इस फटेयो दुद्धे छोल्‍लण दे

 

गोपाल शर्मा होरां दा हाल च ही हिमाचली प्हाड़ी कविता संग्रह 'बज्जे ढोल' छपेया है। इस ते पैह्लें इन्हां दा इक हिंदी कविता संग्रह 'अनुभूतियों का आइना' छपेया है। इस पहाड़ी कविता संग्रह पर कुशल कुमार होरां दी समीक्षा पेश है। बानगी दे तौर पर गोपाल होरां दियां दो कवतां भी सौगी देया दे।     

गोपाल शर्मा दे कवता संग्रह दा शीर्षक है- बज्‍जे ढोल। मेळा लगया ढोल बज्‍जा दा। बण-बणते पह्लवाण माल्लियां घुळी जा दे। कोई जित्‍ता दा कोई हारा दा। माह्णुए दी जिंदगी इक मेला भी है, छिंज भी है कनैं पह्लवाण होन या नीं होन एह् छिंज सभनां जो घुळणा ही पौंदी। जित्‍त हार करमा दी गल है।  

कवतां गलाणा बी ता ढोल बज्‍जाणे साही ही है। कवि इस ढोले सुणा दा समझा दा पर लोग इस ढोले सुणी नैं बी नीं सुणा दे। एह् होर बी जादा तकलीफा आळी गल है। जेह्ड़े सुणा दे सैह् अपणियां ही तानां पर नच्चा दे। कवि इस ढोले दिया ताना पर जे गलाणा चाह् दा सैह् डफ-डफा च गुआची जा दा।

कविए दी इस बीत दे जा दे वग्‍ते पर पैनीं नजर है। जेह्ड़ा खरा बीती गिया तिस दी टीस बी है पर जेह्ड़ा बदलोणा चाही दा था कनैं नीं बदलोआ दा तिस दी पीड़ बी है। मरदां दे मूह्ंडे ने मूह्ंडा लाई नैं चलणे दे बावजूद जनांना जो मरदां बराबर मान-सम्‍मान ता दूरे दी गल है, तिन्‍हां दी कोई गिणती ही नीं है पर अज किया जनांना जो अपणे वजूद दा पूरा भान है। सैह् पुच्छा दियां -  

‘नां मैं ढुंढी ना मैं रोह्ळी/नां मैं अह्न्‍नी ना मैं बोळी/तू कैं समझै मिंजो भोळी/ कैं पूजां तिज्‍जो ठौकर जाणी/छड्ड माह्णुआ गल्‍ल पुराणी/ मैं नी भरना तेरा पाणी’ 

कवि कुदरता दिया सुंदरता दिक्‍खी पुच्‍छा दा एह् कुण चितरकार है। इन्‍हां तस्‍वीरां च कुत्‍थी रुक्‍खे पर चढ़ी नैं बेल रुक्‍खे जो दबका दी ता कुत्‍थी अपणे वग्‍ते पर राज करने आळा किह्ला अज ढही गिया तिस दी सारी शान-शोकत कनैं रौनक मिट्टिया च रुळा दी। एह् दिक्‍खी नैं लगदा के जीणे दा बी कोई मतलब नीं है फि‍ह्री बी माह्णू बेह्ला मेरे-तेरे दिया इसा अह्न्निया दौड़ा दौड़ी जा दा।

‘धारियां पाई कुण सजांदा/डबकडबेयॉं कुण बणांदा।/ बिल्लियाँ, कुत्‍ते, बाघ, सियार,/ कुण ऐ बुझ सैह् चितरकार’

इस संग्रह च माह्णुए दे दुख-सुख होणे-जीणे दी पीड़ गाणे सौगी-सौगी कवि इस रंग बरंगिया दुनिया दिया फितरतां, दोगलापण कनैं पखंडा पर बी मार करादा। हिमाचले दे मौसम, खान-पान, रीति रुआज, नशे एब कनैं शराब सब है ता नेतेआं दी गल नीं होए एह् ता होई नीं सकदा।

‘बोट्टां पेईयां जित्‍ते नेते/दूर होई गे मेते-तेते/ इक माणूं मैं हसदा दिखेया/ हस्‍सी-हस्‍सी डसदा दिखेया’ ‘अप्‍पू लाईं जा ना गप्‍फे/बाकियां जो तू फेरैं तप्‍फे/मिठ्ठा-मदरा अप्‍पू खाअ्नां/ होरां जो म्‍हाणी बरताअ्नां’

दुनिया कोई सिद्धी लकीर नीं है, बड़े टेडे-मेडे फेर हन। बड़ा मुश्‍कल है, माह्णू कुसा बत्‍ता चल्लै, सच्‍चे दा साथ दै या अपणी सिद्धी लाए। किछ समझा नीं औंदा। पता नीं हुण एह् जाणी बुझी नैं होया या भल्‍लेखे ने होई गिया पर एह् है बड़ा मजेदार। इकी कवता च कवि बोल्‍ला दा-

‘मिंजो तू सच बोल्‍ल्‍ण दे/दिलां दे दुखड़े फोल्‍लण दे/ इस फटेयो दुद्धे छोल्‍लण दे/मिंजो तू सच बौल्‍लण दे’

अगलिया कवता ‘देह् जाणा’ च सलाह देया दा भाई तैं क्‍या लैणा सच्‍चे ते तू चढ़दे जो पूजी अपणा कम कड अड़ना ठीक नीं है। ।

‘डुबदे जो भाई देह् तू जाणां/चड़दे सूरजे करा सलाम्‍मां/करी मजूरी भुक्खे मरदे/जी हजूरिया खाह् तू धाम्‍मां’

ऐत्‍थू ही बस नी होआ दी अगलिया कवता ‘गल्‍ल-दस्‍सा’ च कवि पुच्‍छा दा। लोको एह् तुसां कुस रस्‍तें चली पै – ‘मनुखता दा तुसां रस्‍ता छडी/एह् कुण दिह्या रस्‍ता फड़ी लिया/दिक्‍खा लोको इक गल्‍ल दस्‍सा/प्‍यार कुथु नह्स्‍सी गिया’

अगलिया कवता च कवि इस प्‍यारे तोपणा मितरां सौगी मेळे जो चली पोआ दा। - ‘मितरां सौगी मेळे हुंदे/बाजी मितरां मेल्‍ला सुन्‍ना/गल्‍ला जो मत ज्‍यादा गुह्न्‍ना/मत दिक्‍खा तुसां पैना-खुह्न्‍ना’  इस ते बाद इक नेक सलाह है। - ‘तू मेरा क्‍या खाणां मितरा/मैं तेरा क्‍या खाणां मितरा/मत पछतांदे बक्‍त गुआई/कवि देया दा नेक सलाह्ई’

एही जीणे दी सस्‍सोपंज कनैं दुवधा है। माह्णू भावना च आई नें गलत कनैं झूठ दे बरोध दा झंडा ता चकी लैंदा। पर जाह्लू दिख दा सब गलते दा साथ देआ दे ता सोचदा मैं कजो पंगा लई बुरा बणी नैं अपणा नकसान कराएं। मैं क्‍या सच्‍चे दा ठेका लिया? फिह्री सैह् बी भीड़ा च शामल होई जांदा।  

असां सारे इसा भीड़ा च शामल हन। कवि इसा भीड़ा नैं किछ कौड़ा गलाणा चाह्ंदा पर कोई पेश नीं चला दी। इस ताईं सुपनयां सुणा दा। कैंह् कि लोग गलाणे बगैर कुसी जो नीं छडदे। पैसे पचांह् दौड़दे-दौड़दे एह् दुनिया बी पाअ्जी होई गईयो। बड़ी सयाणी गल है दुनिया पैसे लुट्टा दी या फिह्री पैसयां ही एह् दुनिया लुट्टी खाह्दी।   

‘कौड़ा किछ गलाणा मैं भी/सुपना इक सुणाणा मैं भी’  ‘केई किछ भाइयो गलांदे न लोक/दूर बेह्ई हुज्‍जां लगांदे न लोक’

‘दुनिया पैसे पिच्‍छे दौड़ा दी। पैसे जो एह् लुट्टा करदी/ पैसें लुट्टी खाह्दी दुनिया/ ठग्‍ग बणीं गेई चोर बणीं गेई/ बणी गेई हुण पाअ्जी दुनिया’   

कवि दिक्‍खा दा जेह्ड़ा भोळा माह्णू ध्‍याड़ी-मजूरी करा दा सैह् सणे टब्बरे भुक्‍खा सोआ दा। दुअें पास्‍सें विकास दे नांए पर माह्णूएं कम्‍म कमाणा छडी तियो। कविएं कांगड़े जो कसबे ते शैह्र बण दे दिक्‍खया। ‘आया शैह्र’ कवता च शैह्रे होणे दा ढोल बी खूब बज्‍जया।

‘चुप-चपीते नी पिहोणा/मजदूरां भी हुण बोली देणा’

‘गलाअ्दे मेरे ग्रांये दा/हुण विकास होआ दा/इह्त्‍थू दा हर इक माह्णू/आम ते खास होआ दा’

‘मच्‍छरे ते न बच्‍चै खैर/पैरे ऊपर चड़ेया पैर/प्‍यार घटा दा बह्दे बैर/ताह्ल्‍लू समझा आया शैह्र’     

अपणे अनुभव, जेह्ड़ा सुझा दा कनैं होआ दा कविएं सुरे च गाया। ‘खुशियां बिच भी रोइयॉं हाक्‍खीं/पीड़ा बिच लब्‍बड़ मुस्‍काये/जिंदडि़ये मूइये मडि़ये तैं/सांझो कितणे पाठ पढ़ाये’

कुशल कुमार
कवि, व्यंग्यकार, संपादक 

आखर च कवि मन्ना दा कि न्‍हेरा सच है, पर राती दी भ्‍याग जरूर होंदी। एह् ढोल कवि गोपाल शर्मा जी अपणे इस संग्रह च बज्‍जा दे। इन्‍हां व्‍हाल लोक भासा दी मठास, जिंदगी दे पाठ, लय कनैं सुर हन। इस संग्रह ताईं इन्‍हां जो मतियां-मतियां बधाईयां कनैं शुभकामनां।

‘चौंह् बक्‍खैं ये न्‍हेरा छाह्या/एह् ता इक्‍क सच्‍चाई यै/हर रात्‍ती दा अंत सवेरा/नेईं देणा असां भुलाई यै’   

पुस्तक: बज्जे ढोल (हिमाचली पहाड़ी काव्य संग्रह)

लेखक एवं प्रकाशक

गोपाल शर्मा

गीता कुंज, संत विहार कॉलोनी, वार्ड नंबर 9, कांगड़ा, जिला कांगड़ा,

हिमाचल प्रदेश 176001

प्रकाशन वर्ष 2021

मूल्य रु 220/

गोपाल शर्मा होरां दियां दो कवतां    

 

बणी सरांअ

इक धियाड़े अफसर आई,

सरपैंचे जो लगा गलाणा।

इस ग्रांयें च सरांअ बणाणी,

दस सांजो कोई खुह्ल्‍ली थां।

 

गैरमरुसी, जुमला मालकां,

शामलात, पंचैता दी थां।

हजम कीतियो सारी इत्‍थू,

चलदेयां-पुरजेयां बड्डेयां टिड्डां।

 

सारेयां रळी सलाह बणाई,

दिक्‍खो मूरख हुण कोई भाई।

तिसजो तुसां फलेरी ने,

लेया जगह दा दार कराई।

 

फंगो तिन्‍हां दे डिक्‍के आया,

जगह दा तिसते दान कराया।

भ्रष्‍टाचारियां रळी-मिळी ने,

सरांई दा फिरी कम लगाया।

 

गिठ भर डूह्गी नीहं दिक्‍खी ने,

ओवरसीर भी लगा गलाणा।

चुप करी ने अध देई देया,

जे मस्‍ट्रोल यै पास कराणा।

 

अम्‍ब-टाहली यै मैहंगी लकड़ी,

इसजो लाइ ने किछ नी बचणा।

ओआड़ा कुथीयों कैंबळ-सिंबळ,

जे बोतला कन्‍ने कुकड़ खाणा।

 

लेतरे कन्‍ने हुयै चणाई,

सिरमिट लिया सारा बचाई।

करी तिना ने चोखी कमाई

दित्‍ती ग्रांये च सराअं बणाई।

 

मंत्री लग्‍गा उद्घाटन करना,

चमचे बज्‍जणा लग्‍गे ताड़ियां।

ताड़ियां दीया धमकरा कन्‍ने,

डिग्‍गी गेई मितरो नोईं सराअं।

 

एह् दिक्‍खी ने मंत्रीये जो गुस्‍सा आई गेया,

किहल्‍ला ही प्रधान सारे पैसे खाई गेया।

इन्‍कोआरिया ते बचणे ताई,

मेरे घर पुजाओ एह् रोड़े-ईंटां।

 

साढ़े ग्रायें च बणी सराअं।

 

 

आया शैह्र

तंग भीड़ियाँ गह्ळियां इह्त्‍थू,

उच्‍चे-उच्‍चे पेह्यो मकान;

कोई दोमंजला कोई चौमंजला,

अंबरे ने कोई टकरां लाह्न।

दिन-धियाड़े बिजली जग्‍गै,

बाह्जी होआ घुट्टण लग्‍गै;

मच्छरे ते न बच्चै खैर,

ताह्ल्‍लू समझा आया शैह्र।

 

मनयारी तां बजाजिया कन्‍ने,

छैल न सजयो इह्त्‍थु बजार;

पंसारी करयाना कराकरी,

गैहेण्‍यां घड़ी दियै सनियार।

हलबाइयां नाइयां कन्‍ने कसाइयां,

अपणियां हटियां छैळ सजाइयां;

गाहके दे नी लह्ग्‍गन पैर,

ताह्ल्‍लू समझा आया शैह्र।

 

टैक्‍सी टाँगे टैम्‍पू दौड़न,

रिक्‍शे वाळे हैंडल मोड़न;

पां-पां पूं-पूं अणमुक रौळा,

सड़क न टप्‍पी सक्‍कै भोळा।

सैक्‍लाँ सकूटरॉं गिणै न कोई,

रश दिखी ने मत्‍त मरोई;

पैरे उपर चड़ेया पैर,

ताह्ल्‍लू समझा आया शैह्र।

 

जूए दे भी अड्डे इह्त्‍थू,

खेह्ल्‍लन बड्डे इह्त्‍थू;

होटल कन्‍ने ढाबे इह्त्‍थू,

जेब कतरे बेस्‍हाबे इह्त्‍थू।

बाह्ज्‍जी पैसेयां नेइ गुजारा,

मुल्‍ले इह्त्‍थू पाणी बिकदा;

मह्चेया इतड़ा भारी कैह्र,

ताह्ल्‍लू समझा आया शैह्र।

 

रेह्ड़ियां-फह्ड़ियां पाह्या खलार,

गन्‍दगिया दी भी भरमार;

चाट-समोसेयां दिक्‍खी दिक्‍खी,

मुहें चा टपकादी लार।

कुथी ललारिये दे हन रंग;

सब किछ दुह्स्‍सै करदेयां सैर

ताह्ल्‍लू समझा आया शैह्र।

 

क्‍लब्‍ब सभां-ससैटियां केई,

अणमुक बिलडिंगां गेइयां ढेइ;

बैंक डाखाना हसपताळ

डाक्‍टरां दा यै रैह्न्‍दा (अ)काल।

स्‍कूलां-कालजां हुयै पढ़ाई

कदी हड़ताळ कदी लड़ाई;

प्‍यार घटा दा बह्दै बैर,

ताह्ल्‍लू समझा आया शैह्र।