लेई धूएं मारदा था मुँहयें पर

दिक्खी ने खड़ोतिया छैल मुटियारा पर

चिमनियां कालिया ते बणी खलनायक

मारदे न धुआं कारखाने धौळाधारा पर 

धाराँ दे बणा च भड़कियो अग्ग ‘पवन’ होरां ते एह् बन्द लखुआन्दी: 

“लाह्ण सुट्टे बीड़ियाँ दे आई ने सरारती

 मनांदे आई बणां च न फुल मून पार्टी

झिल झूड़े फूकदे न लोक लुकी रोज राती

तां जे उग्गे घा मत्ता भेठीं पर बरसाती

मेळ करी हाकमा ने रुक्खां बह्ढे माफिया

फुकी फिरी बणा ढक्के हेराफेरी माफिया

भड़किया अग्गी औंदा कोई नी बुझाणे जो

नह्सदे घराह्ली सब हन लुकी जाणे जो

दिक्खी अग्गी बिचकार इसजो बझोए ईह्यां

धारी बरफा दी चिट्टा कफण बझोए जीह्यां

भड़कियो अग जणी कफणे जो जाला दी

चिता पर जले जणी लास धौळाधारा दी” 

धारा गाँह् दूँह् भेट्ठीं दा जुड़ाव इह्याँ लग्गा दा जीह्याँ कुसी मुटियारा कताब खोह्ड़ियो, इसा कताबा जो असाँ रमैण, गीता, गुरुग्रंथ साहिब जाँ कुरआन भी गलाई सकदे: 

“धारा अग्गे लग्गे दूँह् भेठीं दा जुड़ाव ईह्यां

कुणी मुटयारा होए खोलियो कताब जीह्याँ

कोई बोल्ले गीता ईजो कोई तां रमैण बोल्ले

गुरुग्रंथ कोई तां कोई कुरआन बोल्ले

सबनां दी इक बोल्ली सबना दा इक सार

धरमाँ दे नाएँ फिरी कैह जो इन्नी मारोमार

होआ पाणी सबना जो देई करी इक सार

गूढ़ ग्यान देया दी है दुनियां जो धौळाधार” 

बिडम्बना एह् भी है जे धौळाधार जो लुट्टी-लुट्टी घराँ भरने आळे मदान-सेठ इसा जो पिछड़ियो गलाणे ते भी बाज नीं औन्दे: 

“बदलां दे घोड़यां लुटेरे होई ने सुआर

किणियां ने आह्णी दी देई अणमुकमार

लुट्टी लुट्टी चिक जैदाद धौलाधारा दी

खेतरां दी टिल्लुआं दी कने धारा धारा दी

नदियां दरैं दयां पाणियां रुढ़ाई जाह्न

मितरां मदानां देयाँ खेतराँ बछाई जाह्न

लुट्टा बाले माल्ले ने मदान सेठ साहू बणे

धारां दिया चिक्का लेई बड़े उपजाऊ बणे

बोलदे मदान्नां जो अज सारे होसयार

लटोंदी रेह्यी जेह्ड़ी ऊह्जो पिछड़ियो धौळाधार” 

धौळाधार देयाँ एह् देह्याँ कने होर भी कई रंग-रूप्पाँ दे अद्भुत  नजारेयाँ दा, छंद बद्ध गीति काव्य च आ(नन्द) लैणे तियें "मेरा है खयाल भई पढ़ना जरूरी है। इसा कताबा जो धौळाधारी महाकाव्य भी बेधड़क होई ने गलाया जाई सकदा, इस ते पैहल्ले धौळाधार पर लिखणे दियाँ कई  कोससाँ होइयाँ अपण पवनेन्द्र होराँ दिया कलमाँ दा जादू भी सिरे चढ़ी ने बोलणे वाळा है। एह् कताब प्हाड़िया च छपियाँ किछ खरियां कताबाँ च सामल होणे, गिणोणे  दी समर्थ्या रखदी। कताब्बा च फोटू भी ह्न, ताँ जे बंदाँ दिया “अभिव्यक्तिया दी कमी इन्हाँ तस्वीराँ दिया अभिव्यक्तिया ने पूरी होई सकै।” 

पवनेन्द्र ‘पवन’ होराँ दा इक मसहूर शे’र है: 

“उसे दुख धरा का सुनाना पहाड़ो!

कि अंबर तुम्हारे बहुत पास होगा”  

पहाड़ो! तिसजो धर्तिया दा दुख सुणान्यो, अंबर तुसाँ दे ता बक्खें इ हुंगा। पवनेन्द्र होराँ दे प्हाड़ अंबरे जो, जगतिया जो, धरतिया दा दुख सुणान्दे दिक्खे-सुणे जाई सकदे। 

प्हाड़िया च मतियाँ कताब्बाँ धड़ाधड़ छपा दियाँ अपण एह् चाह्ळियाँ साल्लाँ च पैह्ल्ली कताब!!! धौळाधार दे उआन्ने कने ओबरिया, जिस्में कने रूह्ई दा सार देणे वाली एह् कताब मतेयाँ लकीराँ देया फकीराँ, कलम -घचीण्डुआँ तियें संदेस भी है, "भई! कताबाँ गुणे दियाँ होन ताँ इक्क दो ही बतेह्रियां, नीं ता बणाँ दे बण, जँगलाँ दे जंगल कागज लाई ने छपुआन्दे रेह्या, कने अप्पूँ ही पढ़दे रेह्या! 

छंदबद्ध कविताइया दिया कला कनैं छळैप्पे दी हिफाजत करने वाळे अपणे समें दे सच दी गैह्री पड़ताल अपणिया भासा दे मुहावरे दे नौयें रंगे च रंगी ने, सुणिया-पढ़ियाँ कथाँ दे पात्तराँ जो बिम्ब, उपमा कने रूपक दई ने लोकधर्मी भासा दे सुआद्दे दे गीति काव्य दे चौह्ट्टाँ बंदा च परोणे वाल़े ग़ज़लकार कवि पवनेन्द्र पवन होराँ दा एह् पहाड़ी गीति काव्य संग्रह मेरा है ख्याल भई पहाड़ी साहित्य दिया जातरा दा इक नौआँ मील पत्थर है।

यादां फौजा दियां

 

फौजियां दियां जिंदगियां दे बारे च असां जितणा जाणदे, तिसते जादा जाणने दी तांह्ग असां जो रैंह्दी है। रिटैर फौजी भगत राम मंडोत्रा होरां फौजा दियां अपणियां यादां हिंदिया च लिखा दे थे। असां तिन्हां गैं अर्जी लाई भई अपणिया बोलिया च लिखा। तिन्हां स्हाड़ी अर्जी मन्नी लई। हुण असां यादां दी एह् लड़ी सुरू कीती है, दूंई जबानां च। पेश है इसा लड़िया दा ब्याह्ळुआं मणका। 

(चित्र : सुमनिका, कागजे पर चारकोल) 

...................................................................

समाधियाँ दे परदेस च 

 

मिंजो तंइयें लोकनाथन जो बचाणे दे हुण सब्भ रस्ते बंद होयी चुकेह्यो थे। उंञा भी तिसदे बारे च जे किछ भी मैं तैह्ड़िया तिकर कित्तेह्या था सैह् मेरे कमांडिंग अफसर दी दरियादिल इन्सानी सोच दिया बजह ते मुमकिन होया था। फौज च सारे कमाण अफसर तिन्हाँ साँह्ईं नीं होंदे जेह्ड़े महज इक सूबेदार क्लर्क दे सुझावां पर सहानुभूतिपूर्ण बिचार करी नै इक अल्कोहलिक जुआन जो सुधरने दा मौका देणे ताँईं राजी होयी जाह्ण। एह् ताँ लोकनाथन दी बदनसीबी थी कि सैह् तिस सुनहरी मौके दा फायदा नीं लयी सक्केया था। 

फौज च लोकनाथन बरगे जुआनाँ कनै अफसराँ कन्नै निपटणे ताँईं कमाण अफसर होराँ व्ह्ली इक होर तरीका भी होंदा है।  फौज च इक फॉर्म होंदा है जिस्सेयो ए.एफ.एम.एस.एफ-10 (AFMSF-10) नाँ ते जाणेया जाँदा है।  मते कमाण अफसर अपणे ताँईं प्रॉब्लम बणदे जाह्दे शख्स दे बारे च उप्पर दस्सेह्यो  फॉर्म जो भरी करी तिस्सेयो दिमागी  तौर ते बीमार दस्सी नै अगली जाँच कनै निपटाण ताँईं सम्बन्धित मिलिट्री हस्पताल च भेजी दिंदे हन्न। इंञा करने ते सैह् प्रॉब्लम बणदे शख्स दे खिलाफ डिस्सिप्लिनरी जाँ एडमिनिस्ट्रेटिव  एक्शन लैणे ते बची जाँदे हन्न।  लोकनाथन दे बारे च पहले ते ही तोपखाना अभिलेख ते तिस्सेयो नौकरी ते डिस्चार्ज करने ताँईं चिट्ठी आयी रखिह्यो थी।  इस बजह ते तिसदे बारे च फॉर्म नंबर 10 भरने दा सुआल ही पैदा नीं होंदा था। 

लोकनाथन दा फौज ते निकाळेया जाणा हुण तय था। मैं कमाण अफसर दे ऑर्डर दे मुताबिक “कारण बताओ नोटिस” दा ड्राफ्ट तैयार करी नै तिन्हाँ ते मंजूर करुआई लिह्या था। 

हिरासत च रखे गै जुआनाँ ते, किछ संतरियाँ दिया निगरानिया च, कम्म करुआया जाँदा है। लोकनाथन जो दो जुआनाँ दिया देखरेखा च पलटण दे हैडकुआटर दे साह्म्णे लगे बगीचे दियाँ क्यारियाँ ते रुक्खां ते टिरह्यो सुक्के पत्ते बिणने कनै चिक्का जो ताजा करने दा कम्म करने ताँईं लगाया जाँदा था। सैह् ज्यादातर मेरे दफ्तर दे साह्म्णे पौणे वाळी क्यारियों च ही कम्म करदा था। मैं अपणी कुर्सिया च बैठह्या तिस्सेयो कम्म करदे होये सिद्धा दिक्खी सकदा था। पहले ही दिन जाह्लू चाणचक मेरी नजर तिस पर पई ताँ तिन्नी, बगैर टोपी कनै बेल्ट दे, साबधान होयी करी मिंजो सेल्यूट दित्ता।  मैं जाणीबुज्झी करी तिस्सेयो जवाब नीं दित्ता कनै देहा जाहिर कित्ता कि जिंञा मैं तिस्सेयो दिक्खेया ही नीं।  ताह्लू जरा कि देरा परंत, तिस पर तैनात इक नायक मिंजो व्ह्ली आयी करी सेल्यूट देई नै बोल्या था, “सर, लोकनाथन तुसाँ कन्नै दो मिनट गल्ल करना चांहदा है।” 

मैं दिक्खेया क्यारिया च खड़ोतेया लोकनाथन मिंजो पासैं ही दिक्खा दा था।  तिसदियाँ नम हाखीं मिंजो अज्ज भी याद औंदियाँ हन्न। “ना, मिंजो तिस नै कोई गल्ल नीं करनी,” मैं जाणीबुज्झी करी तिस नायक जो ऊंची आवाज च जवाब दित्ता था ताकि लोकनाथन जो भी साफ सुणायी दे। 

तिस दौरान इक नायक दे मामले च कमाण अफसर होराँ मिंजो ते नाराज होयी गै थे।  होया एह् था कि लोकनाथन दे सिलसिले ते तकरीबन अट्ठ-दस्स महीनें पहलैं, इक दिन दफ्तर च मिंजो व्ह्ली  इक नायक रैंक दा जुआन आया। तिसदा नाँ नारायण सिंह था। सैह् कानपुर दा रैहणे वाळा था। तिन्नी बड़िया सोबती कन्नै मिंजो ते अपणी इक प्रॉब्लम दे बारे च गल्ल करने दी परमिशन मंगी। मैं तिसदी प्रॉब्लम ध्याने नै सुणी करी तिसदे कागजात जो सरसरी नजर मारी  कनै तिस्सेयो तसल्ली दित्ती कि मैं कमाण अफसर कन्नै गल्ल-बात करी नै तिसदी प्रॉब्लम जो दूर करने दी पूरी-पूरी कोशिश करह्गा। तिन्नी मिंजो एह् भी दस्सेया था कि तिसदे ग्राँ ते मेरे ही रैंक दा इक हेडक्लर्क आर्टिलरी रिकार्ड्स च पोस्टड है, तिन्नी तिस्सेयो दस्सेह्या है कि तिसदी प्रॉब्लम दा समाधान नीं होयी सकदा किंञा कि इक ताँ तिस समस्या दा घटनाक्रम दस साल ते भी पुराणा है कनै दूजा तिस गलती दा कोई समाधान है ही नीं।   मैं तिस्सेयो दस्सेया था कि तकरीबन पंज-छे महीनेयाँ च मैं तिसदी समस्या जो सुलझायी सकदा। मैं तैह्ड़ी ही कमाण अफसर कन्नै गल्ल करी नै नायक नारायण सिंह दी समस्या जो सुलझाणे दी परमिशन मंगी। कमाण अफसर होराँ गल्ल सुणी नै मिंजो ग्लाया कि अगर मैं नायक नारायण सिंह दे बारे च होयी फौज दी गलती जो‌ सुधारी सकदा है ताँ बहोत बद्धिया गल्ल होणी।  कमाण अफसर दी  परमिशन मिलणे पर मैं तिस जुआन दी समस्या पर कम्म शुरू करी दित्ता था।

 

नायक नारायण सिंह दी समस्या मोटे तौर च किछ इस तरहाँ थी ― सैह् नवें दी दहाई दे शुरू च, अपणी यूनिट कन्नै अखनूर च पोस्टड था। अंग्रेजाँ ते आजादी मिलणे परंत  जम्मू-कश्मीर च, कदी सरहद पर ताँ कदी अंदर, बन्दूकां ते गोळियाँ निकलणे दियाँ आवाजाँ अक्सर औंदियाँ रैहदियाँ हन्न। इक दिन सैह् जुआन अपणी टुकड़िया सोगी गश्त करा दा था।  चाणचक तित्थू धमाका होया कनै अफरा-तफरी च तिन्हाँ दी गड्डी पलटी गयी।  तिसदी इक जंघ च सीरियस चोट (सीवियर इंज्यूरी) आयी।  तिस्सेयो इलाज  ताँईं मिलिट्री हस्पताल च दाखिल कित्ता गिया।  तित्थू डाक्टराँ, फौज दे इक  तयशुदा फार्म पर, इंज्यूरी रिपोर्ट जारी करी दित्ती। 

इंज्यूरी रिपोर्ट तीन-चार पेज दा इक फार्म होंदा है जिसदा शुरू दा  हिस्सा फौज दे डाक्टर भरदे हन्न। तिसदे बाद दा हिस्सा तिस जुआन दा कमाण अफसर भरदा है। तिस पर आखिरी फैसला ब्रिगेड कमांडर जो देणा होंदा है। फौज च खास तौर च इंज्यूरी जो तिन्न किसमां च बंडेआ जाँदा है ― सीवियर इंज्यूरी, मोडरेटली सीवियर इंज्यूरी कनै माइनर इंज्यूरी। सीवियर इंज्यूरी कनै मोडरेटली सीवियर इंज्यूरी होणे पर तिसदी वजह जाणने ताँईं इक कोर्ट ऑफ इन्क्वायरी बिठायी जाँदी है। इंज्यूरी दे मामले च बैठायी गयी कोर्ट ऑफ इन्क्वायरी गुआहाँ दे बयानाँ कनै अपणी फांयडिंग जो लिक्खी नै कमाण अफसर जो देई दिंदी है। कमाण अफसर इंज्यूरी रिपोर्ट कनै कोर्ट ऑफ इन्क्वायरी दी प्रोसीडिंग्स जो अपणी रिकमेन्डेशन सोगी ब्रिगेड कमांडर व्ह्ली तिन्हाँ दे फाइनल फैसले ताँईं घली दिंदे हन्न।

ब्रिगेड कमांडर दे फैसले दे मुताबिक सैह् कैजुअल्टी यूनिट दे ‘पार्ट टू ऑर्डराँ’ च पब्लिश कित्ती जाँदी है। नायक नारायण सिंह जो लगिह्यो चोट दे बारे च फैसला दर्ज करदे वक्त तदकणे बिग्रेड कमांडर दे स्टाफ ते इक चूक होयी गइह्यो थी। नतीजतन सैह् कैजुअल्टी यूनिट दे ‘पार्ट टू ऑर्डराँ’ च सही तरीके नै पब्लिश नीं होइयो थी। मिंजो तिस्सेयो सुधारने ताँईं लिखा-पढ़ी करनी थी। 

मैं लोकनाथने जो तिस महीने दी 23 तारीख जो कमाण अफसर ते दस्तखत करुआयी नै  “कारण बताओ नोटिस” जारी करी दित्ता था।  तिस नोटिस च लोकनाथन दी ‘कंडक्ट सीट’ च बहोत सारी लाल स्याही दियाँ एंट्रियाँ दा हवाला दिंदे होंयाँ तिसते पुच्छेया गिह्या था कि आर्मी रूल 13 दे तहत तिस्सेयो कैंह् नीं फौज दी नौकरी ते कढ़ी दित्ता जाये। जबाव देणे ताँईं तिस्सेयो सत्त दिन दा टैम दित्ता गिया था। मिंजो पता था लोकनाथन दा जाणा हुण पक्का है इस ताँईं मैं तिसदी डिस्चार्ज रोल (IAFY-1948 A) भी तैयार करी लई थी। 

(बाकी अगलिया कड़िया च….)

 

 

...................................................................

समाधियों के प्रदेश में (बयालीसवीं कड़ी)

 

मेरे लिए लोकनाथन को बचाने के लिए अब सभी रास्ते बंद हो चुके थे। वैसे भी उसके बारे में जो कुछ मैंने अभी तक किया था वह मेरे कमान अधिकारी के उदारवादी मानवीय दृष्टिकोण की बदौलत संभव हो पाया था। सेना में सभी कमान अधिकारी उन जैसे नहीं होते जो महज एक सूबेदार क्लर्क के सुझावों पर सहानुभूतिपूर्ण विचार करके एक अल्कोहलिक जवान को सुधरने का मौका देने के लिए राजी हो जाएं।  ये तो लोकनाथन की बदनसीबी थी कि वह उस सुनहरी मौके का लाभ नहीं उठा पाया था। 

सेना में लोकनाथन जैसे जवानों और अधिकारियों से निपटने के लिए कमान अधिकारी के पास एक और उपाय भी उपलब्ध होता है।  सेना में एक फॉर्म होता है जिसे ए.एफ.एम.एस.एफ-10 (AFMSF-10) नाम से जाना जाता है। कई कमान अधिकारी अपने लिए समस्या बनते जा रहे व्यक्ति के बारे में उपरोक्त फॉर्म भर कर उसे मानसिक रूप से अस्वस्थ बताते हुए, आगे की जाँच और निपटान के लिए, सम्बन्धित सैन्य हस्पताल में भेज देते हैं। ऐसा करने से वे समस्या बने व्यक्ति के विरुद्ध अनुशासनात्मक अथवा प्रशासनिक कार्रवाई करने के झंझट से बच जाते हैं। लोकनाथन के बारे में पहले से ही तोपखाना अभिलेख से उसे नौकरी  से डिस्चार्ज करने के लिए चिट्ठी  आ रखी थी।  इसीलिए उसके बारे में फॉर्म नंबर 10 भरने का सवाल ही पैदा नहीं होता था। 

लोकनाथन का फौज से निकाला जाना अब तय था। मैंने कमान अधिकारी के निर्देशानुसार “कारण बताओ नोटिस” का प्रारूप तैयार करके उनसे स्वीकृत करवा के रख लिया था।  

हिरासत में रखे गए सैनिकों से कुछ संतरियों की निगरानी में काम करवाया जाता है। लोकनाथन को दो सैनिकों की निगरानी में पलटन के मुख्यालय के सामने लगे बगीचे में क्यारियों में से पेड़ों से गिरे सूखे पत्ते चुनने और मिट्टी को ताजा करने का काम करने लाया जाता था। वह ज्यादातर मेरे दफ्तर के सामने पड़ने वाली क्यारियों में ही काम करता था। मैं अपनी कुर्सी पर बैठे हुए उसे काम करते हुए स्पष्ट देख सकता था। पहले ही दिन जब अचानक मेरी नजर उस पर पड़ी तो उसने, बिना टोपी और बेल्ट के, सावधान होकर मुझे सेल्यूट दिया।  मैंने जानबूझ कर उसको जवाब नहीं दिया और ऐसा आभास दिया कि जैसे मैंने उसे देखा ही नहीं। तभी थोड़ी देर बाद उस पर तैनात एक नायक मेरे पास आकर सेल्यूट देकर बोला था, “सर, लोकनाथन आपसे दो मिनट बात करना चाहता है।”

मैंने देखा क्यारी में खड़ा लोकनाथन मेरी तरफ ही देख रहा था। उसकी नम आंखें मुझे आज भी याद आती हैं। “नहीं, मुझे उससे कोई बात नहीं करनी,” मैंने जानबूझ कर उस नायक को ऊंची आवाज में जवाब दिया था ताकि लोकनाथन को भी स्पष्ट सुनाई दे। 

उसी दौरान एक नायक के मामले में कमान अफसर महोदय मुझ से नाराज हो गये थे। हुआ यह था कि लोकनाथन के घटनाक्रम से तकरीबन आठ-दस महीने पहले, एक दिन दफ्तर में मेरे पास एक नायक रैंक का युवक आया। उसका नाम नारायण सिंह था। वह कानपुर का रहने वाला था। उसने बड़ी तहजीब के साथ मुझ से अपनी एक समस्या के सिलसिले में बात करने की इजाजत मांगी। मैंने उसकी समस्या ध्यान से सुन कर उसके कागज़ात को सरसरी नज़र से देखा और उसे आश्वस्त किया कि मैं कमान अधिकारी से बात करके उसकी समस्या को हल करने का भरपूर प्रयास करूंगा। उसने मुझे बताया कि उसके गांव से मेरे ही रैंक का एक हेडक्लर्क आर्टिलरी रिकार्ड्स में सेवारत है। उसने उसे बताया है कि उसकी समस्या का समाधान नहीं हो सकता है क्योंकि एक तो उस समस्या का घटनाक्रम एक दशक से भी पुराने समय का है और दूसरा उस गलती का कोई समाधान है ही नहीं।  मैंने उसे बताया था कि लगभग पांच -छह महीने लगेंगे पर मैं इस समस्या को सुलझा सकता हूँ।  मैंने उसी दिन कमान अधिकारी से बात करके नायक नारायण सिंह की समस्या को सुलझाने की आज्ञा मांगी। कमान अधिकारी ने मुझे बताया कि अगर मैं नायक नारायण  सिंह के बारे में सेना द्वारा की गई भूल को सुधार सकता हूँ तो अच्छी बात होगी। कमान अधिकारी की आज्ञा मिलने पर मैंने उस जवान की समस्या पर काम शुरू कर दिया था।  

नायक नारायण सिंह की समस्या संक्षेप में इस प्रकार थी ― वह नवें दशक के आरंभ में, अपनी यूनिट के साथ अखनूर में सेवारत था।  अंग्रेजों से स्वतंत्रता मिलने के बाद जम्मू-कश्मीर में, कभी सरहद पर तो कभी अंदर, बन्दूकों से गोलियाँ निकलने की आवाजें अक्सर आती रहती हैं। एक दिन वह जवान अपनी टुकड़ी के साथ गश्त कर रहा था।  अचानक वहाँ विस्फोट हुआ और अफरा तफरी में उनकी गाड़ी पलट गयी।  उसकी एक टांग में गंभीर चोट (सीवियर इंज्यूरी) आयी।  उसे उपचार के लिए सेना हस्पताल में दाखिल किया गया।  वहाँ डाक्टरों ने, सेना के एक निर्धारित फार्म पर, इंज्यूरी रिपोर्ट जारी कर दी। 

इंज्यूरी रिपोर्ट तीन-चार पेज का एक फार्म होता है जिसका शुरू का  हिस्सा सेना के डाक्टर भरते हैं। उसके बाद का हिस्सा उस जवान विशेष का कमान अधिकारी भरता है। उस पर अंतिम फैसला ब्रिगेड कमांडर को देना होता है। सेना में मुख्यतः इंज्यूरी को तीन श्रेणियों में बांटा जाता है ― सीवियर इंज्यूरी, मोडरटेली सीवियर इंज्यूरी और माइनर इंज्यूरी। सीवियर इंज्यूरी और मोडरटेली सीवियर इंज्यूरी होने पर उसके कारण जानने के लिए एक कोर्ट ऑफ इन्क्वायरी बिठायी जाती है। इंज्यूरी के मामले में बैठायी गयी कोर्ट ऑफ इन्क्वायरी गवाहों के बयानों और अपनी फांयडिंग को कलमबद्ध करके कमान अधिकारी को सौंप देती है। कमान अधिकारी इंज्यूरी रिपोर्ट और कोर्ट ऑफ इन्क्वायरी की प्रोसीडिंग्स को अपनी अनुशंसा के साथ ब्रिगेड कमांडर के पास उनके अंतिम निर्णय के लिए भेज देते हैं। ब्रिगेड कमांडर के निर्णय के अनुसार उस घटना को यूनिट के ‘भाग दो आदेशों’ में प्रकाशित किया जाता है। नायक नारायण सिंह को लगी चोट के बारे में निर्णय देते समय तत्कालीन बिग्रेड कमांडर के स्टाफ से एक चूक हो गयी थी। परिणामस्वरूप वह घटना यूनिट के ‘भाग दो आदेशों’ में सही ढंग से प्रकाशित नहीं हुई थी।  मुझे उसे सुधारने के लिए लिखा-पढ़ी करनी थी। 

मैंने लोकनाथन को उस महीने की 23 तारीख को कमान अधिकारी से दस्तखत करवा कर “कारण बताओ नोटिस” जारी कर दिया था। उस नोटिस में लोकनाथन की ‘कंडक्ट शीट’ में बहुत सारी लाल स्याही की प्रविष्टियों का हवाला देते हुए उससे पूछा गया था कि उसे क्यों न सेना नियम 13 के तहत सैन्य सेवा से निकाल दिया जाए।  जबाव देने के लिए उसे सात दिन का समय दिया गया था।  मुझे पता था लोकनाथन का जाना अब तय है अतः मैंने उसकी डिस्चार्ज रोल (IAFY -1948 A) भी तैयार कर ली थी।

 (शेष अगली कड़ी में…)