असां दोस्तां दियां कताबां खरीदी नै पढ़दे
कुसी भी समाजे दी भाषा सिर्फ गलबात करने ताईं ई नीं हुंदी; सिर्फ सूचनां दा भंडार ई नीं हुंदी; भाषा सभ्यता-संस्कृति दियां परतां भी खोलदी। साहित्य कनै दूइयां कलां, दर्शन, इतिहास असां जो अपणे होणे दी पछाण करांदे। इसा पछाणा दा जरिया बणदियां कताबां। कताबां दी जरूरत सदा ते रही है। इस बारे च अनूप सेठी होरां बोला दे मेरी गल सुणा। एह गल दस दिसंबर जो नव भारत टाइम्स च छपियो है। उपरली फोटो नीलमणि पोद्दार होरां दी है।
हिन्दी प्रदेशां दियां नाटक मंडलियां जो आम शिकायत
रैंह्दी भई लोक टिकट खरीदी नै नाटक दिखणा नीं औंदे। हर कोई मुफ्ते दे सादेयां
निहाळदा। एही स्हाब कताबां दा है। इक ता सैह्रां च कताबां दियां दुकानां नीं
हुंदियां, जेह्ड़ियां हुंदियां भी तिन्हां च सिर्फ सलेबसां दियां कताबां ई मिलदियां। साहित्य
दियां कताबां ताईं कोई जगह नीं हुंदी। बड-बडेयां सैह्रां च जेह्ड़ियां दुकानां हन
तिन्हां जो उंगळियां पर गिणी सकदे। तिन्हां व्हाल अंगरेजी पुथन्ने ढेरां-ढेर हुंदे, हिंदुस्तानी
भाषां दियां कताबां सिर्फ दस्णौकिया जो रखियां हुंदियां। दुकानदारां भी क्या करना?
तिन्हां सैही चीज रखणी जेह्ड़ी बिकै। असां लोकां जो कताबां खरीदणे दी आदत नीं है। जिन्हां जो
लिखणे-पढ़णे च दिलचस्पी हुंदी,
सैह् तोपदे पोथियां। तिन्हां चा ते भी जदातर इसा ताका च
रैंह्दे भई भेंट-पुरस्कार मिली जाऐ,
जेब ढिल्ली न करना पौऐ। पर एह् गल भी पूरी सच नीं है।
पुस्तक मेल्यां दी भीड़ दसदी भई साहित्य दे पाठक हन।
इक जमाना था धर्मयुग पत्रिका तकरीबन हर पढ़ेयो लिखयो
घरैं औंदी थी। लोक घरां च अपणी लाइब्रेरी भी बणांदे थे। हिंदी पॉकेट बुक्स कनै
राजकमल प्रकाशन दी घरेलू लाइब्रेरी योजना हुंदी थी। मैं जदूं पढ़दा था,
मतलब 1978-80 च, तां यूएसएसआर दे प्रगति प्रकाशन दियां बड़ियां जरूरी
बताबां मिली जांदियां थियां। कनै सस्तियां। दुनिया दा श्रेष्ठ साहित्य। सैह् भी
हिन्दिया च। भारत भवन भोपाल आळेयां कई मैग्जीनां चलाइयां। बिहार अकादमी नै बड़ी
बधिया कताबां छापियां। राजर्षि टंडन अकादमी लखनऊ व्हाल भी बड़ा खजाना हुंदा था। इक
बरी असां जो मुंबई पुस्तक मेले च इन्हां दियां कताबां मिली गइयां। दूए बक्खें इक
बंदा देह्या भी टकरेया जेह्ड़ा पंजांह् दी कताब पंजां सौआं च बेचा दा था।
कताबां ता हिमाचल कला भाषा अकादमी नै भी छापियां हन। केंद्रीय साहित्य अकादमी, नेशनल बुक ट्रस्ट कनै प्रकाशन विभाग दे बारे च ता सारे ई जाणदे। एह् बड्डे इदारे अपणियां कताबां बेची लैंदे। पर राज्य सरकारां दियां अकादमियां सरकारी सोतड़पणे दियां शिकार होई जांदियां। मार्केटिंग करने दे बारे च कोई जादा नीं सोचदा। मार्केटिंग दे बारे च ता प्राइवेट सेक्टर दे प्रकाशक भी नीं सोचदे। सैह् कताबां लाइब्रेरियां च ही थपदे। हुण तकनीक सस्ती होई गई ता लेखक अप्पू ही छापणा लगी पेह्यो। पर तिन्हां दे साम्हणें भी यक्ष प्रश्न है भई कताबां कुस जो कनै कुनी बेचणियां। मैं इक बरी मक्लोडगंज दिक्खया इक तिबती नौजुआन सड़का कंढै अपणिया कवतां दिया कताबा बेचा दा था। असां देह्ई हिम्मत कदूं करनी है?
इसा कमिया ताईं सारा दोस मोबाइलां कनै कंप्यूटरां जो नीं
दयी सकदे। असां अपणे अंदर झाकी नै दिखिए, असां दिया
जिंदगिया च कताबां दी कितणी क जगह है। कनैं अपणा कितणा बजट कताबां-मैग्जीनां ताईं
रखदे। जे होर खर्चे करी सकदे ता कताबां पर भी करना चाहिदा। घरैं कताबां रखोइयां
होन ता याणेयां जो भी चा होई सकदा। असां जो मुफ्ते च कताबां लैणे- देणे दे बारे च
भी संजीदगिया नै सोचणा चाहिदा। लेखकां जो इक्की दुए दी मदद करनी चाहिदी। मेरा
कविता संग्रह छपया ता मैं इक मराठी दोस्ते जो गलाया भई मैं कताब भेजदा। तिन्हां
गलाया, ‘‘असां दोस्तां दियां कताबां खरीदी नै पढ़दे। फिकर मत करा, मैं
मंगुआई लैंह्गा।’’ मैं सोच्या देह्-देह्ई सद्बुद्धि हिन्दिया कनै हिमाचलिया
दे पाठकां जो भी आई जाऐ ता नजारा बदलोई जाऐ।
असां दोस्ता दियां कताबां खरीदी नै पढ़दे : अखबारा दा लिंक
No comments:
Post a Comment