म्हारे ग्रांएं च आई जनेत

नवीन हल्दूनवीं होरां 1974च एह् कवता लीखी थी l

अज चाल़ी साल बाद भी इसा कवता जो लोग पसंद करदे।

म्हारे ग्रांएं च आई जनेत

                

म्हारे   ग्रांएं  च  आई   जनेत l

होइगे   किट्ठे  सब्बो   घरेत ll

लाड़े दा ताऊ खऊं-खऊं खंग्घा दा,

निक्कुए ते घुट शराबा दा मंग्गा दा;

नच्चा दा दिक्खा ओह् कुड़िया दा जेठ l

कुड़मां-कुड़मां दी मिलणी जे होई,

नाई वचारा सैह् गेआ पथोई ;

परोह्त परतोया सैह् पग्गा समेत l

मामे नैं मामा भाउए नैं भाऊ ,

चाचे नैं चाचू ताउए नैं ताऊ ;

दादू बी देआ दा पग्गा पल़ेस l

जनेता दे मुंडू जौंगल़ ते भौंछी ,

सूट्टा लगाई गल्ल करै झौंफी ;

  भई चूंडे खलारी बणेयों परेत l

रात  जे  होई  भत्त   खुआया ,

लगनां ते पैह्लैं लाड़ा नुहाया ;

बौह्णे जो बछाया वेदी च खेस l

भ्याग जे होई टौहरां बणांदे ,

चौल़ थे कच्चे सब्बो गलांदे ;

सैह् पकड़ी के ढिड दुआंदे न सेक l

चाई नैं दित्ता मिठाइया रा डून्ना,

ते भंगू दे पकौड़े दा इक नमून्ना ;

पे  इक्की  झुटारैं  मंजे  दे     हेठ l

भोज सबेल्ला ते तल़ी ले भटूरू ,

मठड़ी कनैं मधरा बणांदा ऐ भूरू;

रसोइया बी मंग्गा दा खट्टे जो तेल l

मंग्गदा ए रुल़िया दुरबा दा नोट ,

नगारची नगारे च मारा दा  चोट ;

लाड़े दा बब्ब अज्ज लग्गा दा सेठ l

नाई-परोह्त हत्थां जो रंग्गा दे ,

टिक्का लुआई जनेतां ते मंग्गा दे;

खाणे जो सैह्-ई करा दे पछेत l

भई  भोजे  परंत  धाम  खुआई ,

जनेत तां खट्टे नैं दित्ते नुहाई ;

लबड़ां जो लग्गा पिपल़ीं दा सेक l

अहा! छैल़ रसो$ बणी पेटू गलांदे,

पंज   परोसे   चौल़ां  दे   खांदे ;

सैह् खाई बरंजा पकड़ा दे पेट l

जणास्सां दा लैंह्गा कनैं झूंड तरीरा ,

कुड़िया जो दिक्खा पुआदियां कलीरा ;

सरगुंदिया जो होआ दी तांईं पछेत l

करी चज्जां-चारां जुआई सदाया,

सस्सू नैं टिक्का-तमोल़ लुआया ;

रोई बोल्लै मां धीए! जा अपणे देस l

प्यारे च दित्ता कुड़िया जो दाज़ ,

जनेतां की दच्छणा लाड़े जो राज़;

समझ'नवीन' दुनियांदारी दा भेतl

म्हारे    ग्रांएं  च    आई   जनेत l

होइगे   किट्ठे   सब्बो    घरेत ll

 नवीन हलदूणवी