आपबीती और जगबीती

 

इस साल कवतां दी इक होर नौंई कताब छपी है - मुठ भर अंबर। हिमाचली पहाड़ी भाषा ताईं नायाब तोह्फा। कताबां दियां कई खूबियॉं हन। एह् हिमाचली पहाड़ी कवतां दी कताब है। एह् कवतां कन्नो कनिया हिंदिया च भी हन। पहाड़िया च दूंह् भाषां च कवता दा एह् नौआं प्रयोग है। हिंदी पाठकां जो पहाड़ी कवता दा सुआद मिलणा है। कवि हन कुशल कुमार। एह् हन हिमाचली पर जम्मे बडोए महानगर मुंबई च। कुशल होरां हिमाचल मित्र पत्रिका भी पंज साल संपादित कीतिओ है। कुशल होरां दियां कवितां दा सुआद ई अलग है। कताबा च दो भूमिकां हन। पहाड़िया च अनूप सेठी होरां दी कनै हिन्दिया च नवनीत शर्मा होरां दी। अज तुसां पढ़ा अनूप सेठी होरां दे वचार। कनै कुशल होरां दी इसी कताबा चा ते इक कविता। 

तेज भाई इक लोकगीत गांदे, ‘भाखड़े दे नौकरां जो छुटियां जे होइयां, घरा ब्ह्ल सुरत दुड़ाई।’ भाखड़ा डैम हिमाचले च ही है। लोक नौकरी करना या रोजी-रोटी कमाणा हजारां मील दूर निकळी जांदे। बगानियां धरतीं च जिंदगियां बीती जांदियां पर सुरत घरा ब्ह्ल ही रैंह्दी। कई खुसकिस्मत अपणेयां अंगणां जो हटी औंदे। कइयां दियां तांह्गां ई रह्यी जांदियां। आदमजात है, जित्थू जांदी, बूटेयां साही पुंगरी पौंदी।

जेह्ड़े लोक अपणेयां घरां छड्डी दूएयां मुल्कां जो निकळी जांदे, तिन्हां जो अंगरेजिया च ‘डायस्पोरा’ कनै हिंदिया च ‘प्रवासी’ गलांदे। असां दा मुल्क बड़ा बड्डा है, उपमहाद्वीप। इस दिया संस्कृतिया दा ताणा-बाणा इसजो जोड़ी नै रखदा। अंदरूनी बुणतर इक्को-देही है, बाह्रले रूप-सरूप फर्क हन। भाषां कई हन। अप्पू ची मिलदियां भी हन पर जुदियां भी हन। बड-बडेयां शैह्रां च भाषां-बोलियां कनै इलाकेयां दे लोक कठ-कट्ठे होई रैंह्दे। मुंबई दी ही गल करिए ता गुजराती, सिंधी, तमिळ, मंगलोरी वगैरा।

इसी तरीके नै पिछलिया शताब्दिया च हिमाचली भी मुंबई आए। ग्रां दे म्हाणू, इक्की दूए दे पचांह् औंदे गै। टैक्सी चलाणे आळेयां दा कट्ठ जेह्या होया। हौळें-हौळें तिन्हां अप्पू ताईं  इक ठीह्या भी बणाई लेया। तित्थी अपणियां बोलियां कन्नां च मिसरी घोळदियां थियां। औंदे-जांदे ग्राइयां ते घरा दा सुख-सांद भी मिलदा रैह्ंदा था। धामा-धूमा दा मौका भी निकळी औंदा था।

कुशल कुमार होरां इन्हां प्रवासियां दिया दूइया पीढ़िया दी नुमांइदगी करदे। एह् गल गौर करने आळी है भई इन्हां दी पैदाइश मुंबई दी है। हिमाचल जादा रैह्णे दा मौका नीं मिल्ला। मेरा ख्याल, हिमाचली संस्कार अपणे माता-पिता ते ई मिल्ले। कुशल होरां रैंह्दे हन मुंबई, पर इन्हां दे भाव-संसार दी सीर पहाड़ां च ही है। एह् इक्की किस्मा दी दीवानगी है। दीवानगी इस करी नै है कैंह् कि इसा भाव-समाधिया च रैह्णा सौखा नीं है। बडियां भाषां दे लोक जादा हुंदे, समर्थ भी हुंदे। तिन्हां ब्हाल अपणियां सांस्कृतिक जरूरतां पूरियां करने दे साधन हुंदे। जिञा  बंगला, राजस्थानी, तमिळ, मलयाली समाज सारेयां तरीकेयां नै समृद्ध हन। इन्हां दे मुकाबले हिमाचली समाज हाशिए पर ही है। महानगरे च बगैर दिवानगिया ते अपणी पछैण बचाई रखणा कनै बणाई रखणा सौखा नीं। इसा दी इक मिसाल असां दी ‘हिमाचल मित्र’ पत्रिका थी, जेह्ड़ी कुशल होरां दे जनून दिया वजह ते ही निकळी कनै दो हजार पंज दे दो हजार दस तक पंज साल चल्ली। दूई मिसाल दस्सां-ग्यारहां सालां परंत कायम होआ दी है, कुशल होरां दे हिमाचली कनै हिंदी द्विभाषी कविता संग्रह दे छपणे कनै।

मिंजो हिमाचले ते बाह्र रैंह्देयां चाळी साल होई गै। मते बरी लगदा भई मेरी भाषा ओह्थी ही खड़ोतियो है। भाषां खड़ोई जाह्ण ता मरनां लगी पौंदियां। मेरिया भाषा च अजकी रंगत नीं है। हिंदी कनै अंगरेजी बिच-बिच झाती मारी जांदियां। कुशल कुमार ता पैदा ही मुंबई होए। इन्हां दी पहाड़ी होर भी मलमली है। शायद शैह्री पहाड़ी!   

एह् गल मैं इस करी नै छेड़ी कैंह् कि हिमाचली कविता दी भाषा लोक भाषा दे जादा नेड़ें है। कवियां दा रुझान गीतां, ग़ज़लां कनै छंदा बखैं जादा है, लोच-लचक कनै रुण-झुण मती है, पर जिंदगी जदेही करड़ी है, सैह् करड़ापन न कविता च है न छंदां च। द्विजेंद्र द्विज होरां ‘ऐब पुराणा सीह्स्से दा’ नै इक छाळ मारी है। मिंजो कोई हैरानी नीं है, भई तिन्हां जो जिंदगिया दा ताप झेलणे कनै ग़ज़लां च बयान करने ताईं  व्यंग्य दा स्हारा लैणा पेया। सिद्धी गल करना असान नीं।

कुशल कुमार होरां दी कविता दे विषय, भाषा कनै तसीर नौईं (आधुनिक) है। एह् भी व्यंग्य आळे पासे जो निकळी जांदे। अपणिया गल्ला जो दार्शनिक अंदाज़ भी देई दिंदे। इन्हां दियां कवितां दा विस्तार भी बड़ा है। ग्राएं ते लई नै ब्रह्मांड तक, याणयां ते लई नै लोक लोकणियां बुजुर्गां तक। इन्हां गैं दूरा ते दिखणे दी दृष्टि है। इस ते इक बैराग भाव पैदा हुंदा पर करुणा भी कन्नें रैंह्दी। कुशल कुमार दी कविता महसूस करने कनै सोचणे जो कई कुछ दिंदी है। हिमाचली कविता ताईं एह् इक तोह्फा है।

कुशल होरां इक होर पैह्ल कीती है। एह् कताब द्विभाषी है। कवितां पहाड़िया कनै-कनै हिंदिया च भी हन। हिंदी रूप भी कुशल होरां अप्पू ही त्यार कीत्या है। मेरा ख्याल एह् सिर्फ अनुवाद नीं है, एह् पुनर्लेखन है। इक्की कविता जो दूं भाषां च लिखणा असान नीं हुंदा। जिञा छंदां आळियां कवतां दा अनुवाद मुस्कल हुंदा, तिञा ई जिन्हां भाषा पर लोक भाषां-बोलियां दा रंग गूढ़ा हुंदा, तिन्हां जो दूइयां भाषां च लिखणा होर भी मुस्कल हुंदा। बराबरिया दे शब्द ई नीं मिलदे। लय तुक ता बाद दी गल है। कुशल होरां दियां एह् कवितां हिंदिया च हिमाचली कवितां हन। इन्हां दा अंदाज-ए-बयान जुदा ही है। इन्हां दिया भाषा च पहाड़ी लोक रंग ता है, पर एह् काफी हद तक इसते अजाद भी है। एह् प्रवासियां दी पहाड़ी है। इसा च इक खास जेह्या खुलापन है। शायद इसी वजह नै एह् खड़ी बोलिया दे सांचे च ढळी गई। एह् कवितां छंदां च नीं हन। एह् भी सहूलत रही होणी है।

कुशल होरां हिमाचल प्रदेशे ते बाह्र मुंबई देह् महानगरे च हिमाचलिया दी अलख जगाइयो है। हिमाचली पहाड़ी भाषा च इस नौइंया कविता दा स्वागत है- नौएं तौर-तरीके कनै नौएं तेवर दियां कवितां पेश करने ताईं, सैह् भी सिर्फ पहाड़िया च नीं, हिंदिया च भी। हिंदी पाठकां जो भी अजकणिया हिमाचली कविता दा सुआद एह्थी मिल्ला दा है। 

टैम हत्थे ते निकली नीं जाए

 

मैं घड़िया दी सूई पकड़ी लई

सूईयां गांह्-गांह् दौड़ना लगी पैइयां

फिरी कुन्‍नकी गलाया

बड़ा ही स्ताबखां है

कोई भी कम्‍म होए

टैमे दा ही खरा लगदा

मैं सूईयां कनैं चलणा लगी पिया

चाणचक बीतियां गल्‍लां याद करि

मैं पुट्ठयां फेरयां मारना लगी पिया

असां सारे टैमे ताईं घड़ियां दिक्‍खदे

टैमे दा घड़ियां नै क्या रिश्ता

घड़िया दा टैम

माह्णुए दा टैम लग होंदा

जगह-जगह दा टैम लग होंदा

इकी घरे च रैह्णे वाळयां दा टैम बी

इकी दुए ते लग होंदा

इस ताईं ही गलांदे

अजकल मेरा टैम खरा चलया

सैह् अंगरेजां दा टैम था

जबरे सदियां ते गलांदे आये

बड़ा बुरा वग्‍त आई गिया

प्यार-मुहब्बत, इन्सानियत

छोटे-बड्डे दा लिहाज

किछ भी नीं रिह्या

मता कुछ बदलोआ दा

घड़ियां भी बदलोआ दियां

घड़ियां च टैम पकड़ना

औंजळा च पाणी पकड़ना है

टैमे दे पाह्यां सराखां

टैमे दियां धेड़ियां सयाईयां

कोई दर्जी नीं सी सकदा

पर मन नी मनदा

दिन चढ़दा, घरोई जांदा

भ्याग होंदी, रात होई जांदी

असां बेह्ले ही गिणी जा दे

टैम हटि ने वापस नी औंदा

हाली भी मतियां कूणां हन

जित्थू न्‍हेरा है

इस ते बावजूद

अगलियां पीढ़ियां ताईं

असां रोज नोईंया गुफां खुणा दे

टेमें जो पत्थरां च चिणा दे

समय हाथ से निकल न जाए

 

मैंने घड़ी की सूई पकड़ ली

सुईयों के आगे-आगे दौड़ने लगा

फिर किसी ने कहा

बड़ा ही उतावला है

कोई भी काम हो

समय से ही अच्‍छा लगता है

मैं सूईयों के साथ चलने लगा

अचानक बीती बातें याद कर

मैं उलटे फेरे मारने लग पड़ा

हम सब समय के लिए घड़ियां देखते हैं

समय का घड़ी से क्या रिश्ता

घड़ियों का समय

इन्सान का समय अलग होता है

जगह-जगह का समय अलग होता है

एक घर में रहने वालों का समय भी

एक दूसरे से अलग होता है

इसलिए ही कहते हैं

आजकल मेरा वक्त अच्छा चल रहा है

वो अंगरेजों का वक्त था

बूढ़े सदियों से बोलते आये हैं

बड़ा बुरा वक्त आ गया है

प्यार-मुहब्बत, इन्सानियत

छोटे-बड़े का लिहाज

कुछ भी नहीं रहा

बहुत कुछ बदल रहा है

घड़ियां भी बदल रही हैं

घड़ियों में वक्त को पकड़ना

अंजुरी में पानी पकड़ना है

वक्त के किए सुराख

वक्त की उधेड़ी सिलाईयां

कोई दर्जी नहीं सी सकता

पर मन नहीं मानता है

दिन उगता है, ढल जाता है

सुबह होती है, रात होती है

हम निठ्ठले गिने जा रहे हैं

वक्त लौट के वापस नहीं आता है

अभी भी बहुत से कोने हैं

जहां अंधेरा है

इस के बावजूद

हम रोज नई गुफा खोद रहे हैं

अगली पीढ़ियों के लिए

वक्त को पत्थरों में चिन रहे हैं