दयार

 

अज पेश है कुशल कटोच दे दूए कनै नौंए कवता संग्रह पहाड़ बदळां दे दे बारे च कुशल कुमार दी समीक्षा। कुशल कटोच दा पिछला कवता संग्रह बदलोंदे रिस्ते पंदरा साल पैह्लें आया था। तदूं हिमाचल मित्र पत्रिका छपा दी थी। तिसा च कुशल कुमार नै ही समीक्षा कीती थी, हिंदिया च। तिसा समीक्षा दी फोटो भी असां एह्थी दया दे हन। कुशल कटोच ते असां चार सुआल भी पुच्छे थे। तिन्हां संक्षेप च उत्तर दित्तेयो। सैह् भी पेश हन। सौगी तिन्हां दियां तिन कवतां दी सौगात भी है।  

  सुआल जवाब   

दयार:     तुसां दा पिछला कविता संग्रह 2007 च आया था। असां हिमाचल मित्र च तिसदी समीक्षा भी छापी थी। सैह् भी कुशल कुमार होरां ही लिखी थी। एह् संग्रह पंदह्रां सालां परंत आया है। इन्हां साला च जुसां क्या बदलाव महसूस कीता?

कुशल कटोच:     पंदह्रां सालां च जमाना बदल्या, लोक बदले, लिखणे पढ़ने कनै सुणने दा महोल भी बदलोई गिया।

दयार:     इन्हां  सालां च तुसां दिया कवता च क्या बदलाव आया?

कुशल कटोच:     उमरा कनै जमाने बदलने नै सोच बदली कनै कवता दा रूप भी बदलया।

दयार:     तुसां दे मुताबिक इन्हां सालां च समूची पहाड़ी कवता च क्या बदलाव आए?

कुशल कटोच:     पहाड़ी कवता दे स्तर च तां नखार आया पर लिखणे पढ़ने बाले घटी गै।

दयार:     कताबां दे छपणे कनै बिक्री दे बारे चे तुसां दे क्या अनुभव हन? कनै क्या सुझाव हन?

कुशल कटोच:     कताबां छपणे कनै बिकणे च बड़ा बदलाव आया। हुण ऑनलाइन भी कताबां छपा कनै बिका दियां। कताबां छापणे कनै बेचणे तांई साहित्यकारां कनै सरकारा जो मिली ने सोचणा चाहि्दा, तां जे पहाड़ी कनै पहाड़ी साहित्य  जो संजोई ने रक्खी सकिये।

पहाड़ां भी कितणा कि झलणा

‘पहाड़ बद्दळां दे’  कुशल कटोच जी दे हिमाचली पहाड़ी कवता संग्रह दा शीर्षक है। जेह्ड़ा पहाड़ी मन पहाड़ां पर बद्दळां दिक्खी नै खुश होई गांदा था - ‘सौण म्हीना आया आइयां बरखा बहारां।’ हुण तिस जो पहाड़ पर चढ़यां बद्दळां जो दिक्खी नै रोणा औआ दा। इस साल ता इन्हां बद्दळां अति ही करी तियो। हुण एह् माह्णुआं दिया अतिया दा बदला है या कुछ होर?

माह्णुएं भी ता दुनिया दा नक्शा ही बदली तिया। पहाड़ां भी कितणा कि झलणा। माह्णुऐं छड्डया ई किच्छ नीं। खड्डां-नदियाँ, नाळ, झुडे़-बूटे, दरख़्त सब निगळी जा दा। पहाड़ां दी ता छेक्की-छेक्की छाणनी ही बणाई तियो। जरा कि जोरे दियां बरखा नै एह् छाणनी सारयां पास्सैं चुड़ना-रुढ़ना लगी पौआ दी।

कुशल कटोच होरां भाल पहाड़ी मुहाबरयां, पखैनां, सणोणियां दा खजाना है। कवता दी भासा कनै गल्ल गलाणे दा हुनर है। जीणे दियां मुस्कलां, समस्यां कनैं रोजकणे रोणे-धोणे, खिंज-धरीड़ां दी पच्छैण है। इस संग्रह दियां कवताँ इक आम माह्णुए दी सोच कनै सरोकारां जो बड़ी छैळ लय कनै रोचक अन्दाज च बयान करा दियां।

खास करी सरकारी नौकरां दी अपणिया मिडल क्लास बरादरिया पर कविए दी पैनी नज़र है। रटैर होणे पर भी त्रै कवतां हन। तनखाह  ते अद्धी पेन्सन मिलणे दा दुःख, रुतबा कनै पुच्छ घटी जाणे दा दुःख, घर, दुनियादारी दियां ज़िम्मेदारियाँ गळें पई जाणे दा दुःख। उपरे दे अपणे मने दा कम्म करने दी अजादिया दा नीं  रैह् दा दुःख। कोई कम्म नीं होणे दा दुख।

कवि इक्की कवता च गला दा-

नुक्सां कडणे वाला कैंह् लिखदा लखारिया।

इक ता जे नुक्स नी होण ता लखारियां क्या लिखणा? हालांकि एह् लिखणा भी नुक़्स कढणा ही है। उपरे ते नुक्सां कड्ढी निंदा करने दे सुखे साही कोई सुख नीं है। अपणिया स्थितिया कनैं हाले तांई दुए च नुक़्स कढणा ही मने जो जीन्दा रखणे दा ज़रिया है। कवि कुशल कटोच भी अपणिया इसा नुक्सां नीं कढणे दिआ लकीरा कन्नैं ज्यादा दूर तक नीं चली सकेया। कविये जो ता कुदरत भी नुक्सा नैं भरोइयी लग् दी। काह्ली बह्री जांदा। काह्ली धुप्प अग बह्रना लगी पौंदी। नोइंया पीढ़ियां च ता नुक़्स ही नुक़्स हन। मा बुढ़यां कनैं सयाणयां दा कोई मुल्ल कनैं पुच्छ नी है। ब्याह निभा दे नीं, झट तलाक होआ दे। इसा दुनिया झट मुकी जाणा। इक आम माह्णुए दिआं इन्हां सारियां पीड़ां जो इस  संग्रह दिआं कवतां बखूबी बयान करा दिआं।

असल च असां जिस बग्ते च जिया दे होंदे तिसने असां दी इक लड़ाई भी चला दी होंदी। सैह् वर्तमान करड़ा लगदा। तिस पर गुस्सा भी औंदा कनैं शिकायतां, तकलीफां दी भी असां भाल इक लम्मी कनैं कदी नीं मुकणे वाळी लिस्ट होंदी। जेह्ड़ा बीती गिया सैह् सोना होई जांदा कनै ओणें वाले दिक्खी करी डर लगदा।

कुशल कुमार

माह्णू सदियां ते अपणयां संस्कारां, आदर्शां कनैं इसा सोचा नैं अपणे बगते नै घुळदा कनैं घटोई-घटोई जीन्दा औआ दा। इस जो औणे वाली हर नोंई पीढ़ी संस्कार हीन, लापरवाह, रिश्तेयां कनैं बुजुर्गों दी अणदेखी करने वाळी लगदी।

गोह्टू, पेड़ू, बिलंगा पर लटकोइयां  खिन्दां, किट्ठे टब्बर, चुल्हे दिया कूणा लकड़ुआं दा ढेर, भेंपह्ले दियां फूकां जेह्ड़ियां चीजां नी रहियां। रळियां, रीति रिवाज, त्योहार जेह्ड़े लोक भुलदे जा दे। इन्हां सबना जो कवि याद करा दा।

एह् असां दे पहाड़ी कवता कनैं समाजे दे मुख स्वर है। शायद एह् गल सारयां ही समाजां पर लागू है। इस संग्रह दी भी ऐही देही तासीर है। छोटियां-छोटियां कनैं पढ़ने च असान कवतां हन। शायद इन्हां जो पढ़ने ते ज्यादा सुणने च मजा आई सकदा। कवि कुशल कटोच जी जो बधाई कनैं शुभकामनां।

  बदलोंदे रिस्ते : हिमाचल मित्र च पंदरा साल पैह्ललें छपियो समीक्षा  

           

(जे इन्हां तस्वीरां जो पढ़ने च मुस्कल औऐ ता डाउनलोड करी नै बड्डा करी नै पढ़ी सकदे।)

कुशल कटोच दियां तिन कवतां 

 

  1   

पहाड़ बद्दळां दे

पहाड़ां दिक्खी रोणां आया

जाह्लू जाह्लू है बद्दल छाया

 

खड्ड नाले सब काबू कित्ते

रूढे़ तां सरकारां पैसे नीं दित्ते

  

किछ रुढे़ किछ गै दबोई

कइयाँ दी पछाण नी होई

 

अजदा माह्णू किछ नी दिक्खा दा

खड्डां बिका दियां समशान बिका दा

 

रुक्ख कटोआ दे खिसका दे प्हाड़

थोड़िया ही बरखा नैं औआ दी बाढ़

 

खड्ड नालुयां रोकी घरां बणां दे

घरां बड़ै पाणी फिरी घबरा दे

 

घरे पर घर जगह् नी बचा दी

तांई तां फिरी हन बद्दळ फटा दे

 

सारेयां जीवां तांई ‘कुशल’ था रचेया संसार

माहणू ही माहणूं दुसदे सैह् भी है लाचार

 

  2   

इन्सानियत

क्या माह्णुऐं दी भी सोचगा कदी माह्णू

क्या माह्णुऐ दा दुस्मण ही रैंह्गां माह्णू

 

इन्सानियत अज खत्म होआ दी

जमीर माह्णुऐ दी जिञा सौआ दी

 

घायल माह्णु सड़का पर तड़पदा रैह्ंदा

मदद दिया जगह माह्णु वीडियो बणादा

 

अज माह्णु मारना मामूली गल्ल ऐ

इह्याँ तां बड़ा मुश्किल म्हारा कल ऐ

 

बमार माह्णु लाज्जे जो तड़फा दा

मरीज अज घरे बाल्लेयां जो खुड़का दा

 

लीडरी चमकाणे तांई हद पार करा दे

इन्सानियत दा नेता ही व्योपार करा दे

 

अज कुसी जो कुसी दी नीं रहियो पीड़

जींदे माह्णुऐं जो ही अग्ग लगा दी भीड़

 

खस्म जणांसां दा हुण रिश्ता रिहा नी

जरा गल होई नीं कनैं तालक लिया नीं

 

लगदा बड़ी सताबी मुकी जाणा इसा दुनिया

बच्चेयां जो संस्कार देया जे बचाणी दुनिया

 

 3    

लखारिया

सोचें जरा तू कुस तियैं लिखदा लखारिया

लिखे दा कदी असर भी दिक्खया लखारिया

 

घरे वाले दुखी रैंह्दें, कैंह् लिखदा ही रैंह्दां

सब ख़ुश रैह्ण, देह्या कैंह्नी लिखदा लखारिया

 

तेरा लिखया नीं है कोई रदि्दया दा ढेर मितरा

जे लिखें तु खरा ता केह्नी बिकदा लखारिया

 

अप्पू जो बड़ा बड्डा लिखारी तू है समझदा

तांई ता कुथी भी नी तू टिकदा लखारिया

 

लिख देहा कुशल जेह्ड़ा सभनां दे मने दा होऐ

नुक्सां कढणे वाला ही कैंह लिखदा लखारिया

 

कुशल कटोच
बदलोंदे रिस्ते कनै पहाड़ बद्दळां दे (हिमाचली पहाड़ी कविता संग्रह)