Friday, September 23, 2016

असां, तुसां कनैै पहाड़ी

पहाड़ी भाषा दे बारे च लखारी बिच बिच चर्चा करदे ई रैह्ंदे। 
कई मसले ऐसे हन जिन्‍हां दे बारे च बड़ा घचोळ पेया है। 
बड्डा मसला है कुण बोली, कुती दी बोली ? व्‍याकरण कनै लिपि दे सुआल भी खड़ोंदे रैह्ंदे। 
इस बारे च पढ़ा नौजवान कवि भूपेंद्र भूपी जमवाल होरां दे वचार।  

जित्थू तिकर अपणी गल्ल कुसी जो दसणे दा सवाल है, सबनां जो भाषा या बोलिया दी ज़रूरत मसूस हुन्दीकने असां हिमाचलियां जो जिसा भाषा दी दिले ते ज़रूरत लगदी सैह  है-- पहाड़ी । पर  इक्क सवाल हल्ली भी हल नी होया जे इस प्रदेशे दी सरकारी कमकाज कने पढ़ाइया-लखाइया दी भाषा एह काहलू बणगी! हिमाचले दे साहित्यकार , कलाप्रेमी, कने संस्कृति दे राखे केइयां बर्हेयां ते कोशिश करादे जे अपणिया भाषा जो किहियां बचाइये।अज हालत एह है कि असां अपणेयां बच्चेयाँ जो भी पहाड़ी नी सखालदे। मते सारे लफ्ज़ गवाची ही गे।जे इहियां ही रेह्या तां क्या एह भाषा हौले-हौले मुकी जांगी? प्रदेश दे बुद्धिजीवी जेहड़ियां कोशिशां करादे सैह बेकार चली जांगियां? हल्ली जे ,अज्ज भी मते सारे माहणू ऐसे हैन जेह्ड़े अपणिया बोलिया ताईं डुग्गी पीड़ बुझदे।

मुस्कल एह भी आई जांदी जे पहाड़ी कुसा बोलिया जो मन्निए? कांगड़ी? चम्बियाली? कुलवीमण्डियाली? कहलूरी? बघाटी?   महासुवी? सिरमौरी?? आखर कुसजो मानक लेई के चल्लिए?इक शुद्ध विन्यास कने व्याकरण दी ज़रूरत सांजो पौणी है। इस वास्ते इक ऐसी बोली चुंणना पौणी जिसा जो सबते जादा ग्लाया, समझेया जाँदा होएं। हुण , कांगड़ी इक ऐसी बोली है जिसा जो पूरे हिमाचल प्रदेश विच सारेयां ते ज़ादा यानि कि लगभग चाळी फ़ीसदी ते भी ज़्यादा हिमाचली ग्लांदे जाणदे कने समझदे हैन। जोगिन्द्रनगर सीमा ते लेई के पठानकोट सीमा , कने चुवाड़ी ते घुमारवीं सीमा तिकर बड़े बड्डे क्षेत्र च विच इसा दा फलाव है। अगर इसा बोलिया जो शुद्ध मानक मन्नी करी होरणी सारियां बोलियाँ दे लफ्ज़ इस च खुल्ले तौर पर शामल करी दित्ते जाह्न तां एह मुस्कल भी दूर होई जाणी। इसा गल्ला पर प्रदेश दे लग्ग लग्ग हिस्सेयां च रेहणे वाले बुद्धिजीवियाँ भी हामी भरियो है। इस विच माड़ी मोटी दिक़्क़त किन्नौर कने लाहौल-स्पीती वालेयां जो रेही सकदी।  बाकी पूरे प्रदेश विच असां अरामे कन्ने इक्की दूइया बोलिया देयाँ लफ़्ज़ां जो समझी ही लैंदे हैन।  भाषा कने शब्द-भण्डार दे मामले विच कुछ क़ुर्बानियाँ भी देणा पेई सकदियाँ । जाहलू असां कोई मिट्ठेयां फलां वाला रुक्ख लगांदे तां निकेयां निकेयां बूटेयां कने घाए पट्ठे जो अपणा वजूद गवाणा ही पौंदा  है।        

जाहलू गल्ल पहाड़ी भाषा दी  औंदी तां इक्क पेच होर फसदा और सैह पेच है लिपिया दा। असां सारे ही जाणदे हैन जे पहाड़ी रियासतां दी लिपि टाकरी रेहियो। पुराणे ग्रन्थ, हसाब-कताब सब इसा ही लिपिया विच मिलदे।पर अज्ज टाकरी जाणने वाले गिणुएं ही हैन बचेयो। कुछना संस्कृति देयां सच्चेयां सपाहियां हिम्मत नी छड्डी कने टाकरी जो दोबारा सारेयां साह्मणे ल्योंदा । एह सच्ची मुच्ची इक बड्डी क़ामयाबी है । कैंह जे कुसी वक़्त पर प्शावर ते लेई के नेपाल देयां पहाड़ां तिकर एही लिपि इस्तेमाल हुन्दी थी। अज्ज कोई भी पहाड़ी प्रदेश इसा लिपिया दा प्रयोग नी करादा। बक्खे दे ही प्रदेश जम्मू कश्मीर जो लेई लेया।इत्थू दी डोगरी बोली अज्ज भाषा दा दर्जा लेई बैठियो पर इसाजो देवनागरी विच ही लिखेया जाँदा है। असां दे साहित्यकार भी अज्जे तिकर  देवनागरी दे ही सहारें चलदे आए हैन। ऐसे वक़्त विच जे असां ग्लाण जे हुण असां पहाड़ी टाकरी च ही लिखणी तां मैं समझदा एह कोई फायदे वाळी गल्ल नी हुणी। असां पहाड़ी दी तरक़्क़ी विच पहलें ही बड़े रोड़े बछायो हैन।इसा जो होर ज़ादा करड़ा नी बणाणा ।पुराणा साहित्य भी पढ़ना, टाकरी भी सिखणी ;अपणी संस्कृति भी बचाणी पर नोएं साहित्य वास्ते एहड़े बह्नण नी पाणे जे लिखणा ही मुस्कल होई जाएं। इस वक़्त इक्क सर्वसांझे हल दी ही ज़रूरत है। अज्ज जिसा तौळा कन्ने पहाड़ी दा शब्द भण्डार घटा करदा है,एह ही हाल रेह्या तां इक दिन एह भाषा भी सिर्फ इतिहास ही बणी के रेही जाणी। फिरी काहल्की लोक्कां कताबाँ च ही पढ़ना कि पहाड़ी भी कोई भाषा थी।      

जितने मठैह्ने खुणगे उतनी पोल ही पौणी, मिलणा कख नी। इस वक़्त सांजो ज़रूरत है इकजुट होई के कम्म करने दी , किट्ठेयां होई के सोचणे कने अग्गे बधणे दी , तां जे असां पहाड़ी भाषा जो सैह जगह दुआई सकिए जिसा दी एह हक़दार है। जे असां तुसां सारे हिमाचल वासी मिली के कोशिश करगे तां सैह ध्याड़ा दूर नी है जाहलू पहाड़ी सरकारी कम्मेकाजे कने पढ़ाइया दे इक्की विषय दे रूप च नजरी औणी।

4 comments:

  1. दयार पर लेख पपाणे ताईं शुक्रिया जी

    ReplyDelete
  2. मैं भी अपणी तरफा ते थोड़ा बहुत कम करा दा है .. इस पेजे च पहाड़ी गाने लिखा दा - http://www.humhimachali.com/category/himachali-pahari-nati-folk-songs/

    ReplyDelete
    Replies
    1. बड़ी खुसी होई जी। अपणे बारे च होर दस्‍सा anupsethi@yahoo.com पर

      Delete
  3. पहाड़ी भाषा उपर भूपी जी दा सुंदर लेख......बधाई।

    ReplyDelete