कामरेड मियां शमशेर सिंह पर कताबा पर इक नजर पाई है कुशल कुमार होरां
‘हिऊंआ रीया धारा ते’ कताबा च कामरेड
मियां शमशेर सिंह जी दियां तीह दे लगभग कवतां, जीवन परिचय, इन्हां दे कम कनै सामाजिक सोच, इन्हां दे बारे च मितरां कनै स्नेहीयां दे लेख
संस्मरण हन। एह कताब पढ़ने ते बाद एह एहसास होंदा कि सैह अपणे वग्ते ते किछ पैर
गांह थे। समाजे दिया पीड़ा जो घटाणें ताईं जेड़ी मेहनत तिन्हां किती तिसा जो कदी
नी भुलाया जाई सकदा।
मियां शमशेर सिंह जी दा जन्म 1930 च बिलासपुरे दे इक जमींदार परुआरे च होया।
छोटीया ही उमरा च इन्हां दे पिता होरां दा सुअर्गवास होई गिया कनै परुआरे दी सारी
जिम्मेदारी इन्हां पर पई गयी। इन्हां दसमीं बड़या खरयां नंबरां ने पास कीता कनै
सरकारी नौकरी भी लगी गई। पर शमशेर सिंह जी जमींदार करसाण थे कनै दलित, गरीब मुजारयां – मजूरां दा दुख भी
इन्हां ते दिखी नीं होंदा था। तिस वग्त गरीब मुजारयां – मजूरां
दा जीणा बंधुआ मजूरां ते भी बदतर था। दुअें पासें
करसाणे दे दुख भी घट नीं थे। मेहनता दा फळ मिलणा की नीं मिलणा पक्का नीं था।
मोसमे दी मार, बमारी समारी, ब्याह-कारज, फिरी साहुकारां दे ब्याजां दे
फेर। ऐह देह्या मोह्ल कनै सुच्चा मन-सोच। तिन्हां जो अपणयां लोकां ने सुच्चा प्यार
होई गिया कनै बाकी जेड़ी कसर थी। सैह सुच्चे वचार कनै नोंईंया चेतना वाळयां कम्युनिस्ट
साथीयां गुआई ती। पार्टीया दे चक्करे च नौकरी चली गई पर प्यार बधदा गिया। फिरी
सारी उमर लोकां दी पीड़ कनै एह प्यार तिन्हां जो नचादां रिह्या, गीतां गांदा रिह्या।
मैं सदा गांदा रहया, गांदा रहयांगा
इक नवें माणुयेरे गीत
सै जे जुल्मां जो बिच
रणे ललकारदा
सारी दुनियारयॉं
लुटेरेयां जो सामणे फटकार दा
हुई गया जे सामणा तॉं हिटलरां
जो मारदा
ये भलामानुष मनुख दीन दुखियां
रा गीत
मैं सदा गांदा……………
सारयां ते बडी गल्ल ता ऐह थी कि करसाण बणी जिमींदारी करने दे बजाए सैह बडे
अफसर हाकम, प्रोफेसर, पत्रकार
लखारी कवि किछ भी बणी सकदे थे। 1948 च नौकरी जाणे दे बाद इन्हां अपणी जीविका जो कदी
कोई तवज्जो-ध्यान दिता ही नीं। जेला ते बचणे ताईं नह्ठी ने अंबालें लुक्की नें कम्युनिस्ट-मार्क्सवादी साहित पढ़या कनै मितर
बणाए। फिह्री मार्क्सवाद-लेनिन दे साम्यवादी वचार कनै कताबां लेई बिलासपुरी आई
गे। ऐत्थु इन्हां वचारां नें हिमाचले दे प्हाड़ां खुणना लगी पैए्। आई नें
मितरां जो कठेरी बिलासपुर कम्युनिस्ट पार्टीया दी शाखा खोली ती। पाटींया दी
प्रदेश इकाई भी बाद च शिमलें खुड़ी थी।
इसते बाद बडयां जमींदारा दे खलाफ आंदोलन, पंजाब देयां प्हाड़ी लाकयां हिमाचल च मैळणने दी लड़ाई, करसाणा कनै जनता दे बिच सहाकारा दी भावनां कनै सहकारी संस्थां बणाई नें
लोकां जो जोड़ने-कठेरने ताईं कामरेड शमशेर सिंह जी पार्टीया दा झंडा चकी गरीबां,
मुजारयां, दलतां दी लड़ाईया च सार्यां ते
मूह्रे ही चलदे रेह्। मियां जी सच्चे कामरेड होणे कनै सच्चे करसाण भी थे। जिमीं
करसाणे दी मा होंदी इक्की पासें लड़ाई लड़ी नें पूरे प्रदेसे देयां सारयां गरीब
मुजारयां जो जमीनां दुआई ने करसाण बणाई ता कनै मुजारंया ते अपणी जमीन भी छडाई लेई।
ऐह वरोधाभास जिंदगीया दी मजबूरियां भी होंदे। तिन्हां भाल सैह पुरखयां दी अमानत
इक जमीन ही ता थी टब्बरे पाळने दा जरीया।
कॉमरेड जी पार्टीया दे सच्चे सपाही होणे दे बावजूद वामपंथीयां दे अतिवादी
वचारां कनै नक्सलवाद ने सहमत नीं थे। तिन्हां दा ज्यादा जोर सहकार कनै कट्ठे होई
मिली-जुली समस्यां दूर करने पर था। इन्हां दा पक्का कनै निघा निश्चा था कि
सरमायादारीया दा मकाबला सहकार ने ही होई सकदा। जाह्लू भाखड़ा दा कम्म पूरा होई
गिया। गोविंद सागार झील च पराणा बिलासपुर डुब्बी गिया कनै सरकारें मच्छीयां
पकड़ने दा ठेका इक सरमायादार ठेकेदारे जो इक लखा सालाना पर देई ता। इन्हां मच्छीयां
मारने वाळयां दरयाईयां जो कट्ठेरी नें तिन्हां दियां सहकारी संस्थां बणाई सैह
ठेका इन्हां जो दुआई ता। इन्हां मतियां सहकारी संस्था गठित कितीयां पर स्वारथां
दियां आरियां ते गांह सहकारीयां नीं टिकी सकीयां। जेह्ड़ा सहकारी आंदोलन नें सारे
देसे च होया वग्ते कनै अज सारा सहकार खर्च होई गिया।
जे मिल-जुल कर हिम्मत करिए,
तां मेहनतां रा बोलबाला हुई सकदा।
मिली जुली जुल्मां रा मुंह काल़ा हुई सकदा
जे सारे इक बार हल्ला बोली देंगे,
तां बड़ी गल नी सरमाये रे,
राकसां जो भगाई सकदे।
पर इक्की गल्ला दी तसअ्ल्ली है। ग्रां-ग्रां च भटकणे कन्ने काफी मश्क्कत
करने ते बाद इन्हां जो 13 साथी कनै 130 रपईयां दी पूंजी मिली थी। तिसा पूंजीया ने
शमशेर सिंह जी ने 1955 च दधोल ग्राम सेवा सहकारी सभा बणाई ती। जेड़ी अज करोंड़ां च
है कनै देसे दियां किछ बडीयां सहकारी संस्थां दी मूहरली है। मियां शमशेर सिंह जी
हिमाचल दी जुवा पीढ़ीया ताई अज भी प्रेरणा स्रोत हन।
इन्हां कहलूरी(प्हाड़ी) बोली च सैंकड़ें दे साह्बें रचना लीखियां कनै अनुवाद
किता पर सांभ नी होई सकी। इन्हां दे मते सारे गीत आकशवाणी गायकां गाये कनै लोक अज
भी लोकगीतां साही गांदे। कॉमरेड शमशेर सिंह जी दिया कवतां-गीत, लेख कनै गोर्की दे मा नाबल दा प्हाड़ी अनुवाद प्हाड़ी भासा साहित्य
जो तिन्हा दा कदी नीं भुलणे वाळा जोगदान है।
कॉमरेड मियां शमशेर सिंह पटियाल जी स्मृति जो नमन कनै दयार
दी विनम्र श्रद्धंजली। पेश है तिन्हां दियां तिन कवतां।
हिऊँआ रीया धारा ते
हिऊँआ रीया धारा ते लैणियॉं गवाईया ओ,
किने-किने खादीरियॉं लोकां री कमाइयां
पत्थरां ने घुलदयां रे हड्ड बी ओ टुटी गए
फेरी भी ओ कामेयां तिजो खाणोरी मनाईयां
ऐड़ी चोटी र जोर लाई फसलां कमाइयां
खाणोरियां बेला मुया भुखां सिर आईयां
हिऊँआ रीया धारा ते………….
छाई रे सन्देसे दुधा री त गल क्या?
टुटूरे खन्दोलू लेफांरी ता गल क्या?
खड़दियां छुड़दियां टपरीयां तेरी कामयां
तिनाते भी तिज्जो वेदखलियां आइयां
हिऊँआ रीया धारा ते………….
रोडुए रा साब कित्ता, चवानियां रा ब्याज दित्ता
फेरी बी इना शाहांरियां कुरकियां आईयां
शरमा जो छड्डी करी धरमा जो छड्डी करी
इने जालमें लोकारियां कुडि़यां बकाइयां
हिऊँआ रीया धारा ते………….
खेतरा च खड़ी ने जगीरदार बोलदा
देखयां मेरे खेतरा च तू हल्ल जोड़दा
नंगियां तलवारां लेई ने खेतरा च फि रदा
मुंडखरा खेतरां च मुंडियां रलौइयां
हिऊँआ रीया धारा ते लैणियॉं गवाईया ओ,
किने-किने खादीरियॉं लोकां री कमाइयां
मुश्कल लफ्ज 1) हिऊँआ – बर्फ से ढकी हुई। 2) मुंडखरा – एक गांव।
पहाड़ां रेया शेरा
पहाड़ां रेया शेरा, दुख झल़ैया भतेरा।
सोची समझी चलणा द्वार एकता रा मल़णा।
तेरी कमाई खादी राजेयां ते राणेयां।
जैलुआं, जगीरूआं खसम खाणेयां।
उठी जा, जागी जा, फेरी नी
पछताणेया।
पहाड़ां रेया शेरा दुख झल़ैया-भतेरा… … …।
दिन रात करदा फेरी भुखा मरदा,
चुड़दियां टपरियां बुरा हाल चरदा।
गल्ल सुणा भोल्या जन्मा रे हालिया
अगले दी सोईल्यां पिछला तै गालया।
पहाड़ां रेया शेरा दुख झल़ैया-भतेरा… … …।
रुखी सुकी खाई कने ठंडा पाणी पींदा रहया।
जिस्मां जो तोड़ी-तोड़ी जख्मां जो सींदा रहया।
बदहालियां, गरीबीयांरी कहानी नी मुकी तेरी।
नया भ्याग देखणे दी आशा च जींदा रहया।
पहाड़ां रेया शेरा दुख झल़ैया-भतेरा… … …।
बहंदा नदियां रा पाणी तिज्जो बोली रहया।
कदी नीं तू बिछड़यां, सदा कोली-कोली रहंया।
तेरे दयार, कीलों, रई तोस सदा बोली रहे
तेरे स्वागता च पखुआ झोली रहे।
इक मुठ हुई ने लड़ंया लड़ाईयां
फांदी लैणियां तुझ समाणा री उचाईयां
पहाड़ां रेया शेरा दुख झल़ैया भतेरा
हुण सोची समझी चलणा
शोषणा रा राज कतई नी झलणा
द्वार एकता रा मलणा
पहाड़ां रेया शेरा दुख झल़ैया-भतेरा… … …।
साल सोहल़ुआं चढ़या मांखा देख
साल सोहल़ुआं चढ़या मांखा देख
मांखा देख अड़या मांखा देख
नैणा मेरे हुण गल़ां करदे, उड़ी-उड़ी पैंदे केश
साल सोहल़ुआं चढ़या मांखा देख मांखा देख
साल सोहल़ुआं चढ़या मांखा देख।
मुखड़ा मेरा हुण लोए करदा, करदा चन्दा जो मात।
राती जो निन्द नी आऊंदी छोड़े, लम्बी लगदी रात।
दिल धड़कदा तड़पदा मेरा, हिलदा छातिया समेत।
साल सोहल़ुआं चढ़या मांखा देख मांखा देख।
साल सोहल़ुआं चढ़या मांखा देख।
पैर मेरे हुण धरती नी पऊंदे, उड़ने जो करदा दिल।
फुलां साई हल्की हई हऊं, उड़ने जो करदा दिल।
बदना मेरे चार चफेरे पाए पके पल़ेस
साल सोहल़ुआं चढ़या मांखा देख मांखा देख।
साल सोहल़ुआं चढ़या मांखा देख।
अम्बरा जाई नच्चू गाऊं, एड़ा जे करदा दिल।
बदलां री फुहारां च नहाऊं, एड़ा जे करदा दिल।
हत्थ देखयां मेरे हाणियां, उघड़ी ब्याहरी रेख,
साल सोहल़ुआं चढ़या मांखा देख मांखा देख।
साल सोहल़ुआं चढ़या मांखा देख।
 |
| कुशल कुमार |
No comments:
Post a Comment