कुछ चिर पैह्लें अहां
दयारे पर अपणिया भासा पर चर्चा करने ताईं छे सुआल ईमेल कनै वट्सऐप पर कइयां लेखकां
जो भेजे थे। डाका च चिठियां नी पाइयां। दयार कागजे पर नीं छपदा। इंटरनेट पर ब्लॉग
ही है। कोशिश एह करदे भई इस च पहाड़ी भासा कनै समाज दी नौईं चेतना जो मूह्रेंर
रखिए। इसा ई कोशिशा च एह् सुआल खरेड़े हे। करीब दस लेखकां जुआव भेजे। सीनियर
लेखकां जो असां नी मनाई सके। इक जुआब एह भी आया, पैह्लें पहाड़ी
दी जगह हिमाचली करा। अहां जो एह् स्टैंड गैर-जरूरी लग्गा। अहां दा हिमाचली नां
नै कोई वरोध नीं है। अहां ताईं दोयो इक्को ई हन। फिरी भी अहां तिन्हां दा स्टैंड
सिर मत्थें लाया। खैर, जिन्हां लेखकां
जुआब भेजे, तिन्हां दा सार कनै अपणे विचार जोड़ी नै कुशल
कुमार होरां इक्की जगह सुआल-वार कट्ठा करी ते कनै अनूप सेठी नै अपणी
गल भी रखी है। कुछ दिन पैह्लें दुर्गेश नंदन होरां स्नेहा भेज्या भई सैह् भी
जवाब लिखणे दी त्यारी करा दे। अहां तिन्हां नै गुजारिश कीती भई अहां दिया इसा गल-बाता
पढ़ी नै अपणी गल गांह् बधान। उम्मीद है तिन्हां दे वचार भी अहां जो मिलगे।
कुशल कुमार: पहाड़ी दयार पर
हिमाचली पहाड़ी भासा दी चर्चा च द्धिजेंद्र द्धिज, पवनेंद्र ‘पवन’, चंद्ररेखा ढडवाल, रमेश चंद्र ‘मस्ताना’, सुरेश भरद्धाज
‘निराश’, मुक्त कंठ ‘कश्यप’, राजीव कुमार
‘त्रिगर्ती’, नवीन शर्मा कनै
भूपेंद्र भूपी इन्हां नौ लखारियां अपणे
जवाब भेजे। पैह्ला सुआल था। असां दा पहाड़़ी लेखन मुल्के दियां दूइयां भासां
दे मुकाबलें च कुतु खड़ोंदा। द्धिज जी दा मनणा है कि कुती नीं। मस्ताना कनै सुरेश
भारद्वाज जी दी स्हाबें पिछें नीं है। कम करने कनै-कनै प्रचार प्रसार होणा चाही
दा कनैं मान्यता मिलणा चाही दी। पवनेंद्र पवन, त्रिगर्ती, चंद्रलेखा, कनै भूपी जी बालदे, भासा पिछें है। इन्हां दे स्हाबें मता सारा
स्तरीय लीखणे दी जरूरत है। भासा खरी कनैं समृद्ध है पर कम उतणा नीं होया। मुक्तकंठ
दे लेखें भासा खरी कनैं लोक माड़े।नवीन शर्मा जी दे स्हाबें भासा समृद्ध कनैं
संस्कृत दे नेड़े है, इस ताईं तुलना
जरूरी नीं। निचोड़ एह भई भासा च दुईंया भासां दे मुकाबले कम घट होया या जेड़ा होया
सैह भी गांह नी आई सकया। कम कनै कम्में दी पच्छैण होणा चाही दी।
अनूप सेठी: अहां
जो अपणिया भासा नै प्रेम है। इहा दा चा है। तांह्ई ता खौह्दळ पाइयो। आसावादी होणा
भी जरूरी है। पर असलियत दा साह्मणा भी करना पौंदा। हाखीं बंद करी नै सच नीं
बदलोंदा। जरा क रमाने नै सोचा भला, पहाड़िया च हिंदिया दे पासंग बराबर भी लखोया है? तिसा हिंदिया च जिसा जो दो सौ साल भी नीं होए, मराठी, तमिल, बंगला दे बक्खें भी खड़ोई सकदी एह?मिंजो ता,
चाळी साल पैह्लें जदूं मैं कालजे च पढ़दा हा, तां भी पहाड़ी
भासा दा आदिकाल लगदा हा, कनै अज चाळियां सालां परंत भी, इक दो जण्यां जो छड्डी नै सैह्
ई बेलबूटे नजरी औंदे। मिंजो पता है, मतेयां नराज होई
जाणा है, फिरी इग्नोर करी देणा है, पर
जो सुझदा सैह् गलाणा ता पौणा ई है। होई सकदा मैं गलत ई होआं। अंदर बक्खैं नजर
फेरी लैणा चाहिदी। सिर्फ हिमाचल सूबे दे गुण गाई नै, कुदरतां
दे गीत गाई नै दूइयां भासां दी बराबरी नीं होई सकदी।
कुशल कुमार: दुआ सुआल था पहाड़ी
भासा च इतनी समर्थ्या है कि अजकिया जिंदगिया दा अन्नोह-बाह् दौड़ कनै सारे
ढक-पळेस लखोई सकदे या फिरी एह् चीलां दे डाळुआं झुलाणे जोगी ई है? इस सुआले च सारे सहमत हन कि भासा च समर्थ्या
है। जेह्ड़ी कुसी भी भासा च है। जे पंजाबी, राजस्थानी, डोगरी, भोजपुरी च है ता
पहाड़ी च भी है। भासा च लफ्जां दी दौलत कनै मुहाबरयां दा खजाना है। चीलां दे
डाळुआं वाळे भी बडे कवि थे। डाळु भी झुलणा चाही दे, एह भी भासा दी खूबसूरती है। एह व्याकलता भी है
कि पहाड़ी सुंदरता तिक्कर ही कैंह् सीमित है। जीणे दी पीड़ा जो चतेरने दी जरूरत
है। इसा च सब किछ लखोया कनै किछ होर भी जोर लाई छैळ कनै दुईंयां भासां दे लफ्ज लई
नें लीखणे दी जरूरत है। अजके स्हाबें बदलोई नें हाजमा खरा रखा। जे इसा न्हसदिया
जिदंगिया बिच अपणी होंद बचाई के रखी सके। हालात देह्ये हन जे चीलां दे डाळु भी
झुलदे रेंह्गे ता बची रेह्णा है। इसते गांह बधणे दी जरूरत है। जीणा कनैं गलाणा इक
होंणा चाही दा। आखिर च ऐह असां दे उप्पर है। डाळुआं ते लम्मी डुआरी मारी जाए।
अनूप सेठी: मेरी
मुस्कल एह् है भई मेरी भासा चाळी साल पुराणी है। मुंबई च बोलणे दा मौका नीं
मिलदा। जे लिखणा होऐ ता लफ्ज नीं मिलदे। (लफ्ज ताईं भी अक्खर ई दमागे च औंदा, पर अक्खर अक्खर है शब्द शब्द।) मेरी
छड्डा पर हिमाचले च चाळी साल पुराणी भासा जिंदा है? सैह् कितणी क बदलोई?
मेरी इक होर मुस्कल है। जरा भी गैह्री गल लिखणी होऐ
ता शब्द ई नीं मिलदे। हिंदिया ते लैणा पौंदे। अपणिया भासा च विज्ञान, दर्शन, मनोविज्ञान, समाजशास्त्र जेह् विषयां पर किञा
लखोंगा? इन्हां दूंह् वाक्यां च ही दिखी
लेया, व्याकरण पहाड़िया दा है, शब्द हिंदिया दे।
फिरी हिंदिया च आधुनिकता,
उत्तर आधुनिकता दे दौर निकळी गै, पहाड़ी कितणी क गांह् बधी? होर न सही, मेद है सैह् दिन छोड़ ई औंगा जदूं पहाड़ी
साहित्य दी आलोचना पहाड़िया च लखोंगी।
कुशल कुमार: त्रिया सुआल था
पहाड़ी लेखन कनै पाठकां दे रिस्ते दी कदेई सकल बणदी? इस ताईं होर क्या
करना चाही दा? इस सुआले च भी
सारयां दी सहमति है कि कोई सकल नीं बणदी। कोई नीं पढ़दा। लेखक कनै पाठक शरोतंया दा
रिस्ता किछ घटदा जा दा। सब छापी नें मुफ्त बंडा दे खरीदी नै पढ़ने दी आदत नीं
है।लोकां जो पहाड़ी लेखन कनैं नीं होऐ पर पहाड़ी भासा कनैं प्यार है। पर पहाड़ी
पढ़ने दी बारीया मते हत्थां खड़ेरी
दिंदे। पढ़ने वाळे घट कनैं लीखणे वाळे जादा हन। इक्क लेखक ही दुए जो नीं पढ़दा।
हासे मनासे दी मंचीय कवता सुणी कनै सराही जांदी। गंभीर कम्मे जो पढ़ने दी आदत
कनैं लेखक-कवि बणने तैं पेहलें पाठक बणना जरूरी है। क्या करना चाही दा इस पर भी
एह सोच है कि लेखक, पाठक आम आदमियां
कनैं सरकार, तिन्नां जो कोस्त करना चाही दी। स्कूलां
कालजां च प्रतियोगितां करना चाहीं दियां। कताबां दे पाठक सारीयां भासां च घटदे जा
दे। जमाना नेट दा है। नेट कनै सोसल मीडिया पर भी मंचां साही हासे मनासे कनै छूछा
लेखन ही जादा है गंभीर कम्म घट है।
निचोड़ त्रिगर्ती जीदे गलाणे च है। जाह्ली लेखन इक बधिया सकल लई नैं ओंदा
ता सैह् पाठकां जो बेचैन करी दिंदा। तांही कोई सकल बणदी। पहाडि़या दा जेह्ड़ा भी
आम आदमी सामाजिक कनै आर्थिक तौर ने थोड़ा हटी ने खड़ोत्या सैह् पता नीं कैंह् पहाड़िया
ते भी हटी ने खड़ोणा चाहा दा। इसा बमारिया दा लाज जरूरी है पर कुसी वैदे भाल लाज़
नीं है। इस पर एही गल्लाया जाई सकदा कि भई पहाड़ी लेखन दी पाठकां कनै रिस्ते दी
सकल सैही दैही है जदेही पहाड़ी भासा दी पहाड़ी माह्णुआं कनैं रिस्ते दी सकल है या
बणदी जा दी।
अनूप सेठी: लेखक
पाठक दे रिस्ते पर तां ‘चाहिदा’ आळे मते हन। ‘करने’ आळयां हत्थ
खरेड़ी तेयो। इस स्हाबें ता परमात्मा ई मालक है। जेह्ड़े भाई अठवीं अनुसूची दी
गल करदे, जेह्ड़े पाठकां दी चिंता करदे, तिन्हां जो मूह्रें औणा ई पौणा है। अपणी सूळी अप्पू ई चकणा पौणी है।
मेरा सुझाव है, अखबारां पर जोर पाणा चाहिदा भई सैह् इक पेज
या अद्धा पेज या इक कॉलम ई सही, पहाड़िया च खबरां दा देह्न।
अपण-अपणे जिले च अपण-अपणिया बोलिया च तां जे कजा भी न पौऐ। कविता कहाणी नीं, सिर्फ खबरां। लोकां जो पहाड़ी सुझगी ता सैह् पढ़गे भी।
इक होर गल, एह गल मिंजो हिंदिया
ताईं भी सच लगदी, जदूं तक गरीब-गुरबा सलामत है, टुट्टयो-भज्जयो, बिगड़यो,
फिणक्यो ही सही, पर
ग्रां अबाद हन, ताह्ली तिकर असां दी एह भासा रैहणी है।
इक गल होर, पढ़ने आळे घट ही
हुंदे। सारी जनता पढ़ीक होऐ तो समाज सुधरी न जाऐ। एह् उन्म्हिया सदिया दा यूरोप
नीं है जित्थी दे किसान भी कताबां पढ़दे हे।
कुशल कुमार: चौथा सुआल था कि अगलिया
पीढ़िया तक तुसां दी गल-बात कियां पूजदी?इस दे जबावे दा
सुर ऐही था कि कमी है। मुश्कल औआ दी पर पूजणा चाही दी। पजाणे दी जुगत होणा चाही
दी। बच्चयां याणयां ने पहाड़िया च ही गल करना चाही दी। बड़ी ही सुंदर भासा है।
अगलिया पीढ़िया जो पहाड़िया नैं जोड़नां चाही दा। संस्कार देणे दा कम बुजुर्ग, टीचर कनैं लिखारी
ही करी सकदे। असां गलांदे,
अगली पीढ़ी
अपणयां बच्चयां ने गलांगी ता पूजी जाणी। प्हाड़ी छडा होर भी कख नीं ओंदा। हिंदी
वीक, ग्रेजी कमजोर है
कनैं प्हाड़ी बोलणे च सरमा ओंदी। निक्कियां गलां, लोक कथां, परम्परां, संस्कार, रीत-रूआज, जमणे ते मरने दे
बाद तिक्कर चलणे वाले गीत सब लखोई कनै
ऑडियो वीडीयो रूपे च इंटरनेट पर रखणा चाहीदे। साहित्य ही पूजी सकदा। खूब लिखणा, छपणा कनै इंटरनेट
पर प्रचार प्रसार होणा चाही दा।
अनूप सेठी: एह् भी
कौड़ी सचाई है। अहां जो पता ई नीं है अपण्यां निक्के-याण्यां नै कुसा जबाना च
कनै कुस तरीके नै गल करिए। अहां अपणे सयाणे होणे दे गुरूरे च रैहंदे, याणे अपणे तैशे च। जे अहां दा समाज ‘संवेदनशील’ बणना लगगा,‘खूबसूरतिया’ जो समझणा लगगा, बजारे दे जादुए ते खबरदार रैंह्गा, तां शायद कुछ बदलाव होणा लगगा। पर मिंजो एह् भी लगदा, भई जादा मीनमेख
कढ्ढे बिना अपणा कम करदे चलिए। जो अहां जो ठीक लगदा, सैह्
करदे रहिए। बाकी कल की कल जाणै। जेह्ड़े मेरे साही सोचदे,
तिन्हां नै हत्थ पकड़ी नै कुआळ चढ़ने दी कोशिश करदे चलिए। थकी जांह्गे ता बसौंई
लैंह्गे, नतीजे बखी कजो दिखणा।
कुशल कुमार: पंजुआं सुआल था अगली
पीढ़ी पहाड़िया जो भासा बणाणे दा ख्यो करह्गी कि गीतां सुणदेयां गांह् बधी
जांह्गी?इस सुआले दे जबावे च कुसी जो वेदण कनै पीड़ होआ
दी। सान नीं है गलाणा अगली पीढ़ी कितणी की गंभीर होंगी। इंकलाब भी आई सकदा या एह
भी होई सकदा अगली पीढ़ी गुजारा चलाणे जोग्गी भासा सिक्खी नैं तसल्ली करी लै कि
असां भासा जींदा रक्खी लेई। एह असां दिया मेहनता पर है। मुश्कल है सौए ते पंज लोग ही निकलणने मती मैद
मत ला। भासा रोजी रोटी कन्ने जुड़ी जाए ता अप्पु ही गांह बधी जांदी। भासा नें प्यार
जींदा कनै गांह नींणे दी सोच होणा चाही दी। असां जो प्रेरणा हौसला अफजाई देणा
पोणी। अगलिया पीढ़िया जो संस्कार देणे वाळयां पर निर्भर है। जे हिब्रु साही कोमा
च गईयो भासा जींदी होई सकदी ता असां दी ता हसदी खेलदी है। सोचणे च भी भासा लगदी। सोच्चा
दी भासा अगलिया पीढ़िया च भी प्हाड़ी ही रैह ऐह् जरूरी है। इक जबाव किछ लग था
असां दिया पीढ़िया च जोश है। फिल्मां बणा दियां। टैक्नालॉजी आई गईता इक इक अखर
संभाळया जाई सकदा। प्हाड़ी दिलां दी भासा है, माऊं दी भासा है इसा जो कोई खतरा नीं है।
अनूप सेठी: अगलिया
पीढ़िया दे साह्मणै मदान खुल्ला है। तिहा दे हत्थैं कागज कलम नीं है, मोबाइल कंप्यूटर है। सोशल मीडिया कनै टैक्नौल्जिया
कामल करीत्या। इन्हा दा उजला पख भी नजरी औआ दा। पहाड़िया च फिल्मां बणना लगी
पहियां। अजय सकलानिएं ‘सांझ’ बणाई।
पहाड़िया कनै हिंदिया च रिलीज होई। (एह जुदी गल है भई लोकां तिह्जो धरीड़ी खाणे दी
भी कोशिश कीती)। अज पहाड़ी पंचिया च इक गद्दी फिल्मा दा टीजर भी आया। नौजवानां
यूट्यूब पर गीतां, नाटियां दी बहार लाई तियोह्। इसनै भूगोल
दियां हदां खत्म होई गइयां। पैह्लें मिंजो गीता दियां कैसटां हिमाचल या दिलिया
मिलदयां थियां। हुण यूट्यूब पर मैं कइयां किस्मां दे गीत सुणी लैंदा। मजाकिया
वीडियो भी अहां दिया भासा जो गांह् बधा दे। छोट-छोटे डबिंग आळे वीडियो बुड्ढे-ठेरे
नीं, छुकरैह्दा ई सुणदा हुंगा। नईं ता तिन्हां बणाणे ई कजो
हे।
कुशल कुमार: छिटुआं सुआल था आम
जिंदगी जीणें ताईं सिर्फ इक्की भासा नैं कम चली सकदा कि इक्की ते जादा भासां
जरूरी हन? अज कणे वग्ते च
इक्की नै ता कम चली नीं सकदा। चली भी सकदा पर घटे ते घट हिन्दी अंग्रेजी ता चाही
दी। चार पंज भाषां सिखणा चाही दियां। इक्की दा कोई मतलब नीं है। इक्की दा मतलब
है अपणे आपे जो बंद करना। इक्की नैं तिसदा कम्म चली सकदा। जिन्नीं चुप रैह्णा
कनैं इक्की ठारी रैह्णा होये या फिरी ब्रह्मज्ञान हासिल होई गिया होऐ।। भाषां
सिखणा इक्क गुण है। पर अपणियां मां बोली जो छडणा मूर्खता है। मतीयां भाषां सिखणे
वाळा अपणिया मां बोलीया नीं छडी सकदा। अपणिया छडी नैं होरनां भाषां पचांह न्हसणा
कतई अकला दा कम्म नीं है। जितणियां भाषां उतणा स्वा दा विस्तार होंदा। प्रदेसे
दियां सारियां बोलीयां समझा ओणा चाही दियां। द्धिज जी दा बड़ा ही छैळ जबाव है। हर भासा दी अपणी बांक है, अप-अपणा छळैपा है, अप-अपणा रस, अप-अपणा तुड़का
कनै सुआद है। पर द्विज जी एह् गल्ल कुण समझाये तेज चीनी मसालयां कनै अजीनोमेटो
साही ग्रेजी कनै किछ हिंदिया वाळे भी होर कुसी सुआदे ताईं जगह ही नीं छडा दे। मते
हन, मुखर हन कनै
ताकतवर भी हन। जिन्हां जो लगदा अंग्रेजा साही सैह भी अंग्रेजीया ने दुनिया पर राज
करी सकदे ता होर भाषां कैत पाणईयां।
अनूप सेठी: एह्
अहां दी खुसकिस्मती है जे अहां दा देस कनै समाज इतणा रंग-बरंबा है। दो तिन भासां
अज आम गल है। मनोवैज्ञानिक गलांदे, जेह्ड़े जादा भासां जाणदे, तिन्हां दा दमाग तेज
हुंदा। जादा भासां होन ता अप्पू चीएं कंपीटीशन भी होई जांदा। लेनदेन भी होई
जांदा। इस च कोई सक नीं है।
