बंदूका ते कलमा तिकर पक्किया शिस्ता वाळा सिपाही

 

बंदूका ते कलमा तिकर पक्किया शिस्ता वाळा सिपाही

भगत राम मंडोत्रा होरां दे कविता संग्रह 

मैं डोलदा रिहा पर कवि लेखक कनै भाषाविद् राजीव त्रिगर्ती होरां दी समीक्षा

 

‘मैं डोलदा रिहा’ भगत राम मंडोत्रा होरां दी पहाड़ी भाषा बिच लिखियो पंजमी किताब है। कवियें अपणिया उमरा दे पूरे बत्ती साल भारतीय सेना बिच रही देशे दी रक्षा दे खातर कटी दित्ते। इक्क सच्चा देशभक्त सिपाही अपणे कर्मे जो ही अपणा धर्म मन्नी, अपणियां बंदूकां, ग्रनेडां, तोपां दे संगीते बिच ही रमेया रेहा। कलमा दा सिपाही दमागे बिच पळदा रिहा। सावधान खड़ोतेया सिपाही अन्दर मस्कड़ोन्दे तिस कविये दे गीतां सुणदा रिहा पर तिन्नी बंदूकाँ, गोलियां कने कोई समझौता नी कित्ता। सैह् जाणदा था जे लक्ष्मिया कने सरस्वतिया देयां चेहरेयां उप्पर निखार ता ही आई सकदा जाह्लु तिकर दुष्टां जो पैरां हेठ पीह्णे वाळी काली (चामुण्डा) अपणेआँ हथियारां कने तिह्ना दी रक्षा करदी रैह्। अपणे इक्की कम्में जो पूरा करने ते परन्त ही घरें आई अपणे देशे जो होरनी नौयां तसल्लीबक्श हत्थाँ बिच देई करी ही बन्दूकिया सिपाही कलमा दा सिपाही बणी बैट्ठा। शिस्त एत्थु भी ठीक लगाई।   

एत्थु भी सिपाही तिस जोरे-शोरे कने ही लग्गा जिस जोरे-शोरे कने सैह् सीमा पर कम्म करदा रिहा था। तूह्डे देए टैम्मे बिच पंज कताबां मातृभाषा बिच साहित्ये दिया कमिया जो पूरा करने ताएँ लिखणा कने सेना दे प्रति आम लोकां बिच उच्च भावना दी अलख जगाणे ताएँ धड़के कने फड़के जो बधाणे वाळे शूर-वीरता दे जिन्दे-जागदे उदाहरण किताबाँ दे रूपे बिच रखणे कने ही एह् इकदम साफ होई जान्दा जे इस लखारिए बिच दम कितणा है। 

कवि सेना बिच रही करी इसा गल्ला ने पूरा इत्तफाक रखदा था जे बन्दूका ते निकलियो गोली हटदी नी। गलाणे दा मतलब एह् है जे गोली गलत निशाणे पर नी लग्गे कने फालतू खरचोए भी नी। ठीक एह् ही चीज कलमा दे सिपाहिए जो भी पता होणा चाहिदी जे कुछ गलत ना लखोए कने व्यर्थ भी नी लखोए। नियमाँ दे पक्के पूजके इक्की सपाहिए ते कुसी भी तरीके दी, कुसी भी पास्सें, कुसी भी गलतिया दी असां उम्मीद नी करी सकदे। एह् सच्चा समर्पण असां तिह्ना दियां कविता बिच साफ-साफ दिखदे। 

‘मैं डोलदा रिहा’ किताबा बिच कुछ रचनां ग़ज़लनुमा, कुछ गीत-नवगीत, कुछ छन्दमुक्त कवितां, कोरोना काले बिच लिखेओ 73 मुक्तक, ता 80 माहिए हन्। 43 बहुरंगी कवितां कने 73 मुक्तक कने 80 माहियां वाळी एह् किताब सचमुच ही इक्की बांके ताज़े गुलदस्ते साही है। जिसा दियां लाह्दियां-लाह्दियां खुश्बुआँ रळी कने इक्क नोंई ही मनमोहिणी महक बिखेरा दियां हन्।  

कवि अपणिया पैह्लिया कविता ‘आस घरोई नी’ बिच सारियाँ नकारात्मकताँ जो दस्सदा, जेह्ड़ियां असां दे समाजे बिच, इक्की-दुए ने असां देया सरबंधा जो सामणे रखदा। देशे दे कुसी भी कनारें दिक्खा, मीर आदमिएँ दे कम्म होआ दे। नेते भी वोटां दे मौकें गरीब-गरीब करदे कने जित्ती जाणे परन्त मीराँ दे ही कम्म होंन्दे। कुसी दफ्तरे बिच दिक्खा मीराँ दे ही कम्म होन्दे। एत्थु स्थिति एह् है जे मन्दराँ बिच भी मीरां जो ही दर्शन हन्। दे  मीर-गरीबे ताएँ लाह्देयां-लाह्देयां व्यवहारां जो दिखदा सैह् लिखदा-

मीर-गरीब च फर्क न जित्थू, देहा देस कोई नी।

बंड बरोबर जेह्ड़ी करदी, मिल्ली सैह् डोई नी।।  

हालांकि कवि कविता दिया मूह्र्लिया पालिया बिच ही आसा दिया कनारिया जो नी छडदा। कवि मनदा जे कितणे भी पुट्ठे पास्सें चलिए इक्क न इक्क दिन ता सधरोणा ही। कैंह् जे हर राती दी भ्याग होंदी। इस करी ने ही सैह् गलान्दा ‘जिसदी भ्याग न होये, देही रात कदी होई नी।’ 

दुइया कवता बिच कवि मतियां नसीह्ता दिन्दाँ। अजकले दे जमाने बिच क्या कमाणा कने गलाणा ठीक है, सैह् इक्क-इक्क करी दसदा। सैह् चेहरे पर चेहरा नी लगाणे दी नसीह्त भी दिन्दा। अजकल मतेयां लोकाँ दी एह् आदत होई गइयो जे सैह् दिखणेओ होर कने कमाणे जो होर हन्। सामणे खरे कने मिट्ठे बणी रैह्णा कने पिट्ठी परोखा बुरा चिन्दणे दा कम्म करदे। पर एह् देए माह्णु इक्क ना इक्क दिन पणछोई ही जान्दे-

बहुरूपिए पणछोई जांदे हन्,

चेहरे पर चेहरा लगान्दा मत। 

उइयां ता असां दे पूरे देशे बिच ही मेळेयां-छिंजा दा बड़ा महत्त्व है, पर असाँ दे पहाड़ी जीवने बिच ता इह्ना दा औणा इक्क नौआँ जोश भरी दिन्दा। मेळेयां दे मुकणे पर साल भर लोक तिह्ना जो निहागदे। मेळे पहाड़ी संस्कृतिया बिच नौंई जान अणदे। रुता बिच गरमोस ओन्देयां ही मेळेयां दा ढैं-चोट्टा चौंह् पास्सेयां सह्णोणा लगी पोन्दा। उइयां मेळेयां दा ढक्क होळिया ते लगी पौन्दा। कवि सुजानपुरे दियां होळियां दे मेळेयां दे बहाने कुछ पराणे  मितराँ दे मिलणे दा चित्रण करदा कने प्रेमी-प्रेमिका दे मेळे बिच मिलणे दी गल्ल भी करदा। असल बिच ता मेळा शब्द ही मिलन दा प्रतीक है-  

जाह्लु भुल्ले-बिसरे मिलदे

जफ्फियां पाई गळें मिलदे

दिक्ख-सुण दे खेल होंन्दे

मेळेयां च मेळ होन्दे।  

अपणिया मातृभाषा कने कविये जो बड़ा प्यार है। इसा गल्ला दा पता ता इसते ही लगी जान्दा जे कवियें तूह्ड़े देए टैम्मे बिच ही अपणिया कलमा ने इसा जो सजाणे-संवारने दा जिम्मा चुक्केया। सैह् दुखी है, अपणिया मां-बोलिया दिया दुर्दशा जो दिक्खी करी। सैह् दिक्खा दा जे कोई भी इसा जो लई करी गम्भीर नी है। कविये जो डर है जे कुथी सैह् मरी-मुकी ना जाए। अपणे-अपणे स्वार्थां ता सारे साधणा चाह्न्दे पर भाषा दे प्रति जेह्ड़ी पीड-भीड़ होन्दी, सैह् कुसी बिच नी सुझदी। गल्ल सच भी है, भाषा दे प्रति जेह्ड़ा असां जो करना चाहिदा, सैह् असाँ नी करा दे। मते सारे स्वार्थी ता पहाड़िया दे गुणा गान्दे नी थकदे पर घरे अपणेयां बच्चेयां कने बोलणे ते परहेज करदे। कविये दी पीड इकदम दिले ते निकलियो है-

असाँ हर साल अड़िये तेरा दिन हन् मनान्दे,

करदे-करान्दे ता किछ भी नीं बस टरकांदे।

-------------

एह् ही हाल रेहा तां तू मरी-मुकी जाणा, 

गुआई ने तिज्जो लोकां तोपणा जाणा।। 

कुदरता कने जे तालमेल रक्खेया जाए ता असां दे जीवने बिच खुशियां दा ढेर लगी सकदा, पर जे प्रकृतिया दा गलत तरीकेयां कने दोहन कित्ता जाए ता सैह् असां जो भुगतणा भी पई सकदा। गल्ल सैह् ही है कि जे माह्णु दानव बणेया ता प्रकृतिया जो काली बणने जो चिर नी लगणा। असां देयां पौराणिक आख्यानां वाळा दानव अजकले दा माह्णु ही बणी गेआ। प्रकृति प्राकृतिक आपदा दे रूपे बिच काली बणी जाए इस बिच कोई सन्देह ही नी है। 

माह्णुआँ कुदरता पर कहर ढाया।

ताहीं ता होआ बिच जहर आया।। 

‘माह्णुआँ दी मत गई मारी’ कविता बिच भी कुछ एह् देये ही भाव हन्। प्रकृतिया कने छेड़खानी असां जो भारी पोणी, इसा गल्ला जो कवि सारेआँ जो सचेत करदा, खुलेआम गला दा-

पत्थर खड्डाँ दे चकोई गै, लोकाँ रेत बजरी ढोई लै।

नदियां दे वाह घुटी दित्ते, छैळ पहाड़ भी पुटी दित्ते।

कुदरता गास चोट करारी, माह्णुआँ दी मत गइयो मारी।। 

कवि प्रेमे दे लौकिक रूपे चिएँ अलौकिक गीताँ दी रचना करना चाह्न्दा। तिस्सेओ  अपणिया प्रेमिका दियां हाक्खीं बिच दिले दियां गल्लाँ करदे-करदे अपणेयाँ गीताँ दी निहाग है।

बस इक्क नज़र दित्तियो होंदी। 

गल्ल दिले दी कित्तियो होंदी। 

मिंजो मेरा गीत मिली जाए।           

'बरसाती दी नदी’ कविता बिच बरसाती दिया नदिया दा बड़ा ही जीवन्त चित्रण कित्तेआ। बरसाती दा मौसम मुकी जाणे परन्त नदी सौंधिया मिट्टिया वाळेयां कनारेयां ने मिलना चाहन्दी ता तिसा दी कनारेआँ तिकर पहुंच ही नी रैह्न्दी। 

कवि मखीर कठेरने ताएँ मखीरे ने भरोइया कस्सां जो बह्ढ़णे वाळेयां जो चोर ही नी गलान्दा, सैह् तिह्ना जो बणे बिच अग्ग लगाणे दा भी जिम्मेदार मनदां- 

मखीरे ने भरोइयां कस्सां जो/दिक्खी करी

पागल दरिंदेयां साही/दौड़ी पौन्दे 

हत्थें जळदे गोह्टुआँ दा/ठूठा लई करी

धूँ देई नै मखीर जा चोरदे ही/मारी भी दिंदे 

अज्जकल बागां च अग्ग लगणे दियां

वारदातां इञा ही नी होन्दियां।

‘तरंगे ने लिपटेया ताबूत’ कविता बिच कवि अपणिया भावना जो बड़े ही मार्मिक रूपे ने सामणे रखदा- 

तरंगै ने लिपटेयो/ताबूतां जो दखांदियां

सोसल मीडिया पोस्टां पर ‘जय हिन्द’ लिखणे दे परन्त  

मेरा मन उदास होई जान्दा/ बड़िया देरा तिकर

मैं अम्बरे बखी/ दिखदा रैंह्दा। 

अपणिया तिसा भावना जो सैह् तिस शहीदे दिया लाड़िया, न्याणेयां माऊ कने जोड़देयाँ ऐह् उसदा जे सीमा पर शहीद होणे वाळा फौजी देशे ताए अपणी जान दिन्दिया मौकें सब कुछ भुली जान्दा। बस अपणे कर्तव्ये जो याद रखदा, पर पिच्छें सैह् अपणा पूरा टब्बर रोंदा छड्डी जान्दा।  

कोरोना काल देयाँ मुक्तकां बिच भगतराम होराँ इसा बिमारिया दे सारे पक्ख बड़े ही बाँके तरीके ने सामणे रखेओ। इसा दा डर, इसा ते बचाव दे सारे तरीके, कोरोना योद्धा, गरीब-मजदूर कने रोजगारे पर प्रभाव सारियां गल्लां विस्तारे कने कित्तियां। माह्णुए दा प्रकृति कने कित्ता जाणे वाला गलत व्यवहार ही एह् देइयां विपदाँ दा कारण बणदा इस पर कवि बेझिझक खुली कर गलान्दा मिलदा। इक्क मुक्तक दिक्खा-

रोजी-रोटी दे लाले पई गै। 

हंड़ी-हंड़ी नै छाले पई गै। 

बुरी गुजरी मजदूरां पर भगता, 

चलदे साहां पर ताळे पई गै।।

माहिया छंद इक्क बड़ा पराणा छंद है। पंजाबी बिच कने पहाड़िया बिच इसदा प्रयोग होंदा रेहा। लोक बिच इस छंदे दा प्रयोग बड़ा आम था। बिच इसदा प्रयोग थोड़ा घटेया था पर हुण एह् भिरी अपणी गोआचियो पछैणा जो तोपणा लगेआ। मते कवि इसदा प्रयोग करा दे। इस जो कांगड़े बिच माहिया नी गलाई करी टप्पा गलान्दे। इस करी ने असां इस जो टप्पा छंद भी गलाई सकदे। कवि इस छंदे दे प्रयोग करने बिच बड़ा सफल होया। किट्ठे अस्सी टप्पे रखी करी कने तिह्ना बिच अपणे बड़े उच्चे भाव भरी करी कवि एह् साफ करदा जे टप्पे जेह्ड़े असां दिया परम्परा बिच रचेयो बसेयो हन् तिह्ना बिच असाँ मने बिच जागणे वाळियां अपणियां सारियां गल्ला जो कविता दा रूप देई करी रखी सकदे। कवि टप्पेयां लिखणे बिच कितणा कुछ व्यक्त करदा है ऐह् असां कुछ टप्पेयां (माहियां) बिच दिक्खी सकदे-

दौलत दा सरूर रिहा

भगता सैह् माह्णु

अप्पु ते भी दूर रेहा। 

चल हुण परदेशाँ जो 

तैं कुसजो दसणे

ढक्की रख क्ळेसाँ जो।

चाहे ग्रां होए, चाहे वण-पहाड़, चाहे नदियां होन् चाहे अम्बर, प्रेम होए चाहे समाजिक समरसता, चाहे जीणे दा असान देया तरीका होए चाहे बुरयाइयां कने घुळने दी हिम्मत सारा कुछ ही इह्ना

राजीव त्रिगर्ती

दियां कवितां बिच मिलदा। कविए दा कम्म ही होंदा जे सैह् तिह्ना सारिया गल्लाँजो अपणियां कविता बिच लई अणे, जिह्ना जो दिखदेयाँ-सुणदेयाँ होयाँ भी आम आदमी दरकिनार करी दिंदा। कवि अप्पु कने ता गल्लाँ करदा ही सौगी सैह् अपणे ग्राएँ-मेळेयाँ, नदियां-नाळाँ, पहाड़ा ते निकली अपणे देशे दे गीत भी गांदा। तिसदियां कविताँ बिच जवानिया बिच प्रेमे दे दो रूप हन्। इक्की बिच सैह् राँझू बणी ने ओंदा जा दुए बिच सैह् देश-प्रेम दिया भावना कने भरोया देशे ताएँ अपणा समर्पण करी दिंदा।

सचमुच ही भगतराम मंडोत्रा होराँ दा कवि बड़ा व्यापक है। तिस बिच प्रयोगविधा, भावविधा सौगी सैह् भाषा दा भी बड़ा ही साफ-सुथरा कने सारेआँ जो समझा ओणे वाळा जेह्ड़ा रूप सामणे अणदा, सैह् असां दिया भाषा दे ओणे वाळे टैमे ताएँ बड़ा खरा है। पूरी उम्मीद है जे कवि भगतराम मडोत्रा होराँ ते इसते भी बेहतर रचना असां जो औणे वाळे वेल्लें मिलणियां। (मूह्रली तस्वीर द्विजेंद्र द्विज होरां खिंजियो)