नवनीत शर्मा दियां चार कवतां

।। लाह् त्‍रोटा ।। 

इक गल बोलैं ?  

सुणदा जायां 

जे रोणे दा गौं करदा ता

रोई लेया कर 

जाण्‍दा मैं हन अत्‍थरू महंगे 

पर एह अत्‍थरू जे रुकगे तां 

मारू बणगे 

खारी दिंदा खारा पाणी

लग्‍ग ई है इसदी भी क्‍हाणी 

रोणा कोई ऐब है? हई नी

अळख जे लग्‍गै, चुप नी रैह्णा

जे भी होए, बेसक सैह्णा 

रोणे ने क्‍या क्‍या नहीं हुंदा 

अंदर जे हन दुखां दे त्रंभड़ 

मितरा तिन्‍हां जो घाळ दयोंदी 

दिले दी काळख मिह्सणा लगदी 

चेहरे पर फिरी नूर भी ओंदा 

अपणिया हिक्‍का मूंढा रखी 

अप्‍पू पर कोई रैह्म नी करना 

जे कोई अपणा मूंढा नी है 

जे कोई पखला मूंढा नी है 

अप्‍पू रोणा, अप्‍पू ही रोणा

रींगां, रोण रडत्‍त जे पाणा

बस अप्‍पू साह्मणे पाणा 

अप्‍पू जो ही दुख सनाणे 

अप्‍पू जो ही ताह्ने लाणे 

अप्‍पू जो ही बकणा बुकणा

अप्‍पू ते बिलकुल नी लुकणा

सीह्सा दिखणा दूआ कम है

अप्‍पू  साह्मणे नंगे होणा

पहला कम है 

तेरे अत्‍थरू तिज्‍जो ताईं 

ता अत्‍थरू हन 

लोकां ताईं मेळे हुंदे 

लोकां ताईं खुसियां हन सैह 

रोंदा दिखणा कोई माह्णू 

लोकां दीयां सोचां दे जे भांडे हन

मते पराणे बाह्यी...तिन्‍हां पर 

तेरे अत्‍थरू कली चढ़ांदे 

खुसियां लोक मनांदे 

रोणा है ता रोई सट्टैं 

रोणा ता पूजा साह्यी है 

हाक्‍खीं धोणा ही रोणा है 

अपणियां हाक्‍खी अप्‍पू ही धोएं

चल रोई दे 

हण ता रोएं। 

 

।। इन्‍नी मोह्णे फांसिया चढ़ना ।।

कन्‍नां बिच

गडियां दा रोळा

फर-फर करदा

इक दफ्तर

 

एह ता ईहयां नी होणा था

इसजो ईह्यां करना था

 

तिस ने गल नी होई अज भी

जिसजो जे किछ दसणा था

बची गेया अड्डे मेरे ते

सैह, जिसियो जे घसणा था

इक नंबरे पर गल करी की

इक दो घड़ियां हसणा था

 

मिस कालां दे नंबर

गूढ़िया लालिया आळे

गल्‍ल हटी करी होई सकी नी

 

खूब मसेंजरें टूं टूं कित्‍ती

लोकां ट ट टाइप चलाई

 

उह्यां ता वाट्सएप भी हुंदा

गुड मार्निंग करी करी थकदा

 

सब रेहई गै

चुप चपीते

बस अप्‍पू ने गल्‍ल नी होई

अप्‍पू पर कोई मल्‍ल नी होई

 

सूरज भी क्‍या हथ बंडाणा

चंद्रमे जो मंड नी पेहियो

स्‍हारा लाए आई सैह भी

 

राती बैठी गिणना लग्‍गा

कुरसां जाह्लू चिणना लग्‍गा

सज्‍जे हत्‍थें मुंडे फेरी

अपणे क्‍याड़े मिणना लग्‍गा

कोई आई खड़ोता, बोल्‍लै

एह अपणा क्‍या हाल बणाह्या

सारिया ध्‍याड़िया अंबर गाह्या

 

इतणियां गलतियां इक्‍की दिने च

रात जे सुकणा लग्‍गी सारी

गल एह मुकणा लग्‍गी सारी

 

तेरी गलती ता तेरी है

उसदी गलती भी तेरी है

इसदी गलती भी तेरी है

 

इतणा भी क्‍या

फसणा अड़ना

इन्‍नी मोहणे

फांसिया चढ़ना

 

।। चगानैं पुज्‍जी करी ।। 

हक्‍कां पाइयां जोरैं जोरैं

जीह्ंया मारै डूड कोई

पर नी जुम्‍सया कुंजू

 

कुंजू नी मिलदा हण एत्‍थू

एत्‍थू ता बस गडियां ही हन

छोटियां हन किछ

बडियां भी हन

 

पर बटणां दा कोई थौह नी

चंचलो भी नी सुझदी एत्‍थू

 

रावी सर सर चलदी रैह्ंदी

 

चाही दा कप पी करी सोचां

लोकगीत दे लोकां जो मैं

एह कुस टैमें तोपा दा

एह क्‍या टुंब है पइयो मिंजो

एह मैं कुस पर कोपा दा

 

लकवा माह्णुआं जो ही हुंदा

जे भी बोल्‍लै, गलत गलांदा

चीजां जो भी हुंदा लकवा

सोचां जो भी होई जांदा

 

एह चौगान बचारा ऐसा

इसदा लकवा कोई नी दिक्‍खे

बस कुंजुए जो राड़ां मारी

चौगाने दी बेदण लिक्‍खे

 

घाए दिक्‍खी साफ बझोंदा

हण कुंजुए दे बाल रुड़ी गै

चौगाने दे गेट खुड़ी गै

रावी बोले

गल सुन मेरी

तू कुसजो है तोपा दा

घरेयो जाह् तू घरेयो जाह्

कैह्जो जानी लाणा फाह्

घरेयो जाह्, सुण

घरेयो जाह्

 

।। ईह्यां भी पत्‍योई सकदे ।।

बाह्जी बाह्यीं बाह्यी दिख्‍यां

बी किछ

खरियां सोचां दे

हत्‍थां बाह्जी बीणी दिख्‍यां

पज्‍जे दे

चिट्टे फुल्‍लां

बाह्जी हाक्‍खीं दिक्‍खी दस्‍यां

अंबां पर

पैह्यो कूरे

बाह्जी पैरां लौह्यी दस्‍यां

नौणे दे

लम्‍मड़े टप्‍पे

बाह्जी ऐसा शब्‍द है मितरा

जीह्यां होए भोका

महंगे पट्टुए च

जीह्यां होए नसाण

हळदिया रळयो

घ्‍यूए दा

चिट्टिया थाळिया पर

भोएं तुसां गला$ चंद्रमे जो दिक्‍खी की

छैळ बड़ा था मूआ…

लग्‍गै नजर नी कुसी दी इसजो

इस करी इसदिया माऊ

कजळे दा है टिक्‍का लाह्या

जे भी गला पर बाह्ज ता है ही

बाह्जी पर ही दुनिया चलियो

सारे ही ता

कुसकी कुसकी बाह्जी हन

माह्णू इक्‍की दूए बाह्जी

पैर पताणे जुटकुआं बाह्जी

नंगसरीरे कुर्तुआं बाह्जी

पेट कई सैह् रोटिया बाह्जी

भाषा आली शब्‍द मते हन

पर मुंह ऐसे भी हन कितणे

भाषा हई नी, शब्‍द भी हई नी

बाह्ज बोलिया

बाह्ज बेदणी

बाह्जी भाउआं

बाह्जी बैह्णी

 

जे कदी ईसर मिल्‍लै मिंजो

बस इतणा ही पुछणा है

एह संसार ता तुसां चलाह्या

या है एह भी बाह्जी ईसर

पता नी लगदा ता पुच्‍छा दा

बुरा नी मणना

 

उहिंयां मिंजो पता है एह गल

जेहड़ा भी जिस बाह्जी रैह्ंदा

सैह् तिस सौग्‍गी ही हुंदा

धरती अंबर दूर मते पर

धरती अंबरे बाह्ज नी हुंदी

 

ईह्यां भी पत्‍योई सकदे

कुसकी बाह्जी होई सकदे

 

जामणी कने पढ़ाई-लखाई : 22 जुलाई, 1973 जो पालमपुरे दे नेड़ले कस्‍बे मारंडे (टीका भणघियार) च जम्‍मे। पिता मनोहर शर्मा सागर पालमपुरी होरां बड्डे शायर थे ते कने कई भाषां जाणदे थे। नवनीत होरां दसवीं तिकर सरकारी स्‍कूल दैहण च पढ़े। फिरी बीए सनातन धर्म कालज राजपुरे ते कित्‍ती। 1996 च हिमाचल प्रदेश यूनिवर्सिटी शिमलैं ते एमबीए करी की नौकरी ता झट मिली गेई पर पत्रकारिता करने ताईं 1998 च दिव्‍य हिमाचल च आई गै। 2005 च जागरण च आई गै। अजकल संपादक दैनिक जागरण हिमाचल प्रदेश हन। 'खबर के पार' कालम लिखदे  रेह। कताबां: 2016 च बोधि प्रकाशन जयपुर ते कवतां दी कताब छपी, 'ढूंढना मुझे'। 2022 च गजलां दी कताब भारतीय ज्ञानपीठ ते आई, 'झील में सोने का सिक्‍का'। 2023 च कवतां दी कताब बिम्‍ब प्रतिबिम्‍ब प्रकाशन ते आई, 'बुखार में तपता आदमी'। 2023 च 'ईह्यां भी पत्‍योई सकदे' शीर्षक ने पहाड़ी कवतां दिया कताबा दी मेद है। पत्रकारिता पर दो कताबां कनें इक व्‍यंग्‍य संग्रह भी लैणी च हन।

(मूह्रली तस्वीर: वी. एस. गाएतोंडे दा तैलचित्र इंटरनेट ते साभार)