डोगरी दी प्रसिद्ध लखारी कनैं कवयित्री पद्मा सचदेव जी दा 4 अगस्त 2021 जो देहांत होई गिया। पहाड़ी दयार ताईं तिन्हां जो याद करा दे कुशल कुमार।
एह् 26 अक्तूबर
1981 दी गल है। मुंबई च हिमाचल मित्र मंडल जो भवन बणाणे ताईं प्लॉट मिल् था कनै
तिसा ही जगहा पर मंडल अपणा स्थापना दिवस मना दा था। इक चलताऊ देह्या मुंबईया
आक्रेस्ट्रा था पर सैह् अज भी मिंजो याद हैं कैंह् कि खास परौह्णी थी पद्मा
सचदेव। तिन्हां अपणे गीत भी सुणाए कनैं डोगरयां प्हाड़ीयां जो डोगरिया च शीर्बाद भी दित्ता।
सैह् शायद उस वग्त
हिंदी फिल्मां च गीत लिखणे ताईं मुंबई रेह्या दियां थियां। तिन्हां प्रेम पर्वत कनैं आखिंन देखी फिल्मां ताई गीत भी
लिखयो। लता मंगेशकर जी दे गायो गीत 'भला शपाइया डोगरिया', 'तू मलां तू', 'निकड़े फंगड़ेू उची उड़ान' साही गीतां जो लिखणे
कनैं संगीत देणे दे कारण सारंया पहाड़ी लोकां च पद्मा जी दा बडा नां था। उपरे ते
बड़ी प्यारी डोगरी बोळने दे कारण मिंजो ता अज भी सैह् समा नीं भुलदा।
कई साल बीती गै असां अनूप सेठी होरां कनै
मुंबई ते 'हिमाचल मित्र' पत्रिका प्रकाशित करा दे थे। इक रोज पद्मा जी दा फोन आया।
तिन्हां दी स्नेह कनै शीर्बादां दिया बरखा च पता नीं मैं कितणी की देर सिजदा
रिह्या। हाखीं भरोइयां थियां, गलाई किछ नीं होया। मैं इतणा ही गलाई सकया, तुसां लिखी नै भेजी देन ता बड़ी खुशी होणी। जवाब मिल्ला पुत्तर कोशश करगी, गलाई नीं सकदी, पर तू
डोगरी ताईं कम करना बंद मत करदा। तुसां साही नौजवानां ते ही मेदां हन।
एह् होई नीं सकया। तिन्हां लिखी नैं नीं
भेजया पर इक बरी मैं दिलिया गिया ता तिन्हां नै मिलणा तिन्हां दे घरें पूजी
गिया। खूब गप्पां होइयां। तिन्हां मिंजो अपणी इक कताब कनै गीतां दी कैसट दिती।
कैसेटां दा जमाना बीती गिया पर तिसा कताबा च तिन्हां देयां गीत कनैं गीतां दे
लखोणे दी भूमिका कनैं हिंदी अनुवाद भी था। सैह कताब या ता कोई पढ़णे जो लई गिया
कनैं टाह्ई नीं या फिरी मिंजो ते दो बरी घरां बदलणे च देह्ई रखोई गइयो। मतयां दिनां दे
तोपा दा पर हुण मिला दी नीं।
सरहदां पर लड़ने वाळयां डोगरेेयां सपाहियां
ताईं तिन्हां जो बड़ा मंदा लगदा था पर सैह् असां दी डोगरी-पहाड़ी भासां दी मूरला
सपाही थियां। जाह्लू भी लता जी दिया उआजा च तिन्हां दा गीत 'निकड़े फंगड़ू ऊची
उड़ान' बजदा ता इह्यां लगदा इन्हां फंगा पर असां दियां पहाड़ी भासा दी उड़ान भी
शामल है कनैं हाली मता अंबर लंघणा है। असां दी पहाड़ी भासा दी दादी असां जो छड्डी नैं चली गई पर तिन्हां दे गीत असां जो छड्डी नैं नीं जाई सकदे। मतयां सारयां लोकां दी
रिंग टोन अज भी 'भला शपाइया डोगरिया' है।
निक्कड़े फंगड़ू, ऊची
उड़ान
जाह्यिां थमना किह्यां अशमान
चान्नणियां गल किह्यां लानीयां
सारयां पहाड़ी मितरां नै दरखास्त है डोगरी-पहाड़ी दे निक्कड़े फंगड़ूआं दिया इसा उड़ाना जो न्हीठा होणा मत दिंदे। एही तिन्हां दी स्मृति जो सच्ची सलामी होणी है। साहित्य अकादमी, पद्म श्री कनैं होर मतयां सन्मानां नै सन्मानित पद्मा सचदेव जी जो पहाड़ी दयार, हिमाचल मित्र कनैं सारे हिमाचली पहाड़ी समाज दी विनम्र श्रद्धांजली।
भला शपाइया डोगरिया
ओ ओ ओ ओ रसलियां रसलियां धांरा
तेरी सौ रसलियां रसलियां धांरा
तेरा बड़ा मंदा लगदा
मंदा लगदा ओ ओ ओ ओ
रसलियां रसलियां धांरा
तेरी सौ रसलियां रसलियां धांरा
तेरा बड़ा मंदा लगदा
भला शपाइया डोगरिया……
ओ ओ ओ ओ धारा दिया दे आले
तेरी सौ धारा दिया दे आले
बनस्के दे फूल चुणी जा
फूल चुणी जा ओ ओ ओ ओ
धारा दिया द दे आले
तेरी सौ धारा दिया दे आले
बनस्के दे फुल चुणी जा
भला शपाइया डोगरिया……
ओ ओ ओ ओ दो दिन छुटिया आई जा
तेरी सौ दो दिन छुटिया आई जा
सुहानी रुत फगणे दी
फगणे दी ओ ओ ओ ओ
दो दिन छुटिया आई जा
तेरी सौ दो दिन छुटिया आई जा
सुहानी रुत फगणे दी
भला शपाइया डोगरिया……
ओ ओ ओ ओ बाँकिया बाँकिया नारां
तेरी सौ बाँकिया नारां
शान पहाड़ां दी
पहाड़ां दी ओ ओ ओ ओ
बाँकिया बाँकिया नारां
तेरी सौ बाँकिया नारां
शान पहाड़ां दी
भला शपाइया डोगरिया……
ओ ओ ओ ओ साले दा इक फेरा पाई जा
तेरी सौ साले दा इक फेरा पाई जा
जमाना मोया शक करदा
शक करदा ओ ओ ओ ओ
साले दा इक फेरा पाई जा
तेरी सौ साल दा इक फेरा पाई जा
जमाना मोया शक करदा
भला शपाइया डोगरिया……
सादर नमन
ReplyDeleteछैळ जी
ReplyDeleteपद्मा सचदेव होरां नै मेरी मुलाकात शायद सन 1984 च होई थी। मैं विविध भारती सेदा च नौंआ नौंआ था कनै सैह् भी मुंबई ई रैंह्दे जे। तदूं अचला नागर भी हाली आकाशवाणी च ई ही थे। हिमाचली होणे करी नै पद्मा होरां मेरे नै डोगरिया च गलाए। मिंजो बड़ा अपणापण लगेया। कळेजें ठंडा पेई। मतेयां सालां परंत मैं साहित्य अकादमी च नौकरिया ताईं इंटरव्यू देणा गेया ता सैह् मेजे जे दूजै पासें थे। मैं अपणा कविता संग्रह दस्सेया तां तिन्हां पैह्ली कविता बोली नै पढ़ी। हिमाचल मित्र पत्रिका जे वग्ते था जिक्र कुशल होरां उप्पर कीतेया ही है। बड़ी स्नेही शख्सियत थी।
ReplyDelete